د امریکا دفاع وزير جېمز متېس په ناڅاپي سفر بغداد ته رسېدلی دی.
د ده د سفر هدف د اسلامي دولت سخت دريځې ډلې يا داعش پر ضد پر مبارزه تمرکز دی.
متېس نن عراق ته په داسي حال کې تللی چې د دغه هېواد صدراعظم حیدرالعبادي له موصل څخه د داعش ډلې د ايستلو لپاره د عملیاتو نوی پړاو اعلان کړ.
خو په بغداد کې به متېس عراقي مشرانو ته ډاډ ورکوي او دا وروسته له هغه چې د امریکا ولسمشر ډونالد ټرمپ د کمپاين پر مهال ويلي وو چې د امریکايي نظامي ملاتړ په بدل کې باید له عراقه تېل واخيستل شي.
متېس بغداد ته له رسېدو وروسته وويل چې امریکا عراق ته د تېلو اخيستلو لپاره نهدی ورغلی:
"په امریکا کې موږ ټولو د ګازو او تېلو بيې پرې کړي دي او زه ډاډه يم چې موږ به دا کار په راتلونکي کې هم وکړو، موږ په عراق کې د تېلو اخيستلو لپاره نه يو راغلي. "
د امریکا د هوايي حملو په ملاتړ عراقي ځواکونه له داعش جنګيالیو څخه د موصل بېرته نيولو لپاره په جګړه بوخت دي.
دوی د دجله سيند ختيځه برخه نيولې ده خو داعش جنګيالي اوس هم د ښار پر لوېديځه برخه کنټرول لري.
پرون عراقي ځواکونو په وروستیو عملیاتو کې د موصل په لوېديځ کې څو کلي ونیول او همداراز ځواکونه په جنوب کې هم د عذبه کلي پر لور پرمخ تللي چېرته چې دوی د داعش تر کنټرول لاندې د موصل هوايي ډګر ته نېږدې رسېدلي دي.