افغان امنیتي بنسټونه په راتلونکي کې د هغو کسانو د افشا کېدو پروګرام لري چې په افغانستان کې دي خو د وسلهوالو حملو تر شا لاس لري.
د دفاع وزارت د ویاند مرستیال محمد رادمنش د پنجشنبې په ورځ ازادي راډيو ته وویل چې حمله کوونکي تر ډېره د هېواد ضد ځينو داخلي کړیو په مرسته هدف ته رسیږي.
هغه وايي، حکومت پلان لري چې داسې کسان په راتلونکي کې خلکو ته ور وپیژني.
ښاغلي رادمنش زیاته کړه:
"چاودیدونکي مواد په افغانستان کې نه جوړېږي، دا مواد زموږ د یوه ګاونډي هېواد څخه دلته راځي او شته داسې کسان چې له دې بیروني بانډونو او تروریستانو سره مرسته کوي او تر هغو سیمو یې رسوي چې دوی پهکې تروریستي حملې غواړي، افغان دولت په راتلونکي کې خلکو ته د دې کسانو د ورپېژندلو پروګرام لري."
ښاغلی رادمنش وايي چې افغان حکومت د امنیتي پېښو تر شا ډېر کسان نیولي دي.
دا په داسې حال کې ده چې وسلهوال مخالفین توانیدلي چې یوازې په وروستی یوه میاشت کې د کابل په مهمو سیمو کې څو چاودنې یا وسلهوالې حملې وکړي.
په وروستیو اونیو کې وسلهوالو حملو او چاودنو د افغانستان په امریکايي پوهنتون، دفاع وزارت په څېرمه او شهرنو کې لسګونه کسان وژلي دي.
ښاغلی رادمنش وايي چې دفاع وزارت سره د شوي حملې په اړه چې پهکې د دویمې حوزې امرین هم وژل شوي لاهم څېړنې روانې دي.
خو د امنیتي چارو یو شمېرکارپوهان افغان حکومت په دې ګرموي چې تر پیښو وروسته کمېسیونونه ټاکي خو پایلې څرنګه چې د ملت غوښتنه ده نه روښانه کیږي.
د امنیتي چارو کارپوه اجمل سایس ازادي راډيو ته وویل حکومت مسؤل دی چې یا د خلکو امنیت خوندي کړي او یا لږ تر لږه د امنیتي پیښو تر شا څېرې افشا کړي.
سایس زیاته کړه:
"هغه ادارې چې د امنیتي پېښو د څېړلو او هغې سره د مبارزې مسؤلیت لري باید امنیتي موضوعات تر پایه تعقیب کړي که اول دا توان وي چې مخه یې ونیول شي غوره ده کنه که جرم واقع کېږي د جرم د واقع کېدو او داخلي اشخاصو په اړه باید کره کشفي معلومات تر لاسه او په وخت یې شریک کړي."
حکومتي چارواکو ډېر وخت په افغانستان کې د ناامنی تر شا د پاکستان لاس یاد کړی خو دا چې د دغو حملو او چاودنو لپاره وسلهوال د چا په مرسته تر هدفه رسېږي هغه څه دي چې تل یې د خلکو او ملي شورا د غړو اندیښنې راپارولي دي.
دوی ډېر وخت د حکومت دننه د پنځم ستون یادونه کړې او غوښتنه یې کړې چې داسې کسان چې هم حکومت خوري او هم د مخالفینو سره مرسته کوي باید په ګوته او ملت ته ور وپیژندل شي.
یوسف خان ځدراڼ