د لاسرسي لېنکونه

تازه خبر
پنجشنبه ۲ لړم ۱۳۹۸ کابل ۰۰:۴۶

نړۍ

د کرکټ سيالۍ: له ويسټ انډيز سره د انګلستان سیالۍ

د کرکټ د ٢٠١٩میلادي کال د نړيوال جام د سيالو په لړ کې د انګلستان او ويسټ انډيز ترمنځ مسابقه روانه ده.

د انګلستان په ساوت هامپټون «Southampton» لوبغالي کې د دې لوبې پچه يا ټاس انګلستان ته وګاټه، خو ويسټ انډيز ته يې د لوبې د پيلولو بلنه ورکړه.

پرون د باران له کبله د هندوستان او نيوزيلنډ ترمنځ مسابقه ونه وشوه.

په انګلستان او وېلز کې د دغو مسابقو په لړ کې سبا شنبې افغانستان له جنوبي افريقا سره د مسابقې ډګر ته وځي.

په پام کې ده د وېلز په کارديف لوبغالي کې دغه مسابقه د افغانستان پر وخت د مازيګر پنځه بجې پيلېږي.

ايران: پر تهران د واشنګټن بنديزونه، د منځني ختيځ امن ته ګواښ پېښوي

د ايران ولسمشر حسن روحاني

د ايران ولسمشر وويل، پر تهران د واشنګټن بنديزونه، د منځني ختيځ امن ته جدي ګواښ پېښوي.

حسن روحاني دا خبره نن د قرغزستان په پلازمېنه بشکيک کې د شانګهاى د همکارۍ سازمان سرمشريزې ته وکړه.

دا په‌داسې حال کې ده چې د امريکا متحدو ايالاتونو د بهرنيو چارو وزير مايک پامپيو پرون په عمان خليج کې د تېلو پر يوې جاپانۍ او يوې نارويژۍ تجارتي ټانکرونو حملې د ايران کار وباله چې د امريکا سمندري ځواکونو بيا دغه ټانکرونه بدرګه کړل.

ايران په دغو حملو کې خپل هر ډول ارتباط رد کړى دى.

د ايران ولسمشر هم په خپلو خبرو کې پرونيو حملو ته اشاره ونه کړه.

خو حسن روحاني سرمشريزې ته وويل، د امريکا د ولسمشر ډونالډ ټرمپ اداره د يو اړخېز پالنې د هغې اوبا مسووله ده چې تر بل هر وخت يې نړيواله ټولنه له چنلج سره مخامخ کړې ده.

د هغه اشاره د تهران او د نړۍ د پياوړو هېوادونو ترمنځ له اټمي تړون څخه د واشنګټن د وتلو پرېکړې ته وه.

حسن روحاني وويل، ايران به د دغه تړون درناوي ته دوام ورکړي او د اټمي تړون له پاتې لاسليکوونکو يې هم د خپلو تعهداتو د پرځاى کولو غوښتنه وکړه.

په سرمشريزه کې د شانګهاى د همکارۍ سازمان د دايمي غړو روسيې، چين، قرغزستان، قزاقستان، تاجکستان، ازبکستان، هندوستان او پاکستان رهبران برخه لري.

په سرمشريزه کې افغانستان، بېلاروس، ايران او منګوليا هم ګډون کړى چې د شانګهاى د همکارۍ سازمان څارونکي غړي دي.

داعش د تاجکستان په يوه زندان کې د یوه بلوا مسؤليت ومانه

د تاجکستان ملي بیرغ

د اسلامي دولت ډلې يا داعش د تاجکستان په يوه زندان کې د هغې بلوا مسؤليت ومانه چې په نتيجه کې يې ٣٢ کسان وژل شوي وو.

په زندان کې دغه بلوا د مې مياشتې پر ٢٠مه شوې وه.

داعش ډلې نن په يوه اعلاميه کې چې د دوى په انلاين خپرونه النبا کې خپره شوې ويلي، «حمله کوونکي» د دې ډلې په خبره د «خلافت سرتېري» وو.

دغه زندان چې امنيتي تدابير يې شديد وي، د پلازمېنې دوشنبې په ١٥ کيلومترۍ کې پروت دى.

د داعش ډلې په دې انلاين خپرونه کې د دې ادعا د ثبوت لپاره شواهد نه دي وړاندې شوي.

د تاجکستان د کورنيو چارو وزارت تېره مياشت ويلي وو، د ٣٢ وژل شويو کسانو په ډله کې ١٧ تنه يې هغه کسان وو، چې د داعش ډلې د غړيتوب په تور بنديان شوي وو.

د کورنيو چارو وزارت ويلي وو په وژل شويو کې د تاجکستان د اسلامي رنسانس ممنوعه ګوند درې غړي هم شامل وو.

د نیوزیلنډ په جوماتونو کې پر بریدونو تورن پر ځان لګیدلي تورونه رد کړل

د نیوزیلنډ په جوماتونو کې پر بریدونو تورن

هغه اسټرالیايي چې د نیوزیلنډ په دوو جوماتونو بریدونو کې د ۵۱ کسانو په وژلو تورن دی، پر ده لګیدلي ټول تورونه رد کړي. د نوموړې محاکمه د ۲۰۲۰ میلادي کال د مې په څلورمه نېټه پلان شوې ده.

برینټان ټارانټ چې د قتل په ۵۱ تورونو، د قتل د هڅې په ۴۰ تورونو او د ترهګرۍ په یو تور تورن دی، د جمعې په ورځ په ټولو کې ځان بې ګناه وباله.

دا ۲۸ کلن مشکوک د اوکلانډ د زندان له یوې وړې خونې د ویډیو له لارې په محکمه کې څرګند شو.

د هغه وکیل د نوموړې په استازیتوب د ده د ځان بې ګناه بللو غوښتنه محکمې ته وړاندې کړه.

تمه کېږي چې دا محاکمه به شپږ اوونۍ دوام وکړي.

څو میاشتې مخکې په نیوزیلنډ کې په وسلو سنبال یو بریدګر د جمعې د لمانځه پرمهال پر مسلمانو لمونځ کونکو ‌ډزې وکړې لسګونه کسان یې مړه او ټپیان کړل.

دا د نیوزیلنډ په تاریخ کې تر ټولو لویه ډله‌ییزه وژنه بلل شوې ده.

امریکا: د تېلو پر بېړیو برید کې د ایران د سپاه پاسدران ځواک لاس لري

د عمان په خلیج کې دوه د تیلو ټانکرونه تر برید لاندې راغلي

د امریکا پوځ یوه ویډیو خپره کړې چې په وینا یې په عُمان خلیج کې د تېلو پر دوو لېږدوونکو ټانکرونو په وروستي برید کې د ایران د سپاه پاسدران انقلاب ځواک لاس لرل څرګندوي.

دا په سیمه کې د تاوتریخوالي تازه پېښه ده چې امریکا او متحدان یې ملامتي پر تهران اړوي.

د امریکا د پوځ مرکزي قوماندانۍ پرون وویل، دا ویډیو ښيې چې د ایران د سپاه پاسدران انقلاب د کښتیو عملې یوه وسيله چې ناچاودېدلي ماين ته ورته ده، له هغې تیل لېږدوونکې کښتۍ څخه لرې کوي چې برید پرې شوی.

د امریکا د پوځ د مرکزي قوماندانۍ ویاند بیل اوربان «Bill Urban» په یوه اعلاميه کې وويل: "پر سیمه يیز وخت د مازیګر پر څلورو بجو او لسو دقیقو د ایران سپاه پاسداران انقلاب ځواک د ګزمې یوه کښتۍ د کوککا کریجیس «Kokuka Courageous» په نوم د تېلو بېړۍ ته نږدې شوه چې څارل کېده او په ثبت شوې ويډيو کې ښکاري چې ناچاوده ماین د دې کښتۍ له باډۍ ليرې کوي."

چارواکو «CNN» ټلوېزيوني شبکې ته ویلي، د امريکا دفاع وزارت په‌دې باور دى چې دا د ایراني ځواکونو له خوا په دې پېښه کې د خپلې ښکېلتیا د شواهدو د ليرې کولو هڅه وه.

په ملګرو ملتونو کې د ایران د استازي دفتر پرون وویل: "دوی په قطعي توګه د امریکا دا بې بنسټه ادعا ردوي" چې ګوندې تهران په عمان خلیج کې په تازه بریدونو کې لاس لري.

امریکا په خلیج کې پر ۲ تیل وړونکو کښتیو حمله د ایران کار بولي

د عمان په خلیج کې دوه د تیلو ټانکرونه تر برید لاندې راغلي

د امریکا د بهرنیو چارو وزیر په خلیج کې پر دوو تیل وړونکو تجارتي کښتیو حمله د ایران کار بولي او وايي چې دا په سیمه کې د کړکېچ د پراخولو لپاره د ایران د کمپاین یوه برخه ده.

مایک پامپیو پرون پنجشنبې په واشنګټن کې د خبرو پرمهال د کارول شویو چاودېدونکو موادو څرنګوالي او د دې حملې پېچلتیا ته د اشارې په ترڅ کې وویل، دا د هغو حملو لړۍ ده چې ایران او لاسپوڅو یې د امریکا او د امریکا د متحدانو پرضد پیل کړي.

پرون د جون په ۱۳مه د عمان په خلیج کې په دوو تیل وړونکو تجارتي کشتیو کې چې چاودنې وشوې او اور یې واخېست.

له دې کشتیو یوه- چې ۲۱ تنه عمله یې لرله د یوه جاپاني شرکت او بله چې ۲۳ تنه عمله یې درلوده د یو ناروېژي شرکت وه.

د دې کشتیو چلوونکي وايي چې له پېښې وروسته ټوله عمله د نژدې کشتیو له خوا وژغورل شوې، خو د ایران دولتي رسنیو راپور ورکړی چې د ایران سمندري ځواک د کشتیو ۴۴ تنه عمله ژغورلي او هغوی یې د ایران یوه ساحلي بندر ته لېږدولي، خو متحد ایالاتو دا ادعا رد کړې او وايي چې د امریکا سمندري ځواکونو دا کسان ژغورلي دي.

له دې پېښې نژدې یوه میاشت مخکې د متحده عربي اماراتو سواحلو ته نژدې پر څلورو تېل وړونکو کشتیو حملې وشوې چې په خلیج کې د تهران او واشنګټن ترمینځ کړکېچ یې لا پراخ کړ.

ترکیې د امریکا هغه التیماتوم رد کړ چې له روسیې دې «اېس-۴۰۰» نه پېري

د «اېس-۴۰۰» په نوم د توغندیو دفاعي سیستم

ترکیې د متحدایالاتو هغه التیماتوم رد کړی چې له روسیې څخه دې «اېس-۴۰۰» دافع هوا توغندي نه پېري.

د ترکیې د بهرنیو چارو وزیر مولوت چاووش اوغلو پرون پنجشنبې وویل، د امریکا له دې ګواښ سره- سره چې ترکیه به د «اېف-۳۵» ډوله جنګي جټ الوتکو په پروګرام کې له ګډونه بې برخې کړي، انقره به د دې روسي توغندیو له پېرلو په شا نه شي.

د چاووش اوغلو له دې څرګندونو یوه ورځ مخکې ولسمشر رجب طیب اردوغان ویلي و چې دی هیله من دی متحد ایالات به له خپلو ګواښونو لاس واخلي.

تمه ده چې اردوغان به د روانې جون میاشتې په ۲۸-۲۹ مه په جاپان کې د شلو صنعتي هېوادونو په سرمشریزه کې د امریکا له ولسمشر ډونالډ ټرمپ سره وګوري.

متحد ایالاتو د جولای تر ۳۱ مې پورې ترکیې ته مهلت ورکړی چې که د «اېس-۴۰۰» توغندیو د پېرلو له پرېکړې په شا نه‌شي، نو د امریکا په مشرۍ د «اېف-۳۵» جنګي جټ الوتکو په پروژه کې له ګډون څخه به بې برخې شي.

د روسیې د بهرنيو چارو مرستیال وزیر ونزوئلا ته ځي

د ونزوئلا ملي بیرغ

د روسیې د بهرنيو چارو وزیر مرستيال په راتلونکو څو اوونیو کې ونزوئلا ته سفر کوي.

روسي رسنيو نن د پنجشنبې په ورځ د سرګي ریابکوف له قوله په داسې حال کې راپور ورکړی چې مسکو د ونزوئلا په بحران کې د ولسمشر نیکلاس مادورو ملاتړ ته دوام ورکړی دی.

د کاراکاس د سیاسي رژیم د مخالفانو مشر خوان ګواېدو چې د واشنګټن او تر پنځوسو زياتو نورو هېوادونو ملاتړ لري، څو مياشتې مخکې خپل ځان د ونزوئلا د مؤقت ولسمشر په توګه اعلان کړی وو.

روسیې او چین د مادورو ملاتړ کوي.

روسیه چې د پیسو او وسلو په برخه کې له ونزوئلا سره مرسته کوي په تېره مارچ مياشت کې خپل شاوخوا سل نظاميان ځای پر ځای کړل.

علي خامنه‌اي د ټرمپ له ادارې سره د خبرو وړاندیز رد کړ

د ایران مشر ایت‌الله علي خامنه‌اي د جاپان صدراعظم شینزو ابه

د ایران مشر ایت‌الله علي خامنه‌اي د ډونالډ ټرمپ له ادارې سره د خبرو وړاندیز رد کړ.

دا وړاندیز نن د جاپان صدراعظم شینزو ابه په تهران کې له خامنه‌اي سره په لیدنه کې کړی دی.

د امریکا ولسمشر ډونالډ ټرمپ وايي، ایرانیان دې له ده سره خبرې وکړي.

خامنه‌اي په ځواب کې ويلي چې له امریکا سره په رښتینو خبرو باور نه‌لري. د ایران مشر نن د جاپان له صدراعظم شینزو ابه سره ولیدل:"زه د ټرمپ پیغام ته هېڅ ځواب نه وایم. تاسې ته ځینې مطالب وايم خو هغه ته هېڅ پیغام نه ورکوم. ځکه ټرمپ د پیغام د تبادلې وړ نه بولم. له امریکا سره زموږ ستونزه دا نه‌ده چې دوی وايي د ایران د رژيم تغيیر نه غواړو. که داسې څه وهم غواړي، د اجرا قدرت یې نه لري."

شینزو ابه د ګڼو نورو مسایلو تر څنګ تهران ته د امریکا له وړاندیز سره ورغلی وو.

د جاپان صدراعظم ایران هڅولی چې په سیمه کې د سولې او ثبات لپاره همکاري وکړي.

له ابه سره پرون د ایران ولسمشر حسن روحاني هم وکتل او ویې ویل چې له امریکا سره جنګ نه غواړي.

امریکا ایران تورنوي چې په سیمه کې ترهګري تمویلوي.

ایران دا تورونه ردوي.

امریکايي پوځيان د ایران د احتمالي تهدیدونو د دفاع لپاره په خلیج کې د خپلو پوځيانو حضور زیات کړی او وایي چې د ایران د هر ډول برید ځواب به په کلکه ورکړي.

د عمان په خلیج کې دوه د تیلو ټانکرونه تر برید لاندې راغلي

د عمان په خلیج کې دوه د تیلو ټانکرونه تر برید لاندې راغلي

نن پنجشنبه د عمان په خلیج کې دوه د تیلو ټانکرونه تر برید لاندې راغلي دي.

د ټانکرونو پنځوس د عملې غړي ژغورل شوي دي. تر برید وروسته ټانکرونو اور اخېستی وو.

معلومه نه‌ده چې چا د عمان په خلیج کې د تیلو په دوو ټانکرونو برید کړی.

د ایران دولتي ټلوېزیون د دغو ټانکرونو د سوځلو عکسونه خپاره کړي دي.

رسنیو ویلي چې د ایران سمندري ځواکونو ۴۴ کسان ژغورلي.

د جاپان حکومت اعلان کړی چې دغو ټانکرونو د دوی لپاره تیل انتقالول.

تردې یوه میاشت مخکې د متحده عربي اماراتو فجیرې ته نږدې پر څلورو ټانکرونو برید شوی وو.

امریکا د هغه برید لپاره ایران ملامت کړی وو، خو تهران دا ادعا بې اساسه بللې وه.

د بریتانيې د کورنیو چارو وزیرد اسانج په لاس ورکولو امر لاسلیک کړی

ارشیف، په اکوادرو کې د ويکي‌لیکس جوړوونکی جولیان اسانج. May 19, 2017

د بریتانيې د کورنیو چارو وزیر ساجد جاوېد بي بي سي خبري رسنۍ ته ويلي چې امریکا ته د ويکي‌لیکس د بنسټ ايښودونکي جولیان اسانج په لاس ورکولو امر یې لاسلیک کړی دی.

جاوېد وویل چې امريکا ته د اسانج د ایستلو اخري پرېکړه به د جون په ۱۴مه په يوه بریتانوۍ محکمه کې وشي.

اسانج په امريکا کې په اتلسو مواردو د محرمو معلوماتو په خپرولو او د امریکا د پوځ له پخواني قراردادي چلسي ماننګ سره یو ځای د امريکا د دفاع وزارت د یوه پاسورډ په لټولو تورن دی.

د امريکا د عدليې وزارت له‌خوا په‌دغو تورونو کې په قانون کې د جاسوسۍ اړوندې مادې له مخې تورونه شامل دي.

۴۷ کلن اسانج د اپرېل په ۱۱مه نېټه په لندن کې د اکواډور له سفارته وایستل شو چېرته چې دی له ۲۰۱۲میلادي کال راهیسي د پناه غوښتنه کړې وه.

د کرکټ په نړیوال جام کې هند او نیوزیلنډ سره لوبېږي

د نیوزیلنډ دوه لوبغاړي

د ۲۰۱۹ کرکټ نړیوال جام سیالیو په لړ کې نن پنجشنبه د هندوستان او نیوزیلنډ لوبډلې د سیالۍ ډګر ته ځي.

ټاکل شوې وه چې دغه سیالۍ د انګلستان په نتنګهم لوبغالي کې د افغانستان پر وخت دوه بجې پیل شي، خو د باران له امله ځنډېدلې ده.

په روانو سیالیو کې نیوزیلنډ تر دې دمه درې سیالۍ کړي او درې واړه يې ګټلي، هندوستان هم په خپلو دواړو سیالیو کې بریا خپله کړې ده.

د دې سیالیو د تېرې شپې په لوبه کې بیا اسټرالیا د ۴۱ منډو په توپیر پاکستان ته ماتې ورکړه.

پاکستان د ټاس په ګټلو د توپ اچونې پریکړه وکړه.

اسټرالیا د ټولو لسو لوبغاړو په سوځېدلو سره په ۴۹ اورونو کې پاکستان ته ۳۰۸ منډې هدف وټاکه چې پاکستان یاد هدف پوره نه شو کړای او یاده يې سیالي يې د ۴۱ منډو په توپیر وبایلله.

ډونالډ ټرمپ به په جاپان کې له ولسمشر پوتین سره وګوري

ارشیف، ټرمپ او پوتین

د امریکا د متحدو ایالاتونو ولسمشر ډونالډ ټرمپ وایي، د روسیې له ولسمشر ولادیمیر پوتین سره به د روانې میاشتې په پای کې په جاپان کې د پرمختللو جي شل ډلې د هېوادونو په سرمشریزه کې وګوري.

که څه هم کرملین تر اوسه نه‌ده تأیید کړې چې د دې کتنې لپاره یې د واشنګټن بلنه ترلاسه کړې، خو ټرمپ له پوتین سره د کتنې خبره پرون په سپینه ماڼۍ کې خبریالانو ته وکړه.

دغه څرګندونې د دواړو مشرانو د کتنې په اړه د ابهام وروستۍ بېلګه ده.

ټرمپ تېره میاشت د جي شل په سرمشریزه کې له پوتین سره د لیدو خبره کړې، خو کرملین هغه مهال ویلي و چې د دواړو مشرانو د مخامخ کتنې په اړه کومه موافقه نه‌ده شوې.

وروستۍ ځل ټرمپ او پوتین د ۲۰۱۸ میلادي کال په جولای کې د فنلنډ په پلازمېنه هلسنکي کې سره کتلي و.

پر دغې دوه ساعته کتنې چې د معمول خلاف نه د ټرمپ نور همکاران او نه هم نوټ اخېستونکي په‌کې وو، د هغه د مخالفینو له‌خوا سخت انتقاد شوی و.

د کرملین ویاند دمیتري پسکوف د روسیې دولتي خبري اژانس تاس ته ویلي چې کرملین ته تراوسه دا نه‌ده تأیید شوې چې دواړه مشران دې د جاپان په اوساکا ښار کې چې د جون په ۲۸مه او ۲۹ مه به د دې سرمشریزه کوربه وي، مخامخ کتنه ترسره کړي.

د امریکا متحد ایالاتونو د عراق پر یوه شرکت بندیزونه ولګول

د عراق نقشه

د امریکا متحد ایالاتونو د عراق پر یوه شرکت بندیزونه ولګول. دا بندیزونه د ایران له سپاه پاسداران انقلاب ځواکونو سره د میلیونونو ډالرو په ارزښت د وسلو په قاچاق کې د مرستې په خاطر لګيدلې دي.

د امریکا خزانې وزارت پرون د چهارشنبې په ورځ په یوې اعلامیې کې وویل چې دا بندیزونه په بغداد کې د جنوبي شتمنیو د سرچینو پر شرکت او د دې شرکت پر دوو رئیسانو لګیدلي دي.

اعلامیه څرګندوي چې د دې شرکت دوه مشران مکي کاظم عبدالحمید الاسد او محمد حسین صالح الحسني د ایران له سپاه قدس ډلې سره ارتباط لري.

په اعلامیه کې د امریکا د خزانې د وزیر سټیفن منوچین په وینا راغلې دي چې د دې بندیزونو هدف د ایران سپاه قدس ډلې ته د وسلو د قاچاق مخنیوی دی.

تر اوسه ایران او عراق په‌دې اړه څه غبرګون نه‌دی ښکاره کړی.

د امریکا متحد ایالاتونو د اپریل په میاشت کې د ایران سپاه پاسداران انقلاب اسلامي ډله یوه ترورستي ډله ونوموله.

د جاپان صدراعظم: په سیمه کې باید د هر راز جګړې مخه ونیول شي

د جاپان صدراعظم د ایران له ولسمشر سره وکتل.

د جاپان صدراعظم شینزو ابه د امریکا د متحد ایالاتونو او ایران ترمنځ کړکېچ ته په اشارې وویل چې په سیمه کې باید د هر راز نښتې او جګړې مخه ونیول شي.

شنیزو ابه پرون د چهارشنبې په ورځ په تهران کې د ایران له ولسمشر حسن روحاني سره تر لیدو وروسته خبرې غونډې ته وویل: "موږ ګټورې خبرې سره وکړې چې څرنګه کړکېچ راکم کړو، په سیمه کې د هر راز شخړو مخه ونیسو او څرنګه په سیمه کې ثبات وساتو او سوله ټینګه کړو."

د جاپان صدراعظم پرون تهران ته په‌دې نیت ورسېد چې د واشنګټن او تهران ترمنځ به د کړکېچ په کمېدو کې مرسته وکړي.

د ایران ولسمشر حسن روحاني وویل چې ایران به له امریکا سره جګړه ونه کړي خو که برید پرې وشو سخت ځواب به ورکړي.

روحاني زیاته کړه که چېرته واشنګټن پر ایران له اقتصادي فشارونو لاس واخلي ډېر مثبت بدلون به د سیمې او نړۍ په کچه رامنځته شي.

جاپان: هيله لرم د واشنګټن-تهران د کړکېچ کمولو کې همکاري وکړم

د جاپان صدراعظم شينزو ابه

د جاپان صدراعظم شينزو ابه چې ايران ته روان دى وايي، هيله لري د واشنګټن او تهران ترمنځ د کړکېچ په کمولو کې همکاري وکړي.

تمه ده شينزو ابه ايران ته د خپل سفر پر مهال له ولسمشر حسن روحاني او د ايران له رهبر ايت الله علي خامنه‌اي سره وګوري.

په تېرو څه باندې ٤٠ کلونو کې ابه د جاپان لومړى برحال صدراعظم دى چې ايران ته سفر کوي.

وروسته له هغې چې د امريکا متحدو ايالاتونو د ٢٠١٥میلادي له اټمي تړون څخه د وتلو او پر ايران د بنديزونو د بيا لګولو اعلان وکړ، د واشنګټن او تهران ترمنځ اړيکې ترينګلې شوي دي.

له توکيو تر روانېدو مخکې د جاپان صدراعظم شينزو ابه وويل:"جاپان غواړي په منځني ختيځ کې د سولې او ثبات لپاره هره ممکنه هڅه وکړي."

د شينزو ابه تر سفر مخکې د ايران ولسمشر حسن روحاني د کابينې غونډې ته وويل، پر ايران د امريکا متحدو ايالاتونو فشار تر ټولو لوړ حد ته رسېدلى دى.

مسکو کې پوليسو په لسګونو لاريون کوونکي نيولي

په مسکو کې مظاهره چیان

د روسيې په پلازمېنه مسکو کې نن د چهارشنبې په ورځ د نيول شويو مظاهره چيانو شمېر تر ٢٠٠ واوښت.

دغه کسان پر چارواکو د فشار راوستلو لپاره په لاريون راوتلي وو، څو د ايوان ګولونوف په نوم تحقيقاتي خبريال خوشې کړي.

دغه خبريال د مخدره موادو په تړاو نيول شوى، هغه قضيه چې د ده پلويان يې جعلي ګڼي.

د مسکو په مرکزي برخه کې نن د لاريون پر مهال د نيول شويو کسانو په منځ کې د اپوزيسيون مشر الکسي ناوالني او ګڼ ژورنالېستان شامل دي.

د مسکو پوليس وايي، په دغو مظاهرو کې شاو خوا ١٢٠٠ کسانو برخه اخېستې وه چې تر ٢٠٠ زيات يې په داسې عامه جلسه کې د برخې اخېستو له کبله نيول شوي چې د ښار چارواکو يې اجازه نه وه ورکړې.

اروپايي ټولنې په کريميا کې د پانګونې پر منع کېدو موافقه وکړه

د اروپايي ټولنې سفيرانو د يوه بل کال لپاره هم په کريميا ټاپو وزمه کې د پانګونې پر منع کېدو موافقه وکړه.

هغو سرچينو چې دا موضوع له نږدې څاري ازادي راډيو ته د نوم نه ښوولو په شرط ويلي، دغه بنديزونه به په را روانو دوو اوونيو کې د وزيرانو په سطحه غونډه کې تمديد شي.

د اروپايي ټولنې له‌خوا دغه بنديزونه په ٢٠١٤ میلادي کال کې وروسته له هغې ولګول شول چې روسيې د اوکراين کريميا ټاپو وزمه لاندې او له خپلې خاورې سره الحاق کړله.

د سعودي عربستان په جنوب کې یوې حملې ٢٦ ملکيان ټپيان کړي

د سعودي او یمن ترمنځ ګډه پوله

د سعودي عربستان په جنوب کې پر يوه هوايي ډګر د حوثي ياغيانو د ميزائيلو په حمله کې ٢٦ ملکيان ټپيان شوي دي.

د سعودي عربستان په مشرۍ پوځي ائتلاف نن د چهارشنبې په ورځ په يوه اعلاميه کې وويل، پر ابها هوايي ډګر د ميزائيلو لګېدو له کبله په ټپيانو کې درې ښځې او دوه ماشومان شامل دي.

دغه هوايي ډګر د سعودي عربستان او يمن ترمنځ سرحد ته نږدې پروت دى.

د سعودي عربستان په مشرۍ د ائتلاف اعلاميه وايي، دا حمله ثابتوي چې حوثي ياغيانو له ايرانه پرمختللې وسلې ترلاسه کړي دي.

اعلاميه زياتوي چې دا حمله ښايي يو جنګي جنايت وبلل شي.

حوثي ياغيانو تردې مخکې اعلان کړى و چې دوى پر دغه هوايي ډګر يو کروز ميزائيل ويشتلى دى.

تېره مياشت د سعودي عربستان د تېلو پر تأسيساتو د يوې بې پېلوټه الوتکې له‌خوا حمله شوې وه چې حوثي ياغيانو يې مسووليت منلى و.

خو رياض د دې حملې پړه پر ايران واچوله، هغه تور چې تهران رد کړى دى.

د سعودي عربستان په مشرۍ پوځي ائتلاف چې د يمن د حکومت ملاتړ کوي، د حوثي ياغيانو پرضد له څلورو کلونو راهيسې جګړه پرمخ بيايي.

دغې شخړې ته د سعودي عربستان د هغه د سيمه‌ييز سيال ايران ترمنځ د نيابتي جګړې په سترګه کتل کېږي.

د پاکستان او استراليا ترمنځ مسابقه پيل شوه

د پاکستان د کرکټ یو تن لوبغاړی ناصر جمشېد

په انګلستان کې د کرکټ د ٢٠١٩ میلادي کال د نړيوال جام د سياليو په لړ کې د پاکستان او استراليا ترمنځ مسابقه پيل شوه.

پاکستان چې د انګلستان په ټاونټن «Taunton» لوبغالي کې د لوبې پچه يا ټاس‌يې وګاټه، استراليا ته‌يې د بېټنګ کولو بلنه ورکړله.

اسټرالیا تر اوسه د ۲۰۱۹ کال په نړیوال جام کې درې لوبې کړي چې دوې يې ګټلي او يوه بايللې ده.

پاکستان په درېیو لوبو کې یوازې یوه ګټلې ده.

د دوی لوبه په ټاونټون ښار کې په ځايي وخت له غرمې مخکې پيلېږي.

د کرکټ نړیوال جام سیالۍ د انګلستان او ولز په کورب‌توب پیل شوی.

افغان لوبډله به هم راتلونکې شنبه خپله څلورمه سیالي د جَنوبي افریقا په وړاندې وکړي.

دواړو ټیمونو ویلي چې د مخته تګ لپاره‌یې د شنبې سیالي خورا مهمه ده.

توقايف د قزاقستان د نوي ولسمشر په توګه د وفادارۍ لوړه وکړه

قاسم جومارت توقايف د قزاقستان د نوي ولسمشر په توګه لوړه پر ځای کړه

قاسم جومارت توقايف د قزاقستان د نوي ولسمشر په توګه د وفادارۍ لوړه وکړه.

دى د هغو انتخاباتو ګټونکى اعلان شو چې نړيوالو څارونکو په‌کې د رأی ورکولو پر مهال د پراخو سرغړونو راپور ورکړى دى.

د انتخاباتو پر مهال په سلګونه سوله‌ييز اعتراض کوونکي د حکومت له‌خوا ونيول شول.

توقايف چې پخواني مستبد ولسمشر نور سلطان نظربايف د خپل ځايناستي په توګه غوره کړى و، نن د چهارشنبې په ورځ د وفادارۍ لوړه وکړه.

د لوړې مراسم د پلازمېنې نور سلطان د خپلواکۍ په نوم ماڼۍ کې جوړ شوي وو.

د قزاقستان د پلازمېنې نوم په‌دې وروستيو کې له استانې څخه نورسطان ته اړول شوى دى.

د انتخاباتو وروستي نتايج ښيي چې ٦٦ کلن توقايف د تېرې يکشنبې د ولسمشرۍ په انتخاباتو کې په سلو کې ۷۱ رأیې ګټلې دي.

په سوډان کې د سياسي مخالفینو رهبران مظاهرې پاى ته رسوي

سوډان کې مظاهره

په سوډان کې د سياسي مخالفانو رهبرانو موافقه وکړه چې مظاهرې به پاى ته رسوي او د سوډان له واکمنې پوځي شورا سره به خبرې بيا پيلوي.

دا خبره د ايتوپيا يوه منځګړي وکړه.

د سوډان واکمنو جنرالانو د دغه پرمختګ خبر نه‌دى تأييد کړى، خو دا په‌داسې حال کې ده چې د ملګرو ملتونو امنيت شورا پرون د ملکيانو پر وړاندې د پوځ وروستى تشدد وغانده.

په سوډان کې دغو ملکيانو د ملکي نافرمانۍ په کمپاين کې برخه اخیستې او په‌دغه هېواد کې ملکي واکمني غواړي.

بل‌خوا د امريکا يو عالي رتبه ډيپلومات په پام کې لري چې سوډان ته سفر وکړي چې پر پوځ فشار راولي، څو پر مظاهره‌چيانو خپل فشار پاى ته ورسوي.

د ايتوپيا د صدراعظم ابي احمد يو استازى محمود ديرير چې هڅه کوي د سوډان د شخړې په حل کې منځګړيتوب وکړي، ويلي: "د ازادۍ او بدلون لپاره ملکي اتحاد، منلې چې سر له نننه به د ملکي نافرمانۍ کمپاين پاى ته رسوي."

د سوډان انتقالي پوځي شورا تأييد کړې چې ٩ ورځې مخکې تر ٣٠ زيات کسان هغه وخت ووژل شول چې امنيتي ځواکونو په پلازمېنه خارطوم کې دفاع وزارت ته څېرمه د مظاهرو پر يوه کمپ يرغل وروړ.

خو د اپوزېسيون ځواکونه وايي تر دې زيات کسان وژل شوي دي.

ټرمپ او بایډن یو بل ته سپکې سپورې ویلي

د ټرمپ مهم ډموکرات سیال جو بایډن

د امریکا متحده ایالاتو ولسمشر ډونالد ټرمپ او مهم ډموکرات سیال جو بایډن ایووا ایالت ته په سفر کې په یو بل لفظي بریدونه کړي.

ټرمپ پرون سې شنبه ایووا ته تر تلو مخکې په سپينه ماڼۍ کې د امریکا پخوانی مرستیال ولسمشر جو بایډن کم عقل او له ذهني کمزورتیا سره مخ بللی.

بایډن هم د ټرمپ ځواب ورکړی. هغه په اتوموا ښار کې د سې شنبې په ورځ په وینا کې ۷۲ کلن ولسمشر ټرمپ د امریکا لپاره یو موجوده ګواښ یاد کړی.

بایډن ویلي، ټرمپ د کارګرانو او بزګرانو د دفاع ژمنه کړې، خو په ځواب کې یې د ده په خبره هغوی د چین او مکسیکو په څېر هېوادونو سره د تعرفو او مالیاتي لانجو واړول.

د جمهوري غوښتونکي ګوند له‌خوا په ۲۰۲۰ میلادي کال کې د ولسمشرۍ ټاکنو ته د ولسمشر ټرمپ کاندیداتوري نږدې مشخصه ده.

خو جو بایډن د ډموکرات ګوند د کاندیداتورۍ لپاره له خپلو څه باندې ۲۰ ګوندي ملګرو سره مخ دی هغه څه چې په یو لړ مقدماتي انتخاباتو کې پرې فیصله کېږي.

روسیه ترکیې ته د «اېس-۴۰۰» په نوم د توغندیو دفاعي سیستم سپاري

د «اېس-۴۰۰» په نوم د توغندیو دفاعي سیستم

روسیه وايي، پلان لري چې د روان کال په جولای میاشت کې ترکیې ته د «اېس-۴۰۰» په نوم د توغندیو دفاعي سیستم وسپاري.

د کرملېن د بهرنیو چارو سلاکار یوري اوشاکوف د سې شنبې په ورځ مسکو کې خبریالانو ته وویل: "د روسیې او ترکیې ترمنځ توافق شوی او د مهالوېش سره سم به پرې عمل وشي."

د دې روسي چارواکي په وینا د مسکو او انقرې په اړیکو کې هېڅ ستونزه نه‌شته.

تر دې مخکې واشنګټن انقرې لپاره د جولای تر ۳۱مې وخت ټاکلی و چې له روسیې څخه د توغندیو د دې دفاعي سیستم پېرل ودروي او که‌نه د «اېف-۳۵» امریکايي الوتکو قرارداد به له لاسه ورکړي.

ترکیه چې د ناټو غړیتوب لري په تېرو څو میاشتو کې یې له روسیې څخه د دې دفاعي سیستم د پېرلو پر سر له امریکا ناندرې درلودې.

متحده ایالات استدلال کوي چې د توغندیو دا روسي دفاعي سیستم د ناټو د متحدانو له دفاعي شرایطو سره برابر نه‌دی، خو ترکیه وايي له روسیې سره‌یې د دې دفاعي سیستم په اړه هوکړه کړې او د لغوه کېدو په برخه کې خبرداری ورته د منلو نه‌دی.

ایران کې نیول شوی لبنانی تر خوشې کېدو وروسته لبنان ته رسېدلی

نزار زکا امریکا ته د جاسوسۍ په تور ایران کې نیول شوی و، تر خوشې کېدو وروسته خپل هېواد ته رسېدلی دی.

یو لبنانی چې امریکا ته د جاسوسۍ په تور ایران کې نیول شوی و، تر خوشې کېدو وروسته خپل هېواد ته رسېدلی دی.

نزار زکا چې د امریکا دایمي اقامت هم لري په ۲۰۱۵ میلادي کال کې په ایران کې ونیول شو.

زکا د سې شنبې په ورځ د بیروت هوايي ډګر ته له رسېدو وروسته په داسې حال کې چې د لبنان د استخباراتو رئیس ورسره ملګری و، د جمهوري ریاست ماڼۍ ته بوتلل شو او ولسمشر میشل عون او کورنۍ یې له نوموړي سره وکتل.

تر دې مخکې یو ایراني چارواکي ویلي و، د دې هېواد یو محکمې لبناني چارواکو ته د نزار زکا له سپارلو سره موافقه کړې ده.

زکا چې د ټکنالوژۍ یو متخصص دی، په ۲۰۱۶ میلادي کال کې د ایران له‌خوا امریکا ته د جاسوسۍ په تور په ۱۰ کاله بند او په څه باندې څلور میلیونه ډالر جریمه محکوم شوی و.

نوموړي پر ده لګېدلي ټول تورونه رد کړي.

نور راوښيه

XS
SM
MD
LG