د امریکا ولسمشر جوبایډن ویلي، د اسراییلي مشرانو د نیولو د امر صادرولو لپاره د جرمونو نړیوالې محکمې د څارنوال کریم خان غوښتنه غندي او دا غوښتنه یې سپکونکې بللې ده.

کریم خان پرون (دوشنبه، ۳۱ ثور) په یوه بیان کې وویل چې دی د جنګي جرمونو له کبله د اسرائیلو د لومړي وزیر بنیامین نتانیاهو، د هغه د دفاع وزیر یواف ګالانت او د حماس د درېو مشرانو د نیولو وړاندیز کوي.

امریکا او اروپايي اتحادیه حماس د یوه تروریستي سازمان په توګه پیژني.

د رویټرز خبري اژانس د راپور له مخې، کریم خان دغه څرګندونې په غزه کې له اووه میاشتنۍ جګړې وروسته په یوه خپره کړې خبرپاڼه کې کړې دي.

ښاغلي بایډن په یوه بیان کې ویلي چې د اسراییلو او حماس تر منځ هیڅ ډول برابري نشته.

د امریکا د بهرنیو چارو وزیر انتوني بلېنکن هم خبرداری ورکړی چې دا اقدام به په غزه کې د اوربند په اړه خبرې اترې زیانمنې کړي.

اسراییلي او فلسطیني چارواکو تر دې مخکې د جنګي جرمونو تورونه رد کړي دي.

د رویټرز د راپور له مخې پر نتانیاهو او ګالنټ د جګړې د یوه اړخ په توګه د ملکي وګړو د وږي ساتلو، هغوی ته د کړاو رسولو او دغه راز د ملکیانو د وژنې تورونه پورې دي.

د حماس درې مشران هم د ورانکارۍ، وژنې، یرغمل نیونې، شکنجې، جنسي تیري او د تاوتریخوالي په نورو بڼو تورن شوي دي.

اوس، د محاکمې دمخه، د قاضیانو یوه هیئت پرېکړه کوي چې ایا شواهد به د دې جوګه وي چې د دغو چارواکو د نیولو امر صادر شي او که نه.

د ایران دولتي رسنیو راپور ورکړی چې د دغه هېواد ولسمشریزې ټاکنې به د راتلونکې جون میاشتې په اته ویشتمه ترسره شي.

دا په داسې حال کې ده چې د یکشنبې په ورځ د یوې هلیکوپټرې د غورځېدو په پېښه کې د ایران ولسمشر ابراهیم رییسي، د بهرنیو چارو وزیر حسین امیر عبدالهیان او یوشمېر نور چارواکي مړه شول.

د ازادي راډیو د ایران څانګې راډیو فردا د راپور له مخې، د ولسمشریزو ټاکنو لپاره دغه نیټه پرون د قضایه او مقننې قواوو د چارواکو او د نګهبان شورا په سلا مشورې وټاکل شوه.

د ایران د اساسي قانون له مخې د ولسمشر د مړینې یا استیضاح په صورت کې باید په ۵۰ ورځو کې نوی ولسمشر وټاکل شي.

ReplyReply allForward

Attendee panel closed

روسي ځواکونو پرون د اوکراین د خارکیف ښار په ځینو سیمو د بې پیلوټه الوتکو د برید په ګډون پراخې حملې کړي.

خارکیف له کیف وروسته د اوکراین دوهم لوی ښار دی.

خو سیمه ییزو چارواکو ویلي چې اوکرایني ځواکوني لا هم د ووو چانسک د سرحدي ښارګوټي شاوخوا ۶۰ سلنه برخه په واک کې لري.

د سیمه ییزې پوځي ادارې مرستیال رومن سمی نوخا ویلي، چې روسیې خپلې هڅې د ووف چانسک او لیپتسي سیمو پر نیولو متمرکزې کړې دي.

په عین حال کې، امریکا متحده ایالتونو د کییف د ملاتړ ډاډ ورکړی.

واشنګټن پر خپلو نورو متحدینو هم غږ کړی چې د اوکراین د دفاع لپاره د لا زیاتو وسلو ورکولو ته دوام ورکړي.

د امریکا د بهرنیو چارو وزارت تایید کړه چې ایران د هیلي کوپترې د لوېدو له پېښې وروسته له واشنګتن د همکارۍ غوښتنه کړې وه.

په هغه پېښه کې د ایران ولسمشر سیدابراهیم رییسي او اوه نور کسان ووژل شول.

د امریکا د بهرنیو چارو وزارت وویل چې امریکا بلآخره د لوجیستیکي دلایلو له امله په دغو حادثو کې له تهران سره مرسته ونه کړای شوه.

د امریکا د بهرنیو چارو د وزارت ویاند متیو میلر خبریالانو ته وویل چې د رئیسي مړینه د ایران په وړاندې د امریکا اساسي دریځ نه بدلوي.

دا نه ده څرګنده چې ایران له امریکا څخه په کومه لار مرسته غوښتې وه ځکه د امریکا او ایران تر منځ هیڅ ډول رسمي دیپلوماتیکې اړیکې نشته.

د اسراییل پوځ اعلان وکړ چې د غزې په تړانګه کې یې د یوه بل اسراییلي برمته مړی موندلی او خپل هېواد ته لېږدولی دی.

دا اسراییلي تبعه د تېر کال د اکټوبر په ۷مه پر اسراییل د حماس د سختدریځې ډلې د حملې په مهال برمته شوی و.

د پوځ ویاند ډانیل هیګاري وویل چې د غزې په تړانګه کې د اسراییلي پوځ او د اسراییلو د داخلي امنیت سازمان په ګډو هدفي عملیاتو کې د رون بنیامین مړی د درېیو نورو یرغمل شویو جسدونو سره یوځای موندل شوی دی.

د هویت د تایید لپاره عدلي طب ته استول شوی دی.

هغه زیاته کړه چې جسد پېژندل شوی او پوځ په دې اړه د رون بنیامین کورنۍ ته خبر ورکړی دی.

د بریتانیا سترې محکمې د جولین اسانج دا استدلال منلی چې په متحده ایالاتو کې د محاکمې په صورت کې به هغه د بیان د آزادۍ له حق څخه برخمن نه وي، او د ویکي لیکس بنسټ ایښودونکي ته یې اجازه ورکړه چې متحده ایالاتو ته د هغه د سپارلو د حکم لپاره د استېناف غوښتنه وکړي.

د سترې محکمې دوو قاضیانو په خپل حکم کې، چې نن د دوشنبې ورځ، د مې ۲۰مه اعلان شو، وویل چې اسانج د استیناف حق لري چې خپل دلیل وړاندې کړي چې په متحده ایالاتو کې د اسټرالیا د تبعه په توګه ورسره تبعیض کېږي.

له محاکمې سره هممهاله د جولین اسانج په سلګونو مینه وال د محکمې د ودانۍ مخته راټول شوي وو.

د محاکمې اصلي موضوع دا وه چې ایا د بریتانیا د سترې محکمې قاضیان له دې درکه پوره رضایت لري او که نه چې اسانج به د بیان د ازادۍ د حق په اړه د امریکا د اساسي قانون د لومړۍ مادې له حقه برخمن شي.

د نړیوالې جزايي محکمې څارنوال کریم خان نن دوشنبې وویل چې ده د جنګي جنایتونو د تورونو په خاطر د اسراییل د صدراعظم بنیامین نتنیاهو، دفاع وزیر یواف ګالانت او د حماس د درېیو مشرانو د نیونې حکمونه صادر کړي دي.

امریکا او اروپايي اتحادیه حماس تروریستي ډله ګڼي.

کریم خان همداراز د حماس د یوه مشر یحیي ابراهیم سنوار، د دې ډلې د پوځي څانګې قوماندان محمد المصري او د سیاسي دفتر د ريیس اسماعیل هنیه د نیولو حکمونه صادر کړي دي.

اوس به تر محاکمې مخکې د قاضیانو یو پلاوی دا تشخیصوي چې ایا شواهد د دوی د نیولو کېدو سبب کېږي او که‌نه.

اسراییلي او فلسطیني چارواکو تر دې مخکې د جنګي جنایتونو په اړه تورونه رد کړي دي.

د رویترز د راپور له مخې، د جرمونو نړیواله محکمه ۱۲۴ کسیزه محکمه د نیولو امر نه لري او امریکا او اسراییل له اوږدې مودې راهیسې د غزې د جګړې په اړه له تحقیقاتو سره مخالفت کوي.

د هندوستان غوره لیګ یا "آی‌پي‌ایل" د پلې‌اف پړاو ۴ لوبډلې معلومې شوې او دا مرحله به سبا سه شنبه د مې په ۲۱مه نېټه پیل شي.

د لیګ پړاو وروستۍ سیالي د یکشنبې په ورځ د می په ۱۹مه نېټه د سن رایزر حیدراباد او پنجاب کینګز لوبډلو ترمنځ وه چې حیدراباد وګټله او د نومرو په جدول کې یې دویم مقام ونیوه.

د یاد لیګ د نومرو په جدول کې سږ کال کلکته نایټ رایډرز، سن رایزر حیدراباد، راجستان رایلز او رویلز چلینجرز بنګلور په ترتیب سره یو په بل پسې په لومړي، دویم، درېیم او څلورم مقام کې راغلل او پلې‌اف پړاو ته ورسېدل.

سبانۍ سیالي به د کلکته نایټ رایډرز او سن رایزر حیدراباد ترمنځ په احمداباد ښار کې ترسره شي، چې ګټونکې به یې نېغ په نېغه پایلوبې ته ووځي او بایلونکې به یې پایلوبې ته د رسېدو یو بل چانس هم ولري.

د ناک اوټ په پړاو کې بیا رویلز چلینجر بنګلور له راجستان راویلز سره د مې په ۲۲مه نېټه په احمداباد ښار کې لوبه کوي.

د راپورونو له مخې د ناک اوټ دویمه سیالي به د مې په ۲۴مه نېټه د چینای په ښار کې ترسره شي او پایلوبه هم په یاد ښار کې د مې میاشتې په ۲۶مه نېټه پلان شوې ده.

د ویلو ده چې د افغانستان د شل اوریز نړیوال جام د منتخبې لوبډلې دوه لوبغاړي رحمن‌الله ګربز او فضل حق فاروقي لا هم په یاد لیګ کې پاتې دي.

د ایران ستر مذهبي مشر ایت الله علي خامنه‌اي د خپل ولسمشر ابراهیم رییسي له وژل کېدو وروسته پنځه ورځنې ملي ماتم اعلان کړی او محمد مخبر یې د ایران سرپرست ولسمشر ټاکلی دی.

د ازادي راډیو د ایراني څانګې راډیو فردا د راپور له مخې خامنه‌اي نن دوشنبه ویلي چې د ایران د اساسي قانون د ۱۳۱مې مادې له مخې محمد مخبر چې د ولسمشر لومړی مرستیال و، سرپرست ولسمشر ټاکل شوی دی.

خامنه‌اي ویلي، اجراییه قوه موظفه ده چې د مقننه او قضایه قوې د مشرتابه په همکارۍ تر پنځوسو ورځو پورې نوی ولسمشر وټاکي.

دا په تېرو ۲۴ ساعتونو کې د خامنه اي دویم پیغام دی.

هغه پرون هم ویلي وو چې ایراني ولس دې اندېښنه نه کوي او ټینګار یې کړی و چې د هېواد به چارو کې به یې هېڅ ډول خلل نه رامنځته کېږي.

د ایران ولسمشر ابراهیم رییسي، د بهرنیو چارو وزیر حسین امیر عبداللهیان او یو شمېر نور لوړپوړي چارواکي پرون د هیليکوپټرې د سقوط په پیښه کې ووژل شول.

تراوسه په رسمي ډول د پېښې لامل ښکاره نه دی، خو د ایران د بهرنیو چارو پخواني وزیر جواد ظریف ادعا کړې چې "د دغې غمیزې یو مقصر لوری" امریکا ده.

هغه ویلي، امریکا پر ایران د الوتکو او هوایي چلند د پرزو پلور تحریم کړی او اجازه نه ورکوي چې ایران د هوايي چلند یو ښه او پیاوړی سیستم ولري.

د امریکا د بهرنیو چارو وزیر انټوني بلېنکن د یکشنبې په ورځ ناوخته د تایوان نوي ټاکل شوي ولسمشر لای چینګ‌تي ته مبارکي ورکړه او په خبره یې واشنګټن غواړي په تایوان کې سوله او ثبات وساتي.

لای چې نن سهاریې لوړه وکړه د چین د پوځي فشارونو او د واشنګټن او بیجینګ د لانجو له کبله په سیمه کې له سیاسي کړکېچ سره مخامخ دی.

بلېنکن په یوه بیان کې وویل، د لای د هرکلي ترڅنګ، "موږ د تایوان خلکو ته هم مبارکي وایو چې یوځل بیا یې د خپل پیاوړي او مقاومت لرونکي ډیموکراتیک سیسټم پیاوړتیا ښودلې."

بلېنکن په تیرو اتو کلونو کې د متحده ایالاتو او تایوان ترمنځ د "پیاوړتیا" لپاره له واکه د تللي ولسمشر سای انګ وین د رول ستاینه هم وکړه.

د بلېنکن دا څرګندونې په داسې حال کې کوي چې چین د دوشنبې په ورځ وویل چې پر درېیو امریکايي دفاعي کمپنیو به تایوان ته د وسلو د پلور له امله بندیزونه ولګوي.

واشنګټن په ۱۹۷۹م کې تایوان په رسمیت وپیژند او له همغه وخته یې د وسلو لوی عرضه کوونکی پاته شوی دی.

چین بیا د واشنګټن له دغه دریځ سره موافق نه دی.