رحمت الله نبیل د پنجشنبې په ورځ د ملي امنیت عمومي ریاست له څوکۍ استعفا ورکړې ده.
دا خبره د ملي امنیت عمومي ریاست په یوه بیان کې رسنیو ته کړې ده.
اخوا یوې حکومتې سرچینې ازادي راډیو ته تایید کړه چې د ښاغلي نبیل استعفا منل شوې او د ملي امنیت عمومي ریاست اوپراتیفي مرستیال مسعود انداربي د دې ادارې د سرپرست په توګه ټاکل شوی دی.
د ارګ په نوم د جمهوري ریاست یوې رسمي فیس بوک پاڼې لیکلي چې ولسمشر غني د رحمت الله نبیل استعفا منلې ده.
رحمت الله نبیل چې له پنځو کلونو راهیسې د ملي امنیت عمومي ریاست څوکۍ مخته وړله له خپلې دندې د استعفا لاملونه د ده په خبره کاري محدودیتونه او بې باوري، له پالیسیو سره مخالفت او ورنه د استعفا په خاطر د ولسمشر پرله پسې شفاهي غوښتنې یادې کړي دي.
ښاغلي نبیل په خپلې استعفا کې چې د پنجشنبې په ورځ یې جمهوري ریاست ته لیږلې دا څرګندونې کړي دي.
د رحمت الله نبیل د استعفا خبر او د استعفا متن د ملي امنیت عمومي ریاست له رسنیو سره شریک کړی دی.
رحمت الله نبیل وروسته له هغه استعفا ورکړه چې هغه په رسمي فیس بوک کې د ولسمشر محمد اشرف غني په سیاستونو او د اسیا زړه هېوادونو په کنفرانس کې د ولسمشر د ګډون او ورنه د پاکستان د تود هرکلي او په افغانستان کې د پاکستان له خوا د حملو د مخته وړلو په اړه سخت انتقاد کړی و.
ښاغلي نبیل په خپلې استعفا کې همدا راز ویلي چې د افغانستان په کورنیو چارو کې د هغه په خبره د مغرضه هېوادونه په خاصه توګه د پاکستان له ښکاره لاسوهنو سره سره چې په هېواد کې یې سختو نا امنیو ته لمن ووهله د پام وړ پرمختګونه هم شوي دي.
په حکومت کې دننه سرچینو هم ازادي راډيو ته تایید کړې چې د رحمت الله نبیل استعفا منل شوې ده او پرځای يې د ملي امنیت ریاست اوپراتیفي مرستیال مسعود انداربي د دې ادارې د سرپرست په توګه ټاکل شوی دی.
د ارګ په نوم د جمهوري ریاست یوې رسمي فیس بوک پاڼې هم لیکلي چې ولسمشر محمد اشرف غني د رحمت الله نبیل استعفا منلې ده.
په دې فیس بوک پاڼه کې راغلي که څه هم ولسمشر په داسې جنګي شرایطو کې د ملي امنیت په رهبري کې د بدلون د راوستلو پلوی نه و خو د استعفا په خاطر یې د ښاغلي نبیل غوښتنه منلې ده او په یوه فوق العاده غونډه کې به جمهوري ریاست د ملي امنیت له ادارې دننه یو کس د دې ادارې د سرپرست په توګه وټاکي.
د رحمت الله نبیل د استعفا په اړه که څه هم تر اوسه زیات غبرګونونه نه دي ښکاره شوي خو د ولسي جرګې د کورني امنیت کمیسیون وايي چې په دې اړه به له ښاغلي نبیل او حکومتي چارواکو هرو مرو پوښتنه کوي.
د دغه کمېسیون یوه غړي صالح محمد صالح ازادي راډيو ته وویل چې ښاغلي نبیل د امنیت په برخه کې د افغانانو لپاره ښې لاسته راوړنې کړې وې:
"موږ مجبوره یو چې هم له حکومت او هم له ښاغلي نبیله چې علت د ده د استعفا به څه وي. موږ بیا هم د دغه ملاتړي یو. ځکه د ده ایمانداري د ده لاسته راوړنه. دا به هیڅکله هېره نه کړو. شپه او ورځ یې یوه کړې وه چې افغانستان په امنیتي لحاظ نړۍ او په خاصه توګه ګاونډيو ته وپيژني."
د ولسي جرګې یاد غړي همدا راز وویل چې کیدای شي د ښاغلي نبیل د استعفا تر شاه ګاونډي هېوادونه په خاصه توګه پاکستان لاس ولري.
رحمت الله نبیل له شاوخوا پنځو کلونو راهیسې د ملي امنیت ریاست څوکۍ مخته وړله چې د ملي وحدت حکومت هم د ملي امنیت د عمومي رییس په توګه کاندید او بیا ولسي جرګې د ۱۳۹۳ کال د دلوې په اتمه د ۱۵۴ مثبتو رایو په ورکولو سره دې څوکۍ ته وټاکه.
راپور - صفي الله ستانکزی
پخواني:
په هغې خبرپاڼه کې چې د ملي امنیت عمومي ریاست له خوا رسنیو ته استول شوې ده، راغلي دي چې د افغانستان د ملي امنیت عمومي رییس رحمت الله نبیل استعفا کړې ده.
دا په داسې حال کې ده چې له ولسمشرۍ ماڼۍ څخه یوې سرچینې چې نه غواړي ورڅخه نوم واخیستل شي ازادي راډیو ته وايي چې د ښاغلي نبیل استعفا منل شوې ده او د ملي امنیت عمومي ریاست اپراتیفي مرستیال د دغې ادارې د سرپرست په توګه ګومارل شوی دی.