د پاکستان لاهور کې د دوشنبې ورځې د انتحاري حملې په تړاو د دغه هېواد د پولیسو له لوري د یو شمېر افغان کډوالو تر نیولو وروسته د افغانستان د بهرنیو چارو وزارت د ستراتیژیکو څېړنو مرکز پر پاکستان غږ کوي چې په هغه هېواد کې له مېشتو افغان کډوالو څخه سیاسي استفاده ونهکړي.
د دغه مرکز رئیس فرامرز تمنا د پنجشنبې په ورځ ازادي راډیو ته وویل، افغانستان تل پاکستان کې له طرحه شویو ترورېستي پلانونو څخه زیانمن دی.
ښاغلی تمنا وايي، د افغانستان د امنیتي بنسټونو معلومات ښیي چې دواړو هېوادونو کې شوې ترورېستي پېښې پاکستان کې طرحه کېږي.
نوموړی وايي:
"افغان حکومت تل له هغو ترورېستي پېښو څخه زیانمن شوی چې پاکستان کې طرحه کېږي، افغان حکومت دا ردوي چې ګواکې افغانستان کې مخالفې وسلهوالې ډلې په پاکستان کې ترسره شویو بریدونو کې لاس لري برعکس موږ د پاکستان له خاورې څخه ګواښل شوي یو. هیله لرم چې له افغان کډوالو څخه هېڅ ډول سیاسي استفاده ونهشي."
د پاکستاني رسنیو د راپورونو له مخې د نوموړي هېواد امنیتي ځواکونو لاهور کې د دوشنبې ورځې تر انتخاري برید وروسته ۴۰ تنه نیولي چې یو شمېر یې افغانان دي.
د پاکستان دنیا نیوز چینل راپور ورکړی چې دا کسان د لاهور ښار د وروستۍ انتحاري حملې په تړاو نیول شوي دي.
افغانستان کې د پاکستان سفارت یوه مطبوعاتي مسؤل اختر منیر ازادي راډیو ته وویل چې دوی لا تر اوسه په دې اړه پوره معلومات نهلري.
دا لومړی ځل نهدی چې پاکستاني ځواکونه په یاد هېواد کې تر چاودنو او انتحاري حملو وروسته افغانان نیسي او ځوروي یې، بلکې تر دې وړاندې هم د افغان کډوالو د نیولو، ځورولو او ان له یاد هېوادهیې د اجباري ایستلو راپورونه هم ورکړل شوي دي.
د افغانستان د کډوالو چارو وزارت وايي، د پاکستان حکومت باید له کډوالو سره د بشري حقونو او د دواړو هېوادونو تر منځ د شویو تړونونو مطابق چلند وکړي.
د دغه وزارت مطبوعاتي سلاکار حفیظ احمد میاخېل ازادي راډیو ته وویل، پاکستان کې د بېګناه افغانانو نیول او ځورول د کډوالۍ د ټولو قوانینو او اصولو څخه سرغړونه ده.
نوموړی وايي:
"که بېګناه افغانان نیول کېږي دا د افغانستان او پاکستان تر منځ د دوه اړخیزو تړونونو څخه او همداراز د کډوالۍ د ټولو نړیوالو قوانینو څخه سرغړونه ده."
ښاغلی میاخیل وايي، پاکستان کې د افغانستان د کډوالو اتشې دې برخه کې هڅې کوي څو نیول شوي بېګناه افغان کډوال خوشې کړي.
پاکستان کې د افغان کډوالو د نیولو راپورونه داسې مهال ورکول کېږي چې د چهارشنبې په ورځ په یاد هېواد کې د افغانستان، پاکستان او د کډوالو برخه کې د ملګرو ملتونو د عالي کمېشنرۍ تر منځ غونډه وشوه.
په دې غونډه کې درې اړخیز تړون هم لاسلیک شو چې له مخې بهیې د ۲۰۱۷ میلادي کال تر پایه په پاکستان کې د مېشت راجسټر شویو افغان کډوالو د اوسېدلو موده وغځېږي.
راپور: عبادالله حنانزی