د افغانستان ولسمشر محمد اشرف غني په کابل کې پرونۍ انتحاري حملې په شدت وغندلې.
ښاغلي غني له ارګه په خبرپاڼه کې ویلي چې "وسلهوال طالبان په بېشرمۍ د ملکي وګړو د وژلو مسؤلیت مني او فخر ورباندې کوي."
په خبرپاڼه کې د ولسمشر غني په حواله ویل شوي چې د "داسې جنایت عاملان به د افغانستان په هېڅ برخه کې په امان کې نهپاتې کېږي."
د افغانستان ولسمشر په دې حملو کې له وژل شویو او زخمیانو سره خواخوږي څرګنده کړې او ویلي یې دي چې د زخمیانو په درملنه کې به هېڅ ډول امکانات ونهسپمول شي.
د افغانستان د عامې روغتیا وزارت په وینا په کابل کې پرون مازیګر د دارالامان پر سړک په دوو چاودنو کې لږ تر لږه ۳۸ تنه ملکي خلک او پوځي مأمورین وژل شوي او ۷۲ تنه زخمیان شوي دي.
د کابل امنیه قوماندانۍ د جنايي څېړنو رئیس فریدون عبیدي پرون ازادي راډیو ته وویل، د چاودنو زیات قربانیان ملکي وګړي دي.
فریدون عبیدي زیاته کړه:
"تحقیقات جریان لري. د حملې علت او انګېزه او د تلفاتو وروستی رقم به انشاءالله له کابل ښاریانو سره شریک کړو."
په ولسي جرګه کې د هرات د خلکو استازي غلام فاروق نظري اسوشيټېډ پرېس خبري اژانس ته وویل چې د هرات وکیله رحیمه جامي هم په زخمیانو کې ده خو د هغې د روغتیايي وضعیت په اړهیې نور معلومات نهدي ورکړي.
د کابل ښار د اوومې امنیتي حوزې امر احمدولي صبوري ازادي راډیو ته وویل چې لومړۍ حمله د ملي امنیت د پنځم ریاست په دروازه کې دوهمه د افغانستان امریکايي پوهنتون ته نېږدې شوې ده.
د ښاغلي صبوري په وینا، دواړه حملې انتحاري وې او د موټرو په وسیله شوې دي.
د بخښنې نړیوال سازمان هم په کابل کې پر ملکي خلکو پرونۍ حملې غندلي او په یوه اعلامیه کې یې ویلي چې دا حملې د بېګناه خلکو ژوند ته د وسلهوالو بېپروايي څرګندوي.
په دې سازمان کې د اسیا د جنوب چارو مشرې چمپا پاټېل په کابل کې د دې چاودنو په اړه د بېپرې، خپلواکو او هر اړخیزو څېړنو غوښتنه کړې ده.
مېرمن پاټېل ویلي چې د چاودنو قربانیانو او د هغوی کورنیو ته د عدالت د تأمین لپاره باید څېړنې وشي او عاملینیې باید مجازات شي.
د پاکستان د بهرنیو چارو وزارت هم په کابل کې د پرونیو چاودنو له امله خواشیني څرګنده کړې ده.
د پاکستان د بهرنیو چارو وزارت ویاند نفیس زکریا پرون سې شنبه پر ټویټر ولیکل چې دوی له دې امله د افغانستان له حکومت او خلکو سره خواخوږي لري او د قربانیانو کورنیو ته صبر غواړي.
