د سولې عالي شورا سلاکار عبدالحکیم مجاهد وایي، تر اوسه له ارګ ماڼۍ ورته د ګوښه کېدو په اړه رسمي اطلاع نهده ورکړل شوې نو ځکه خپلې دندې ته ادامه ورکوي.
ښاغلي مجاهد چې د افغان حکومت د اجرائیه ریاست په خبره له دندې ګوښه شوی له ازادي راډیو سره په یوې ځانګړې مرکه کې وویل چې د سولې عالي شورا د غړو ګوښه کول د ولسمشر له صلاحیتونو څخه دي.
نوموړي وویل:
"د سولې عالي شورا د مشر او غړو ګمارل او له دندې ګوښه کول د ولسمشر صلاحیت دی، تر اوسه ماته د ولسمشر لهخوا کومه رسمي اطلاعیه نهده رسېدلې یعنې انفکاک مې نهدی ابلاغ شوی."
دا څرګندونې په داسې حال کې مطرح کېږي چې وړاندې د اجرائیه رئیس ویاند مجیبالرحمان رحیمي رسنیو ته ویلي و چې عبدالحکیم مجاهد د وروستیو څرګندونو له کبله له دندې لیرې شوی دی.
د ښاغلي رحیمي په خبره له دندې څخه د عبدالحکیم مجاهد د لیرې کېدو پرېکړه ولسمشر او اجرائیه رئیس په ګډه کړې وه.
د سولې عالي شورا سلاکار عبدالحکیم مجاهد چې د طالبانو د واکمنۍ پر مهالیې هم په لوړو پوسټونو کې کار کړی تېره اوونۍ په کابل کې یوې ناستې ته وویل چې طالبانو یو ځل د روسانو پر وړاندې جهاد کامیابه کړ او بل ځلیې د مجاهدینو ګډوډۍ پای ته ورسولې او امنیتیې ټینګ کړ.
د ښاغلي مجاهد له دې بیان سره سم ارګ ماڼۍ د یوې اعلامیې په خپرولو سره وویل، هېڅڅوک حق نهلري چې د بیان له ازادۍ څخه په استفادې د ملي ګټو پر ضد څرګندونې وکړي.
د افغانستان د سولې عالي شورا بیا د عبدالحکیم مجاهد څرګندونې د هغه شخصي نظر وباله.
له دې ټولو سره-سره د سولې د عالي شورا د سلاکار څرګندونو په ټولنیزو رسنیو کې هم غبرګونونه له ځان سره لرل.
د افغانستان د ارګ مانۍ وايي چې له دندې څخه د عبدالحکیم مجاهد د ګوښه کېدو موضوع د دوی له لوري نهده مطرح شوې.
د ولسمشر مرستیال ویاند شاه حسین مرتضوي وايي چې یاده مسئله باید له اجرائیه ریاست څخه وپوښتل شي.
په همدې حال کې د اجرائیه ریاست ویاند مجیبالرحمن رحیمي بیا وايي، عبدالحکیم مجاهد نور نهشي کولای چې د سولې په عالي شورا کې دنده مخ ته یوسي.
ښاغلي رحیمي زیاته کړه:
"ښاغلی مجاهد نور په خپلې دنده کې نهشته، موږ روښانه کړه چې د کابل امنه فضا کې چې د ملي ځواکونو د وینې په قیمت منځ ته راغلې څوک حق نهلري چې د دغې فضا څخه په استفادې د طالبانو جنایتونه توجیه کړي چې مجاهد دا کار کړی دی."
کله مو چې له ښاغلي مجاهد څخه د ځانګړې مرکې پر مهال پوښتنه وکړه چې ایا د نظام پر وړاندې د وسلهوالو طالبانو اوسنۍ کړنې جواز لري هغه په دې اړه روښانه ځواب نهدرلود، خو دا یې وویل چې له حکومت، طالبانو او مجاهدینو څخه غواړي چې له افراطي کړنو څخه ډډه وکړي او د ټولو تر منځ باید ګډه همغږي رامنځته شي.
راپور: حدیث پردېس
