ټاکل شوې مسکو په نېږدې راتلونکي کې د افغانستان په اړه د یوې غونډې کوربه وي چې په خپله افغان چارواکي نهدي وربلل شوي.
دغه غونډ چې د ډسمبر میاشتې په ۲۷مه په مسکو کې کېږي پاکستان او چین ګډون کوي چې ویل کېږي ښايي د افغانستان د سولې پر خبرو تمرکز وشي.
د چین د بهرنیو چارو وزارت ویاند جینګ شوانګ په یوه خبري کنفرانس کې ویلي چې د مسکو په غونډه کې به په افغانستان کې د سولې او ثبات راوستلو په اړه بحث وشي.
په ورته وخت کې د افغانستان د بهرنیو چارو وزارت وایي، افغان چارواکو ته تر اوسه په دې غونډه کې د ګډون بلنه نهده ورکړل شوې.
د دغه وزارت مرستیال ویاند خیرالله ازاد ازادي راډیو سره په خبرو کې د دې غونډې جوړېدل د نورو هېوادونو د مخکنیو ژمنو خلاف بللې.
نوموړي زیاته کړه:
"افغانستانیې نهدی وربللی او د افغان حکومت نظر دا دی چې هره هغه غونډه چې د افغانستان په اړه جوړېږي، باید د افغانستان په حضور کې جوړه شي او په دې اړه هېوادونو وړاندې هم ژمنې کړې وې."
د چین د بهرنیو چارو وزارت ویاند ویلي چې هېواد یې په افغانستان کې د سولې او پرمختیا د ترویج په ا ړه له پاکستان سره په تماس کې دی، خو د افغانستان د بهرنیو چارو وزارت وایي هغه غونډې چې د افغانستان د سولې او ثبات په اړه د دغه هېواد د استازو پرته جوړېږي، مثبتې پایلې نهشي لرلی.
تر دې وړاندې پاکستان او چین د افغانستان د سولې په اړه په څلور اړخیزو غونډو کې ګډون کړی وو.
پاکستان په هغو غونډو کې ژمنه کړې وه چې طالبان به د سولې مذاکراتو مېز ته راولي، خو هغه ژمنې یې لا تر اوسه نهدي عملي کړي.
اسلاماباد مني چې د وسلهوالو طالبانو مشران د دوی په خاوره کې دېره دي.
د امریکا متحده ایالاتو او افغان حکومت په وار وار له اسلاماباد څخه غوښتي چې په هغه هېواد کې د مېشتو وسلهوالو ډلو په وړاندې چې د افغانستان پر ضد فعالیت کوي، جدي اقدامات وکړي.
د پاکستان استخبارات د هغو تندلارو ډلو په ملاتړ تورنې دي چې په افغانستان کې په ترورېستي پېښو کې لاس لري، پاکستان تل دا تورونه ردوي.