د لاسرسۍ وړ لېنکونه

تازه خبر
دوشنبه ۳۰ مرغومی ۱۳۹۸ کابل ۰۲:۵۶

نړۍ

وکیلانو د روسي ژورنالېست ګولونوف د نظر بندۍ پرضد اعتراض کړی

روسی ژورنالېست ایوان ګولونوف

د روسي ژورنالېست، ایوان ګولونوف وکیلانو د هغه د قسمي نظر بندۍ پرضد عرض کړی دی.

دا ژورنالېست په روسیه کې ډېر پېژندل شوی دی او د مدوژدا په نوم خبري اژانس ته چې په روسي ژبه له لاتویا فعالیت کوي، څېړنیز رپوټونه جوړوي.

هغه د مخدرو موادو د خرڅولو په جرم په قسمي ډول، دوه میاشتې په خپل کور کې نظر بند شوی دی، خو که محکمه پرېکړه وکړي، د هغه د نظربندۍ موده نوره هم تمدیدلای شي.

ژورنالېست ایوان ګولونوف پرځان لګېدلی تور رد کړی دی.

د هغه وکیل، سرګي بادامشین نن د جون په ۱۱مه وویل چې د ګولونوف د نظربندۍ پرضد یې د مسکو ښاري محکمې ته عرض کړی دی.

په همدې حال کې، یو شمېر روسي ژورنالېستانو، مدني فعالانو او د ژورنالېست ایوان ګولونوف ملګرو په مسکو کې د سوله‌ییز لاریون پرېکړه کړې ده.

د پاکستان پخوانی ولسمشر اصف علي زرداري محکمې ته وړاندې کړل شو

د پاکستان پخوانی ولسمشر اصف علي زرداري

د پاکستان پخوانی ولسمشر اصف علي زرداري نن د جون پر ۱۱مه د احتساب محکمې ته وړاندې کړل شو.

هغه د لسو ورځو تحقیقاتو لپاره د پاکستان د احستاب ادارې په توقیف کې دی.

د پاکستان د احتساب ملي ادارې پر اصف علي زرداري او د هغه خور فریال تالپور تور لګولی چې ډېرې پېسې یې د جعلي بانکي حسابونو له لارې خپل شخصي شرکت ته لېږدولي دي.

فریال تالپور نه‌ده نیول شوې، خو د هغې ضمانت پرون رد شو.

د پاکستان د خلکو ګوند یا د پاکستان پيپلز پارټي پلویانو نن د هغه هېواد په بېلابېلو ښارونو کې وړې – وړې مظاهرې وکړې.

زرداري به د جون په ۲۱مه بیا محکمې ته حاضر شي.

د پاکستان د احتساب ملي ادارې د اداري فساد په جلا مسئله کې نن د پاکستان د پخواني صدراعظم نوازشریف وراره، حمزه شهباز هم نیولی دی.

پخوانی صدراعظم نواز شریف هم په زندان کې دی.

په ایران کې زنداني لبنانی وګړی نزار زکا خوشې شو

د ایران ملي بیرغ

لبنانی وګړی نزار زکا چې په ایران کې امریکا ته د جاسوسۍ په تور زنداني و، خوشې شو او د لبنان د امنیت د رئيس په بدرګه بېروت ته لاړ.

لویدیځ خبري اژانسونه نن، د جون په یولسمه، د ناڅرګندو لبناني چارواکو په حواله وايي چې نزار زکا له جنرال ابراهیم عباس سره په یوه الوتکه کې له تهرانه د بېروت پر لور الوتلی دی.

د ورځې په پېل کې د ایران د قضائیه قوې ویاند، غلام حسین اسماعیلي ویلي و چې قضائیه قوې د نزار زکا له مشروطې ازادۍ سره موافقه کړې ده.

اسماعیلي ویلي و چې نزار زکا به د لبنان حکومت ته وسپارل شي خو نور جزئیات یې نه و ورکړي.

نزار زکا چې د امریکا ګرین کارد لري او د واشنګټن استوګن دی په ایران کې امریکا ته د جاسوسۍ په تور نیول شوی او په لس کاله زندان محکوم شوی دی.

د لبنان ولسمشر او د بهرنیو چارو وزیر د ایران له دولته غوښتنه کړې وه چې نزار زکا عفو کړي.

ایران رسنیو د دوشنبې په ورځ ویلي و چې تهران به نزار زکا په لبنان کې د حزب الله د ډلې مشر حسن نصرالله ته د درناوي له مخې خوشي کړي.

کاناډا: تر ۲۰۲۱ کاله به پلاستیکي وسایل له مارکېټه لیرې کړو

د کاناډا صدراعظم جسټن ټروډو

د کاناډا صدراعظم جسټن ټروډو اعلان کړی چې تر ۲۰۲۱ میلادي کاله به د یو وار استفادې لپاره پلاستیکي وسایل لکه پلاستیکي لوښي، پلاستیکي کڅوړې او د څښاک لپاره د پلاستیک پايپونه به له مارکېټه لیرې کړي.

جسټن ټروډو پرون د جون په ۱۰مه، وویل: "زه ډېر خوشحال یم چې اعلان کوم چې تر ۲۰۲۱ میلادي کاله به کاناډا هغه ټول مضر پلاستیکي شیان چې د یو وار استفادې لپاره جوړېږي، بند کړي."

د نړۍ د سترو اقتصادي قدرتونو په غونډه کې تېر کال د کاناډا، فرانسې، جرمني، ایټالیا او اروپايي اتحادیې مشرانو د نړۍ د سمندرونو د ککړتیا د مخنیوي موافقه لاسلیک کړه.

خو امریکا او جاپان موافقه نه‌وه کړې.

د اوکراین په ادېسه کې په یوه روغتون کې اور لګېدنې۶ تنه وژلي

د اوکراین د ادېسې ښار پېښه

د تور سمندرګي پر غاړه د اوکراین په ادېسه ښار کې په یوه روغتون کې د اور لګېدو له امله شپږ تنه مړه شوي دي.

رپوټونه وايي چې د کاربن مونو اُکساید ګاز له امله پینځه تنه سخت ناروغ او په روغتون کې بستر شوي دي.

د اوکراین د بېړنیو حالاتو ادارې ویلي چې روغتون یو پوړیز و او اور د جون په لسمه، د شپې لګېدلی و.

د ازادي اروپا راډيو خبریال وايي چې په وژل شوېو کې یوه نرسه او پینځه ناروغان دي.

د اور لګېدو علت لا نه‌دی څرګند شوی.

د امریکا د بهرنیو چارو وزیر د ګُرجستان له صدراعظم سره ګوري

د امریکا د بهرنیو چارو وزیر مایک پامپیو

د امریکا د بهرنیو چارو وزیر مایک پامپیو به نن د جون په ۱۱مه د ګُرجستان له صدراعظم مموکا بختادژې سره په واشنګټن کې وګوري.

دواړه خواوې به د امریکا او ګرجستان لپاره پر مهمو مسئلو وغږېږي.

د امریکا د بهرنیو چارو وزارت ویاندې، مورګن اورتېګس پرون وویل چې د امریکا متحد ایالات له ګرجستانه په جلا شوې سیمه، جنوبي اوسېتا کې وروستي پارلماني انتخابات په رسمیت نه پېژني.

اورټیګس ویلي چې د جنوبي اوسيتا په اړه د امریکا دریځ څرګند دی او واشنګټن جنوبي اوسیتا د ګُرجستان د خاورې برخه ګڼي.

د امریکا د بهرنیو چارو وزارت ویاندې وویل چې واشنګټن په کلکه د ګُرجستان د خاورې د بشپړتیا او د ګُرجستان د پولو چې نړیوالو په رسمیت پېژندلې، درناوی کوي.

د جنوبي اوسیتا د پارلمان د ۳۴ څوکیو لپاره نږدې سلو کاندیدانو د تېرې یکشنبې په ورځ په انتخاباتو کې برخه واخېسته.

د ګُرجستان حکومت دا انتخابات غندلي او د خپلې خاورې پر بشپړتیا یې څرګند تېری بللي دي.

په قزاقستان کې د ولسمشرۍ د انتخاباتو وروستي نتایج اعلان شول

د قزاقستان د انتخاباتو د رأیو صندوق د انتقال په حال کې

د قزاقستان د انتخاباتو مرکزي کمېسیون د ولسمشرۍ د انتخاباتو وروستي نتایج چې د موقت ولسمشر قاسم جومارت توکایف قاطع بریا تأییدوي، نن اعلان کړل.

توکایف چې پخواني دیکتاتور ولسمشر نورسلطان نظربایف د خپل ځای ناستي په توګه غوره کړی و، د کمېسیون د اعلان له مخې په سلو کې نږدې یو اویا رأیې ګټلې دي او پخواني ژورنالېست امیرجان قوسانوف په زیات توپیر په سلو کې د ۱۶.۲۳ رأیو په ګټلو سره دوهم شوی دی.

په قزاقستان کې د جون د نهمې د ولسمشرۍ د انتخاباتي کمپاینونو په جریان کې د حکومت پرضد پراخې مظاهرې وشوې او د حکومت په ځوابي اقدام کې سلګونه سوله ییز اعتراض کوونکي ونیول شول.

نن سهار د قزاقستان د لوی ښار الماتي په ځینو ناحیو کې د راپورونو له مخې پولیسو یو شمېر اعتراض کوونکي وروسته له هغه ونیول چې د انتخاباتو د نتایجو پرضد د اعتراض لپاره راټول شول.

ظریف: په سیمه کې د تاوتریخوالي د کمولو لار د اقتصادي جګړې درول دي

د ایران د بهرنیو چارو وزیر محمد جواد ظریف

د ایران د بهرنیو چارو وزیر وایي چې په سیمه کې د تاوتریخوالي د کمولو یوازنۍ لار د اقتصادي جګړې درول دي.

محمد جواد ظریف دا خبرې د دوشنبې په ورځ له خپل جرمني سیال هایکو ماس سره تر لیدو وروسته کړي دي.

ده وویل:

"زموږ په سیمه کې تازه شخړې د ایران پر وړاندې د امریکا متحده ایالاتو د اقتصادي جګړې نتیجه ده چې شخصاً ولسمشر ټرمپ اعلان کړی چې موږ له ایران سره په اقتصادي جګړه کې یوو، نو د دې شخړو د راکمېدو یوازنۍ لاره د اقتصادي جګړې درول دي."

د ایران د بهرنیو چارو وزیر زیاته کړه چې جرمني او اروپایي ټولنه کولای شي چې د دې شخړو په راکمولو کې مهم رول ولوبوي.

په همدې حال کې د جرمني د بهرنیو چارو وزیر هایکو ماس چې د ایران د اټمي تړون او په سیمه کې د وروستیو شخړو په اړه د خبرو لپاره ایران تللی، ویلي چې د سیمې شخړې د اندېښنې وړ دي او دده په خبره، یوه کوچنۍ پېښه لوی ناورین رامنځته کولای شي.

د تهران او واشنګټن ترمنځ وروستۍ شخړې داسې مهال راپورته شوې چې په وروستیو اوونیو کې امریکا په فارس خلیج کې د ایران د ګواښونو د ډېرېدو په پلمه په سیمه کې خپل پوځي حضور پیاوړی کړ.

د امریکا ولسمشر ډونالد ټرمپ په ۲۰۱۸ کال کې د ایران له اټمي تړونه د وتلو اعلان ځکه وکړ چې دده په خبره، دا تړون نشي کولای چې د ایران د باليستیک توغندیز پروګرام او یا د منځني ختیځ په شخړو کې د تهران د رول مخه ونیسي.

امریکا ایران تورنوي چې په سیمه کې د ترهګریزو فعالیتونو ملاتړ کوي، خو ایران دا تورونه ردوي.

په قزاقستان کې د معترضینو نیول دوام لري

د قزاقستان پولیس د معترضینو د نیولو په حال کې

له قزاقستانه راپورونه وایي چې چارواکي د الماتان په ځینو برخو کې د معترضینو نیولو ته دوام ورکوي.

دا اقدام وروسته له هغه شوی چې سلګونه کسان د قزاقستان د ولسمشرۍ انتخاباتو د رسمي پایلې له کبله په الماتا ښار کې په اعتراض راوتل.

هغه ویډیو چې د شپې مهال اخيستل شوې او ټولنیزو رسنیو ته راووتله، ښیي چې لسګونه کسان د پولیسو له ځانګړې قطعې د تېښتې په حال کې دي.

د قزاقستان د انتخاباتو د کمېسیون چارواکو د جون په لسمه وویل چې د دې هېواد موقت ولسمشر قاسم جومارت تکایف څه باندې ۷۰ سلنه رأیې اخيستي دي.

رأیې ورکوونکو د جون په نهمه د یکشنبې په ورځ د نوي ولسمشر د ټاکلو لپاره خپلې رأیې وکارولې.

پاکستاني چارواکو پخوانی ولسمشر اصف علي زرداري نیولی

د پاکستان پخوانی ولسمشر اصف علي زرداري

پاکستاني چارواکو د دې هېواد پخوانی ولسمشر اصف علي زرداري د اداري فساد په تور نیولی دی.

په پاکستان د احتساب د ملي ادارې یوې ډلې د دوشنبې په ورځ زرداري له هغې وروسته په خپل کور کې ونیوه چې محکمې د پیسو د وینځلو په یوه قضیه کې د نوموړي د ضمانت غوښتنه رد کړه.

د اسلام اباد سترې محکمې د پاکستان د پیپلز ګوند د دې مخکښ مشر زرداري او د ده د خور فریال تالپور د ضمانت غوښتنه رد کړه.

راپورونه وايي، د تالپور د نیولو امر تر اوسه پورې نه دی شوی.

د پاکستان د احتساب ملي ادارې زرداري او خور یې تالپور تورن کړي چې یوسلو پنځوس میليونه پاکستانۍ روپۍ یې د جعلي اکاونټونو له لارې خپل خصوصي شرکت ته لېږدولې دي.

زرداري او خور یې پر دوی لګېدلي تورونه رد کړي دي.

د پاکستان د احتساب ادارې له هغې راوروسته چې عمران خان د پاکستان صدراعظم شوی، څو نور سیاستوال هم د درغلیو په تور نیولي دي.

د پاکستان سترې محکمې د دې هېواد پخوانی صدراعظم نوازشریف هم د مالي درغلیو په تور له واکه لېرې کړ.

اصف علي زرداري چې د پاکستان د وژل شوې پخوانۍ صدراعظمې بېنظیر بوټو خاوند و، په ۲۰۰۸ میلادي کال کې د پاکستان ولسمشر شو او تر ۲۰۱۳ میلادي کال پورې د دې هېواد ولسمشر پاتې شو.

د قزاقستان پولیسو په الماتا ښار کې ۳۰ مظاهره چیان نیولي

په قزاقستان کې پولیس د مظاهره چیانو د نیولو په حال کې

د قزاقستان پولیسو په الماتا ښار کې چې د دې هېواد لوی ښار دی، ۳۰ تنه مظاهره چیان نیولي دي.

دې اعتراض کوونکو غوښتل چې د ښار په مرکز کې د دې هېواد د ولسمشرۍ د انتخاباتو پر رسمي نتایجو اعتراض وکړي.

نړیوالو څارونکو د دې هېواد د ولسمشرۍ د انتخاباتو نتایج له اساسي ازادیو څرګند سرغړاوی بللی دی.

د اروپا د امنیت او همکارۍ د سازمان څارونکو نن وویل، د سوله ییزو اعتراض کوونکو د نیولو په شمول د خلکو اساسي حقونو ته ناپامي او د انتخاباتو په ورځ پراخې بې نظمۍ د ولسواکۍ معیارونو ته د درناوي د نشتوالي څرګندونه کوي.

د قزاقستان د انتخاباتو کمېسيون نن وویل چې قاسم جومارت تکایف له درې لسیزو وروسته په دې هېواد کې په لومړنیو انتخاباتو کې ۷۱ په سلو کې رأیې خپلې کړي دي.

د یکشنبې په ورځ د دې هېواد انتخابات د حکومت د سلګونو مخالفانو له نېول کېدو سره یوځای ترسره شول.

قاسم جومارت تکایف د قزاقستان موقت ولسمشر او د ولسمشرۍ د څوکۍ کاندید پرون په یوه خبري غونډه کې د یوه خبریال د دې پوښتنې په ځواب کې چې ایا له هغو مظاهرو چې اعتراض کوونکي په کې د ده پر ضد شعارونه ورکوي، خبر دی، وویل:

"هو زه پوهېږم، بېلابېل راپورونه مو تر لاسه کړي، دا د هغوی انتخاب دی، که خلک داسې شعارونه ورکوي، زه څه کولای شم؟"

اعتراضونه د انتخاباتي کمپاینونو پر مهال پیل شوي او د انتخاباتو په ورځ یې هم دوام وکړ.

معترضان وايي، دا انتخابات عادلانه نه دي.

نظر پوښتنه: د قزاقستان انتخاباتو کې توقایف​ د پام وړ بریا خپله کړې

د قزاقستان مؤقت ولسمشر قاسم جومارت توقایف

په قزاقستان کې تر پرونيو انتخاباتو وروسته د نظرپوښتنو نتايج ښيي چې مؤقت ولسمشر قاسم جومارت توقایف​ د پام وړ بریا خپله کړې ده.

دى د پخواني مستبد ولسمشر نور سلطان نظربايف له‌خوا د ده د ځای ناستي په توګه غوره شوى و.

د ولسمشرۍ د دغو ټاکنو چې د سلګونه سوله‌ييزو اعتراض کوونکو نيول کېدل هم ورسره مل وو، لومړنۍ نظرپوښتنه ښيي چې توقايف ښايي په سلو کې تر ٧٠ زياتې رأيې ګټلې وي.

په دوهم کتار کې بل کانديد پخوانى ژورنالېست امير جان قوسانوف راغلى چې ښايي نږدې ١٦ فيصده رأيې یې ګټلې وي.

تمه کېږي د دغو انتخاباتو لومړني رسمي نتايج په څو ساعتونو کې اعلان شي.

تر وخت مخکې دغه انتخابات پرون وشول چې توقايف له شپږو هغو کانديدانو سره مخامخ وو چې خلک يې چندان نه پېژني.

د انتخاباتو پر مهال لاريونونه وشول چې په جريان کې يې په سلګونو کسان ونيول شول.

يوه لاريون کوونکي پرون د ازادۍ راډيو قزاقۍ څانګې ته وويل: "موږ غواړو قانوني حقونه مو د حکومت له‌خوا د قزاقستان د اساسي قانون او نورو قوانينو له لارې تضمين شي چې د بيان ازادي تجربه کړو."

هغه مظاهرې چې د انتخاباتو د کمپاينونو پر مهال پيل شوې وې، پرون د انتخاباتو په ورځ هم روانې وې، خو پوليسو د هغوى د پاى ته رسولو لپاره چټک اقدام وکړ.

مظاهره‌چيانو اعتراض درلود چې دا انتخابات عادلانه نه‌وو.

د ایران د بهرنیو چارو وزیر: اروپا دې پر ايران انتقاد نه‌کوي

د ایران د بهرنیو چارو وزیر جواد ظریف

په‌داسې حال کې چې نن دوشنبه د جرمني د بهرنيو چارو وزير تهران ته ځي، د ايران د بهرنيو چارو وزير وايي، اروپايي هېوادونه دې پر ايران انتقاد نه‌کوي چې هڅه کوي خپل پوځي ظرفيتونه زيات کړي.

ايراني رسنيو د محمد جواد ظريف هغه خبرې رااخيستي چې پرون‌يې ويلي: "اروپايان په هغه موقف کې نه‌دي چې د ٢٠١٥ میلادي کال د اټمي تړون له چوکاټه دباندې مسايلو په اړه پر ايران انتقاد وکړي."

د ايران د بهرنيو چارو وزير دا څرګندونې په‌داسې حال کې کړي چې د جرمني د بهرنيو چارو وزير هايکو ماس «Heiko Maas» نن په تهران کې له چارواکو سره خبرې کوي.

دى به له ايراني لوري سره د اټمي تړون د خوندي پاتې کېدو پر لارو چارو بحث وکړي.

که څه هم د امريکا متحده ايالات تېر کال له دغه اټمي تړونه په يو اړخیز ډول وتلی، خو د تړون اروپايي لاسليک کوونکي فرانسه، بريتانيا او جرمني د دغه تړون د برحاله پاتې کېدو لپاره هڅه کوي.

د نړیوال جام کرکټ، جنوبي افریقا له وېسټ انډیز سره لوبېږي

د وېسټ انډیز دوه لوبغاړي

د ۲۰۱۹ کال د کرکټ په نړیوال جام کې نن دوشنبه جنوبي افریقا او وېسټ انډیز سره په خپلو کې مسابقه کوي.

په انګلستان او وېلز کې د دغو روانو مسابقو په لړ کې هندوستان پرون خپله دوهمه لوبه له استرالیا د ٣٦ منډو په توپير وګټله.

د لندن په اووال لوبغالي کې هند د لوبې پچه يا ټاس‌يې وګاټه، د بېټېنګ کولو پرېکړه‌يې وکړه.

هندوستان د ٥ لوبغاړو په سوځېدو په ٥٠ اورونو کې اسټراليا ته د ۳۵۳ منډو هدف وټاکه.

خو اسټراليا ونه‌توانېد دغه هدف پوره کړي، په ٥٠ اورونو کې يې ټول لوبغاړي په‌داسې حال کې وسوځېدل چې يوازې يې ٣١٦ منډې کړې وې.

د پرونۍ مسابقې غوره لوبغاړى شیکر داون وټاکل شو چې د هند لپاره‌يې په ١٠٩ توپونو ١١٧ منډې وکړې.

هندوستان د ٢٠١٩ میلادي کال د نړيوال جام د سياليو په لړ کې خپله لومړۍ مسابقه تېره چهارشنبه له جنوبي افريقا په ٦ وېکټو ګټلې وه.

هند په نړیوال جام کې خپله ۲مه لوبه له اسټرالیا وګټله

ارشیف/ د هند د کرکټ دوه لوبغاړي

د هند د کرکټ ملي ټيم د ۲۰۱۹ میلادي کال په نړیوال جام کې خپله دوهمه لوبه له اسټرالیا وګټله.

هند پرون یکشنبه اسټرالیا ته د ۳۵۳ منډو هدف ورکړی و اسټرالیا په ۳۱۶ منډو ټول لوبغاړي له لاسه ورکړل.

د دې لوبې غوره لوبغاړی شیکر دون و چې د هند لپاره‌یې ۱۱۷ منډې جوړې کړې.

داون وویل: "تر ټولو ښه خبره دا ده چې زموږ هر یو لوبغاړی لوبه کوي. زه هم ډېر خوښ یم چې د لوبې غوره لوبغاړی انتخاب شوم او جایزه مې واخیسته. موږ ښه فېلډېنګ کوو، ښه کېچونه مو واخیستل او ډېر متوازنه ټیم یو."

هند تر دې مخکې جنوبي افریقا هم ماته کړې او بله لوبه له نیوزیلنډ سره کوي.

د ۲۰۱۹ میلادي کال د کرکټ په نړیوال جام کې نن دوشنبه جنوبي افریقا او وېسټ انډیز سره مخ کېږي.

په نړیوال جام کې چې د جولای تر ۱۴مې دوام کوي، تر دې دمه نیوزیلنډ په درېیو بریاو لومړی مقام او افغانستان په درېیو ماتو وروستی ځای لري.

نور راوښيه

XS
SM
MD
LG