د روښنایي غورځنګ غړو حکومت ته پنځلس ورځې وخت ورکړ چې یو وار بیا د دوی غوښتنې ومني.
یاد غورځنګ یو وار بیا د بامیان او میدان وردګو له لارې له ترکمنستان نه د پنځه سوه کېلو ولټه برېښنا مزو پر غځولو ټينګار وکړ.
د دغه غورځنګ غړي محمد عارف رحماني د چهارشنبې په ورځ په کابل کې یوې غونډې ته وویل چې د دهمزنګ پېښې تر څلویښتمې پورې د حکومت ځواب ته په تمه دي.
هغه زیاته کړه:
"که د ملي وحدت حکومت د روښنایي میدان د شهیدانو تر څلوېښتمې، دغه برحقه غوښتنه ونهمني، روښنایۍ غورځنګ به تر پخوا لا په جدیت سره خپلو مدني فعالیتونو ته دوام ورکړي."
د روښنایۍ غورځنګ له حکومته غواړي چې د سالنګ له لارې د ترکمنستان د پنځه سوه کېلو ولټه مزو د تېرولو پر پرېکړې له سره کتنه وکړي او دا مزي د بامیانو له لارې تېر کړي.
په ورته وخت کې د افغان حکومت اجرائیه ریاست مرستیال ویاند امید میثم وایي، حکومت د مرکزي ولایتونو لپاره د برېښنا د برابرولو هوډ لري او د حکومت پرېکړه به په خپل حال پاتې شي.
هغه زیاته کړه:
"د مرکزي سیمو اصلي غوښتنه برېښنا وه، حکومت پرېکړه وکړه چې د دوی له غوښتنو سره سم به ورته کافي برېښنا په نظر کې ونیول شي، دا کار شوی دی او دا د حکومت وروستۍ پرېکړه ده."
د اسد په دوهمه نېټه د کابل ښار په دهمزنګ څلور لارې کې د روښنایۍ غورځنګ غړو پر مظاهرې انتحاري حمله وشوه چې د عامې روغتیا وزارت د معلوماتو پر اساس پهکې ۶۶ تنه ووژل شول او سلګونه نور ټپیان شول.
د دغې پېښې مسؤلیت داعش ډلې په غاړه واخیست.
اوس د روښنایۍ غورځنګ غړي حکومت د دغې پېښې مسؤل بولي او وایي چې باید یو بېطرفه کمېسیون دا پېښه وڅېړي.
افغان حکومت بیا د پېښې څېړنې ته د لوی څارنوال په مشرۍ د حقیقت موندنې کمېسیون وټاکه او وایي، هر هغه څوک چې په دغې پېښه کې بېپروایي کړې وي، مجازات به شي.
د روښنایۍ غورځنګ غړي وایي، د دوی د غوښتنو د نهمنل کېدو په صورت کې به د دوی د راتلونکو اقداماتو جزئیات تر ټاکلې نېټې وروسته اعلان شي.
اوس به وکتل شي چې د دغه غورځنګ راتلونکي اقدامات به څه وي.
راپور: محمد قسیم سولهمل
