د لاسرسۍ وړ لېنکونه

تازه خبر
دوشنبه ۳۰ مرغومی ۱۳۹۸ کابل ۰۲:۵۵

نړۍ

روسي او ایراني چارواکو د اټمي موافقې په اړه وغږېدل

د روسيې او ایران د بهرنیو چارو د وزارت مرستیالانو د تهران او نړیوالو قوتونو ترمنځ د ۲۰۱۵ میلادي کال د اټمي موافقې او د ایران او امریکا ترمنځ د مخ په زیاتېدونکې لانجې په اړه خبرې وکړې.

ایراني رسنیو ویلي دي چې سرګي ریابکوف او عباس عراقچي نن په تهران کې له یو بل سره خبرې کړي دي.

ایران د روانې مې میاشت پر اتمه نېټه اعلان وکړ چې د امریکا د فشارونو له امله به دا هېواد د ۲۰۱۵ میلادي کال د اټمي موافقې ځینې برخې عملي نه کړي.

ایران دغه راز اروپايي ټولنې ته ۶۰ ورځې وخت ورکړی چې د ۲۰۱۵ میلادي کال د اټمي موافقې خپل مسؤلیتونه ادا کړي.

د امریکا ولسمشر ډونالډ ټرمپ تېرکال پردې موافقه له پرله‌پسې انتقادونو وروسته، له دې موافقې ووت.

بلجیم یو روسی وګړی چې د داعش په شک نیول شوی مسکو ته سپارلی

د بلجیم بیرغ

بلجیم یو روسی وګړی چې په داعش ډله کې د شاملېدو په شک نیول شوی، مسکو ته سپارلی دی.

د روسيې د فدرالي امنیت ادارې نن د چهارشنبې په ورځ وویل چې امام پاشا احمدوف د سې شنبې په ورځ دوی ته سپارل شوی او دا مهال په توقیف کې دی.

د روسي چارواکو په خبره احمدوف په ۲۰۱۴ میلادي کال کې په داعش ډله کې شامل شوی و او په جګړو کې يې برخه درلوده.

د روسي مقاماتو په خبره شااوخوا دوه زره روسي وګړو په سوریه او عراق کې د داعش ډلې په ملاتړ جګړو کې برخه اخیستې ده.

د هندوستان د کرکټ لوبډلې بنګله‌دیش ته ماتې ورکړه

د هند د کرکټ لوبډلې یو غړی شنکر داون

د هندوستان د کرکټ لوبډلې په «ورام اپ» لوبه کې بنګله‌دېش لوبډلې ته ماتې ورکړه او په‌دې سره د کرکټ د نړیوال جام تمریناتي سیالۍ پای ته ورسېدې.

سبا پنجشنبه د نړیوال جام د رسمي سیالیو لومړۍ لوبه د انګلنډ او سوېلي افریقا ترمنځ ترسره کېږي.

افغانستان به خپله لومړۍ لوبه د جون په لومړۍ نېټه د استرالیا پر وړاندې ترسره کړي.

بولتون: سمندري ماینونه چې د تېلو پر ټانکر کارول شوي ایراني دي

د امريکا د متحده ايالاتو د ملي امنيت سلاکار جان بولتون

د امریکا د ملي امنیت سلاکار جان بولتون وايي، دا تقریباً یقیني ده چې ایران د تېلو پر هغه ټانکر په برید کې لاس لري چې د روانې مې میاشتې په لومړیو کې د متحده عربي اماراتو په سواحلو کې شوی و.

جان بولتون نن د متحده عربي اماراتو مرکز ابوظبۍ ته په رسېدو خبریالانو ته وویل، هغه سمندري ماینونه چې د تېلو پر ټانکر په برید کې کارول شوي تقریباً ایراني دي.

امریکا، امارات او سعودي عربستان چې په سیمه کې د ایران سیالان دي، تهران په خلیج کې د تېلو په ټانکرونو په بریدونو تورنوي.

د امریکا د ملي امنیت سلاکار ویلي، واشنګټن هڅه کوي چې د ایران او دې هېواد پورې د تړلو ډلو د فعالیتونو پر وړاندې له احتیاط کار واخلي.

د ایران د بهرنیو چارو د وزارت مرستیال عباس عراقچي بیا ویلي دي چې هېواد يې چمتو دی چې د سیمه‌ییزو شخړو په اړه د سیمې له هېوادونو سره خبرې وکړي.

د ژورنالېستانو خوندیتوب کمېټه: یو پاکستانی خبریال دې خوشې شي

له ژورنالېستانو څخه د ملاتړ نړیوالې کمېټې پر پاکستان غږ کړی دی چې هغه خبریال سمدستي خوشې کړي چې د پښتون ژغورنې غورځنګ د وروستیو مظاهرو د پوښښ پر مهال نیول شوی دی.

دې کمېټې چې مرکز يې په نیویارک کې دی د سې شنبې په ورځ په یوه بیان کې وویل چې د خېبر نیوز ټلوېزیون خبریال ګوهر وزیر د خېبر پښتونخوا په بنو سیمه کې د پښتون ژغورنې غورځنګ د مظاهرې پر مهال نیول شوې ده.

«پي. ټي. اېم» یا د پښتون ژغورنې غورځنګ د دوی په وینا پر پښتنو د پاکستان د امنیتي او پوځي ادارو د فشارونو پر وړاندې مبارزه کوي.

د دې غورځنګ زرګونه غړو او پلویانو له څو ورځو راهیسې د پاکستان په مختلفو ښارونو کې لاریونونه پیل کړي، د پاکستان د پوځ پر ضد شعارونه ورکوي او د خپلو مشرانو خوشې کېدل غواړي.

کورت ولکر د اوکراين په ختيځ کې د روسيې تحرکات «اشغال» وبلل

د اوکراين لپاره د امريکا ځانګړی استازی کورت ولکر

د اوکراين لپاره د امريکا ځانګړي استازي د اوکراين په ختيځ کې د روسيې تحرکات «اشغال» وبلل.

کورت ولکر له مسکوه غوښتنه وکړه، د هغو مکلفيتونو عملي کول پيل کړي چې د منسک د ٢٠١٥ میلادي کال په موافقو کې درج شوي دي.

د دې نړيوالې موافقې هدف د اوکراين په ختيځ کې د اوکراين د دولتي ځواکونو او د روس-پلوه بېلتون غوښتونکو ترمنځ د شخړې ختمول دي.

د اوکراين لپاره د امريکا ځانګړي استازي ښاغلي ولکر دا څرګندونې پرون د نوي ولسمشر ولادیمير زلنسکي په واکمنۍ د اوکراين د راتلونکو ليد لورو په اړه رسنيو ته د خبرو پر مهال وکړې.

کورت ولکر له واشنګټنه په وېډيو کنفرانس کې خبريالانو ته وويل، روسيې ته په کار دي چې د منسک موافقې عملي کړي.

هغه په خپلو خبرو کې زياته کړه چې اوکراين هم خپل مسؤليتونه لري.

جان بولتون د خبرو لپاره متحده عرب اماراتو ته رسېدلى

د امريکا د متحده ايالاتو د ملي امنيت سلاکار جان بولتون

د امريکا متحده ايالاتو د ملي امنيت سلاکار وايي «د سيمه‌ييز امن پر مسايلو» خبرو لپاره متحده عرب اماراتو ته رسېدلى دى.

جان بولتون پرون ناوخته په ټويټر کې ليکلي، تمه لري نن په اماراتو کې له متحدانو سره وګوري چې د سيمه‌ييز امن پر مهمو مسايلو خبرې ورسره وکړي.

د امريکا د ملي امنيت سلاکار په‌داسې حال کې اماراتو ته ځي چې په سيمه کې د ايران او امريکا ترمنځ کړکېچ اوج ته رسېدلى دى.

واشنګټن چې د ايران د سيمه‌ييزو متحدانو سعودي عربستان او متحده عرب اماراتو يو نږدې متحد دى، تهران تورن کړى چې د دې مياشتې په پيل کې يې په خليج کې د تېلو پر ټانکرونو په حمله کې لاس درلود.

په عين حال کې سعودي عربستان هم پر تهران تور لګولى چې د سعودي د تېلو پر تأسيساتو د بې‌پیلوټه الوتکې د حملې امر يې ورکړى و.

د هغې حملې مسؤلت د يمن حوثي ياغيانو منلى چې د ايران له‌خوا يې ملاتړ کېږي.

ايراني چارواکو د بې‌پیلوټه الوتکې په هغه حمله کې خپل دخالت رد کړى دى.

د جرمني او ازبکستان مشرانو د اړیکو پر پراختیا ټینګار کړی

د جرمني ولسمشر فرانک والټر شټاین مایر او د ازبکستان ولسمشر شوکت میرضیایف په تاشکند کې

د جرمني او ازبکستان مشرانو د دوه اړخیزو اړیکو پر پراختیا ټینګار کړی دی.

راپورونه وايي چې د جرمني ولسمشر فرانک والټر شټاین مایر تاشکند ته د خپل سفر په دوهمه ورځ د ازبکستان له ولسمشر شوکت میرضیایف سره کتلي دي.

میرضیایف له خپل جرمني سیال سره تر لیدنې وروسته وویل، د تاشکند او برلین ترمنځ د اړیکو د پراختیا لپاره به ډېرې هڅې وکړي.

شټاین مایر هم د ازبکستان سره د میرضیایف د ولسمشرۍ په دوره کې د خپل هېواد د سیاسي، اقتصادي او ټولنیزو همکاریو د پراختیا په اړه څرګندونې کړي.

ازبکستان له هغې راوروسته چې په ۲۰۱۶ میلادي کال کې میرضیایف واک ته ورسېد له انزوا یو څه راوتلی او د نړیوال ملاتړ د ترلاسه کولو هڅه کوي.

دا هېواد په تېرو کلونو کې د بشري حقونو د سرغړاویوو له کبله د لوېدیځو هېوادونو له انتقادونو سره مخ وو.

د تهران پخواني ښاروال د خپلې دوهمې مېرمنې پر قتل اعتراف کړی

د تهران پخوانی ښاروال محمد علی نجفي د خپلې دوهمې مېرمنې مترا استاد سره

د تهران پخواني ښاروال د خپلې دوهمې مېرمنې پر قتل اعتراف کړی.

ایراني رسنیو راپور ورکړی چې محمد علي نجفي د سې شنبې په ورځ خپل ځان پولیسو ته وسپاره.

د تهران څارنوال محمد شریعتي هم تأیید کړې چې د نجفي د اعتراف پر بنسټ هغه خپله مېرمن د کورنیو مسئلو پر سر وژلې ده.

د ایران دولتي خبري اژانس وايي، د تهران د پخواني ښاروال د مېرمنې میترا مړی د سې شنبې په سهار په تهران کې د هغوی په کور کې موندل شوی دی.

پولیسو ویلي چې دا مېرمن په ډ‌زو وژل شوې.

د سوریې شمال لوېدیځ کې حکومتي ځواکونو ۲۱ ملکیان وژلي

ارشیف، د سوریې ادلب ښار, May 26, 2019.

د سوریې په شمال لوېدیځ کې د حکومتي ځواکونو په بمبارۍ کې لږ تر لږه ۲۱ ملکیان وژل شوي دي.

دا خبره د سوریې د بشري حقونو د څار ډلې کړې.

دې بریتانیا مېشتې ادارې د سې شنبې په ورځ وویل، په وژل شویو کې نهه تنه ماشومان شامل دي.

په راپور کې ویل شوي چې حکومتي ځواکونو په حلب کې پر څو ښارګوتو بریدونه کړي.

د فرانسې خبري اژانس یو عکاس هم ویلي چې په حلب ولایت کې یې د څو جسدونو ټوټې لیدلې دي.

د سوریې حکومتي ځواکونه چې پر ملکي وګړو په بریدونو تورن دي، ډېر کم د دا ډول پېښو مسؤلیت مني او تل پر دې ټینګار کوي چې د هوايي او ځمکنیو بریدونو هدف‌یې د حکومت مخالف وسله‌وال دي.

د جرمني ولسمشر خپل ازبک سیال سره پر دوه اړخېزو اړیکو غږېدلی

د جرمني ولسمشر فرانک والټر شټاین مایر او د ازبکستان ولسمشر شوکت میرضیایف په تاشکند کې

د جرمني ولسمشر فرانک والټر شټاین مایر او د ازبکستان ولسمشر شوکت میرضیایف نن د مې په ۲۸مه، په تاشکند کې پر دوه اړخېزو اړیکو غږېدلي دي.

میرضیایف له شټاین مایر سره تر کتنې وروسته وویل چې ازبکستان ته د جرمني د ولسمشر سفر به د دواړو هېوادونو دوه اړخېز روابط لا ښه کړي.

میرضیایف په ۲۰۱۶ میلادي کال کې د ازبکستان ولسمشر وټاکل شو.

داسې ګڼل کېږي چې د میر ضیایف حکومت به هغه انزوا چې د منځنۍ اسیا دا جمهوریت د مخکني ولسمشر اسلام کریموف په واکمنۍ کې ورسره مخامخ و، کمه کړي.

ازبکستان ته د جرمني د جمهور رئیس سفر هم اصلاحاتو ته د ازبکستان د هڅولو یو ګام بلل شوی دی.

د بشري حقونو مدافع سازمان، هیومن رایټس واچ د جرمني پر جمهور رئیس غږ کړی چې پر میرضیایف ټینګار وکړي چې په ازبکستان کې مثبت بدلون پر یوه ډېره اوږده لاره څو ګامونه دي.

زرګونه کسانو په پاکستان کې پرون ناوخته د پوځ پر ضد مظاهرې وکړې

ارشیف، د پښتون ژغورنې غورځنګ د غونډې یو انځور

زرګونه کسانو په پاکستان کې پرون د مې په ۲۷مه تر روژه ماتي وروسته د هغه هېواد د پوځ پر ضد مظاهرې وکړې.

هغوی په وزیرستان کې د پښتون ژغورنې غورځنګ پر سوله ییزه مظاهره د پوځیانو له لوري د حملې او د یو شمېر فعالانو د قتل پر ضد سوله یيز احتجاج کړی و.

د رپوټونو پر اساس، په شمالي وزیرستان کې د یکشنبې په ورځ د پښتون ژغورنې غورځنګ د پلویانو او غړو پر سوله ییز لاریون پوځیانو ډزې وکړې چې څلور تنه په کې ووژل شول او څلوېښت تنه زخمیان شول.

د پاکستان پوځ ویلي چې د پښتون ژغورنې غورځنګ د دوو غړو علی وزیر او محسن داوړ په مشرۍ مظاهره چیانو د تلاشۍ په وخت کې پر پوسته حمله کړې وه.

خو پر ټولنیزو رسنیو په خپرو شویو ويډیوګانو کې ليدل کېږي چې مظاهره چیانو وسلې نه درلودې.

د پاکستان پولیسو علی وزیر چې د هغه هېواد د ملي اسامبلې غړی دی، نیولی دی.

د پښتنو د تحفظ غورځنګ فعالانو او پلویانو بېګا د پوځ پر ضد شعارونه ورکول.

د برازیل په یوه محبس کې د ۴۰ زندۍ شویو بندیانو مړي موندل شوي

د برازیل بیرغ

د برازیل په یوه محبس کې د لږترلږه څلوېښتو بندیانو مړي په داسې حال کې موندل شوي دي چې زندۍ شوي وو.

د امازون ایالت د محبسونو ادارې په یو بیان کې ویلي چې دا بندیان پرون د مې په ۲۷مه د امازون په ځنګلي ښار ماناوس کې هغه مهال ووژل شول چې وضعیت یې د پولیسو له ادارې ووت.

له دې یوه ورځ مخکې په دې محبس کې د بندیانو د سیالو ډلو په جګړه کې پنځلس کسان وژل شوي وو.

د برازیل حکومت دې سیمې ته د فدرال ځواکونو ځانګړې قطعې استولي دي، څو وضعیت کنټرول کړي.

د برازیل په محبسونو کې د بندیانو د سیالو بانډونو ترمنځ نښتې عادي خبره ده، ځکه د مخدره موادو مافیایي ډلې پر دې زندانونو تقریباً بشپړ کنټرول لري.

تمه ده چې د جرمني ولسمشر نن د ازبکستان له ولسمشر سره وګوري

تمه ده چې د جرمني ولسمشر فرانک والټر شټاین مایر به ازبکستان ته د سفر په ترڅ کې نن له ولسمشر شوکت میرضایف سره وګوري.

د شټاین مایر درې ورځنی سفر پرون د مې په ۲۷ مه پیل شو.

دې سفر ته د هغو هڅو د یوې برخې په سترګه کتل کېږي چې په ۲۰۱۶ میلادي کال کې واک ته د میرضیایف له رسېدو وروسته د اصلاحاتو لپاره پیل شوي دي، ځکه د پخواني ولسمشر اسلام کریموف د واکمنۍ پرمهال ازبکستان د ډېرو کلونو لپاره په انزوا کې پاتې و.

د بشري حقونو د څار ټولنې هیومن رایټس واچ پر شټاین مایر غږ کړی چې د خپل سفر پرمهال ولسمشر میرضیایف ته په ډاګه کړي چې د ده د واکمنۍ پرمهال په ازبکستان کې مثبت بدلونونه د اوږده مزل پر لاره کوچني ګامونه دي.

د امریکا د ملي امنیت سلاکار متحده عربي اماراتو ته سفر کوي

د متحده ایالاتو د ملي امنیت سلاکار جان بولټن

په ابوظبي کې د امریکا سفارت وايي چې د متحده ایالاتو د ملي امنیت سلاکار جان بولټن به ډېر ژر متحده عربي اماراتو ته سفر وکړي.

د امریکا سفارت په دې اړه په خپل بیان کې د دې سفر نېټه نه ده ښودلې، خو دا سفر داسې مهال کېږي چې دواړه هېوادونه د ایران د لا منزوي کولو هڅه کوي.

په عین حال کې سعودي عربستان چې په سیمه کې د ایران تر ټولو لوی سیال دی، په پام کې لري چې د ایران د نورې انزوا په خاطر د روانې مې میاشتې په ۳۰مه او ۳۱ په مکې مکرمه کې د خپلو متحدانو دوه بېړنۍ سرمشریزې د عرب لیګ او د خلیج د همکارۍ شورا غونډې ته رابللې دي.

له ایران سره د شپږو پیاړو قدرتونو د ۲۰۱۵ میلادي کال له اټمي موافقې د متحده ایالاتو له وتلو او پر تهران د نویو بندیزونو له لګولو وروسته په سیمه کې کړکېچ د پراخېدو په حال کې دی.

نور راوښيه

XS
SM
MD
LG