د ملي وحدت حکومت په کابل کې د روسیې د سفیر د وروستیو څرګندونو په غبرګون کې وايي چې وسلهوال طالبان سیاسي نه، بلکې یوه ترورېستي ډله ده.
د اجرائيه ریاست ویاند مجیبالرحمن رحیمي د پنجشنبې په ورځ کابل کې یوې خبري ناستې ته وویل، هېڅ حکومت باید وسلهوال طالبان د سیاسي ډلې په توګه ونهمني.
ښاغلي رحیمي زیاته کړه:
"طالبان رسماً یوه ترورېستي ډله ده، نه سیاسي. هېڅ یو حکومت باید دغه ډول څرګندونې ونهکړي او که هر دولت داسې څرګندونې وکړي زموږ په نظر محکوم دی."
هغه وايي، طالبان کولای شي خپلې وسلې په ځمکه کېږدي او د افغانستان د اساسي قانون په منلو سره په یوه سیاسي ډله بدله شي چې په وینا يې اوسمهال د نظام پر ضد د جنګېدو له امله ترورېستي ډله بلل کېږي.
دا په داسې حال کې ده چې کابل کې د روسیې سفیر الکساندر مانتېتسکي د چهار شنبې په ورځ وسلهوال طالبان یوه سیاسي ډله یاده کړه او ويېویل چې افغانستان کې د روانو ستونزو د ختمولو لپاره باید له دې ډلې سره خبرې وشي.
هغه ویلي چې مسکو د افغانستان له قانوني دولت او د افغانانو په مشرۍ د سولې د راتګ ملاتړ کوي خو په خبرهيې طالبان باید له القاعده بېله او د هېواد اساسي قانون ومني.
دا لومړی وار نهدی چې د روسي چارواکو لهخوا ورته څرګندونې کېږي، له دې وړاندې روسي چارواکو منلې چې له وسلهوالو طالبانو سره په اړیکه کې دي خو له دې ډلې سرهيې پوځي مرسته رد کړې ده.
خو یو شمېر افغان چارواکو او د ولسي جرګې غړو ویلي چې له وسلهوالو طالبانو سره د روسیې د پوځي مرستې په اړه اسناد او شواهد لري.
د وروستیو راپورونو پر بنسټ د روسیې یوه پلاوي په شمالي وزیرستان کې د طالبانو له مرکزونو نه هم لیدنه کړې ده.
وسلهوالو طالبانو ته په کابل کې د روسیې د سفیر لهخوا د یوې سیاسي ډلې د خطاب کولو په اړه د ولسي جرګې اداري پلاوي هم غبرګون ښودلی دی.
د دغې جرګې دوهم مرستیال محمد نذیر احمدزي د پنجشنبې په ورځ ازادي راډیو ته وویل، هېڅ دولت حق نهلري چې د افغانستان په چارو کې لاسوهنه وکړي.
ښاغلي احمدزي څو ورځې وړاندې د داسې اسنادو او شواهدو د درلودو خبره هم کړې وه چې له طالبانو سره د روسیې پوځي همکاري ښيي.
نوموړي په دې اړه د افغانستان له بهرنیو چارو وزارت څخه وغوښتل:
"له بهرنیو چارو وزارت غواړم چې باید ژر تر ژره کابل کې د روسیې سفیر احضار کړي او غوږونو تهيې باید دا خبره جداً ورسول شي چې باید له لاسوهنې لاس په سر شي، پرته له دې به خلک غلي پاتې نهشي ځکه دا د افغانستان په چارو کې عملاً لاسوهنه ده."
د سیاسي چارو کارپوه بشیر بېژن په ګډون د افغانستان یو شمېر سیاسي کارپوهان وسلهوالو طالبانو ته د یوې سیاسې ډلې خطاب دغه ډلې ته د مشروعیت او جرأت ورکولو لامل بولي.
ښاغلي بېژن له افغان دولت غوښتنه وکړه چې نور باید پهدې برخه کې غلي پاتې نهشي ځکه چې په وینا يې افغانستان به په دغه ډول خبرو له بحران سره مخامخ شي.
راپور: اکرامالله اکرام