د لاسرسي لېنکونه

ټاکل شوې چې د امریکا مرستیال ولسمشر جوبایډن د روانې اګست میاشتې په ۲۴مه نېټه ترکیې ته سفر وکړي.

بایډن په داسې حال کې ترکیې ته ځي چې د تېرې میاشتې له ناکامې کودتا وروسته د حکومت پر سیاسي مخالفینو د ځپونکو اقداماتو له کبله د انقرې او لوېدیځ په اړیکو کې کړکېچ رامنځته شوی دی.

د ترکیې صدراعظم بن علي ییلدرېم او د سپینې ماڼۍ سرچینو پرون د بایډن سفر چې د جولای د ۱۵مې له کودتا وروسته ترکیې ته د یوه جګپوړي امریکايي مقام لومړی سفر دی تائید کړ.

ییلدرمې وویل، په امریکا کې د دېره دیني عالم فتح‌الله ګولېن د استرداد د غوښتنې په برخه کې د انقرې په وړاندې د واشنګټن په دریځ کې مثبت بدلون راغلی خو په دې اړه‌یې جزئیات ورنه‌کړل.

د ترکیې حکومت پر ګولېن تور لګولی چې د دې ناکامې کودتا په تنظیم کې یې لاس درلود.

انقره د ګولېن سازمان ترورېستي غورځنګ بولي او ترکیې ته د نوموړي د سپارلو غوښتنه کوي خو واشنګټن له دې مخکې ویلي دي چې د دې تورونو په اړه مؤثق اسناد غواړي.

ګولېن په کودتا کې د لاس لرلو تورونه رد کړي دي.

صدراعظم ییلدرېم همداراز یادونه وکړه چې د دې ناکامې کودتا په تړاو د قاضیانو، پوځیانو او ملکي مأمورینو په ګډون ټول یو اتیا زره څلورسوه او څلور نوي کسان یا له دندو لیرې شوي او یا یې دندې ځنډول شوي دي.

XS
SM
MD
LG