د لاسرسۍ وړ لېنکونه

تازه خبر
یکشنبه ۲۹ مرغومی ۱۳۹۸ کابل ۰۰:۰۱

نړۍ

د روسيې سياسي مخالف الکسي ناوالني له زندانه خوشې شوى

د روسيې سياسي مخالف الکسي ناوالني

د روسيې د سياسي مخالف الکسي ناوالني ويانده وايي، وروسته له هغې چې د مسکو يوې محکمې د ناوالنې د بند د سزا د تمديد پېشنهاد رد کړ، نوموړى له زندان څخه خوشې شوى دى.

کيرا يارمېش د خپل ټوېټر په حساب کې د ناوالني عکسونه خپاره کړي چې نن سهار له توقيف ځاى څخه د راوتلو په حال کې دى.

په يوه عکس کې ناوالني ښکاري چې له دروازې دباندې د خبريالانو يوې ډلې ته خبرې کوي.

الکسي ناوالني چې د کرملين له انتقادکوونکو دى، تېره مياشت وروسته له هغې په ٣٠ ورځني بند محکوم شو چې له خلکو يې غوښتنه وکړه چې په يوه ممنوعه اعتراض کې برخه واخلي.

ناوالني د بند په وخت کې پر خپل مخ د داغونو له کبله روغتون ته هم لېږدول شوى و.

ډاکټرانو ويلي چې دغه داغونه يې پر مخ د حساسيت له کبله پيدا شوي دي.

خو د هغه ځيني ملاتړي شک لري چې دى ښايي مسموم کړاى شوى وي.

مکرون: پاریس په کشمیر کې روان وضعيت له نږدې څاري

د فرانسې ولسمشر ایمانوئل مکرون او د هندوستان صدراعظم نریندرا مودي

د فرانسې ولسمشر ایمانوئل مکرون د هندوستان صدراعظم نریندرا مودي ته ویلي چې پاریس په کشمیر کې روان وضعيت له نږدې څاري.

ښاغلي مکرون پر مودي ټینګار کړی چې د همالیا د دې وېشل شوې سیمې د دواړو غاړو د خلکو حقونو ته دې درناوى وکړي.

مکرون دا څرګندونې پرون پنجشنبه وروسته له هغې کړي چې له پاریسه بهر یې په شانتیلي سیمه کې له مودي سره وکتل.

مکرون ویلي، پلان لري چې ورته خبرې په راتلونکو څو ورځو کې د پاکستان له صدراعظم عمران خان سره هم وکړي.

د فرانسې ولسمشر زیاته کړې چې نریندرا مودي ته یې ویلي، دا د هند او پاکستان دواړو مسؤلیت دی چې په سیمه کې د داسې څه له ترسره کولو ډډه وکړي چې د ترینګلتیا د لا زیاتېدو سبب کېږي.

د ایمانوئل مکرون په وینا، فرانسه به دې ته ځير وي، څو ډاډمنه شي چې د کشمیر د اوربند د کرښې دواړو غاړو ته د ولسي خلکو ګټو او حقونو ته درناوی کېږي.

د هند تر ولکې لاندې کشمیر کې وروسته له هغې کړکېچ زیات شو چې نوي ډیلي د اګست مياشتې پر پنځمه له جمو او کشمیر څخه د کورواکۍ ځانګړی موقف واخیست او دې سیمې ته یې اضافي امنیتي ځواکونه واستول.

وروسته له هغې چې په ١٩٤٧میلادي کال کې هندوستان او پاکستان له بريتانيا خپلواکي واخيسته، کشمير د دواړو هېوادونو ترمنځ ووېشل شو.

دواړه هېوادونه د دې ټولې سيمې پر مالکيت دعوه لري.

په تېرو درېيو لسيزو کې د هند تر ولکې لاندې کشمير کې تر ٥٠ زرو زيات کسان وژل شوي دي.

د پولنډ او سلواکیا ترمنځ په تاترا غرونو کې تالندې پنځه تنه مړه کړي

د پولنډ او ګاونډي هېواد سلواکیا ترمنځ په تاترا غرونو کې تالندې د دوو ماشومانو په شمول لږترلږه پنځه تنه مړه کړي دي.

چارواکو پرون پنجشنبه وویل، د تالندې ډېرى قربانیان د پولنډ په خوا کې دي چې پر یوې لوړې غرنۍ سیمې تالنده پرېوتې ده.

په سلواکیا کې هم یو کس مړ شوی دی.

په هغه سیمه کې چې ډېر غرختونکي ورځي، سل تنه نور ټپیان شوي هم دي.

د پولنډ صدراعظم ماتيوس موراويه تسکي ویلي، د ځینو ټپیانو روغتیايي وضیعت نازک دى.

ژغورونکو ویلي، کله چې پر هغه وسپنيز زنځير چې ګرځندويان ورڅخه د غره څوکې ته د ختلو لپاره کار اخلي تالنده پرېوتله، ګڼ غرختونکي سیمې ته نږدې وو.

د چارواکو په وینا، مخکې له هغې چې سېلانیان غره ته روان شي، هوا صافه وه.

مېرکل په بالتیک کې د دېرش کاله مخکې اعتراض کوونکو درناوی وکړ

د جرمني صدراعظمه انګېلا مېرکل

د جرمني صدراعظمې انګېلا مېرکل پرون هغو سلګونه زره خلکو ته درناوی څرګند کړ چې دېرش کال مخکې یې د بالتیک په درېیو هېوادونو کې یې د پخواني شوروي اتحاد پرضد اعتراض کړی و.

د ۱۹۸۹ کال د اګست په ۲۳ مه د بالتیک په درېیو هېوادونو لاتویا، لیتوانیا او استونیا کې له یو میلیون زیات خلک د ۶۷۵ کیلومتره په اوږدوالي یوه لیکه کې د یوه انساناني ځنځیر په څېر ودرېدل او د اعتراض غږ یې اوچت کړ.

درې واړه هېوادونه هغه مهال د پخواني شوروي له جمهوریتونو وو.

مېرمن مېرکل په یوه ویډیويي پیغام کې چې د لاتویا په پلازمېنه ریګا کې په پرونیو ځانګړو مراسمو کې خپور شو، دا اعتراض چې د بالتیک د لارې یا د بالتیک د ځنځیر په نوم یادېږي، په شمالي، منځنۍ او ختیځه اروپا کې د ازادۍ او ډموکراسۍ په لاره کې یو مهم عاطفي ګام وباله.

د لاتویا ولسمشر ایګیلس لیویتس په خپله وینا کې وویل چې دا سوله ییزه مظاهره اروپا ته د ده د هېواد د بیا ستنېدو لاره وه.

ملګرو ملتونو د امازون د ځنګلونو د ساتنې غوښتنه کړې

د امازون ځنګل یوه برخه د سوځېدو په حال کې

په داسې حال کې چې په امازون ځنګلونو کې اور لاهم دوام لري، ملګرو ملتونو د دې ځنګلونو د ساتنې غوښتنه کړې او د فرانسې ولسمشر ویلي چې دا موضوع دې د نړۍ د سترو صنعتي هېوادونو د راروانې سرمشریزې په اجنډا کې شامله شي.

د ملګرو ملتونو سرمنشي انتونیو ګوترش پرون پنجشنبه وویل چې د دې اور د لګېدو له کبله سخت خواشینی دی.

هغه پر ټوېټر په یوه پیغام کې لیکلي، د نړیوال اقلیمي بحران په اوج کې د ځمکې د اکسجن د مهمې سرچینې او د طبیعي تنوع زیانمنېدل نشو زغملی.

هغه زیاتوي چې امازون باید خوندي شي.

ولسمشر ایمانوئل مکرون هم پر خپله ټوېټرپاڼه لیکي دي چې د امازون اور یو نړیوال بحران دی.

مکرون زیاتوي، امازون یا هغه سږي (ششونه) چې د ځمکې د اړتیا وړ په سلو کې شل اکسجن تولیدوي، د سوځېدو په حال کې دي.

د اوړي په موسم کې په امازون ځنګلونو کې اور طبیعي پېښه ده، خو د چاپېریال شنونکي د سږني پراخ اور پړه پر هغو کروندګرو اچوي چې د ورشوګانو د پراخولو لپاره ځنګلونه سوځوي.

امازون د جنوبي امریکا په مرطوبو برخو کې پرته پراخه ځنګلي سیمه ده چې د برازیل په ګډون په څو هېوادونو کې غځېدلې ده.

د ملګرو ملتونو امنیت شورا د امریکا د کروز ازمویلو په اړه غونډه کوي

ارشیف، د ملګرو ملتونو د امنیت شورا غونډه. د ۲۰۱۹ کال د اګسټ ۲۰مه.

د ملګرو ملتونو امنیت شورا نن (پنجشنبه ) د چین او روسیې په غوښتنه یوه پرانیستې غونډه کوي چې په‌کې به د امریکا د متحده ایالاتونو له‌خوا د یو کروز توغندي په ازمایښتي توغولو بحث وشي. امریکا دا ازموینه د اګسټ په ۱۹مه نېټه وکړه.

د روېټرز خبري اژانس وايي، د روسیې په غوښتنه کې راغلي چې دا غونډه "د امریکايي چارواکو د هغو بیانونو په اړه ده چې وايي پلان لري د منځني واټن ویشتونکو توغنديو ته پراختیا ورکړي او ځای پر ځای یې کړي."

په دې اړه د امریکا او روسیې ترمنځ د درې لسیزو زوړ تړون د دې میاشتې په لومړیو کې مات شو. د امریکا د اګسټ په دوهمه نېټه په رسمي توګه د منځني واټن ویشتونکو اټمي وسلو له هغه تړون ووته چې په ۱۹۸۷ م کال کې لاسلیک شوی و.

دا تړون له ځمکې څخه په ویشتل کېدونکو هغو کروز او بالیستیک توغندیو چې له ۵۰۰ کیلومترو تر پنځه نیم زره کیلو مترو پورې واټن ویشتلی شي، بندیز لګوي.

په ملګرو ملتونو کې د روسیې د سفیر مرستیال دمیتري پولینسکي ویلي "بېره له دې کبله ده چې ډېر ګواښونه شته. موږ د وسلو د یوې نوې سیالۍ په درشل کې یوو او غواړو چې پر دې موضوع بحث وکړو."

د امریکا د دفاع وزارت د دې اوونۍ پیل کې وویل، یو داسې توغندی یې توغولی چې په ۵۰۰ کیلومتره واټن کې هدف ویشتلی شي.

ټرمپ: نور هېوادونه باید د اسلامي دولت ډلې پر ضد جګړه وکړي

د امریکا ولسمشر ډونالد ټرمپ

د امریکا د متحده ایالاتو ولسمشر وایي، نور هېوادونه باید د اسلامي دولت ډلې پر ضد جګړه وکړي.

ده د روسیې، ایران، ترکیې، عراق او افغانستان نومونه یاد کړل، بیا یې وویل: "وګورئ هند هلته دی جګړه نه ورسره کوي، موږ جګړه ورسره کوو. پاکستان ورسره یو مخ نږدې دی. دوی ډېره لږه جګړه ورسره کوي، بېخي لږ. دا عادلانه نه‌ده او متحده ایالات اووه زره مایله لیرې پراته دي."

داعش ډلې په کابل کې د واده په یوه محفل کې د شنبې د ورځې د ځان وژونکي برید مسؤلیت ومانه. په دې چاودنه کې ۸۰ تنه ووژل شول.

د روان کال په پیل کې امریکایي ځواکونو په سوریه کې د داعش تر لاس لاندې سیمې ونیولې. بیا وروسته دا اندېښنې پیدا شوې چې د داعش وسله‌وال بېرته په عراق او سوریه کې د پیاوړي کېدو په حال کې دي.

د امریکا له‌خوا د کروز توغندي پر ازمویلو د پوتین انتقاد

د روسیې ولسمشر ولادیمیر پوتین

د روسیې ولسمشر ولادیمیر پوتین د فنلنډ د سفر پر مهال د امریکا د کروز توغندیو پر ازموینې انتقاد وکړ.

ولادیمیر پوتین په ورته وخت کې ګاونډي هېواد فنلنډ ته د روسیې د یوه پوځي مرکز دننه د چاودنې له امله د وړانګو د خپرېدو د ګواښ په خاطر ډاډ ورکړ.

پوتین دا خبرې پرون په پلازمېنه هلسنکي کې د فنلنډ له ولسمشر سوولي نینیستوپ سره د ګډې خبرې غونډې پر مهال وکړې.

د امریکا د متحده ایالاتو دفاع وزارت د یکشنبې په ورځ د کروز توغندي د ازموینې اعلان وکړ چې تر ۵۰۰ کیلو مترو پورې خپل هدف ویشتلی شي.

ډونالد ټرمپ ډنمارک ته خپل سفر وځنډاوه

د امریکا ولسمشر ډونالد ټرمپ

ډنمارک د امریکا د ولسمشر ډونالد ټرمپ دې پرېکړې حیران کړی دی چې دغه هېواد ته خپل رسمي سفر ځنډوي.

دا پرېکړه وروسته تر دې شوې ده چې د ډنمارک حکومت د امریکا دا وړاندیز رد کړ چې د ګرینلنډ سیمه د امریکا پر متحده ایالاتو خرڅه کړي.

د ډنمارک شاهي ماڼۍ پرون خپله حیرانیا څرګنده کړه او صدراعظمې میتي فریدریکسن وویل چې دا ناهیلې شوې ده.

ټاکل شوې وه چې ولسمشر ټرمپ د سپټمبر په دوهمه د ډنمارک د ملکې دوهمې مارګریت په بلنه ډنمارک ته ولاړ شي. تر دې سفر مخکې ولسمشر ټرمپ وړاندیز کړی و چې متحده ایالات دې ته لېواله دی چې ګرینلنډ واخلي. صدراعظمې فریدریکسن دا وړاندیز غیر معقول وباله.

ولسمشر ټرمپ پرون په ټویټر کې ډنمارک د یوه ځانګړي هېواد په توګه وستایه، خو دا یې هم لیکلي دي چې دی د اوس لپاره نه‌غواړي چې ډنمارک ته سفر وکړي ځکه چې فریدریکسن د ګرینلنډ د پلورلو په برخه کې له بحث سره لېوالتیا نه‌لري.

په افغانستان کې د ۲ امریکايي سرتېرو وژل کېدل تأیید شو

ارشیف، په افغانستان کې یو وژل شوی امریکايي سرتېری

د ناټو په مشرۍ د غوڅ ملاتړ مأموریت پرون ناوخته دا خبره تأیید کړه چې دوه پوځیان‌یې په افغانستان کې وژل شوي دي.

د غوڅ ملاتړ مأموریت په یوه بیان کې ویلي دي چې دوه امریکایي سرتېري د چهارشنبې په ورځ په افغانستان کې وژل شوي دي.

په دې بیان کې نور معلومات نه‌دي ورکړل شوي چې دا عسکر چېرته وژل شوي دي.

د روان میلادي کال له پیله تر اوسه ۱۶ امریکایي سرتېري په افغانستان کې وژل شوي دي.

د امریکا د بهرنیو چارو وزیر یو ځل بیا ایران په ترهګرۍ تورن کړ

د امریکا د متحدو ایالتونو د بهرنیو چارو وزیر مایک پامپیو

د امریکا د متحدو ایالتونو د بهرنیو چارو وزیر مایک پامپیو پرون د ملګرو ملتونو د امنیت شورا غونډې ته چې د منځني ختیځ د سولې او پر امنیتي چلنچونو بحث ته ځانګړې شوې، په مشخص ډول د ایران نوم واخیست او تهران یې بیا تورن کړ.

پامپیو وویل، تهران او نیابتي ځواکونه یې د عراق، لبنان، سوریې او یمن په کړکېچونو کې ترهګرۍ او ناکرارۍ ته لمن وهي چې ناوړه بشري عواقب یې رامنځته کړي دي.

هغه وویل چې که ملګري ملتونه پرېږدي چې پر ایران د وسلو د پلورلو بندیز د ۲۰۲۰ کال په اکتوبر کې پای ته ورسېږي، تهران به له محدودیت پرته ګډوډي رامنځته کړي.

پر ایران د ملګرو ملتونو له خوا د لګول شویو بندیزونو په ترڅ کې د ایران د سپاه پاسدران انقلاب د قدس د ځواک پر قوماندان قاسم سلیماني د سفر بندیز هم لګول شوی دی.

پر نورو ۲۳ ایراني چارواکو هم د سفر بندیزونه لګول شوي دي.

د ایران لپاره د امریکا ځانګړي استازي براین هوک د مایک پومپیو له دې څرګندونو مخکې پرون په نیویارک کې خبریالانو ته وویل چې د ده په باور د ملګرو ملتونو له خوا لګول شوي بندیزونه ډېر مهم ځکه دي چې پر ایران د وسلو د پلورلو او هم یې پر چارواکو د سفر بندیزونه دوام ومومي.

هندي پولیس: په کشمیر کې یو مشکوک سخت دریځی وژل شوی

هندي ځواکونه په کشمیر کې

د هند پولیس وایي، امنیتي ځواکونو په کشمیر کې له مشکوکو سخت دریځو سره د ډزو په تبادله کې یو مشکوک سخت دریځی وژلی دی.

دا په روانه میاشت کې له هغه مهال راهیسې چې نوي ډیلي د هند تر کنټرول لاندې کشمیر څخه ځانګړی موقف بېرته واخیست، لومړی نښته ده.

پولیسو ویلي چې په دې پېښه کې چې د هند تر کنټرول لاندې کشمیر کې د بارامولا په سیمه کې شوې، د پولیسو یو افسر هم وژل شوی دی.

په کشمیر کې په زرګونو اضافي ملېشې ځای پرځای شوي چې بغاوت کنټرول کړي.

پولیسو وویل چې دغو ملېشو پرون د بارامولا ښارګوټي په زړې سیمه کې عملیات وکړل.

پاکستان بیا ویلي چې له بېلې شوې کرښې اخوا د هندي ځواکونو له خوا په ډزو کې درې ملکیان وژل شوي دي.

د هند پرېس ټرسټ خبري اژانس د چارواکو له قوله خبر ورکړی چې ویلي يې دي، تېره ورځ یو هندي سرتېری په هغو ډزو کې وژل شوی او څلور نور ټپیان شوي چې پاکستاني ځواکونو بېلې شوې کرښې ته نږدې په پرتو پوستو او کلیو باندې کړې دي.

د هند تر کنټرول لاندې کشمیر کې د ځپونکو امنیتي اقداماتو او پرمخابراتي او مواصلاتي شبکو د لګول شویو بندیزونو په ترڅ کې لږترلږه ۲ زره درې سوه کسان نیول شوی دي.

دغه اقدامات په سیمه کې د نا ارامیو د مخنوي لپاره شوي دي.

دغه خبر د کشمیر د پولیسو د لوړپوړو افسرانو او د نیول شویو کسانو د شمېرو پر اساس رسنیو ورکړی دی.

د نیول شویو کسانو اکثره یې ځوانان دي او هم پکې د هند او د هند تر کنټرول لاندې د کشمیري مشرانو ضد اعتراض کوونکي شامل دي.

ډنالد ټرمپ د هند او پاکستان ترمنځ د منځګړیتوب وړاندیز کړی

د امریکا ولسمشر ډنالد ټرمپ د هند او پاکستان ترمنځ د منځګړیتوب وړاندیز کړی.

نوموړي په کشمیر کې چې د هند او پاکستان ترمنځ لانجمنه سیمه ده او په وروستیو کې د دواړو هېوادونو د پوځیانو ترمنځ د ‌ډزو د تبادلې شاهده ده، وضعیت خطرناک بللی دی.

ډنالد ټرمپ د سې شنبې په ورځ خبریالانو ته وویل، د هند له صدراعظم نریندرا مودي سره به په دې موضوع د دې اوونۍ په پای کې خبرې وکړي.

تمه کېږي چې دواړه مشران د فرانسې په جنوب لوېدیځ کې د اوو صنعتي هېوادونو د سرمشریزې پر مهال سره وګوري.

کله چې د اګست په ۵مه نوي ډیلي د هندي کشمیر هغه کورواکي لغوه کړه چې د هند اساسي قانون ورکړې وه او دغلته یې ځانګړي امنیتي تدابیر ونیول، د پاکستان او هندوستان ترمنځ ترینګلتیا زیاته شوه.

د هند صدارعظم ویلي، د کشمیر د کورواکۍ ختمول به دغلته د ترهګرۍ او بېلتون پالنې په ورکاوي کې مرسته وکړي.

د هند له دې اقدام وروسته پاکستان له هند سره د سوداګرۍ او ټرانسپورت اړیکې پرې کړې او د هندوستان سفیر یې له اسلام اباد وویست.

هند او پاکستان په خپلو کې له درې جګړو دوه د کشمیر پر سر کړي دي.

کشمیر چې اکثریت وګړي یې مسلمانان دي، دا مهال د هند او پاکستان ترمنځ وېشل شوی، خو دواړه هېوادونه یې د بشپړ مالکیت ادعا کوي.

ولسمشر ټرمپ دا سیمه ډېره پېچلې سیمه بللې او ویلې یې دي چې د منځګړیتوب لپاره به پوره هڅه وکړي.

په جولای میاشت کې ډنالد ټرمپ ویلي وو چې مودي ترې د کشمیر په کړکېچ کې د منځګړیتوب غوښتنه کړې، خو نوي ډیلي دا ادعا رد کړه.

ټرمپ غواړي چې جان سالیوان په روسیه کې د امریکا سفیر وټاکي

د امریکا د بهرنیو چارو وزارت مرستیال جان سالېوان

د امریکا ولسمشر ډنالد ټرمپ ویلي، د بهرنیو چارو وزارت مرستیال جان سالېوان په مسکو کې د واشنګټن ډېر ښه راتلونکی سفیر کېدی شي.

په مسکو کې د امریکا اوسني سفیر جان هُنټسمن د دې میاشتې په پیل کې خپله استعفا اعلان کړه.

ټرمپ دا خبره د سې شنبې په ورځ سپینې ماڼۍ ته د رومانیا د ورغلي ولسمشر کلاوس یوهانیس سره د لیدو پر مهال خبریالانو ته وکړه.

ولسمشر ټرمپ دا څرګندونې وروسته له هغې کوي چې د نیویارک ټایمز ورځپاڼې په دې اړه په یوه راپور کې وویل، تمه ده چې ټرمپ به سالېوان پر دې ډیپلوماتیک پوسټ وټاکي.

دا په داسې حال کې ده چې د امریکا او روسیې ترمنځ اړیکې په یو حساس پړاو کې دي.

په مسکو کې د واشنګټن اوسني سفیر هُنټسمن د اګست په اتمه نېټه په یوه لیک کې وویل، نوموړی به د اکتوبر په درېیمه نېټه له دوه کلن ماموریت وروسته په مسکو کې د سفیر په توګه له دندې استعفا وکړي.

د امریکا د اوتا ایالت خبري رسنیو په څو راپورونو کې ویلي چې د دې ایالت پخوانی والي هنټسمن به د خپلې پخوانۍ دندې د بېرته ترلاسه کولو لپاره په انتخاباتو کې برخه واخلي.

د سې شنبې په ورځ نیویارک ټایمز ورځپاڼې په خپل راپور کې د یو شمېر پخوانیو حکومتي چارواکو له خولې ویلي چې د دوی لپاره په مسکو کې د سفیر په توګه د سالېوان انتخاب د نوموړي محدودې ډیپلوماتیکې تجربې ته په پام حیرانوونکی دی.

پامپیو: د داعش د حملو کولو توان تر ډېره حده له منځه تللی

د امریکا د بهرنیو چارو وزیر مایک پامپیو

د امریکا د بهرنیو چارو وزیر تائید کړې چې د اسلامي دولت وسله والې ډلې په ځینو سیمو کې خپل قدرت زیات کړی، خو ویلي یې دي چې د حملو کولو توان یې تر ډېره حده له منځه تللی دی.

د امریکا د بهرنیو چارو وزیر مایک پامپیو له (سي بي اېس) ټلوېزیون سره په مرکه کې ویلي چې وضعیت پېچلی دی، خو ځیني سیمې شته چې هلته د داعش وسله واله ډله د درېيو یا څلورو کلونو مخکې په پرتله پیاوړې شوې ده.

د امریکا د متحدو ایالاتو ولسمشر ډونالد ټرمپ په ډېسمبر میاشت کې ویلي وو چې امریکايي ځواکونه توانېدلي دي چې په سوریه کې د داعش وسله وال وځپل شي.

د امریکا د بهرنیو چارو وزیر مایک پامپیو هم ویلي چې د اسلامي دولت په نوم د وسله والې ډلې د ځپلو لپاره د نړۍ د اتیا هېوادونو پلان بریالی و، خو د دې ګواښ شته چې د داعش او القاعده په څېر افراطي ډلې بیا را څرګندې شي.

نور راوښيه

XS
SM
MD
LG