وال سټریټ ژورنال:
وال سټریټ ژورنال ورځپانې تر دې سرلیک لاندې چې "ایا د روسیې ولسمشر ولادیمیر پوتین د افغانستان د طالبانو لپاره کوم پلان لري؟"
مقاله خپره کړې چې په یوه برخه کې یې راغلي:
"امریکايي او افغان چارواکي د روسیې او طالبانو د سیاسي اړیکو له ژورېدو اندېښنه لري."
په افغانستان کې د امریکايي ځواکونو او ناټو عمومي قوماندان جنرال جان نېکلسن مخکې ویلي و چې د طالبانو او روسیې ترمنځ یو ډول ارتباط ټینګ شوی دی.
د وال سټریټ ژورنال په لیکنه، که څه هم د روسیې د بهرنیو چارو وزارت ویندوې ماریا ذخارووا ټینګار کړی چې حکومت یې له طالبانو سره پټې خبرې نهدي کړي او د هغوی ملاتړ نهکوي، خو څرګنده کړې يې ده چې روسیه په افغانستان کې د سولې د ټینګښت غوښتنه لري او دا یوازې د داسې یوې پروسې په پایله کې امکان لري چې طالبان هم ګډون پهکې ولري.
د ورځپاڼې په ليکنه، روسي چارواکي باور لري چې د افغانستان حکومتي ځواکونو د داعش په وړاندې د مبارزې لپاره کافي هڅې نهدي کړې.
خو وال سټریټ ژورنال د یوه امریکايي جنرال په حواله لیکلي چې د داعش په اړه خبرې د روسیې لپاره یوه پلمه ده څو په افغانستان کې خپل سیاست عملي کړي.
ایشیاپسفیک خپرونې د "افغانستان ښايي د ریلګاډي په مرسته ځان له روسیې او اروپا سره ونښلوي اوخپله مواصلاتي شبکه پراخه کړي" تر سرلیک لاندې یوه مقاله خپره کړې ده.
په مقاله کې د افغانستان د کار او ټولنیزو چارو وزیر محمود بلیغ په حواله راغلي، د اقیني بندر او په ترکمنستان کې د "اته مرات" او "امام نظر" سیمې ته د ریلګاډي پټلۍ جوړېدل مهم پرمختګ دی ځکه دا هېواد به په نوي ډول، له ټولې سیمې سره ونښلوي.
ایشیاپسفیک د محمود بلیغ په حواله لیکلي، د رېلګاډي پټلۍ به افغانستان یوازې له منځنۍ اسیا سره نه بلکه په نهایت کې له روسیې سره ونښلوي او ان د اذربایجان او ګرجستان له لارې به یې لاس اروپا ته ورسوي.
بلیغ ویلي چې په ۲۰۱۷ میلادي کال کې به د اته مراد، امام نظر او اقینې ترمنځ د ریلګاډي په وسیله یو میلیارد ټنه سوداګریز مواد تبادله شي او بل کال به یې اندازه درې میلیارد ټنو ته لوړه شي.
د افغانستان حکومت غواړي چې په را روانو ۱۰ کلونو کې د ریلګاډي پنځه زره کېلومتره پټلۍ جوړه کړي او له مختلفو سیمو سره ځان ونښلوي.