د سوک‌‌وهنې نړیوال اتل ۵۸ کلن مایک ټایسن (Mike Tyson) د ۲۷ کلن جېک پاول (Jake Paul) په وړاندې ماتې وخوړه.

ټایسن او پاول تېره شپه د امریکا د متحدایالتونو په تکزاس کې د مسابقې رېنګ ته داخل شول، چې ټایسن د څلورو امتیازونو په توپیر دغه لوبه وبایلله پاول ۷۸ او ټایسن ۷۴ امتیازونه واخیستل.

له‌‌‌دې سره د مایک ټایسن د ماتو شمېر ۷ ته ورسېد.

ټایسن له ۱۹ کلونو وروسته د مسابقې رېنګ ته داخل شوی و او دا مسابقه په نړۍ په ميلیونونو کسانو وکتله.

راپورونه وايي ټایسن د دې مسابقې لپاره ۲۰ ميلیون امریکايي ډالره اخیستي او جېک پاول ۴۰ ميلیون ډالره عاید ترلاسه کړي او دواړه به په ژوندۍ بڼه د دغې مسابقې د خپرېدو له درکه د ترلاسه شوي عاید ۵۰ فیصده هم اخلي.

ټاکل شوې د امریکا د متحدایالتونو ولسمشر جوبایډن د چین له ولسمشر شي جین پینګ سره په خپله وروستۍ رسمي کتنه کې له هغه وغواړي چې شمالي کوریا، د اوکراین په وړاندې په جګړه کې د روسیې د ملاتړ له لا زیاتولو راوګرځوي.

په پیرو کې د اسیا پسفیک اقتصادي همکاریو د کلنۍ سرمشریزې په څنډه کې د بایډن او شي ترمنځ نننۍ کتنه داسې وخت کېږي، چې ټاکل شوې بایډن دوې میاشتې وروسته واک جمهوریپال منتخب ولسمشر ډونالډټرمپ ته وسپاري.

دا به د چین له ولسمشر سره د بایډن وروستۍ رسمي کتنه وي.

شي جین پینګ هغه څوک دی چې ډیموکراتان په نړیوال ډګر کې د خپل مهم سیال په سترګه ورته ګوري.

چارواکي وايي، بایډن به د چین له ولسمشر وغواړي چې شمالي کوریا وهڅوي چې د کړکېچ د لا زیاتېدو مخه ونیسي.

اوکراین پرون د روسیې له ولسمشر ولادمیر پوتین سره د جرمني د صدراعظم اولاف شولڅ ټلیفوني مکالمه وغندله.

کییف دغه مکالمه د تسکین یوه هڅه ګڼلې چې مسکو ښايي د کمزورۍ د نښې په سترګه ورته وګوري.

د اوکراین د بهرنیو چارو وزارت پرون په یوه اعلامیه کې ویلي، دا ډول خبرې یوازې پوتین ته د هغه د نړیوالې انزوا د کمېدو هیله ورکوي.

د اوکراین د بهرنیو چارو وزارت ویلي، یوازېني څه ته چې اړتیا ده، هغه قوي اقدامات دي، چې پوتین سولې ته مجبورولی شي، نه متقاعد کول او د تسکین هڅه، چې پوتین د کمزورۍ د نښې په سترګه ورته ګوري او د ځان په ګټه یې کاروي.

د جرمني صدراعظم تر دغو ټلیفوني خبرو وروسته تېره شپه پر خپله ایکس‌پاڼه (پخواني ټویټر) لیکلي، له پوتین یې غوښتنه وکړه، چې د اوکراین په وړاندې د روسیې تهاجم پای ته ورسوي او خپل پوځیان له اوکراین وباسي.

شولڅ لیکلي، چې روسیه باید له اوکراین سره مذاکرو ته لېوالتیا وښيي، چې هدف یې سولې ته رسېدل وي.

د هند د یوه روغتون د نوزېږو ماشومانو په څانګه کې د اورلګېدو له کبله لږ تر لږه ۱۰ نوزېږي ماشومان مړه شوي او ۱۶ نور ژوبل شوي دي.

چارواکي وايي، د هند د اترا پردېش ایالت د جهانسي ښار په روغتون کې دغه اور پرون جمعې ډېر ژر په‌دې څانګه کې خپور شو، چې هلته د ۵۵ نوزېږو ماشومانو درملنه روانه وه.

د اورلګېدو علت معلوم نه‌دی.

د اترا پردېش ایالت د اعلی وزیر مرستیال براجیش پتهاک په‌دې اړه د څېړنو ژمنه وکړه.

دغې پېښې د هند په روغتونونو کې د خوندیتوب د مقرراتو په باب پوښتنې ولاړې کړي دي.

د پاکستان پنجاب ایالت د پراخ لوګي له امله پرون جمعه بېړنی روغتیایي حالت اعلان کړ او په دوو سترو ښارونو کې یې د سوداګرۍ پر چارو بندیز ولګاوه.

زهرجنو لوګیو او دوړو له څو اوونیو راهیسې د دې ایالت یوه لویه برخه پوښلې چې امله یې نژدې دوه ميلیون وګړي ناروغه شوي دي.

د پنجاب ایالت اعلا وزیرې مریم اورنګزېب پرون په یوې خبري غونډه کې په‌دې ایالت کې د بېړني روغتیایي وضعیت د اعلانولو پر مهال د دغه پراخېدونکي بحران په وړاندې د مبارزې لپاره د ځینو اقداماتو یادونه وکړه.

د روغتیایي کارکونکو رخصتي لغوه شوې، ټولې تعلیمي مؤسسې تربلې خبرتیا پورې تړلې شوي او رسټورانټونه بند شوي دي.

مېرمن اورنګزیب وویل، لوګی اوس یو ملي ناورین دی.

د لبنان د حکومت سرپرست صدراعظم نجیب میقاتي پرون جمعه له ایران څخه وغوښتل چې د اسراییل او حزب‌الله ترمنځ د روانې جګړې د پای ته رسولو لپاره د یوه اوربند په یقیني کولو کې مرسته وکړي.

داسې ښکاري چې نوموړی غواړي، ایران له خپل ملاتړه برخمنه حزب‌الله ډله چې امریکا یې یوتروریستي سازمان بولي او اروپایي اتحادیې یې یوازې پوځي څانګه په تور لېست کې شامله کړې، دې ته وهڅوي چې یوه جوړجاړي ته غاړه کېږدي.

داسې یوه جوړجاړي ته چې په ترڅ کې یې ښایي له‌‌‌دې ډلې وغوښتل شي چې د اسراییل-لبنان پولې ته له نژدې سیمو ځان شاته کړي.

په‌داسې حال کې چې د ایران د ستر مشر ایات‌الله علي خامنه‌یي چګپوړی سلاکاراو د ایران د پارلمان پخوانی ريیس علي لاریجاني د خبرو لپاره لبنان ته تللی، د دې هېواد چارواکو وویل چې د امریکا د اوربند وړاندیز حزب‌‌الله ته سپارل شوی چې هدف یې د اسراییل او د دې ډلې ترمنځ د درې میاشتنۍ جګړې پای ته رسول دي.

ایران چې د لبنان د حزب‌الله اصلي ملاتړی دی، له لسیزو راهیسې یې دا سخت‌دریځه ډله تمویل او تجهیز کړې ده.

د ۲۰۲۳ کال د اوکتوبر په اوومه نېټه چې په غزه کې د حزب‌‌‌‌الله ملاتړې حماس ډلې پر اسراییل ناڅاپي برید وکړ او اسراییل یې په وړاندې غچ اخیستونکې جګړه پیل کړه، له هغه مهال راهیسې د حزب‌الله او اسراییل ترمنځ شخړې پیل شوې دي.

یو جګپوړی ایرانی چارواکی وايي چې، ایران به له اسراییلو سره د اوربند په برخه کې د لبنان د هرې پرېکړې ملاتړ وکړي.

د ایران د لوی مذهبي مشر لوی سلاکار او د پارلمان پخواني رییس علي لاریجاني پرون د یوه خبریال دې پوښتنې ته چې ایا بیروت ته د دې لپاره تللی دی چې هلته د امریکا په منځ‌ګړتوب د سولې پلان زیانمن کړي، په ځواب کې وویل چې، ایران د هيڅ شي سبوتاژ کول نه‌غواړي بلکې د ستونزو حل غواړي.

د لاریجاني څرګندونې ښيي چې تهران د هغه کړکېچ پای ته رسېدل غواړي چې په نتیجه کې یې اسراییلو د لبنان ایران پلوې حزب‌‌الله ډله سخته وځپله.

حزب‌‌‌الله چې هم سیاسي او هم پوځي څانګې لري د لبنان جنوبي سیمې اداره کوي.

امریکا دا ډله یو تروریستي سازمان بولي، خو اروپايي ټولنې یې یوازې پوځي څانګه په تور لېست کې شامله کړې ده.

د جرمني صدراعظم اولاف شولڅ د روسیې له ولسمشر ولادیمیرپوتین سره په ټليفوني خبرو کې له هغه غوښتي دي چې په اوکراین کې جګړه پای ته ورسوي او له کییف سره د عادلانه او دوامداره سولې په اړه خبرې پیل کړي.

د شولڅ دفتر تېر ماښام په یوه بیان کې د جرمني او روسیې د مشرانو ترمنځ په تېرو دوو کلونو کې د لومړي ځل ټليفوني خبرو خبر ورکړ، خو د دې بیان له خپرېدو وروسته سم‌دستي د اوکراین ولسمشر غبرګون وښود.

ولودیمیر زیلینسکي وویل، د شولڅ او پوتین خبرې به یوازې له انزوا څخه د پوتین او روسیې له راوتلو او د داسې متعارفو خبرو له پیل سره مرسته وکړي، چې نتیجه به یې هيڅ وي.

زیلینسکي وویل، داسې تشې خبرې اترې هغه څه‌‌‌دي چې پوتین یې پر اوکراین د روسیې له یرغل وروسته له اوږدې مودې راهیسې غواړي.

د شولڅ د دفتر په بیان کې د نوموړي له قوله ویل شوي چې، جرمني به له اوکراین څخه ملاتړ ته تر هغه وخته دوام ورکړي چې اړتیا ورته ولري.

د هندوستان او کوربه سویلي افریقا ترمنځ د څلورو شل اوریزو سیالیو د لوبلړۍ وروستۍ سیالي هم پیل شوې ده چې هندۍ لوبډلې لومړۍ پاڼۍ ولوبوله او ۲۸۳ منډې یې وکړې.

په‌‌‌‌‌دې سیالۍ کې یوازې یو هندی توپوهونکی وسوځېد، خو تیلک ورما او سنجو سمسون په روانې لوبلړۍ کې د دویم ځل لپاره سلیزې ووهلې، ورما په ۱۲۰ منډو او سمسون په ۱۰۹ منډو ناسوځېدلي پاتې شول.

تر دې وړاندې د لوبلړۍ په لومړۍ سیالۍ کې سنجو سمسون ۱۰۷ منډې کړې وې، خو تیلک ورما بیا په درېیمې سیالۍ کې په ۱۰۷ منډو ناسوځېدلی پاتې و.

د دې لوبلړۍ دوه سیالۍ هندوستان او یوه سویلي افریقا ګټلې ده او څرګنده به شي چې په وروستۍ لوبه کې سویلي افریقا کولای شي ورکړل شوی هدف پوره کړي یا نه.

د روسیې د جنوبي سیمې کراسنودار چارواکي وایي، اوکراین نن جمعه د دې سیمې پر مختلفو برخو د بې‌پیلوټه الوتکو پراخ بریدونه وکړل.

د دې سیمې والي وینیامین کوندراتیف پر ټلېګرام چینل ولیکل چې، د اوکراین په بریدونو کې د کریمسک او کراسنوارمیسک سیمې په نښه شوې وې، چې د هغه په خبره له مالي زیان پرته یې چاته مرګ‌ژوبله نه‌ده اړولې.

د اسټرا په نوم ټلېګرام چینل راپور ورکړ چې، په برید کې د کریمسک هوایي اډه چې د ښار شمالي برخې ته نژدې پرته ده او روسي ځواکونه ورڅخه د اوکراین پر جنوبي برخې د بریدونو لپاره کار اخلي، په نښه شوې ده.

اوکراین تر اوسه په‌دې اړه څه نه‌دي ویلي.

په عین‌حال کې د روسیې دفاع وزارت ویلي، د هوایي مدافعې سیسټم یې نن د کریمیا ټاپووزمې پر سر چې روسیې اشغال کړې، د اوکراین ۵۱ بې‌‌‌پیلوټه الوتکې راغورځولې دي.

دې وزارت همدارنګه ویلي، ۳۶ نورې بې‌‌‌‌‌‌‌پیلوټه الوتکې یې د کراسنودار د سیمې پرسر ویجاړې کړې دي.

د روسیې پر جنوبي سیمو نن د اوکراین د پراخو بریدونو په اړه راپورونه لږ وروسته له هغې خپرېږي چې، روسیې د تور سمندرګي په غاړه د اوکراین پر لوی ښار ادیسه پراخ بریدونه وکړل.

د روسیې د بې‌‌‌‌‌پیلوټه الوتکو او توغندیو په دغو بریدونو کې د یوې ښځې د وژل کېدو او لږ تر لږه لسو کسانو د ټپي کېدو خبر ورکړل شوی دی.