په افغانستان کې د غوڅ ملاتړ ماموریت وایي، د کابل وروستي بریدونه د توجیه وړ نهدي او په تمه دي چې په دې اړه زیات جزئیات له دوی سره شریک شي.
د دغه ماموریت ویاند برید جنرال چارلس کلېفلېنډ له ځینو خبریالانو سره په ټیلیفوني کنفرانس کې ټینګار وکړ چې د یادو بریدونو تر لا زیاتې روښانتیا وروسته به د نورو جزئیاتو په اړه ځواب ورکړي.
نوموړی وايي:
"موږ تر اوسه پورې ټول جزئیات نهلرو چې معلومات شریک کړو. په تمه یو چې هرومرو دا معلومات ترلاسه کوو. پوهېږو چې د پولیسو په یوې حوزې او د ملي امنیت په مرکز حملو کې ګڼو ملکیانو ته مرګژوبله واوښته. د زیاتو معلوماتو له ترلاسه کولو وروسته به په دې مورد کې نور هم خپل دریځ روښانوو او ځواب به وایو. "
کلېفلنډ دا خبرې کابل کې د غوڅ ملاتړ د ماموریت د ویاند په توګه په خپله وروستۍ کاري ورځ له کابله څو ژونارلېستانو ته په بروکسل کې وکړې.
د چهارشنبې په ورځ کابل کې د پولیسو په یوې حوزې او د ملي امنیت په یوه مرکز بریدونو کې چې وروسته یې مسؤلیت طالبانو په غاړه واخېست ۲۲ تنه ووژل شول او ۱۰۷ تنه نور ټپيان شول.
د عامې روغتیا وزارت ویاند وحید مجروح نن جمعه ازادي راډیو ته تائید کړه چې ټپيان تر درملنې وروسته رخصت شوي خو ځینې نور پوځي روغتونونو ته انتقال شوي دي.
د ملګرو ملتونو امنیت شورا هم د کابل د بریدونو په اړه تُند غبرګون ښودلي.
د ملګرو ملتونو امنیت شورا پرون یوه بیان کې ویلي چې د یادې شورا د پنځلسو غړیو هېوادونو دا حمله په کلکه غندلې او ټینګار یې کړی چې د دغو بریدونو عاملین، طراحان، تمویلونکي او ملاتړي باید د عدالت منګولو ته وسپارل شي.
په بیان کې همدا راز د سولې او ثبات په لور د افغانستان د تحرک په ملاتړ د ملګرو ملتونو په ټولو غړیو هېوادونو غږ شوی چې د یاد سازمان د اصولو او نړیوالو قوانینو په اساس د سولې او ثبات له ټولو خنډ جوړونکو سره باید په ګډه مبارزه وشي:
"هېڅ یو تروریستي عمل او تاوتریخوالی د افغانانو، افغان حکومت او نړیوالې ټولنې له خوا افغانستان کې د سولې، ډموکراسۍ او ثبات په لور وهلی مزل نهشي درولی."
اخوا افغانستان کې د ناټو د غوڅ ملاتړ ماموریت هم ویلي چې کابل کې د خونړیو بریدونو وروسته دوی په هر اړخېزه توګه له افغان پوځیانو سره خپلې مرستې او همکارۍ دوه برابره کوي څو دا پوځیان د دفاع لا نور هم جوګه شي.
د دغه ماموریت ویاند د دندې په وروستۍ ورځ د خپل عمومي قومندان جنرال جان نیکلسن په حواله ډاډ څرګند کړ چې له افغان پوځیانو به ملاتړ دوه برابره کړي.
نوموړی وايي:
"موږ افغان پوځیانو ته روزنه او مشوره ورکوو او همکاري ورسره کوو څو دوی وکولای شی خپل هېواد وساتي. دا [ برېدونه] څه کوي همدا چې له افغان پوځیانو زموږ ملاتړ ژمنتیا نوره هم زیاتوي او هڅې مو دوه برابره زیاتوي چې له هغوی سره مرسته وکړو چې له خپلې خاورې دفاع وکړي."
د کابل د وروستیو خونړیو بریدونو مسؤلیت که څه هم وسلهوالو طالبانو په غاړه اخیستی خو افغان حکومت ویلي د پېښې په اړه څېړنې پیل شوي څو روښانه کړي چې دا بریدونه چا پلان کړي و او څوک یې تر شا و.
تردې مخکې په وار وار پاکستان تورن شوی چې په افغانستان باندې د بریدګرو لپاره په خپله خاوره کې ځای ورکوي.
پاکستان بیا له ترورېزم سره مبارزه کې په خپلو هڅو ټينګار کوي.
صفي الله ستانکزی