د لاسرسي لېنکونه

«جي. آی. زي» يا د جرمني د پرمختیايي اداره په کابل کې خپل دفترونه پرېښي او يوه بل ځای ته کډه کوي.

دا مسئله د جرمني د پرمختیايي ادارې د افغانستان څانګې د سې شنبې په ورځ تائيد کړه.

دغه اداره له اوو دفترونو څخه شپږ يې وروسته له هغه تړي چې په تېرو څو کلونو کې تل د دفترونو او کارکوونکو د ښه امنیت په لټه کې وو.

ويل کېږي د جرمني پرمختيايي ادارې دا اقدام د طالبانو تشدد او کابل کې د دې ډلې د زیاتو شويو حملو او افغانستان کې د تښتونو د زیاتېدو په عکس‌العمل کې کړی دی.

د همدې خطرونو له کبله، د جرمني پرمختيايي ادارې مخکې له خپلو کارکوونکو غوښتي وو، خپل کورونه چې په‎کې اوسي، پرېږدي او د دفترونو ودانیو ته کډه وکړي.

په ښار کې د دغو کارکوونکو پر ګرځېدو هم قيودات لګېدلي وو.

د دې ادارې رئیس وويل، ټاکل شوې ده د دې ادارې د کارکوونکو امنيت به نویو ودانیو کې ښه ونیول شي او د دوی د پروژو پر مخ وړل به هم اسانه شي.

دا خبره په داسې حال کې ده چې طالب سخت دريځو افغانستان کې له بهرنیو سازمانونو غوښتي چې د دوی تر کنټرول لاندې سيمو کې کار وکړي.

د طالبانو په اعلاميه کې چې د چهارشنبې په ورځ خپره شوه، طالبانو له سازمانونو، په ځانګړې توګه له اسلامي خيريه ادارو غوښتي چې د دوی تر کنټرول لاندې سیمو کې خلکو ته مرستې ورسوي.

د امریکايي سرچينو په وينا افغان حکومت اوس‎مهال تر ۶۰ فيصده کمه خاوره په لاس کې لري او په پاتې څلوېښت فيصده برخه کې يا جګړه روانه ده او يا هم هلته طالبان کنټرول لري.

د چهارشنبې په ورځ خپره شوې اعلاميه د طالبانو داسې درېيم پيغام دی چې د دې ډلې له‎خوا د نومبر مياشتې راهيسې خپور شوی او په‎کې د بهرنیو مرستو ملاتړ او خونديتوب شوی دی.

مخکې داسې مرستې د طالبانو له انتقاد سره مخامخ وې.

دا په داسې حال کې ده چې مرستندویه ادارې د طالبانو تر کنټرول لاندې سیمو ته لاسرسی ستونزمن يادوي او د دغو ادارو پر کارکوونکو د حملو له کبله اندېښمنې دي.

يوازې په ۲۰۱۶ میلادي کال کې ملګرو ملتونو د ۲۰۰ پېښو خبر ورکړ چې د مرستندويه ټولنو له کارکوونکو سره‌يې تړاو درلود او له هغوی څخه ۱۵ د داسې ادارو کارکوونکي وژل شوي وو.

د مرستندويه ادارو کارکوونکي له ځان سره د تښتولو او حملو له بېرې نښې نېښانې نه‌ګرځوي چې څرګند شي دوی له داسې ادارو سره کار کوي.

XS
SM
MD
LG