د افغانستان اجرائیه ریاست او د جمعیت اسلامي ګوند ځيني غړي وايي چې عطا محمد نور د دوی په استازیتوب مذاکره نهکوي.
په داسې حال کې چې د جمعیت ګوند اجرائیه رئیس عطا محمد نور ویلي چې د ملي یووالي حکومت اجرائیه ریاست او جمعیت ګوند په استازیتوب له ولسمشر غني سره د ده خبرې ښې روانې دي یادې دواړه خواوې دا پرمختګ د ځان نهبولي.
د ملي یووالي حکومت اجرائیه رئیس ویاند مجیبالرحمن رحیمي د پنجشنبې ورځې په اوونیزه خبري ناسته کې رسنیو ته وویل، که څه هم اجرائیه ریاست د ښاغلي نور د هڅو درناوی کوي خو هېڅڅوک د اجرائیه ریاست په استازیتوب په کومو خبرو کې ښکېل نهدي.
نوموړی وايي:
"داسې غوښتنې چې نن سبا یادېږي د ملي وحدت حکومت د رهبرۍ په کچه نهدي مطرح او نه هم موږ په جریان کې یو، د ښاغلي نور تل ټینګار په دې دی چې دی د جمعیت له ادرسه په خبرو لګیا دی، د ملي یووالي حکوت اجرائیه ریاست په استازیتوب هېڅڅوک په خبرو کې ښکېل نهدي او د دې بنسټ استازیتوب یوازې اجرائیه رئیس کوي."
وموغوښتل چې په همدې اړه خپله د بلخ د سرپرست والي او د جمعیت ګوند د اجرائیه رئیس عطا محمد نور نظر هم ولرو خو د هغه د غبرګون په اخیستو بریالي نهشوو.
له دې وړاندې ښاغلي نور ویلي چې دی له ارګ سره د جمعیت ګوند او اجرائیه ریاست په استازیتوب خبرې مخ ته وړي چې د نوموړي په خبره، تر دې دمهیې ښه نتیجه هم ورکړې ده.
د بلخ سرپرست والي د شااوخوا دوه میاشتو راهیسې د ارګ سره پر خبرو اترو او د واک د څرنګوالي په موضوعاتو بوخت دی چې ارګیې هم نهردوی.
عطا محمد نور ویلي چې په دې خبرو اترو کې یې د څو سفارتونو، ولایتونو او نورو ادارو کې د واک په سر غوښتنې منل شوي هم دي خو ارګ او اجرائیه ریاست وايي چې د مشخصې ونډې بحث کله هم نهدی مطرح.
له دې سره د جمعیت ګوند یو مخکښ غړی فضل احمد معنوي وايي چې که عطا محمد نور غواړي حکومت کې کوم ځای ونیسي دا موضوع عملي نهده.
هغه وايي چې عطا محمد نور دغه مذاکرو ته د جمعیت له ادرسه نهدی معرفي شوی.
ښاغلی معنوي وايي:
"تر اوسه د جمعیت د مشرانو تر منځ هم داسې ناسته نهده شوې چې چاته دې د جمعیت ګوند په استازیتوب د خبرو صلاحیت ورکړي."
د سیاسي او حقوقي چارو کارپوهان که څه هم د حکومت دننه د واک پر سر خبرې د هېواد په ګټه نهبولي خو وايي چې عطا محمد نور ممکن په راتلونکي کې د یوه فعاله سیاستوال د رول اخیستلو لپاره دا هڅې روانې وساتي.
د دې کارپوهانو له ډلې عبدالرؤف جرأت په دې باور دی چې د ارګ او عطا محمد نور تر منځ داسې وېش به چې په واک کې شریک نور کسان زیانمنوي طبعاً له ځانه سره ستونزې هم ولري.
راپور: یوسف خان ځدراڼ
