د لاسرسۍ وړ لېنکونه

تازه خبر
دوشنبه ۳۰ مرغومی ۱۳۹۸ کابل ۰۲:۰۹

نړۍ

د امریکا په ویرجینیا ایالت کې لږترلږه یولس تنه ووژل شول

د امریکا په ویرجینیا ایالت کې د پېښې د ځای یو انځور

د امریکا د متحده ایالتو په ویرجینیا ایالت کې لږترلږه یولس تنه ووژل شول.

داسې ښکاري چې د ویرجینیا بيچ په ساحلي ښار کې یوه ناراضي مامور پر یوې حکومتي ودانۍ ډزې کړي دي.

پولیسو پرون وویل، دغه وسله وال د یوه پولیس په ګډون شپږ تنه نور ټپیان کړي دي.

برید کوونکی د ځوابي ډزو پرمهال وژل شوی دی.

د پولیسو مشر جیمز سیرویرا وویل، برید کوونکي د ویرجینیا بیچ ښار د ښاروالۍ په ودانۍ کې له یوه سره پر مامورینو ډزې وکړې.

چارواکي وایي چې دا برید کوونکی له اوږدې مودې راهیسې له خپله کاره ناراضي و.

د اسلامي همکاریو سازمان د بیت المقدس په اړه ځينې پرېکړې رد کړې

د بیت المقدس یو انځور

د اسلامي همکاریو سازمان د امریکا د متحده ایالتو او یو شمېر نورو هېوادو دا پرېکړه وغندله چې دوی په اسرائیل کې خپل سفارتونه بیت المقدس ته انتقال کړي دي.

د اووه پنځوسو هېوادو د مشرانو په غونډه کې چې د سعودي عربستان په مکې مکرمې کې پرون وشوه، همداراز د متحده ایالتو پر دې پرېکړې اعتراض وشو چې د سوریې د جولان لوړې سیمې یې د اسرائیل د خاورې په توګه په رسمیت پېژندلې دي.

د جولان لوړې د نولس سوه اووه شپېتم کال د عربو او اسرائیل د شپږ ورځنۍ جګړې پرمهال اسرائیل لاندې کړې.

د همدې جګړې په ترڅ کې اسرائیل د بیت المقدس ختیځ لوری هم ونیو.

د امریکا د متحده ایالتو ولسمشر ډونالد ټرمپ په ۲۰۱۷ کال کې بیت المقدس د اسرائیل د پلازمېنې په توګه په رسمیت وپېژانده او امر یې وکړ چې د امریکا سفارت له تل ابیت څخه بیت المقدس ته انتقال شي.

تر دې پرېکړې وروسته لږ شمېر نورو هېوادو د ګواتیمالا په ګډون ورته اقدام وکړ.

په پاکستان کې یوې محکمې درې افراطیان د ترهګرۍ په تور زنداني کړل

د پاکستان بیرغ

په پاکستان کې یوې محکمې درې افراطیان د ترهګرۍ په تور زنداني کړل.

د پاکستان د ترهګرۍ په وړاندې د مبارزې ادارې پرون په یوې اعلامیې کې څرګنده کړه چې دا کسان زندان ته واستول شول.

په اعلامیه کې د دې کسانو نومونه نه دي اخیستل شوي، خو ویل شوي دي چې د جیش محمد د منع شوې ډلې غړي دي.

دا ډله د فبرورۍ په څوارلسمه د هند په کشمیر کې د برید مسؤله بلل شوې ده.

په دې برید کې څلوېښت هندي سرتېرې وژل شوي وو.

دې پېښې د هند او پاکستان اړیکې خورا ترینګلې کړې او په سیمه کې یې د یوې لویې جګړې وېره پیدا کړه.

د سعودي عربستان پاچا تهران د وسله والو ترهګرو په ملاتړ تورن کړ

د سعودي عربستان پاچا سلمان بن عبدالعزیز

د سعودي عربستان پاچا تهران د وسله والو ترهګرو په ملاتړ تورن کړ.

سلمان بن عبدالعزیز پرون په مکه مکرمه کې د اسلامي همکاریو د سازمان په سرمشریزه کې وویل چې دا ترهګر د نړۍ په کچه د تېلو سرچینو ته په یوه ګواښ بدل شوي او د سیمې امنیت تهدیدوي.

پاچا سلمان په دې ترڅ کې په وروسیتو کې د متحده عربي اماراتو په اوبو کې د تېلو پر ټانکرونو بریدونو ته اشاره وکړه او د سعودي عربستان د تېلو پر پایپ لاینونو یې د بې پیلوټه الوتکې برید یو ترورېستي عمل وباله.

پاچا سلمان زیاته کړه چې د دې ترورېستي بریدونو هدف یوازې سعودي عربستان او د فارس خلیج نه دی بلکې د دې هدف ټولې نړۍ ته د تېلو د رسولو مخه نیول دي.

د عربستان پاچا بیا وویل، پر پایپ لاینونو چې کوم برید شوی و، هغه د یمن حوثي یاغیانو وکړ او دا هغه وسله وال ترهګر دي چې ایران یې ملاتړ کوي.

د کوسوو حکومت له خپلې خاورې د یوه روسي وګړي د شړلو امر کړی

روسی ډیپلومات میخایل کراسنوشچیکوف

د کوسوو حکومت یو روسی وګړی چې د ملګرو ملتونو سازمان ته یې کار کاوه، غیر مطلوب بللی او له خپلې خاورې یې د هغه د شړلو امر کړی دی.

د کوسوو صدراعظم راموش هرادیناي پرون د مې په یودېرشمه نېټه پر فېسبوک ولیکل چې خپل د بهرنیو چارو وزارت ته یې امر کړی چې د میخایل کراسنوشچیکوف په نوم دا وګړی بېړنی غیر مطلوب اعلان کړي.

هرادینا په کوسوو کې د ملګرو ملتونو له ځانګړي استازي هم غوښتنه کړې چې د دوی له پرېکړې سره سم عمل وکړي.

د ملګرو ملتونو د سازمان روسی کارکوونکی د مې په اته ویشتمه نېټه د کوسوو په شمالي سیمو کې چې اکثر صربان استوګن دي، د پولیسو په عملیاتو کې زخمي شوی و.

د ملګرو ملتونو ویاند فرحان حق ویلي چې د دې سازمان کارکوونکي غیرمطلوب نه شي ګڼل کېدلای، ځکه هغوی د یوه حکومت استازیتوب نه کوي او ځانګړی مصؤنیت لري.

د امریکا د بهرنیو چارو وزیر د جرمني له صدراعظمې سره وکتل

د امریکا د بهرنیو چارو وزیر مایک پامپیو

د امریکا د بهرنیو چارو وزیر مایک پامپیو پرون د مې په یودېرشمه د جرمني د صدراعظمې انګېلا مېرکل سره وکتل.

پامپیو وویل چې جرمني د امریکا مهم او ستر شریک دی.

ټاکل شوې وه چې د امریکا د بهرنیو چارو وزیر د دې میاشتې په پیل کې جرمني ته ولاړ شي.

خو د واشنګټن او تهران ترمنځ د کړکېچ دد زیاتېدو له امله یې جرمني ته سفر په وروستۍ شېبه کې وځنډول شو.

واشنګټن او برلین هم پر یو شمېر نړیوالو مسئلو متفاوت دریځونه لري.

له ایران سره اټمي موافقه او د روسیې د ګازو د انتقال ستره پروژه (نورد ستورم ۲) د جرمني او امریکا د مخالفت سترې مسئلې دي.

د جرمني صدراعظمې پرون له مایک پامپیو سره تر کتنې مخکې په برلین کې خبریالانو ته وویل چې امریکا به یې مهم شریک پاتې شي.

ملګري ملتونه: ایران د ۲۰۱۵ کال له اټمي موافقې سره سم عمل کړی

د ملګرو ملتونو نښان

د ملګرو ملتونو د اټمي انرژۍ د څارنې نړیوالې ادارې ویلي چې ایران په ۲۰۱۵ میلادي کال کې له شوې موافقې سره سم عمل ته دوام ورکړی خو په ټيټه کچه د غني شویو یورانیمو او درنو اوبو ذخیرې یې د زیاتېدو په حال کې دي.

د ایران د اټمي فعالیت په اړه د ملګرو ملتونو د دې ادارې د څېړنې پایلې په څلور میاشتني رپوټ کې چې پرون د مې په یودېرشمه خپور شو، د دې ادارې غړو هېوادونو ته استول شوې دي.

د ملګرو ملتونو د اټمي انرژۍ د څارنې نړیوالې ادارې ویلي چې ایران له هغو محدودیتونو سره سم عمل کړی چې په نړیواله موافقه کې يې یادونه شوې ده.

ایران په ۲۰۱۵ میلادي کال کې د نړۍ له شپږو قدرتونو سره موافقه وکړه چې د اقتصادي بندیزونو د کمېدو په بدل کې به خپل اټمي فعالیتونه محدودوي.

د امریکا متحدو ایالاتو تېرکال پرېکړه وکړه چې له موافقې ووځي.

د امریکا ولسمشر وویل چې دا موافقه نیمګړې ده او پر ایران یې له خپل لوري بندیزونه زیات کړل.

د کرکټ د نړیوال جام په دوهمه لوبه ویسټ انډیز پاکستان ته ماته ورکړه

ارشیف، د پاکستان کرکټ لوبډله

د کرکټ د نړیوال جام په دوهمه لوبه کې ویسټ انډیز نن پاکستان ته ماته ورکړه.

د پاکستان ټول لوبغاړي په ۱۰۵ منډو اوټ شول او ویسټ انډیز په پنځلسم اوورو کې دا هدف پوره کړ.

د دې لوبې غوره لوبغاړی اوشن توماس و چې د پاکستان پر وړاندې یې څلور ویکټې واخیستې.

هغه وویل چې په نړیوال جام کې به همداسې ښې لوبې وکړي:"دا زما لپاره ډېر یو ښه پیل دی. موږ خپل پلان ډېر ښه تطبیق کړ. زه له خپل بالنګه خوند اخلم څو د ویسټ اندیز لپاره لوبې وګټم."

د ویسټ انډیز لوبغاړي کریس ګیل ان په دې کم هدف کې هم خپله پنځوسیزه پوره کړه.

پاکستان ته دا دوهمه ماته وه ځکه په تمریني لوبه کې یې له افغان لوبډلې ماته خوړلې وه.

تمه ده سبا د کرکټ په نړیوال جام کې افغانستان له اسټرالیا سره مخ شي.

د ۲۰۱۹ میلادي کال د کرکټ نړیوال جام د انګلستان او ویلز په کوربه توب پرون پنجشنبه پیل شوی او د جولای تر ۱۴مه دوام کوي.

انګلا مرکل له مایک پامپيو سره د افغانستان په اړه خبرې کوي

د امريکا د متحدو ايالاتونو د بهرنيو چارو وزير مايک پامپيو

د جرمني صدراعظمې انګلا مرکل ویلي چې د امریکا د بهرنیو چارو له وزیر مایک پامپيو سره د افغانستان په اړه خبرې کوي.

هغې دا خبره نن په برلین کې له پامپیو سره تر لیدنې مخکې وکړه:​ "موږ به د افغانستان په اړه خبرې وکړو هغه ځای چې موږ «امریکا او جرمني» په‌کې د پام وړ شمېر سرتیري لرو."

جرمني د امریکا تر څنګ د افغان ځواکونو په خاصه توګه د پولیسو په روزنه کې همکاري کړې ده.

اوس وخت امریکا په افغانستان کې څه باندې ۱۴ زره سرتیري لري.

د جرمني دولتي رسنیو ویلي چې ۱۳۰۰ جرمني سرتیري د غوڅ ملاتړ د ماموریت په چوکاټ کې دنده لري.

ویسټ انډیز د پاکستان ټول لوبغاړي په ۱۰۵ منډو اوټ کړل

د کرکټ د نړیوال جام په دویمه لوبه کې نن ویست اندیز د پاکستان ټول لوبغاړي په ۱۰۵ منډو اوټ کړل.

د ویسټ انډیز او پاکستان لوبه د انګلستان په ناتګهم ښار کې روانه ده.

پاکستان لومړی بیټینګ وکړ.

د ویسټ انډیز لوبغاړو اوس د هدف د پوره کولو لپاره لوبه پيل کړې ده.

د ویسټ انډیز بالر اوشان ټوماس څلور، لوبډل‌مشر جېسن هولډر درې ویکټې، اندرې راسل دوه ویکټې او شیلډن کټرول یوه ویکټه واخېسته.

پاکستان داسې وخت د نړیوال جام په رسمي خپل لوبغاړي ژر له لاسه ورکړل چې تمریني لوبه کې یې هم د افغانستان په وړاندې ماته خوړلې ده.

تمه ده د افغانستان د کرکټ ملي ټیم سبا شنبه د اسټرالیا په وړاندې لوبه وکړي.

افغانستان د ۲۰۱۵ کال په نړیوال جام کې په اسټرالیا یوه لوبه په لوی تفاوت بایللې وه.

د اروپايي شورا رئیس د قزاقستان له ولسمشر سره وغږېد

د اروپايي شورا رئیس ډونالډ ټوسک. May 31, 2019

د اروپايي شورا رئیس ډونالډ ټوسک مرکزي اسیا ته په سفر کې د قزاقستان له جمهور رئیس قاسم جورمات تکایف سره خبرې کړي.

د قزاقستان د جمهوري ریاست وېب‌پاڼې د ولسمشر تکایف په حواله لیکلي چې قزاقستان به له اروپايي ټولنې سره خپله جامع او رغنده همکارۍ ته دوام ورکړي.

د اروپايي شورا رئیس قزاقستان نه یوازې په سیمه بلکې نړۍ کې یو مهم او با ثباته شریک یاد کړی دی.

له قزاقستان مخکې د اروپايي شورا رئیس ډونالډ ټوسک تاجکستان ته تللی و او هلته یې له ولسمشر امام علي رحمان سره وکتل.

دی به وروسته ازبکستان ته هم ولاړ شي.

د مرکزي اسیا دغو درېیو هېوادونو ته د اروپايي شورا رئیس ډونالډ ټوسک سفر وروسته له هغه سفر وکړ چې اروپايي ټولنې دوه اوونۍ مخکې د منځنۍ اسیا لپاره خپله نوې سټراټيژي پیل کړه.

د شمالي کوريا مشر خپل استازی او یو چارواکی اعدام کړی

د شمالي کوريا مشر

د راپورونو له مخې د شمالي کوريا مشر کېم جونګ اون خپل ځانګړی استازی او د بهرنيو چارو وزارت هغه چارواکي اعدام کړي چې د ده او امريکا د ولسمشر ډونالډ ټرمپ تر منځ د فبرورۍ مياشتې په خبرو کې يې رول درلود.

دا خبر د جنوبي کوريا ورځپاڼې چوسن ایلبو خپور کړی دی.

د کېم جونګ اون خاص استازی کیم یونګ چال چې ویل کېږي په اعدام شویو کې شامل دی د امریکا د بهرنیو چارو له وزیر مایک پامپيو سره هم کتلي و.

هغه د شمالي کوریا د اټمي لانجې د مرکچي پلاوي مشر و.

دی او درې نور کسان په مارچ میاشت کې امریکا ته د جاسوسۍ په تور په میریم هوايي ډګر کې اعدام شوي.

شمالي کوريا له ټرمپ سره د فبرورۍ مياشتې د خبرو د ناکامه کېدو په خاطر دوی مسئول ګڼل.

د شمالي کوریا د مشر کېم جونګ اون ترجمانه هم له ستونزو سره مخامخ ده.

د راپور له مخې دې په ژباړه کې غلطي کړې وه او اوس د سياسي زندانيانو په کمپ کې بندي ده.

پر دې د شمالي کوريا د مشر حیثیت ته د زیان اړولو تور دی.

د کرکټ نړیوال جام: پاکستان ویسټ انډیز سره لوبیږي

د ۲۰۱۹ کال د کرکټ په نړیوال جام لوبو کې نن پاکستان او ویسټ انډیز سیالي کوي.

د دوی لوبه د انګلستان په ناتینګهم ښار کې په ځايي وخت په لس نیمو بجو پیلیږي.

پاکستان په تمریني لوبه کې له افغانستانه ماته خوړلې او ویسټ انډیز بیا په خپله تمریني لوبه کې نیوزیلنډ مات کړی دی.

تېره ورځ هم کوربه انګلستان د ۲۰۱۹ کال د کرکټ د نړیوال جام په پیل لوبه کې جنوبي افریقا ته ماته ورکړه.

سبا به د افغانستان د کرکټ ملي ټیم د اسټرالیا د کرکټ له ملي ټيم سره لوبه وکړي.

د یو ورځنیو لوبو په نړیوال جام کې دا د افغانستان دوهم حضور دی.

په ۲۰۱۵ میلادي کال کې افغان ټيم په اسټرالیا او نیوزلانډ کې د کرکټ نړیوال جام لوبولی و چې په ټولو لوبو کې یې یوازې سکاټلنډ مات کړی و.

د امريکا د دفاع وزارت يوې لوړ رتبه چارواکې ترکيې ته خبردارى ورکړ

د نړيوال امن د چارو لپاره د امريکا د دفاع وزارت سرپرست معينه کاترين ويلبارجر

د امريکا متحدو ايالتونو د دفاع وزارت يوې لوړ رتبه چارواکې ترکيې ته د ميزاييلو د دفاعي سيسټم د رانيولو د عواقبو په اړه خبردارى ورکړ.

نوموړې پر انقرې د فشار زياتولو هڅه په داسې حال کې وکړه، چې ترکيې ويلي د دې سيسټم د رانيولو موافقه به عملي کوي.

د نړيوال امن د چارو لپاره د امريکا د دفاع وزارت سرپرست معينې کاترين ويلبارګر (Kathryn Wheelbarger) پرون وويل:

د ميزاييلو د S-400 ډوله دفاعي سيسټم رانيول به دF-35 ډوله جټ الوتکو په پروګرام کې د ترکيې پر شراکت او د ناټو له نورو متحدانو سره د ترکيې پر اړيکو”زيان رسوونکي“ اغېزې ولري.

مېرمن ويلبارګر پرون په واشنګټن کې اتلانتيک شورا ته په وينا کې وويل، له روسيې د ميزاييلو د دفاعي سيسټم رانيول به ناوړه عواقب ولري.

امريکا له انقرې غوښتنه کړې چې د روسيې دغه دفاعي سيسټم دې نه رانيسي.

د ناټو نورو متحدانو هم اندېښنه ښوولې چې دغه دفاعي سيسټم د امريکا ساخت F-35 ډوله جنګي جټ الوتکو ته بالقوه خطر پېښوي.

پامپیو: د عرب اماراتو ساحل ته نږدې پر ټانکرونو حمله ايران کړې

د امريکا د متحدو ايالاتونو د بهرنيو چارو وزير مايک پامپيو

د امريکا د متحدو ايالاتونو د بهرنيو چارو وزير وايي، د متحده عرب اماراتو ساحل ته نږدې د تېلو پر ټانکرونو وروستۍ حمله ايران کړې ده.

د مايک پامپيو په خبره د دې مياشتې په سر کې د دې حملې هدف په نړيوالو بازارونو کې د اومه تېلو د بيې لوړول وو.

ښاغلي پامپيو مخکې تر دې چې اروپا ته خپل سفر پيل کې پرون خبريالانو ته وويل: "د ايرانيانو دا هڅې د دې لپاره وې چې په ټوله نړۍ کې د اومه تېلو بيه لوړه کړي."

تردې مخکې د سپينې ماڼۍ د ملي امنيت سلاکار جان بولټون ويلي وو، هغه اسناد او شواهد چې ښيې، ايران د تېلو پر ټانکرونو په حملو کې لاس درلود، بله اوونۍ د ملګرو ملتونو امنيت شورا ته وړاندې کېږي.

د امريکا د بهرنيو چارو له وزير مايک پامپيو پوښتنه وشوه چې ايا ده دغه اسناد او شواهد کتلي؟ وويل هو، ده او بولټُن دواړو دغه اسناد کتلي دي.

ايران په هغو حملو کې خپل دخالت رد کړى او دا يې «شرموونکي» تورونه بللي دي.

نور راوښيه

XS
SM
MD
LG