د امريکا ولسمشر بارک اوباما تاييد کړه چې د طالبانو مشر ملا اختر محمد منصور وژل شوى دى.
ده د منصور وژنه په افغانستان کې د سولې د راوستلو لپاره يو مهم ګام وباله.
بارک اوباما نن دوشنبې په يوه اعلاميه کې ويلي: موږ د طالبانو د ډلې دغه مشر چې په القاعده پورې د تړلو ډلو غوندې يې پر امريکايانو او ائتلافي قواوو حملې پلانولې او د افغانانو پرضد يې جګړه پرمخ بېوله، له منځه يووړ.
افغان چارواکي وايي ملا اختر محمد منصور د پاکستان په بلوچستان ايالت کې د بې پېلوټه الوتکې په حمله کې وژل شوى دى.
د پاکستان د بهرنيو چارو وزارت پر دې حملې انتقاد کړى او د پاکستان د حاکميت له حق څخه يې سرغړونه بللې ده.
دغه وزارت وايي امريکا تر دې حملې مخکې له اسلام اباد سره معلومات نه وو شريک کړي.
وروسته له هغې چې د طالبانو د پخواني مشر ملا عمر د مرګ خبر خپور شو، ملا منصور د ٢٠١٥میلادي کال په جولاى مياشت کې د دې ډلې د مشر په توګه وټاکل شو.
