د افغانستان په ولسي جرګه او د زابل په ولایتي شورا کې د زابل د خلکو استازي انتقاد کوي چې له ۱۳ کلونو راهیسې په شملزیو ولسوالۍ کې ۳۰ کیلومتره پوله د مخالفینو په مخ خلاصه ده.
دوی د افغانستان او پاکستان تر منځ په نېږدې دوه نیم زره [۲۴۳۰] کیلومتره ګډه پوله باندې د مخالفینو د تګ-راتګ یوه عمده لار همدا سیمه یادوي.
د زابل د ولایتي شورا رئیس عطا جان حق بیان پرون شپه ازادي راډیو ته وویل، له همدې دېرش کیلو متره ازادې پولې نیمايي افغانستان له امنیتي ګواښ سره مخ دي او د شملزیو ډېرې سرحدي سیمې پاکستاني ملېشو او پوځیانو نیولي دي.
عطاجان حق بیان زیاته کړه:
"شاوخوا ۲۱ [د پاکستان د ملېشه] پوستې له ډېره وخته شته خو دا پوستې کرار-کرار را مخکې کېږي. زموږ ډېر کلي هلته د دوی له پوستو شاته پاتې شوي دي. ۳۰ کیلو متره د دښمن په مخ خلاصه ده. له دې څخه ټول افغانستان، غزني، پکتیکا، پکتیا، شمال ولایتونه، جنوب او جنوب غرب حوزې ګواښل کېږي."
ښاغلي حقبیان دا هم وویل چې د نوبهار او فیضاباد په سیمه کې د پاکستاني ملیشهوو او مخالفینو روغتونونه شته او ټپیان د پاکستان تر روغتونونو انتقالېږي.
تر دې مخکې هم زابل د وسلهوالو مخالفینو په خاصه توګه داعش جنګیالیو له اصلي مراکزو بلل کېده او ان دغه ولایت ته د یادو جنګیالیو د کورنیو د انتقال راپورونه هم تائید شوي دي.
په ولسي جرګه کې د زابل د خلکو استازی عبدالقادر قلاتوال وايي چې په شملزیو کې د مخالفینو د تګ-راتګ په وړاندې د ده په خبره د افغان سرحدي پوځیانو د نه موجودیت په خاطر هېڅ ډول ممانعت نشته.
ښاغلي قلاتوال زیاته کړه:
"دا حقیقت دی چې د شملزیو ولسوالۍ ډیورنډ کرښې ته څېرمه امنیتي پوستې نشته دي. سرحد د ټولو مخالفینو د تګ راتګ په مخ خلاص دی. په دې ارتباط موږ څو-څو ځله له امنیتي سکتور او لومړی درجه مقاماتو سره دا خبره یاده کړه. هغوی له موږ ډېر په دې اړه پوهېږي خو دا چې پاملرنه ورته نهده شوې علتونه یې له هغوی [چارواکو] سره دي."
زابل د شملزیو په ولسوالۍ کې له ډیورنډ کرښې سره شاوخوا ۶۵ کیلومتره ګډه پوله لري.
په ولسي جرګه او ولایتي شورا کې د زابل خلکو استازي په داسې حال کې د شملزیو له خلاصې پولې انتقاد کوي چې د رپوټونو له مخې وړمه ورځ د پاکستان ملېشه پوځیانو د شملزیو په یوه کلي حمله وکړه او یو افغان ماشوم یې وواژه.
د زابل امنیه قومندان پاسوال میرویس نورزی بیا که څه هم امنیتي ستونزې تائیدوي خو وايي چې په شملزیو کې پاکستاني ملېشه یا مخالفین مخکې نه دي راغلي او د ده په خبره کومه لویه ستونزه نهده موجوده.
پاسوال میرویس نورزي زیاته کړه:
"مشکل به خامخا وي خو داسې معلومداره څه نشته چې د دوی پوستې وي یا د دوی روغتونونه وي. موږ خپله په شملزیو ولسوالیو کې دندې مخ ته وړو. هېڅ خبره نشته. واړه عملیاتونه هم ترسره کوو."
یوازې د شملزیو سرحد نه بلکې په ګاونډ پکتیکا کې د انګور اډه، په ختیځ ولایت ننګرهار کې په ګوشتې او ځینو نورو سیمو کې تل د پاکستاني پوځیانو د مخکې راتګ په خاطر نښتې شوي چې تر ډېره په کې افغان ملکیانو ته مرګژوبله اوښتې ده.
اخوا د افغانستان بهرنیو چارو وزارت پرون په یوه اعلامیه کې ویلي چې د کندهار په معروف او د کونړ په سرکاڼو سرحدي ولسوالیو کې یې د پاکستاني پوځیانو د راکټي حملو په غبرګون په کابل کې د دغه هېواد سفیر احضار کړی دی.
په اعلامیه کې د شملزیو د وروستي برید او له دې لارې د مخالفینو د دوامداره تګ راتګ په اړه څه نه دي ویل شوي.
پاکستان په وار- وار د افغان او هندي چارواکو لهخوا له پولو دباندې د ترورېزم په تقویې تورن شوی خو پاکستاني چارواکو کله هم نهده منلې چې خپلو ګاونډيو په ځانګړي توګه افغانستان ته وسلهوال ور اړوي څو برېدونه وکړي او بېلابېل اهداف په نښه کړي.
صفي الله ستانکزی