افغان امنیتي مسؤلان وايي چې پر وسلهوالو مخالفینو به فشارونه، لکه د پسرلي د جنګي فصل په شان جاري وساتي.
د کورنیو چارو وزارت ویاند صدیق صدیقي د سې شنبې په ورځ کابل کې خبري ناستې ته وویل، شفق عملیاتو کې اصلي هدف د وسلهوالو مخالفینو د ریښو او کلیدي غړو لهمنځه وړل دي.
د نوموړي په خبره د عملیاتو نتیجه تر اوسه ښه ده او ټاکل شوي هدفونه هم تر لاسه شوي دي.
ښاغلي صدیقي زیاته کړه:
"اصلي هدف دا دی چې پر دښمنانو فشار راوړل شي او د راتلونکي کال پسرلي کې د خوځښتونو او حملو توان ونهلري، کومو سیمو کې چې فعالیت لري له هغه ځایه په شا شي، نتیجه ښه ده او هغه هدفونه چې ټاکل شوي وو تر لاسه شوي دي."
د شفق عملیات د روان کال له پیله پیل شوي او ژمني هغهیې چې د «شفق۲» په نوم یادېږي، د روان لمریز کال د قوس میاشتې په لومړۍ نېټه پیل شوي چې د کال تر اخره پورې به روان وي.
افغانستان کې هر کال د ژمي په پیلېدو سره د وسلهوالو مخالفینو په وړاندې عملیات راکمېږي خو افغان امنیتي مسؤلان وايي چې سږ کال به په دغه موسم کې دوی خپل روان عملیات جاري وساتي.
تر دې دمخه د افغانستان ولسي جرګې له امنیتي ارګانونو غوښتي و چې د ژمي له موسمه په ګټې اخیستنې سره د مخالفینو پر وړاندې عملیاتو ته په دقیق ډول شدت ورکړي.
د افغان کارپوهانو په باور هم، ژمی د افغان دولت د مخالفینو ځپلو لپاره یو ښه فصل دی.
خو د افغانستان کورنیو چارو وزارت وايي چې لوړپوړي وسلهوال مخالفین په دې موسم کې خپلو اصلي مرکزونو ته ځي او د مرستو راټولولو په هڅه کې وي.
په ورته وخت کې د افغانستان د دفاع وزارت مرستیال ویاند محمد رادمنش په همدغې خبري غونډه کې وویل، دا مهال د افغانستان ۱۸ ولایتونو کې د وسلهوالو مخالفینو پر وړاندې ۲۱ عملیات روان دي.
ښاغلی رادمنش له امنیتي نظره راتلونکی کال ښه ارزوي.
نوموړی وايي:
"هغه محلونه چې د ښوونې او روزنې په نوم تبلیغات لري باید لهمنځه یوړل شي چې دا دی د شفق ۲ عملیات له همدې امله په ژمي کې روان دي، د راتلونکي کال په اړه وړاندوینه کولای شو چې یو ښه کال به وي."
په ورته وخت کې یو شمېر افغان کارپوهان وايي، حکومت کې دننه د وسلهوالو مخالفینو نفوذ د افغان ځواکونو د پلانونو د ناکامۍ لامل شوی دی.
د چارو پوه صدیق ساحل وايي، دا مسئله د دې لامل شوې چې د امنیتي ارګانونو د پروګرامونو تر پلي کېدو دمخه وسلهوال مخالفین ورنه خبر شي.
راپور: اجمل تورمان
