د لاسرسي لېنکونه

د کندهار اوسېدونکي وايي، په دې وروستیو کې وسله‎وال غله زیات شوي چې له ماښام څخه وروسته د خلکو د لوټولو لپاره لارو او کوڅو ته راوځي.

د خلکو په وینا که غلو ته پیسې او د چلولو وسایط ورنه‎کړل شي نو د هغوی له‎خوا يې د وهلو ټکولو سره-سره ژوند ته هم خطر پېښېږي.

دوی له دولته غواړي چې کندهار کې د دغو پېښو د مخنیوي لپاره جدي اقدام وکړي.

دوی وايي:

"کله چې یو موټرګاټ پېرو، هغه دوی راڅخه غلا کړي کور ته ځو توفنګچه راباندې ونیسي پیسې راڅخه واخلي موټرګاټ راڅخه واخلي."

په عین وخت کې د کندهار مطبوعاتي دفتر د غلاوو د پېښو خبره مني او وايي چې پولیس‌یې د مخنیوي لپاره هڅې کوي.

د مطبوعاتي دفتر مسؤل صمیم خپلواک ازادي راډیو ته په خبرو کې له خلکو وغوښتل چې د پولیسو سره دې مرسته وکړي څو پولیس وکولای شي ټولنه کې امنیت ډاډمن او د غلاوو او نورو ورانکارو فعالیتونو مخنیوي وکړي.

ښاغلی خپلواک وايي:

"خلک باید د خپلې حوزې د امنیتي مسؤلینو سره همغږي ولري د نابلده خلکو په اړه وکیل یا امنیتي چارواکو ته اطلاع ورکړي."

کندهار ښار کې د غلا وروستۍ پېښه په چهار سو کې د پولیسو یوې پوستې ته نېږدې د زرګرۍ له یوه دوکان څخه د لسګونه کېلو ګرامه زرو غلا کول وه چې د خلکو اندېښنې يې زیاتې کړي.

وسله‎والو غلو د شپې له‎خوا په خورا مهارت سره د زرو یو دوکان لوټ کړ او له سیمې وتښتېدل.

د کندهار مطبوعاتي مسؤل صمیم خپلواک وايي چې د دغې پېښې په اړه لا هم تحقیقات روان دي او ډېر ژر به‌يې عاملین ونیول شي.

کندهار کې د وسله‎والو غلو د زیاتېدو خبره په داسې حال کې کېږي چې په دې ولایت په تېرو درېيو کلونو کې دغه ډول پېښې ډېرې کمې او په دې اړه د خلکو شکایتونه کم وو.

راپور: محمد صادق رښتینی

XS
SM
MD
LG