د لاسرسۍ وړ لېنکونه

تازه خبر
دوشنبه ۳۰ مرغومی ۱۳۹۸ کابل ۰۲:۴۲

نړۍ

روس‌پلوه بېلتون غوښتونکو سره په شخړه کې ۴ اوکرایني سرتېري وژل شوي

اوکرایني ټانکونه

اوکراين وايي څلور سرتېري يې د دغه هېواد په ختيځ کې له روس‌پلوه بېلتون غوښتونکو سره په شخړه کې وژل شوي، او څلور نور ژوبل دي.

د اوکراين دفاع وزارت نن وويل، ٣ سرتېري هغه وخت ووژل شول او ٣ نور ټپيان شول چې بېلتون غوښتونکو جګړه‌مارو د سپکو او درنو وسلو ډزې ورباندې وکړې.

د وزارت په حواله دغو بېلتون غوښتونکو په تېرو ٢٤ ساعتونو کې د اوربند له موافقې ١٦ وارې سرغړونه کړې ده.

دغه وزارت په جلا اعلاميه کې ويلي، د بېلتون غوښتونکو له‌خوا يوه توغول شوي توغندي کې چې د اوکرايني سرتېرو يو موټر يې په نښه کړ، څلورم سرتېرى ووژل شو او بل ټپي شو.

د مېنسک د موافقو له مخې د ټانکونو ضد ميزايلو په ګډون درنې وسلې منع دي.

د اوکراين دفاع وزارت ويلي وسله‌والو ځواکونو يې لږ تر لږه يو بېلتون غوښتونکى وژلى او بل تن ټپي کړى دى.

له ٢٠١٤م کال راهيسې د اوکراين په ختيځ کې د روس‌پلوه بېلتون غوښتونکو او د اوکراين د دولتي ځواکونو ترمنځ شخړه کې شااوخوا ١٣٠٠٠ کسان وژل شوي دي.

سوډان کې د دوه ورځنیو فشارونو په نتیجه کې ۶۰ کسان وژل شوي

ارشیف، سوډان کې مظاهره

په سوډان کې پر مظاهره‌چيانو د پوځيانو او ملېشه ځواکونو د دوه ورځنیو فشارونو په نتيجه کې ٦٠ کسان وژل شوي دي.

د سوډاني ډاکترانو مرکزي کمېټې نن وويل، ٤٠ کسان تېره دوشنبه هغه وخت ووژل شول چې په خارطوم کې د پوځ مرکزونو ته نږدې د يوې اوونۍ پرلت د تيت‌وپرک کولو لپاره له زورزياتي کار واخيستل شو.

د دې ټولنې په خبره تر ٣٠٠ زيات نور کسان ټپيان شوي دي، خو د ټپيانو د شمېر په اړه د کره معلوماتو راټولول ځکه ګران کار دى چې انتقالي نظامي شورا د دغه هېواد په زياتو برخو کې انټرنټي خدمات قطع کړي دي.

له کله چې دوه مياشتې مخکې ولسمشر عمر البشير له واک څخه وپرځول شو، دغه انتقالي نظامي شورا پر سوډان واکمني لري.

دغې نظامي شورا ويلي، هغه ټولې مخکېنۍ موافقې يې فسخه کړي چې د مظاهره‌چيانو له رهبرانو سره ورباندې سلا شوې وه.

دغه موافقې ملکي واکمنۍ ته د انتقال په اړه وې.

وسله‌والو د مصر په سینا ټاپو وزمه کې ۱۰ امنیتي ځواکونه وژلي

ارشیف، د مصر ښار یوه برخه

مصري چارواکو ویلي چې وسله‌والو کسانو په سینا ټاپو وزمه کې ۱۰ امنیتي ځواکونه وژلي دي.

وسله‌والو پرون سهار د امنیتي ځواکونو په یوه پوسته برید کړی او دا پوځیان‌یې ووژل.

پېښه په الارش ښار کې هغه وخت شوې چې خلک د اختر د لمانځه د ادا کولو لپاره وتلي و.

د دوى په وينا په حمله کې دوه پوليس افسران او اته پوليس سرتېري وژل شوي دي.

حمله کوونکو هڅه کړې وه چې د امنیتي ځواکونو موټر هم وتښتوي، خو د چارواکو په خبره د یوه هوایي برید هدف ګرځېدلي او پنځه تنه‌یې وژل شوي.

د دې پېښې مسؤليت تر اوسه چا پر غاړه نه‌دى اخيستى.

مصر د سينا په شمال کې له کلونو راهيسې له هغو دېره وسله‌والو سره چې له داعش سره ارتباط لري، په جګړه بوخت دى.

د اروپايي ټولنې غړي، د شمالي مقدونیا د غړیتوب په اړه خبرې کوي

د اروپايي کمېسیون رئیس ژان کلوډ یونکر

ټاکل شوې چې اروپايي ټولنه به د جون په ۱۸مه نېټه په دې ټولنه کې د شمالي مقدونیا په شمولیت بحث وکړي.

د اروپايي کمېسیون رئیس ژان کلوډ یونکر د سې شنبې په ورځ تأیید کړه چې دوه اوونۍ وروسته د لوکزامبورګ په غونډه کې په دې اړه خبرې کوي.

رومانیا چې دا مهال د اروپايي ټولنې دوره‌اي مشري کوي وايي، د شمالي مقدونیا د غړیتوب په اړه بحث د جون د میاشتې په اجنډا کې شامل دی.

دا اعلان په داسې حال کې کېږي چې اروپايي کمېسیون سپارښتنه کړې چې په اروپايي ټولنه کې دې د شمالي مقدونیا او البانیا د غړیتوب لپاره خبرې اترې ژر تر ژره پیل شي.

د دې کمېسون په وینا دواړو هېوادونو په خپلو چارو کې پراخ اصلاحات راوستي دي.

شمالي مقدونیا دوه میلیونه او البانیا بیا دوه میلیونه او ۸۰۰ زره نفوس لري. دواړه هېوادونه د ختیځې اروپا د بالکان سیمه کې پراته دي.

امریکا ته په جاسوسۍ تورن یو لبنانی د ایران له زندانه خوشې کېږي

نزار زکا د ټکنالوژۍ یو متخصص چې امریکا ته د جاسوسۍ په تور په ایران کې په ۱۰ کاله بند محکوم شوی و.

د لبنان حکومت تأیید کړې چې د دې هېواد یو وګړی د ایران له زندان څخه خوشې کېږي.

نزار زکا چې د ټکنالوژۍ یو متخصص دی، د امریکا متحده ایالاتو ته د جاسوسۍ په تور په ۱۰ کاله بند محکوم شوی و.

د لبنان د بهرنیو چارو وزارت د سې شنبې په ورځ وویل، زکا د دې هېواد په غوښتنه بخښل شوی او د اختر په ورځو کې به خوشې شي.

تر دې مخکې د نزار زکا وکیل ماجد دمشقیه ویلي و، د ولسمشر میشل عون او صدراعظم سعد حریري په شمول د لبنان د لوړپوړو چارواکو له منځګړیتوب وروسته تمه لري چې مؤکل به‌یې ژر له زندانه خوشې شي.

زکا چې د ۲۰۱۵ م کال په سپټمبر کې په تهران کې نیول شوی و، ۵۲ کلن دی او کلونه‌یې په واشنګټن کې تېر کړي دي.

نوموړی د امریکا ګرین کارډ یا هلته د دایمي اوسېدو اجازه هم لري.

نوموړی په ۲۰۱۶ م کال کې په ۱۰ کاله بند محکوم شو.

زکا پر ده لګېدلي امریکا ته د جاسوسۍ ټول تورونه رد کړي دي.

ټرمپ: د امریکا او بریتانیا لویه اندېښنه د ایران د اټمي وسلې ګواښ دی

د بریتانیا صدراعظمه ترزا مې (ښۍ) د امریکا له ولسمشر ډونالد ټرمپ سره د خبري کنفرانس پر مهال

د امریکا ولسمشر وايي، واشنګټن او لندن غواړي ډاډمن شي چې ایران اټمي وسلې نه‌جوړوي او د ترهګرۍ ملاتړ پای ته رسوي.

ډونالد ټرمپ بریتانیا ته د خپل سفر په ترڅ کې د سې شنبې په ورځ د بریتانیا له صدراعظمې ترزا مې سره په یوه خبري غونډه کې وویل، د امریکا او بریتانیا یوه لویه اندېښنه د اټمي وسلو ګواښونه دي.

ښاغلی ټرمپ زیاتوي: "د هغو فوري ګواښونو په منځ کې چې دواړه هېوادونه ورسره مخ دي، یو ګواښ د اټمي وسلو پراختیا ده او ښايي دا تر ټولو لوی ګواښ واوسي. د امریکا متحده ایالات او بریتانیا غواړي ډاډمن شي چې ایران اټمي وسلې نه‌جوړوي او د ترهګرۍ ملاتړ نه‌کوي او لاس په‌کې نه‌لري."

په وروستیو کې د ایران او امریکا ترمنځ ترینګلتیا زیاته شوې ده.

واشنګټن یو کال مخکې له ایران او نړۍ د شپږو پیاوړو هېوادونو ترمنځ له لاسلیک شوي اټمي تړون ووت او پر دې هېواد یې بېرته له سره بندیزونه ولګول.

سره له دې چې بریتانیا د امریکا مهم متحد هېواد دی، خو ویلي یې دي چې د ایران سره په ۲۰۱۵ م کال کې لاسلیک شوی اټمي تړون ته به ژمن پاتې شي.

د امریکا دوه نورو متحدانو فرانسې او جرمني هم ویلي چې له ایران سره له دې اټمي تړون نه‌وځي.

د چین ولسمشر له پوتین سره په کرملېن کې ګوري

د چین ولسمشر شي جین پنګ

د چین ولسمشر شي جین پنګ نن روسیې ته تللی دی.

روسي چارواکو د هغه سفر د ملګرتیا او اقتصادي اړیکو په برخه کې یو نوی فصل بللی.

شي جین پنګ له ولسمشر ولادیمیر پوتین سره په کرملېن ماڼۍ کې ګوري.

تمه ده چې د چین ولسمشر وروسته د روسیې د ولسمشر ولادیمیر پوتین په کوربه‌توب د سنت پټرزبورګ د اقتصاد په فورم یا مجمع کې ګډون وکړي.

د روسیې د ولسمشرۍ ماڼۍ کرملېن د بهرنۍ تګلارې سلاکار یوري اوشاکوف ویلي چې "د شي سفر زموږ په دوه اړخیزو اړیکو کې یوه مهمه مسله ده."

د روسیې خبري رسنیو د اوشاکوف په حواله ویلي چې د روسیې او چین ولسمشران به د نړیوالۍ ملګرتیا او ستراتېژیکو همکاریو یو تړون لاسلیک کړي.

سټولټنبرګ: د افغان ځواکونو پياوړتیا، افغانستان سولې ته رسوي

د ناټو عمومي منشي ینس سټولټنبرګ

د ناټو عمومي منشي وايي، د افغان ځواکونو مالي ملاتړ او تجهیز د افغانستان د جګړې د سوله‌ییز هواري فرصتونه پیاوړي کوي.

ینس سټولټنبرګ د سې شنبې په ورځ په بروکسل کې د ناټو د غړو هېوادونو د استازو غونډې ته وویل، د افغان ځواکونو پیاوړتیا افغانستان یوې داسې سولې ته رسوي چې د دې هیواد ټول وګړي یې هیله لري.

دا غونډه تر ۲۰۲۴ م کال پورې د افغان ځواکونو د مالي ملاتړ د دوام د ژمنې د پخلي لپاره جوړه شوې وه.

په غونډ کې د ناټو غړو او متحدانو یو وار بیا ډاډ ورکړ چې د نړیوال ملاتړ د صندوق له لارې به د افغان ځواکونو تمویل ته دوام ورکړي.

د ناټو عمومي منشي ینس سټولټنبرګ وویل، د روان کال د مې میاشتې تر ۱۵مې نېټې پورې، بسپنه ورکوونکو هېوادونو د افغان ځواکونو د ملاتړ له صندوق سره دوه میلیارده او ۸۰۰ میلونه ډالره مرسته کړې ده.

افغانستان څه باندې ۳۰۰ زره امنیتي او دفاعي ځواکونه لري چې لویه برخه‌یې له وسله‌والو طالبانو، داعش وسلوالې ډلې او شا او خوا شلو نورو ترهګرو ډلو سره په جګړه بوخت دي.

خلیل‌زاد له جرمني چارواکو سره د سولې پر بین‌الافغاني خبرو، خبرې وکړې

د افغانستان د سولې او پخلاینې لپاره د امریکا خاص استازی زلمی خلیل‌زاد له ازادي راډیو سره د یوې مرکې پر مهال

د افغانستان د سولې او پخلاینې لپاره د امریکا خاص استازي زلمي خلیل‌زاد له لوړپوړو جرمني چارواکو سره د افغان سولې او بین‌الافغاني خبرو په اړه خبرې کړي.

خلیل‌زاد نن سهار په ټویټر باندې لیکلي چې د جرمني په پلازمېنه برلین کې یې د پرون او وړمې ورځې خبرې رغنده وې.

خلیل‌زاد ویلي چې د جرمني د ملي امنیت او بهرنیو چارو له سلاکار جان هکر، د بهرنیو چارو له مرستیال وزیر اندریاس میکایلیس او د افغانستان لپاره د جرمني له خاص استازي مارکوس پوتزل سره‌یې لیدلي.

هغه ویلي له جرمني چارواکو سره‌یې په دې خبرې کړي چې څه کولای شو څو په افغانستان کې دایمي سوله راشي.

ښاغلي خلیل‌زاد همداراز ویلي چې د جرمني په کوربه‌توب د افغان سولې لپاره د امریکا-اروپا د یوه ګروپ غونډه هم وشوه.

هغه ویلي چې د دغه ګروپ د غونډې تمرکز د سولې پروسه او راتلونکې بین‌الافغاني خبرې وې چې کوربه‌توب یې جرمني او قطر کوي او د اسلو په مجمع کې هم پرې بحث کېږي.

د افغانستان د سولې لپاره د امریکا ځانګړي استازي زلمي خليلزاد سيمې او څو نورو هېوادونو ته خپل اووم سفر پيل کړى دى.

هغه تر جرمني مخکې د يکشنبې په ورځ په پاکستان کې و او ټاکل شوې افغانستان، متحده عرب اماراتو، قطر او بلجيم ته هم لاړ شي.

تمه ده دی افغانستان، بلجیم، عربي متحده اماراتو او قطر ته هم سفر وکړي.

خليلزاد د طالبانو له استازو سره شپږ وارې خبرې کړې دي، خو تر اوسه دغه ډله د افغانستان له حکومت سره مخامخ خبرو ته نه‌ده حاضره شوې.

چین د "تيانانمِن" په میدان کې امنتیي تدابیر زیات کړي دي

آرشیف، معترضین په "تيانانمِن" میدان کې. June 4, 1989

چين د پيکنګ په تيانانمِن څلور لاري کې د لاريون په خونړۍ توګه د ځپنې د دېرشمې کليزې پر مهال نن سې شنبه امنیتي تدابیر زيات کړي دي.

ویل کېږي په هغه ورځ سلګونو او ښايي زرګونو کسان ووژل شول چې د ډموکراسي په پلوي يې لاریون کړی وو.

محصلین او کارګران د ۱۹۸۵میلادي کال په پسرلي کې په تيانانمِن میدان کې راټول شوي وو او په چین کې د فساد د پای او دموکراټيک بدلون غوښتنه کړې وه.

تر اووه اوونۍ اعتراض وروسته د چین کمونېست حکومت د اعتراض کوونکو پر ضد سرتيري او ټانکونه ولېږل چې په نتيجه کې يې تيانانمِن ته پر تلونکو سرکونو سلګونو لاريون کوونکي او پر لاره تېرېدونکي ووژل شول.

چين دا ورځ په رسمي توګه نه یادوي.

د اروپايي ټولنې رئيسې فدريکا موګيريني نن له چينه په يوه اعلاميه کې وغوښتل چې د اعتراض کوونکو نيول کېدل او وژل کېدل دې ومني.

دې ويلي، د چين د حکومت له‌خوا د وژل شويو او په بې رحمۍ د ځپل شويو شمېر هېڅ‌کله په رسمي توګه نه‌دی تأييد شوی.

د امریکا د بهرنیو چارو وزیر مایک پامپیو هم له چينه غوښتي چې د دې پيښې په اړه دې حقیقت ووايي.

په واشنګټن کې د چین سفارت د پامپیو خبرې د چین په کورنيو چارو کې لاسوهنه بللي دي.

د ازبکستان ولسمشر د کوچني اختر په مناسبت لسګونو بندیان خوشې کوي

د ازبکستان ولسمشر

د ازبکستان ولسمشر شوکت میر ضيایف امر کړی چې د کوچني اختر په مناسبت به لسګونو بندیان خوشې کړي.

د ازبکستان دولتي رسنيو راپور ورکړی چې د ولسمشر د فرمان پر اساس ۳۶۱ بندیان به له زندانه خوشې شي او د ۲۱۴ نورو زندانيانو د بند موده به کمه شي.

تر دې مخکې د ازبکستان پخواني ولسمشر اسلام کریموف هېڅ‌کله د اختر په ورځو کې د زندانيانو د راخوشې کولو امر نه‌وو کړی.

ازبکستان تر دېرش میليونه زیات نفوس لري او د پخواني شوروي اتحاد له پنځو غړیو هېوادونو څخه دی چې اسلامي دودونه مراعت کوي.

لسګونه زره کسان په لندن کې اعتراضیه لاریون کوي

ولسمشر ټرمپ په لندن کې

تمه ده چې د متحدایالاتو له ولسمشر ډونالډ ټرمپ سره د بریتانیا د صدراعظمې ټرزا مې د خبرو له پیل مخکې نن لسګونه زره کسان په لندن کې اعتراضیه لاریون وکړي.

د مې او ټرمپ خبرې نن ماسپښین په پام کې دي.

له دې یوه ورځ مخکې ټرمپ ته د ملکې الېزابت په کوربه‌توب د رسمي مراسمو په ترڅ کې هرکلی وویل شو.

ملکې مراسمو ته په وینا کې وویل، خوشاله ده چې دواړو هېوادونو ته د خپلو پراخو اړیکو د اهمیت د څرګندولو لپاره یو بل فرصت په لاس ورغلی.

ټرمپ په ځواب کې د لندن او واشنګټن اړیکې خاص وبلل او بیا یې د دوهمې نړیوالې جګړې په وروستیو کې د ۱۹۴۴ میلادي کال د جون په ۶مه د متفقینو له خوا د فرانسې په شمال کې د نورماندي ښار د نیولو یا «D-Day» ورځې کلیزې ته د درناوي مراسم پرځای کړل.

په بریتانیا کې نظرپوښتنې ښيې چې ولسمشر ټرمپ تر ډېره د بریتانیا د خلکو نه خوښېږي او په همدې دلیل پولیس اټکل کوي چې ښايي په مرکزي لندن کې د نننیو اعتراضونو له کبله لارې بندې شي.

د اوکراین نوی ولسمشر په بروکسل کې د ناټو له مشرانو سره وګوري

د اوکراین نوی ولسمشر ولادیمیر زلنسکي

ټاکل شوې چې د اوکراین نوی ولسمشر بهر ته د خپل لومړي سفر په ترڅ کې نن په بروکسل کې د ناټو له مشرانو سره وګوري.

ولادیمیر زلنسکي به د ناټو له عمومي منشي ینس سټولټنبرګ سره وګوري او د ناټو- اوکراین د کمېسیون په غونډه کې به ګډون وکړي.

تمه ده چې زلنسکي به په‌دې غونډه کې د اوکراین په ختیځ کې د وضعیت مسئله راپورته او د اوکراین د جګړې د پای ته رسولو لپاره د نړیوالې ټولنې د هڅو د چټکولو پر لارو چارو بحث وکړي.

د ناټو- اوکراین کمېسیون د کیف او دې ټلوالې ترمنځ د همکارۍ په چاره کې اساسي ونډه لري.

زلنسکي په پام کې لري چې سبا د جون په پنځمه د اروپايي شورا له مشر ډونالډ ټوسک او د اروپايي کمېسیون له مشر ژان کلود یونکر سره وګوري.

ټرمپ: روسیې امریکا ته ویلي چې دوی خپل ډېری خلک له ونزوئلا ایستلي

ولسمشر ټرمپ

د امریکا ولسمشر وایي چې روسیې متحده ایالاتو ته ویلي چې دوی خپل ډېری خلک له ونزوئلا څخه ایستلي دي.

ډونالډ ټرمپ دا خبره د جون پر درېیمه نېټه پر خپله ټویټرپاڼه داسې مهال کړې چې دا مهال د بریتانیا په سفر بوخت دی، خو ولسمشر په‌دې اړه نور جزئیات نه‌دي ورکړي.

د روسیې چارواکو سمدستي د ولسمشر ټرمپ د دې ټویټ په اړه څه نه‌دي ویلي.

د امریکا ولسمشر په مارچ کې پر روسیې غږ کړی و چې له ونزوئلا څخه ووځي.

دا غوښتنه وروسته له هغه شوې وه چې په ونزوئلا کې د سیاسي مخالفینو مشر خوان ګوایدو د دې هېواد د مؤقت ولسمشر په توګه د ځان د اعلانولو وروسته مسکو شاوخوا ۱۰۰ پوځي پرسونل په ونزوئلا کې ځای پرځای کړ.

خوان ګواېدو د امریکا په ګډون د څه باندې ۵۰ هېوادونو ملاتړ لري، خو د دغه هېواد سوسیالیست ولسمشر نیکلاس مادورو د روسیې او چین له‌خوا حمایه کېږي.

نېکلاس مادورو په ۲۰۱۳ میلادي کال کې د دې هېواد ولسمشر شو او بیا یې په ۲۰۱۸ میلادي کال کې د دوهمې دورې ولسمشرۍ لپاره لوړه پرځای کړه، خو دا ځل د اپوزیسیون له مخالفت سره مخامخ شو.

مخالفینو یې د ۲۰۱۸ میلادي کال په انتخاباتو کې د درغلۍ ادعا وکړه.

په سوډان کې د وژل شویو کسانو شمېر ۱۳ تنو ته ورسېد

اعتراض کوونکي

په سوډان کې د امنیتي ځواکونو د برید په نتیجه کې د وژل شویو کسانو شمېر ۱۳ تنو ته ورسېد.

دغو ځواکونه پرون دوشنبې په پلازمېنه خرطوم کې د پوځ د یوې قرارګاه دباندې د ډموکراسۍ پلوه معترضانو پر یوې ډلې برید وکړ.

یو له دغو معترضانو ولید فاروق دی، وايي:"موږ سوډانیان د تحصن کوونکو د تیتولو لپاره امنیتي ځواکونه مسؤل بولو. زموږ امنیتي ځواکونو د سوډان له خلکو سره خیانت کړی دی."

د سوډان د متخصصانو ټولنې د دوشنبې په ورځ پر ټویټرپاڼه ولیکل: "معترضان د یوې ډله‌ییزې خونړۍ وژنې سره مخامخ دی چې هدف یې د تحصن ماتول دي."

د دغې ټولنې په خبره په‌دې ترڅ کې له مرمۍ او زوره کار اخېستل کېږي.

پوځي انتقالي شورا دا ادعا رد کړې چې ګواکې د تحصن اصلي ځای په زور ټول شوی دی.

په سوډان کې د حکومت ضد اعتراضونو څو میاشتې وروسته، عمرالبشیرپه اپریل میاشت کې د پوځ په یوې کودتا د ولسمشرۍ له څوکۍ څخه لېرې کړای شو.

له هغه راهیسې یوې پوځي انتقالي شورا د حکومت اداره په لاس کې اخېستې ده.

معترضان په خرطوم کې خپلو اعتراضونو ته دوام ورکړی او غواړي یو غیر پوځي حکومت دا هېواد اداره کړي.

نور راوښيه

XS
SM
MD
LG