د لاسرسي لېنکونه

تازه خبر
پنجشنبه ۲ لړم ۱۳۹۸ کابل ۰۰:۴۷

نړۍ

د اټمي تړون لاسلیک کوونکو هېوادونو ته د روحاني خبرداری!

د ایران ولسمشر حسن روحاني

د ایران ولسمشر حسن روحاني وايي، که چېرې له دې هېواد سره د اټمي تړون لاسلیک کوونکې نور هېوادونه مثبتې نښې ونه ښيي، هېواد به یې د دې تړون په چوکاټ کې له ناچارۍ ځیني اقدامات وکړي او دې تړون ته له خپلو یو شمېر ژمنو به په شا شي.

د تاجکستان په پلازمېنه دوشنبه کې د اسیايي هېوادونو په سرمشریزه کې روحاني وویل، ایران پرېکړه کړې چې په ۲۰۱۵ میلادي کال کې د نړۍ د پیاوړو هېوادونو سره به د لاسلیک شوې اټمي تړون ته د خپلو ځینو ژمنو عملي کېدل وځنډوي.

نوموړي ونه ویل چې ایران له خپلو کومو ژمنو په شا کېږي او دا چې تهران څه ډول مثبتې نښې غواړي.

د تېر کال په مې میاشت کې چې کله د امریکا ولسمشر ډنالد ټرمپ له دې تړون څخه د امریکا د ایستلو او پر ایران د بندیزونو د بېرته لګولو پرېکړه وکړه، ایران د دې تړون په وړاندې د خپلو ځینو ژمنو عملي کول ودرول.

روحاني د سیکا په غونډه کې راټولو شویو روسي، چینايي او د اسیايي هېوادونو نورو مشرانو ته وویل، ایران په یو اړخیزه توګه نه شي کولی چې دې اټمي تړون ته ژمن پاتې شي.

نوموړې زیاته کړه چې تهران به د اټمي تړون په وړاندې د خپلو ځینو تعهداتو ساتلو ته هم دوام ورکړي.

عراقي ځواکونو ته د امریکايي ځواکونو د روزنې پر ځای بریدونه شوي

د عراق بیرغ

د عراق پوځ وايي، د بغداد په شمال کې د عراقي ځواکونو پر هغې پوځي هوايي اډې درې توغندي لګېدلي، چېرې چې امریکايي ځواکونه عراقي سرتېرو ته روزنه ورکوي.

د عراق پوځ په یو بیان کې ویلي، د شنبې د ورځې په سهار دا بریدونه د بلاد په هوايي اډه کې د وړې اورلګېدنې سبب شوي، خو مرګ ژوبله نه لري.

دا برید په داسې حال کې کېږي چې په منځني ختیځ کې د امریکا او ایران تر منځ ترینګلتیا زیاته شوې ده.

په ځانګړې توګه د جون د ۱۳مې نېټې له هغو بریدونو راوروسته چې هورمز تنګي ته نږدې د عُمان په خلیج کې پر دوو تېل وړونکو کېښتیو وشوې او امریکا یې پړه پر ایران واچوله.

ایران په دې بریدونو کې ښکتیا رد کړې ده.

د امریکا او ایران ترمنځ کړکېچ له تېر کال راهېسې چې امریکا له ایران سره له اټمي تړون ووتله، له یوې ورځې بلې ته زیاتېږي.

واشنګټن پر ایران بېرته بندیزونه لګولي او د امریکا د متحدانو په ګډون نور هېوادونه هم هڅوي چې پر ایران بندیزونه ولګوي.

د شانګهای د همکارۍ سازمان د همکاریو د پراختیا یوه اعلامیه لاسلیک کړه

د شانګهای د همکارۍ سازمان د غړو هېوادونو مشران

د شانګهای د همکارۍ سازمان د غړو هېوادونو مشرانو د همکاریو د پراختیا یوه ګډه اعلامیه لاسلیک کړه.

هغوی پرون د جون په څوارلسمه د قرغزستان په پلازمېنه بشکېک کې د غونډې په وروستۍ ورځ ټینګار وکړ چې ټول به د سیمې د امنیت د ښه کېدو لپاره کار کوي او همکاري به زیاتوي.

د سازمان د دایمي غړو روسیې، چین، قرغزستان، تاجکستان، قزاقستان او ازبکستان ولسمشرانو په دې غونډه کې ګډون کړی و.

غونډې ته د سازمان د دایمي غړو هند او پاکستان صدراعظمان ورغلي وو.

د شانګهای د همکارۍ سازمان نوبتي مشري روسیې ته ور ورسېده، د دې سازمان بله غونډه به کال ته په روسیه کې وي.

د روسیې د جمهوري ریاست یوه مرستیال یوري اوشاکوف پرون خبریالانو ته وویل چې د شانګهای د همکارۍ سازمان مشران د ترورېزم او مخدره موادو پر ضد په مبارزه، اقتصادی پرمختګ او بشري مرستو خبرې کولې.

د روسیې، چین او د منځنۍ اسیا د جمهوریتونو مشران له بشکېکه پرون تاجکستان ته ولاړل.

هغوی به په تاجکستان کې نن د جون په پنځلسمه د اسیا د تعامل او باور جوړولو سازمان په غونډه کې ګډون وکړی.

د مولدووا ډموکرات ګوند: د صدراعظم پاول فيلیپ حکومت استعفا کوي

د مولدووا صدراعظم پاول فيلیپ

د مولدووا ډموکرات ګوند ویلي چې د هغه هېواد د صدراعظم پاول فيلیپ حکومت استعفا کوي.

دا څرګندوي چې په مولدووا کې د نوې ائتلافي کابینې او حکومت ترمنځ لانجه د حل په حال کې ده.

د مولدووا د ډموکرات ګوند مرستیال مشر ولادیمیر سیبوتاري پرون د جون په څوارلسمه د هغه هېواد په پلازمېنه چېشېناو کې دا خبر اعلان کړ.

هغه وویل چې ډموکرات ګوند پرېکړه کړې چې د سیاسي لانجې د حل لپاره له واکه لېرې شي.

په مولدووا کې د اروپايي اتحادیې د پلویانو ګوند او د روسیې ملاتړکوونکي سوسیالېست ګوند ائتلاف کړی دی.

په مولدووا کې تر پارلماني انتخاباتو وروسته د دې دواړو ګوندونو له ائتلاف سره د ډموکرات ګوند مخالفت له څو اوونیو راهیسې سیاسي کړکېچ پېدا کړی و.

د ډموکرات ګوند مشر پرون وویل چې د داسې کړکېچ د مخنیوي لپاره چې حتی تشدد په کې پېښېدلی شي، له واکه لېرې کېږي.

د جون په اتمه نېټه د مولدووا د سوسیالېست ګوند او د اروپايي اتحادیې د پلویانو د ګوند ترمنځ د ائتلاف موافقه د مولدووا د زیاتو سیاستوالو او خلکو لپاره د حیرانتیا وړ وه.

د روسیې څارونکي: د سخوي سوپرجټ الوتکه تالندې او برښنا غورځېدلې وه

ارشیف

د روسیې څارونکي وايي چې د سخوي سوپرجټ الوتکه چې تېره میاشت یې سقوط وکړ او ۴۱ تنه په کې ووژل شول، د تالندې او برښنا له امله را غورځېدلې وه.

روسي څارونکو ویلي چې د تالندې او برښنا له امله د الوتکې اتوپایلوټ سېستم تخریب شوی و او له امله یې الوتکې سقوط کړی و.

په دې اړه په رپوټ کې چې پرون د جون په څوارلسمه خپور شو، د الوتکې د لوېدو مسؤلیت پرپيلوټانو نه دی ور اچول شوی.

سخوي سوپرجټ ۱۰۰ الوتکه په روان میلادي کال کې د مې په پنځمه نېټه د مسکو په شیریمیتیوو هوايي ډګر کې راغورځېدلې وه.

په ابتدايي رپوټونو کې داسې هم ویل شوي وو چې په الوتکه کې یو شمېر مسافرو د الوتکې تر سقوط وروسته د تېښتې په وخت هڅه کوله چې خپل کالي او وسایل هم له الوتکې وباسي چې د پېښې د ځای د تخلیې عملیات یې له خنډ سره مخامخ کړل.

خو پروني رپوټ دې مسئلې ته هم اشاره نه ده کړې.

د کرکټ سيالۍ: له ويسټ انډيز سره د انګلستان سیالۍ

د کرکټ د ٢٠١٩میلادي کال د نړيوال جام د سيالو په لړ کې د انګلستان او ويسټ انډيز ترمنځ مسابقه روانه ده.

د انګلستان په ساوت هامپټون «Southampton» لوبغالي کې د دې لوبې پچه يا ټاس انګلستان ته وګاټه، خو ويسټ انډيز ته يې د لوبې د پيلولو بلنه ورکړه.

پرون د باران له کبله د هندوستان او نيوزيلنډ ترمنځ مسابقه ونه وشوه.

په انګلستان او وېلز کې د دغو مسابقو په لړ کې سبا شنبې افغانستان له جنوبي افريقا سره د مسابقې ډګر ته وځي.

په پام کې ده د وېلز په کارديف لوبغالي کې دغه مسابقه د افغانستان پر وخت د مازيګر پنځه بجې پيلېږي.

ايران: پر تهران د واشنګټن بنديزونه، د منځني ختيځ امن ته ګواښ پېښوي

د ايران ولسمشر حسن روحاني

د ايران ولسمشر وويل، پر تهران د واشنګټن بنديزونه، د منځني ختيځ امن ته جدي ګواښ پېښوي.

حسن روحاني دا خبره نن د قرغزستان په پلازمېنه بشکيک کې د شانګهاى د همکارۍ سازمان سرمشريزې ته وکړه.

دا په‌داسې حال کې ده چې د امريکا متحدو ايالاتونو د بهرنيو چارو وزير مايک پامپيو پرون په عمان خليج کې د تېلو پر يوې جاپانۍ او يوې نارويژۍ تجارتي ټانکرونو حملې د ايران کار وباله چې د امريکا سمندري ځواکونو بيا دغه ټانکرونه بدرګه کړل.

ايران په دغو حملو کې خپل هر ډول ارتباط رد کړى دى.

د ايران ولسمشر هم په خپلو خبرو کې پرونيو حملو ته اشاره ونه کړه.

خو حسن روحاني سرمشريزې ته وويل، د امريکا د ولسمشر ډونالډ ټرمپ اداره د يو اړخېز پالنې د هغې اوبا مسووله ده چې تر بل هر وخت يې نړيواله ټولنه له چنلج سره مخامخ کړې ده.

د هغه اشاره د تهران او د نړۍ د پياوړو هېوادونو ترمنځ له اټمي تړون څخه د واشنګټن د وتلو پرېکړې ته وه.

حسن روحاني وويل، ايران به د دغه تړون درناوي ته دوام ورکړي او د اټمي تړون له پاتې لاسليکوونکو يې هم د خپلو تعهداتو د پرځاى کولو غوښتنه وکړه.

په سرمشريزه کې د شانګهاى د همکارۍ سازمان د دايمي غړو روسيې، چين، قرغزستان، قزاقستان، تاجکستان، ازبکستان، هندوستان او پاکستان رهبران برخه لري.

په سرمشريزه کې افغانستان، بېلاروس، ايران او منګوليا هم ګډون کړى چې د شانګهاى د همکارۍ سازمان څارونکي غړي دي.

داعش د تاجکستان په يوه زندان کې د یوه بلوا مسؤليت ومانه

د تاجکستان ملي بیرغ

د اسلامي دولت ډلې يا داعش د تاجکستان په يوه زندان کې د هغې بلوا مسؤليت ومانه چې په نتيجه کې يې ٣٢ کسان وژل شوي وو.

په زندان کې دغه بلوا د مې مياشتې پر ٢٠مه شوې وه.

داعش ډلې نن په يوه اعلاميه کې چې د دوى په انلاين خپرونه النبا کې خپره شوې ويلي، «حمله کوونکي» د دې ډلې په خبره د «خلافت سرتېري» وو.

دغه زندان چې امنيتي تدابير يې شديد وي، د پلازمېنې دوشنبې په ١٥ کيلومترۍ کې پروت دى.

د داعش ډلې په دې انلاين خپرونه کې د دې ادعا د ثبوت لپاره شواهد نه دي وړاندې شوي.

د تاجکستان د کورنيو چارو وزارت تېره مياشت ويلي وو، د ٣٢ وژل شويو کسانو په ډله کې ١٧ تنه يې هغه کسان وو، چې د داعش ډلې د غړيتوب په تور بنديان شوي وو.

د کورنيو چارو وزارت ويلي وو په وژل شويو کې د تاجکستان د اسلامي رنسانس ممنوعه ګوند درې غړي هم شامل وو.

د نیوزیلنډ په جوماتونو کې پر بریدونو تورن پر ځان لګیدلي تورونه رد کړل

د نیوزیلنډ په جوماتونو کې پر بریدونو تورن

هغه اسټرالیايي چې د نیوزیلنډ په دوو جوماتونو بریدونو کې د ۵۱ کسانو په وژلو تورن دی، پر ده لګیدلي ټول تورونه رد کړي. د نوموړې محاکمه د ۲۰۲۰ میلادي کال د مې په څلورمه نېټه پلان شوې ده.

برینټان ټارانټ چې د قتل په ۵۱ تورونو، د قتل د هڅې په ۴۰ تورونو او د ترهګرۍ په یو تور تورن دی، د جمعې په ورځ په ټولو کې ځان بې ګناه وباله.

دا ۲۸ کلن مشکوک د اوکلانډ د زندان له یوې وړې خونې د ویډیو له لارې په محکمه کې څرګند شو.

د هغه وکیل د نوموړې په استازیتوب د ده د ځان بې ګناه بللو غوښتنه محکمې ته وړاندې کړه.

تمه کېږي چې دا محاکمه به شپږ اوونۍ دوام وکړي.

څو میاشتې مخکې په نیوزیلنډ کې په وسلو سنبال یو بریدګر د جمعې د لمانځه پرمهال پر مسلمانو لمونځ کونکو ‌ډزې وکړې لسګونه کسان یې مړه او ټپیان کړل.

دا د نیوزیلنډ په تاریخ کې تر ټولو لویه ډله‌ییزه وژنه بلل شوې ده.

امریکا: د تېلو پر بېړیو برید کې د ایران د سپاه پاسدران ځواک لاس لري

د عمان په خلیج کې دوه د تیلو ټانکرونه تر برید لاندې راغلي

د امریکا پوځ یوه ویډیو خپره کړې چې په وینا یې په عُمان خلیج کې د تېلو پر دوو لېږدوونکو ټانکرونو په وروستي برید کې د ایران د سپاه پاسدران انقلاب ځواک لاس لرل څرګندوي.

دا په سیمه کې د تاوتریخوالي تازه پېښه ده چې امریکا او متحدان یې ملامتي پر تهران اړوي.

د امریکا د پوځ مرکزي قوماندانۍ پرون وویل، دا ویډیو ښيې چې د ایران د سپاه پاسدران انقلاب د کښتیو عملې یوه وسيله چې ناچاودېدلي ماين ته ورته ده، له هغې تیل لېږدوونکې کښتۍ څخه لرې کوي چې برید پرې شوی.

د امریکا د پوځ د مرکزي قوماندانۍ ویاند بیل اوربان «Bill Urban» په یوه اعلاميه کې وويل: "پر سیمه يیز وخت د مازیګر پر څلورو بجو او لسو دقیقو د ایران سپاه پاسداران انقلاب ځواک د ګزمې یوه کښتۍ د کوککا کریجیس «Kokuka Courageous» په نوم د تېلو بېړۍ ته نږدې شوه چې څارل کېده او په ثبت شوې ويډيو کې ښکاري چې ناچاوده ماین د دې کښتۍ له باډۍ ليرې کوي."

چارواکو «CNN» ټلوېزيوني شبکې ته ویلي، د امريکا دفاع وزارت په‌دې باور دى چې دا د ایراني ځواکونو له خوا په دې پېښه کې د خپلې ښکېلتیا د شواهدو د ليرې کولو هڅه وه.

په ملګرو ملتونو کې د ایران د استازي دفتر پرون وویل: "دوی په قطعي توګه د امریکا دا بې بنسټه ادعا ردوي" چې ګوندې تهران په عمان خلیج کې په تازه بریدونو کې لاس لري.

امریکا په خلیج کې پر ۲ تیل وړونکو کښتیو حمله د ایران کار بولي

د عمان په خلیج کې دوه د تیلو ټانکرونه تر برید لاندې راغلي

د امریکا د بهرنیو چارو وزیر په خلیج کې پر دوو تیل وړونکو تجارتي کښتیو حمله د ایران کار بولي او وايي چې دا په سیمه کې د کړکېچ د پراخولو لپاره د ایران د کمپاین یوه برخه ده.

مایک پامپیو پرون پنجشنبې په واشنګټن کې د خبرو پرمهال د کارول شویو چاودېدونکو موادو څرنګوالي او د دې حملې پېچلتیا ته د اشارې په ترڅ کې وویل، دا د هغو حملو لړۍ ده چې ایران او لاسپوڅو یې د امریکا او د امریکا د متحدانو پرضد پیل کړي.

پرون د جون په ۱۳مه د عمان په خلیج کې په دوو تیل وړونکو تجارتي کشتیو کې چې چاودنې وشوې او اور یې واخېست.

له دې کشتیو یوه- چې ۲۱ تنه عمله یې لرله د یوه جاپاني شرکت او بله چې ۲۳ تنه عمله یې درلوده د یو ناروېژي شرکت وه.

د دې کشتیو چلوونکي وايي چې له پېښې وروسته ټوله عمله د نژدې کشتیو له خوا وژغورل شوې، خو د ایران دولتي رسنیو راپور ورکړی چې د ایران سمندري ځواک د کشتیو ۴۴ تنه عمله ژغورلي او هغوی یې د ایران یوه ساحلي بندر ته لېږدولي، خو متحد ایالاتو دا ادعا رد کړې او وايي چې د امریکا سمندري ځواکونو دا کسان ژغورلي دي.

له دې پېښې نژدې یوه میاشت مخکې د متحده عربي اماراتو سواحلو ته نژدې پر څلورو تېل وړونکو کشتیو حملې وشوې چې په خلیج کې د تهران او واشنګټن ترمینځ کړکېچ یې لا پراخ کړ.

ترکیې د امریکا هغه التیماتوم رد کړ چې له روسیې دې «اېس-۴۰۰» نه پېري

د «اېس-۴۰۰» په نوم د توغندیو دفاعي سیستم

ترکیې د متحدایالاتو هغه التیماتوم رد کړی چې له روسیې څخه دې «اېس-۴۰۰» دافع هوا توغندي نه پېري.

د ترکیې د بهرنیو چارو وزیر مولوت چاووش اوغلو پرون پنجشنبې وویل، د امریکا له دې ګواښ سره- سره چې ترکیه به د «اېف-۳۵» ډوله جنګي جټ الوتکو په پروګرام کې له ګډونه بې برخې کړي، انقره به د دې روسي توغندیو له پېرلو په شا نه شي.

د چاووش اوغلو له دې څرګندونو یوه ورځ مخکې ولسمشر رجب طیب اردوغان ویلي و چې دی هیله من دی متحد ایالات به له خپلو ګواښونو لاس واخلي.

تمه ده چې اردوغان به د روانې جون میاشتې په ۲۸-۲۹ مه په جاپان کې د شلو صنعتي هېوادونو په سرمشریزه کې د امریکا له ولسمشر ډونالډ ټرمپ سره وګوري.

متحد ایالاتو د جولای تر ۳۱ مې پورې ترکیې ته مهلت ورکړی چې که د «اېس-۴۰۰» توغندیو د پېرلو له پرېکړې په شا نه‌شي، نو د امریکا په مشرۍ د «اېف-۳۵» جنګي جټ الوتکو په پروژه کې له ګډون څخه به بې برخې شي.

د روسیې د بهرنيو چارو مرستیال وزیر ونزوئلا ته ځي

د ونزوئلا ملي بیرغ

د روسیې د بهرنيو چارو وزیر مرستيال په راتلونکو څو اوونیو کې ونزوئلا ته سفر کوي.

روسي رسنيو نن د پنجشنبې په ورځ د سرګي ریابکوف له قوله په داسې حال کې راپور ورکړی چې مسکو د ونزوئلا په بحران کې د ولسمشر نیکلاس مادورو ملاتړ ته دوام ورکړی دی.

د کاراکاس د سیاسي رژیم د مخالفانو مشر خوان ګواېدو چې د واشنګټن او تر پنځوسو زياتو نورو هېوادونو ملاتړ لري، څو مياشتې مخکې خپل ځان د ونزوئلا د مؤقت ولسمشر په توګه اعلان کړی وو.

روسیې او چین د مادورو ملاتړ کوي.

روسیه چې د پیسو او وسلو په برخه کې له ونزوئلا سره مرسته کوي په تېره مارچ مياشت کې خپل شاوخوا سل نظاميان ځای پر ځای کړل.

علي خامنه‌اي د ټرمپ له ادارې سره د خبرو وړاندیز رد کړ

د ایران مشر ایت‌الله علي خامنه‌اي د جاپان صدراعظم شینزو ابه

د ایران مشر ایت‌الله علي خامنه‌اي د ډونالډ ټرمپ له ادارې سره د خبرو وړاندیز رد کړ.

دا وړاندیز نن د جاپان صدراعظم شینزو ابه په تهران کې له خامنه‌اي سره په لیدنه کې کړی دی.

د امریکا ولسمشر ډونالډ ټرمپ وايي، ایرانیان دې له ده سره خبرې وکړي.

خامنه‌اي په ځواب کې ويلي چې له امریکا سره په رښتینو خبرو باور نه‌لري. د ایران مشر نن د جاپان له صدراعظم شینزو ابه سره ولیدل:"زه د ټرمپ پیغام ته هېڅ ځواب نه وایم. تاسې ته ځینې مطالب وايم خو هغه ته هېڅ پیغام نه ورکوم. ځکه ټرمپ د پیغام د تبادلې وړ نه بولم. له امریکا سره زموږ ستونزه دا نه‌ده چې دوی وايي د ایران د رژيم تغيیر نه غواړو. که داسې څه وهم غواړي، د اجرا قدرت یې نه لري."

شینزو ابه د ګڼو نورو مسایلو تر څنګ تهران ته د امریکا له وړاندیز سره ورغلی وو.

د جاپان صدراعظم ایران هڅولی چې په سیمه کې د سولې او ثبات لپاره همکاري وکړي.

له ابه سره پرون د ایران ولسمشر حسن روحاني هم وکتل او ویې ویل چې له امریکا سره جنګ نه غواړي.

امریکا ایران تورنوي چې په سیمه کې ترهګري تمویلوي.

ایران دا تورونه ردوي.

امریکايي پوځيان د ایران د احتمالي تهدیدونو د دفاع لپاره په خلیج کې د خپلو پوځيانو حضور زیات کړی او وایي چې د ایران د هر ډول برید ځواب به په کلکه ورکړي.

د عمان په خلیج کې دوه د تیلو ټانکرونه تر برید لاندې راغلي

د عمان په خلیج کې دوه د تیلو ټانکرونه تر برید لاندې راغلي

نن پنجشنبه د عمان په خلیج کې دوه د تیلو ټانکرونه تر برید لاندې راغلي دي.

د ټانکرونو پنځوس د عملې غړي ژغورل شوي دي. تر برید وروسته ټانکرونو اور اخېستی وو.

معلومه نه‌ده چې چا د عمان په خلیج کې د تیلو په دوو ټانکرونو برید کړی.

د ایران دولتي ټلوېزیون د دغو ټانکرونو د سوځلو عکسونه خپاره کړي دي.

رسنیو ویلي چې د ایران سمندري ځواکونو ۴۴ کسان ژغورلي.

د جاپان حکومت اعلان کړی چې دغو ټانکرونو د دوی لپاره تیل انتقالول.

تردې یوه میاشت مخکې د متحده عربي اماراتو فجیرې ته نږدې پر څلورو ټانکرونو برید شوی وو.

امریکا د هغه برید لپاره ایران ملامت کړی وو، خو تهران دا ادعا بې اساسه بللې وه.

د بریتانيې د کورنیو چارو وزیرد اسانج په لاس ورکولو امر لاسلیک کړی

ارشیف، په اکوادرو کې د ويکي‌لیکس جوړوونکی جولیان اسانج. May 19, 2017

د بریتانيې د کورنیو چارو وزیر ساجد جاوېد بي بي سي خبري رسنۍ ته ويلي چې امریکا ته د ويکي‌لیکس د بنسټ ايښودونکي جولیان اسانج په لاس ورکولو امر یې لاسلیک کړی دی.

جاوېد وویل چې امريکا ته د اسانج د ایستلو اخري پرېکړه به د جون په ۱۴مه په يوه بریتانوۍ محکمه کې وشي.

اسانج په امريکا کې په اتلسو مواردو د محرمو معلوماتو په خپرولو او د امریکا د پوځ له پخواني قراردادي چلسي ماننګ سره یو ځای د امريکا د دفاع وزارت د یوه پاسورډ په لټولو تورن دی.

د امريکا د عدليې وزارت له‌خوا په‌دغو تورونو کې په قانون کې د جاسوسۍ اړوندې مادې له مخې تورونه شامل دي.

۴۷ کلن اسانج د اپرېل په ۱۱مه نېټه په لندن کې د اکواډور له سفارته وایستل شو چېرته چې دی له ۲۰۱۲میلادي کال راهیسي د پناه غوښتنه کړې وه.

د کرکټ په نړیوال جام کې هند او نیوزیلنډ سره لوبېږي

د نیوزیلنډ دوه لوبغاړي

د ۲۰۱۹ کرکټ نړیوال جام سیالیو په لړ کې نن پنجشنبه د هندوستان او نیوزیلنډ لوبډلې د سیالۍ ډګر ته ځي.

ټاکل شوې وه چې دغه سیالۍ د انګلستان په نتنګهم لوبغالي کې د افغانستان پر وخت دوه بجې پیل شي، خو د باران له امله ځنډېدلې ده.

په روانو سیالیو کې نیوزیلنډ تر دې دمه درې سیالۍ کړي او درې واړه يې ګټلي، هندوستان هم په خپلو دواړو سیالیو کې بریا خپله کړې ده.

د دې سیالیو د تېرې شپې په لوبه کې بیا اسټرالیا د ۴۱ منډو په توپیر پاکستان ته ماتې ورکړه.

پاکستان د ټاس په ګټلو د توپ اچونې پریکړه وکړه.

اسټرالیا د ټولو لسو لوبغاړو په سوځېدلو سره په ۴۹ اورونو کې پاکستان ته ۳۰۸ منډې هدف وټاکه چې پاکستان یاد هدف پوره نه شو کړای او یاده يې سیالي يې د ۴۱ منډو په توپیر وبایلله.

ډونالډ ټرمپ به په جاپان کې له ولسمشر پوتین سره وګوري

ارشیف، ټرمپ او پوتین

د امریکا د متحدو ایالاتونو ولسمشر ډونالډ ټرمپ وایي، د روسیې له ولسمشر ولادیمیر پوتین سره به د روانې میاشتې په پای کې په جاپان کې د پرمختللو جي شل ډلې د هېوادونو په سرمشریزه کې وګوري.

که څه هم کرملین تر اوسه نه‌ده تأیید کړې چې د دې کتنې لپاره یې د واشنګټن بلنه ترلاسه کړې، خو ټرمپ له پوتین سره د کتنې خبره پرون په سپینه ماڼۍ کې خبریالانو ته وکړه.

دغه څرګندونې د دواړو مشرانو د کتنې په اړه د ابهام وروستۍ بېلګه ده.

ټرمپ تېره میاشت د جي شل په سرمشریزه کې له پوتین سره د لیدو خبره کړې، خو کرملین هغه مهال ویلي و چې د دواړو مشرانو د مخامخ کتنې په اړه کومه موافقه نه‌ده شوې.

وروستۍ ځل ټرمپ او پوتین د ۲۰۱۸ میلادي کال په جولای کې د فنلنډ په پلازمېنه هلسنکي کې سره کتلي و.

پر دغې دوه ساعته کتنې چې د معمول خلاف نه د ټرمپ نور همکاران او نه هم نوټ اخېستونکي په‌کې وو، د هغه د مخالفینو له‌خوا سخت انتقاد شوی و.

د کرملین ویاند دمیتري پسکوف د روسیې دولتي خبري اژانس تاس ته ویلي چې کرملین ته تراوسه دا نه‌ده تأیید شوې چې دواړه مشران دې د جاپان په اوساکا ښار کې چې د جون په ۲۸مه او ۲۹ مه به د دې سرمشریزه کوربه وي، مخامخ کتنه ترسره کړي.

د امریکا متحد ایالاتونو د عراق پر یوه شرکت بندیزونه ولګول

د عراق نقشه

د امریکا متحد ایالاتونو د عراق پر یوه شرکت بندیزونه ولګول. دا بندیزونه د ایران له سپاه پاسداران انقلاب ځواکونو سره د میلیونونو ډالرو په ارزښت د وسلو په قاچاق کې د مرستې په خاطر لګيدلې دي.

د امریکا خزانې وزارت پرون د چهارشنبې په ورځ په یوې اعلامیې کې وویل چې دا بندیزونه په بغداد کې د جنوبي شتمنیو د سرچینو پر شرکت او د دې شرکت پر دوو رئیسانو لګیدلي دي.

اعلامیه څرګندوي چې د دې شرکت دوه مشران مکي کاظم عبدالحمید الاسد او محمد حسین صالح الحسني د ایران له سپاه قدس ډلې سره ارتباط لري.

په اعلامیه کې د امریکا د خزانې د وزیر سټیفن منوچین په وینا راغلې دي چې د دې بندیزونو هدف د ایران سپاه قدس ډلې ته د وسلو د قاچاق مخنیوی دی.

تر اوسه ایران او عراق په‌دې اړه څه غبرګون نه‌دی ښکاره کړی.

د امریکا متحد ایالاتونو د اپریل په میاشت کې د ایران سپاه پاسداران انقلاب اسلامي ډله یوه ترورستي ډله ونوموله.

د جاپان صدراعظم: په سیمه کې باید د هر راز جګړې مخه ونیول شي

د جاپان صدراعظم د ایران له ولسمشر سره وکتل.

د جاپان صدراعظم شینزو ابه د امریکا د متحد ایالاتونو او ایران ترمنځ کړکېچ ته په اشارې وویل چې په سیمه کې باید د هر راز نښتې او جګړې مخه ونیول شي.

شنیزو ابه پرون د چهارشنبې په ورځ په تهران کې د ایران له ولسمشر حسن روحاني سره تر لیدو وروسته خبرې غونډې ته وویل: "موږ ګټورې خبرې سره وکړې چې څرنګه کړکېچ راکم کړو، په سیمه کې د هر راز شخړو مخه ونیسو او څرنګه په سیمه کې ثبات وساتو او سوله ټینګه کړو."

د جاپان صدراعظم پرون تهران ته په‌دې نیت ورسېد چې د واشنګټن او تهران ترمنځ به د کړکېچ په کمېدو کې مرسته وکړي.

د ایران ولسمشر حسن روحاني وویل چې ایران به له امریکا سره جګړه ونه کړي خو که برید پرې وشو سخت ځواب به ورکړي.

روحاني زیاته کړه که چېرته واشنګټن پر ایران له اقتصادي فشارونو لاس واخلي ډېر مثبت بدلون به د سیمې او نړۍ په کچه رامنځته شي.

جاپان: هيله لرم د واشنګټن-تهران د کړکېچ کمولو کې همکاري وکړم

د جاپان صدراعظم شينزو ابه

د جاپان صدراعظم شينزو ابه چې ايران ته روان دى وايي، هيله لري د واشنګټن او تهران ترمنځ د کړکېچ په کمولو کې همکاري وکړي.

تمه ده شينزو ابه ايران ته د خپل سفر پر مهال له ولسمشر حسن روحاني او د ايران له رهبر ايت الله علي خامنه‌اي سره وګوري.

په تېرو څه باندې ٤٠ کلونو کې ابه د جاپان لومړى برحال صدراعظم دى چې ايران ته سفر کوي.

وروسته له هغې چې د امريکا متحدو ايالاتونو د ٢٠١٥میلادي له اټمي تړون څخه د وتلو او پر ايران د بنديزونو د بيا لګولو اعلان وکړ، د واشنګټن او تهران ترمنځ اړيکې ترينګلې شوي دي.

له توکيو تر روانېدو مخکې د جاپان صدراعظم شينزو ابه وويل:"جاپان غواړي په منځني ختيځ کې د سولې او ثبات لپاره هره ممکنه هڅه وکړي."

د شينزو ابه تر سفر مخکې د ايران ولسمشر حسن روحاني د کابينې غونډې ته وويل، پر ايران د امريکا متحدو ايالاتونو فشار تر ټولو لوړ حد ته رسېدلى دى.

مسکو کې پوليسو په لسګونو لاريون کوونکي نيولي

په مسکو کې مظاهره چیان

د روسيې په پلازمېنه مسکو کې نن د چهارشنبې په ورځ د نيول شويو مظاهره چيانو شمېر تر ٢٠٠ واوښت.

دغه کسان پر چارواکو د فشار راوستلو لپاره په لاريون راوتلي وو، څو د ايوان ګولونوف په نوم تحقيقاتي خبريال خوشې کړي.

دغه خبريال د مخدره موادو په تړاو نيول شوى، هغه قضيه چې د ده پلويان يې جعلي ګڼي.

د مسکو په مرکزي برخه کې نن د لاريون پر مهال د نيول شويو کسانو په منځ کې د اپوزيسيون مشر الکسي ناوالني او ګڼ ژورنالېستان شامل دي.

د مسکو پوليس وايي، په دغو مظاهرو کې شاو خوا ١٢٠٠ کسانو برخه اخېستې وه چې تر ٢٠٠ زيات يې په داسې عامه جلسه کې د برخې اخېستو له کبله نيول شوي چې د ښار چارواکو يې اجازه نه وه ورکړې.

اروپايي ټولنې په کريميا کې د پانګونې پر منع کېدو موافقه وکړه

د اروپايي ټولنې سفيرانو د يوه بل کال لپاره هم په کريميا ټاپو وزمه کې د پانګونې پر منع کېدو موافقه وکړه.

هغو سرچينو چې دا موضوع له نږدې څاري ازادي راډيو ته د نوم نه ښوولو په شرط ويلي، دغه بنديزونه به په را روانو دوو اوونيو کې د وزيرانو په سطحه غونډه کې تمديد شي.

د اروپايي ټولنې له‌خوا دغه بنديزونه په ٢٠١٤ میلادي کال کې وروسته له هغې ولګول شول چې روسيې د اوکراين کريميا ټاپو وزمه لاندې او له خپلې خاورې سره الحاق کړله.

د سعودي عربستان په جنوب کې یوې حملې ٢٦ ملکيان ټپيان کړي

د سعودي او یمن ترمنځ ګډه پوله

د سعودي عربستان په جنوب کې پر يوه هوايي ډګر د حوثي ياغيانو د ميزائيلو په حمله کې ٢٦ ملکيان ټپيان شوي دي.

د سعودي عربستان په مشرۍ پوځي ائتلاف نن د چهارشنبې په ورځ په يوه اعلاميه کې وويل، پر ابها هوايي ډګر د ميزائيلو لګېدو له کبله په ټپيانو کې درې ښځې او دوه ماشومان شامل دي.

دغه هوايي ډګر د سعودي عربستان او يمن ترمنځ سرحد ته نږدې پروت دى.

د سعودي عربستان په مشرۍ د ائتلاف اعلاميه وايي، دا حمله ثابتوي چې حوثي ياغيانو له ايرانه پرمختللې وسلې ترلاسه کړي دي.

اعلاميه زياتوي چې دا حمله ښايي يو جنګي جنايت وبلل شي.

حوثي ياغيانو تردې مخکې اعلان کړى و چې دوى پر دغه هوايي ډګر يو کروز ميزائيل ويشتلى دى.

تېره مياشت د سعودي عربستان د تېلو پر تأسيساتو د يوې بې پېلوټه الوتکې له‌خوا حمله شوې وه چې حوثي ياغيانو يې مسووليت منلى و.

خو رياض د دې حملې پړه پر ايران واچوله، هغه تور چې تهران رد کړى دى.

د سعودي عربستان په مشرۍ پوځي ائتلاف چې د يمن د حکومت ملاتړ کوي، د حوثي ياغيانو پرضد له څلورو کلونو راهيسې جګړه پرمخ بيايي.

دغې شخړې ته د سعودي عربستان د هغه د سيمه‌ييز سيال ايران ترمنځ د نيابتي جګړې په سترګه کتل کېږي.

د پاکستان او استراليا ترمنځ مسابقه پيل شوه

د پاکستان د کرکټ یو تن لوبغاړی ناصر جمشېد

په انګلستان کې د کرکټ د ٢٠١٩ میلادي کال د نړيوال جام د سياليو په لړ کې د پاکستان او استراليا ترمنځ مسابقه پيل شوه.

پاکستان چې د انګلستان په ټاونټن «Taunton» لوبغالي کې د لوبې پچه يا ټاس‌يې وګاټه، استراليا ته‌يې د بېټنګ کولو بلنه ورکړله.

اسټرالیا تر اوسه د ۲۰۱۹ کال په نړیوال جام کې درې لوبې کړي چې دوې يې ګټلي او يوه بايللې ده.

پاکستان په درېیو لوبو کې یوازې یوه ګټلې ده.

د دوی لوبه په ټاونټون ښار کې په ځايي وخت له غرمې مخکې پيلېږي.

د کرکټ نړیوال جام سیالۍ د انګلستان او ولز په کورب‌توب پیل شوی.

افغان لوبډله به هم راتلونکې شنبه خپله څلورمه سیالي د جَنوبي افریقا په وړاندې وکړي.

دواړو ټیمونو ویلي چې د مخته تګ لپاره‌یې د شنبې سیالي خورا مهمه ده.

نور راوښيه

XS
SM
MD
LG