د لاسرسۍ وړ لېنکونه

تازه خبر
دوشنبه ۳۰ مرغومی ۱۳۹۸ کابل ۰۲:۴۵

نړۍ

د پي ټي اېم او پاکستاني پوځ ترمنځ په نښتو کې ۳ تنه وژل شوي

د پښتون ژغورنې د غورځنګ د جلسې یو انځور

په پاکستان کې د پښتون ژغورنې غورځنګ د لاریون کوونکو او امنیتي ځواکونو تر منځ په نښتو کې درې کسان وژل شوي او لږترلږه لس نور ټپیان شوي دي.

د یکشنبې په ورځ په شمالي وزيرستان کې د پېښې ډېر تفصیلات نشته، خو عیني شاهدانو ازادي راډيو ته وويل چې د یوه وکيل په ګډون شل کسان ټپیان شول او دا وروسته له هغه چې امنیتي ځواکونو پر سوله یيزو لاریون کوونکو ډزې پيل کړې.

خو پوځ ويلي چې دا لاریون د پارلمان د دوو وکيلانو له خوا جوړ شوی و او پنځه سرتېري يې ټپیان کړل.

د پوځ په وینا، دوی په غبرګون کې درې حمله کوونکي ووژل او لس نور يې ټپیان کړل.

د پاکستان د پارلمان دوه وکيلان علي وزیر او محسن داوړ هم په دې لاريون کې شامل وو.

د خلکو د بشري حقونو غوښتونکی د پښتون ژغورنې غورځنګ له ګڼو ستونزو سره مخامخ شوی او د پوځ په سترګو کې اغزی ګڼل کېږي، ځکه دوی په دوامدارو لاریونونو او اعتراضونو سره له بشري حقونو د پوځ سرغړونې غندي.

له ۲۰۱۸ میلادي کال راهيسې کله چې پښتون ژغورنې غورځنګ رامنځته شو، دا غورځنګ په بشپړه توګه سوله یيز پاتې شوی دی.

د اروپایي ټولنې پارلماني ټاکنو کې افراطي ګوندونه له منځلارو مخکې دي

د اوروپایي ټولنې بیرغ

د اروپايي ټولنې د پارلمان د انتخاباتو لومړي نتايج ښيي چې ملتپال او ښي اړخي افراطي ګوندونه تر هغو ګوندونو مخکې دي چې د اروپايي ټولنې ملاتړ کوي او منځلاري دي.

د نن سهار د انتخاباتو د نیمايي رأيو شمېرنه ښيي چې د اروپايي ټولنې د ملاتړو سيالو ګوندونو ۳۲۱ څوکۍ وړي چې د اروپایي پارلمان د ۷۵۱ څوکيو له نيمايي لږې کمې دي.

په فرانسه کې د ښي اړخي ګوند ماري لوپين په دغو انتخاباتو کې په بې ساري توګه مخکې شوې ده.

زرغونه یا د اروپايي ټولنې ملاتړي ګوندونه هم د تېر په پرتله مخکې شوي دي.

په ټوله اروپايي اتحادیه کې د انتخاباتو لومړي نتايج ښيي چې زرغونو ګوندونو په اروپايي پارلمان کې ۶۹ څوکې ګټلي چې دا شمېر په ۲۰۱۴ میلادي کال کې ۵۲ و.

دا په داسي حال کې ده چې له بريتانيې پرته په ټوله اروپایي ټولنه کې ۵۱ فیصده واجد شرايط خلکو رأيې ورکړې چې په تېرو شلو کلونو کې د اروپايي ټولنې په پارلماني انتخاباتو کې تر ټولو لوی شمېر ګڼل کېږي.

د قطر امیر په مکه مکرمه کې يوه اضطراري سرمشريزه کې برخه اخلي

شيخ تميم بن حمدالثاني

د قطر د بهرنيو چارو وزارت وايي، د دغه هېواد واکمن امير د سعودي عربستان د پاچا بلن‌ليک ترلاسه کړى چې په مکه مکرمه کې را روانه پنجشنبه په يوه اضطراري سرمشريزه کې برخه واخلي.

وروسته له هغې چې سعودي عربستان، مصر، بحرين او متحده عرب اماراتو د ٢٠١٧ میلادي کال په جون مياشت کې له قطر سره پرېکون اعلان کړ، دا ليک د قطر او سعودي عربستان ترمنځ په لوړه سطحه لومړى عام تماس ګڼل کېږي.

د قطر د بهرنيو چارو وزارت پرون ناوخته وويل، شيخ تميم بن حمدالثاني ته د شاه سلمان په‌دغه ليک کې په سرمشريزه کې د دوحې د حضور غوښتنه شوې ده.

په‌دې سرمشريزه کې د متحده عرب اماراتو ساحل ته نږدې د کښتيو د سبوتاژ پر ادعاوو او د يمن د حوثي ياغيانو له‌خوا د سعودي د تېلو پر يوې نل‌ليکې د بې پېلوټه الوتکې د يوې حملې په اړه خبرې کېږي.

ايران په يمن کې د دغو حوثي ياغيانو ملاتړ کوي.

دا پېښې په‌داسې حال کې شوي چې د امريکا د متحدو ايالاتونو او ايران ترمنځ کړکېچ اوج ته رسېدلى دى.

د قطر د بهرنيو چارو وزارت نه‌دي ويلي چې دغه هېواد به په سعودي عربستان کې پلان شوې سرمشريزې ته خپل هيئت ولېږي که نه؟

ټرمپ توکيو کې د جاپان له صدراعظم شينزو ابه سره خبرې کړي

د امريکا متحدو ايالاتونو ولسمشر ډونالډ ټرمپ توکيو د جاپان له صدراعظم شينزو ابه سره

د امريکا متحدو ايالاتونو ولسمشر ډونالډ ټرمپ توکيو ته د رسمي سفر پر مهال د شمالي کوريا او ايران پر موضوع د جاپان له صدراعظم شينزو ابه سره خبرې وکړې.

نن د خپلو خبرو تر پيل مخکې ټرمپ هڅه وکړه، د شمالي کوريا د اټمي او ميزائيلو د پروګرامونو په اړه د جاپان اندېښنو ته په پام سره شينزو ابه ته ډاډ ورکړي.

ټرمپ ښاغلي ابه ته وويل، د امريکا او شمالي کوريا ترمنځ «ډېر زيات احترام» موجود دى.

هغه اټکل وکړ چې د پيونګ يانګ له خوا د ميزائيلو له توغولو سره- سره ښه شيان پېښېدونکي دي.

ولسمشر ټرمپ وروسته په ګډ خبري کنفرانس کې وويل، ده او ابه د تهران او واشنګټن ترمنځ پر هغه کړکېچ خبرې وکړې چې د ايران له اټمي تړون څخه د امريکا تر وتلو وروسته ولاړ شوى دى.

ډونالډ ټرمپ خبريالانو ته وويل، هېڅوک په ځانګړي توګه زه نه غواړم بد شيان پېښ شي.

ده وويل، فکر کوي چې ايران غواړي چې ورسره خبرې وکړي، که دوى دا کار وکړي، دى هم خبرو ته تيار دى.

ټرمپ د نړۍ لومړى رهبر شو چې جاپان له نوي امپراتور سره ګوري

امپراتور ناروهيتو او مېرمن يې مساکو نن په خپله ماڼۍ کې د ولسمشر ټرمپ او د هغه د مېرمنې ملانيا ټرمپ هرکلى وکړ. 

د امريکا د متحدو ايالاتونو ولسمشر ډونالډ ټرمپ د نړۍ لومړى رهبر شو چې جاپان له نوي امپراتور سره ګوري.

د جاپان نوي امپراتور ته د مې پر لومړۍ نېټه تاج ور پر سر کړاى شو.

امپراتور ناروهيتو او مېرمن يې مساکو نن په خپله ماڼۍ کې د ولسمشر ټرمپ او د هغه د مېرمنې ملانيا ټرمپ هرکلى وکړ.

د هرکلي دغه مراسم جاپان ته د ولسمشر ټرمپ د څلور ورځني رسمي سفر د پيل پر مهال جوړ شوي وو.

ولسمشر ټرمپ وروسته د کتنو لپاره د جاپان رسمي مېلمستون ته لاړ چې د جاپان له صدراعظم شينزو ابه سره په يوه خبري کنفرانس کې برخه واخلي.

نن تر خبرو مخکې ټرمپ هڅه وکړه، د جاپان اندېښنو ته په پام سره شينزو ابه ته د شمالي کوريا د اټمي او ميزائيلو د پروګرام په اړه ډاډ ورکړي.

ولسمشر ټرمپ د جاپان صدراعظم ته وويل، د امريکا او شمالي کوريا ترمنځ «لوى درناوى» موجود دى.

ده وويل، د پيونګ يانګ له‌خوا د ميزائيلو له وروستيو ازموينو سره- سره د ښو شيانو اټکل کوي.

د واشنګټن او شمالي کوريا ترمنځ په وروستيو مياشتو کې کړکېچ وروسته له هغې زيات شو چې په فبرورۍ مياشت کې د ولسمشر ټرمپ او د شمالي کوريا د رهبر کيم جونګ اون ترمنځ سرمشريزه بې نتيجې پاى ته ورسېده.

دغه سرمشريزه له اټمي وسلو د کوريا ټاپووزمې د تصفيې په اړه وه.

د پاکستان په جنوب نږدې ٧٠٠ کسان د ايډز په ناروغی اخته دي

ارشیف، دا پاکستان کې د هغه ماشوم عکس دی چې په ایډز اخته دی/AFP

د پاکستان د روغتیا وزیر ویلي چې د دغه هېواد د جنوب په يوه ښار کې نږدې ٧٠٠ کسان چې ډیری یې ماشومان دي، د ايډز په «اېچ.ای.وي» وایروس اخته شوي دي.

چارواکي وايي، د ايډز ناروغۍ وايروس «HIV» هغه وخت په رتوديرو ښار کې خپور شو چې د مظفر غانغارو په نوم له يوه محلي ډاکټر څخه چې په‌دې ناروغۍ اخته و، دې ناروغۍ د اپرېل په لومړيو کې نورو کسانو ته سرايت وکړ.

دغه ډاکټر روانه مياشت وروسته له هغې ونيول شو چې په سلګونو کسانو کې د دې وايروس مثبتې پېښې وليدل شوې.

پوليس اوس دا څېړي چې ايا ډاکټر غانغارو په لوى لاس دغه ناروغي نورو ته خپره کړې ده؟

د پاکستان د روغتيا وزير ظفر ميرزا پرون د یکشنبې په ورځ په اسلام‌اباد کې يوه خبري کنفرانس ته وويل، په رتوديرو کې له جمعې راهيسې په ٦٨١ کسانو کې چې ٥٣٧ تنه يې له دوه کلنۍ تر ١٢ کلنۍ ماشومان دي، د «HIV» مثبتې پېښې ليدل شوي دي.

د روغتيا وزير ظفر میرزا ویلي چې تر ٢١زرو او ٣٠٠ زيات کسان معاینه شوي او د دې ویره شته چې ښايي په «اېچ.ای.وي» د اخته کسانو شمېر تر دې زيات وي.

د روغتيا وزير وايي په «HIV» ايډز د دومره کسانو د اخته يو علت دا و چې دغه ډاکټر خلکو ته ناپاکې ستنې کارولې.

د ايډز ناروغۍ «اېچ.ای.وي» وايروس د انسان د بدن دفاعي سیسټم ژوبلوي.

په ټول پاکستان کې په «HIV» ايډز د اخته کسانو شمېر ٢٣٠٠٠ ته رسېږي.

هیټاناس ناوسدا د لیتوانیا د ولسمشرۍ دوهم ځلي انتخابات وګټل 

هیټاناس ناوسدا

هیټاناس ناوسدا (Gitanas Nauseda) د لیتوانیا د ولسمشرۍ دوهم ځلي انتخابات وګټل.

٥٥ کلن ناوسدا پخوانی بانکدار دی چې وروسته یې سیاست ته مخه کړله.

د لیتوانیا د انتخاباتو کمېسیون چارواکو ویلي، د يو پر څلورمه برخه شمېرل شويو رايو له مخې ښاغلي ناوسدا ۷۴ فیصده رأیې ګټلي.

سیال یې اینګرېدا سیمونیت یوازې ۲۶ فیصده رأیې ګټلي او خپله ماته یې منلې ده.

د لیتوانیا د ولسمشرۍ په ټاکنو کې چې ١٥ ورځې مخکې وشوې، هېڅ یوه کاندید کافي رأیې خپلې نه‌کړای شوې او دغه انتخابات دوهم پړاو ته لاړل.

لیتوانیا چې له روسیې سره ګډه پوله لري، د اروپايي ټولنې او ناټو سازمان غړى هېواد دى.

هیټاناس ناوسدا ژمنه کړې چې د روسيې پر وړاندې به تُند دريځ خپل کړي او د ده په خبره تر هغو چې روسيې د اوکراين له کريميا ټاپو وزمې خپل پوځيان نه وي ايستلي، دى به له ولسمشر ولادیمير پوتين سره د کتنې لپاره مسکو ته سفر ونه‌کړي.

د رومانيا خلک نن په يوه وړاندې شوې ټولپوښتنه کې برخه اخلي

د رومانیا یو انځور

په رومانيا کې خلک نن د واکمن کيڼ اړخي ائتلافي حکومت په يوه وړاندې شوې ټولپوښتنه کې برخه اخلي.

دغه ټولپوښتنه په دغه هېواد کې د اداري فساد په وړاندې د مبارزې په اړه رابلل شوې ده.

رومانيا د اروپايي ټولنې له تر ټولو اداري فسادلرونکو هېوادونو کې شمېرل کېږي.

د رأىې پاڼې يوه پوښتنه دا ده چې ايا تاسې د اداري فساد اړوندو قضيو کې پر عفوې د بنديز ملاتړ کوئ؟

د رومانيا ولسمشر کلاوس يوهانيس چې د دغه هېواد ښي اړخى اپوزيسيون يې ملاتړ کوي، دغه ټولپوښتنه رابللې ده.

په فبرورۍ مياشت کې د رومانيا زرګونو وګړو وروسته له هغې اعتراضونه وکړل چې کيڼ اړخي حکومت له عامې مباحثې پرته يو اضطراري قانون تصويب کړ.

انتقاد کوونکو وويل، د حکومت دغو اقداماتو د څارنوالانو پر خپلواکۍ محدوديت لګولى دى.

ټرمپ د شمالي کوریا د توغندیو وروستۍ ازموینې بې اهمیته وبللې

د امریکا ولسمشر ډونالډ ټرمپ

د امریکا ولسمشر ډونالډ ټرمپ د شمالي کوریا له لوري د توغندیو وروستۍ ازموینې بې اهمیته وبللې، ویې ویل، باور لري چې د شمالي کوریا مشر کېم جونګ اون به پر خپلو ژمنو ودرېږي.

ټرمپ نن یکشنبه په یوه ټویټ کې لیکلي:

"شمالي کوریا ځینې وړې وسلې توغولي چې زه نه، خو زموږ ځینې خلک او نور یې نارامه کړي دي. زه ډاډه یم چې رئيس کېم به له ما سره پر کړیو ژمنو ودرېږي."

ټرمپ دا ټویټ په جاپان کې لیکلی دی.

ټاکل شوې ده چې دی په توکیو کې د جاپان له صدراعظم شینزو ابه سره د شمالي کوریا د اټمي او توغندويي پروګرامونو په اړه پر اندېښنو خبرې وکړي.

د ایران د بهرنیو چارو وزیر محمد جواد ظریف عراق ته ورسېد

آرشیف/ د ایران د بهرنیو چارو وزیر محمد جواد ظریف/ Source: IRNA

د ایران د بهرنیو چارو وزیر محمد جواد ظریف پرون د مې په پینځه ویشتمه، بغداد ته ورسېد.

ظریف په‌داسې وخت کې له عراقي چارواکو سره د خبرو لپاره بغداد ته ځي چې د امریکا او ایران ترمنځ کړکېچ تر هر بل وخت زیات شوی دی.

د ایران د رسمي خبري اژانس، اېرنا په حواله، ظریف به بغداد ته په دوه ورځني سفر کې د عراق د بهرنیو چارو له وزیر، ولسمشر او صدراعظم سره وګوري.

د عراق د بهرنیو چارووزارت یوه ویاند ویلي چې د ایران د بهرنیو چارو وزیر به د سیمې پر حالاتو خبرې او د ستونزو د حل لپاره د ګډ نظر د موندلو هڅې وکړي.

بغداد ته د ایران د بهرنیو چارو د وزیر ترتګ یوه ورځ مخکې، د امریکا د متحدو ایالاتو ولسمشر وویل چې منځني ختيځ ته نور ۱۵۰۰ پوځیان استوي.

د ټرمپ تردې اعلان، څو ساعته وروسته د امریکا د بهرنیو چارو وزیر وویل چې د ایران د تشدد د مخنیوي لپاره به پر سعودي عربستان، متحده عربي اماراتو او اردن د ۸ اعشاریه ۱ میلیارد امریکايي ډالرو په ارزښت وسلې خرڅې کړي.

امریکا منځني ختیځ ته ۱۵۰۰ عسکر استوي

د امریکا بیرغ

د امریکا متحده ایالات به منځني ختیځ ته ۱۵۰۰ عسکر واستوي.

متحده ایالات غواړي چې له ایران سره په روان کړکېچ کې په منځني ختيځ کې خپل ځواکونه پیاوړي کړي.

د امریکا ولسمشر ډونالد ټرمپ پرون د مې په ۲۴مه په سپینه ماڼۍ کې خبریالانو ته وویل چې اضافي ځواکونه به تر ډېره حده په ټوله سیمه کې د ساتندویانو رول لوبوي.

ټرمپ وویل:

"موږ غواړو چې منځنۍ ختيځ مصؤن وي."

هغه دا وینا په داسې وخت کې چې جاپان ته روان و، کړې ده.

ډونالد ټرمپ وویل:

"زموږ ډېر تکړه وګړي منځني ختيځ ته روان دي، نور به ګورو چې څه کېږي."

د هاکي د راتلونکې نړیوال جام سیالۍ په سنټ پټرزبورګ​ ښار کې کېږي

ارشیف، د هاکي لوبې د جریان یو انځور

ټاکل شوې چې د هاکي د نړیوال جام سیالۍ د روسیې په سنټ پټرزبورګ ښار کې وشي.

دا سیالۍ په ۲۰۲۳ میلادي کال کې کېږي.

له ۲۰۱۶ میلادي کال راهیسې دا لومړی وار دی چې د یخ پرمخ د هاکي نړیوالې سیالۍ په روسیه کې کېږي.

په بدل کې ېې د روسیې حکومت ژمنه کړې چې د سنټ پټرزبورګ په مرکز کې به د دې سیالۍ لپاره داسې سټډیوم جوړ کړي چې ۲۳ زره کسان به په کې ځاېږي.

د سنټ پټرزبورګ ښار په بل لوبغالي اېس پلېس کې به هم لوبې کېږي.

پر یخ د هاکي نړیوال فدراسیون پرون د مې په ۲۴مه وویل چې د ۲۰۲۴ د اتلولۍ د سیالیو لپاره یې د چک جمهوریت پلازمېنه پراګ او د دې هېواد بل ښار اوستراوا غوره کړي دي.

د ایران د بهرنیو چارو ورزیر نن د پاکستان له صدراعظم سره کتلي

ارشیف، د ایران د بهرنیو چارو وزیر جواد ظریف

د ایران د بهرنیو چارو ورزیر محمد جواد ظریف نن په اسلام اباد کې د پاکستان له صدراعظم عمران خان سره کتلي دي.

د پاکستان د صدراعظم دفتر په یوې خبرپاڼې کې ویلي، په دې لیدنه کې په دوه اړخیزو مسئلو خبرې شوې دي.

ظریف په داسې حال کې اسلام اباد ته سفر کوې چې په دې وروستیو کې د واشنګټن او تهران ترمنځ ترینګلتیا زیاته شوې ده.

د فارس خبري اژانس د راپور له مخې، جواد ظریف پرون اسلام اباد ته د رسېدو پر مهال له نړیوالې ټولنې وغوښتل څو د هغه څه په وړاندې ګامونه پورته کړي چې نوموړي له ایران سره د امریکا د زور او تاوتریخوالي چلند وباله.

د ایران د بهرنیو چارو وزیر وویل، سیمه دا مهال په یو کړکېچن وضیعت او خطرناکو اقداماتو د کېدو په حال کې ده.

نوموړي زیاته کړې چې له خپلو ټولو ګاونډیو سره سلا مشورې ته اړتیا لري.

د پاکستان د بهرنیو چارو وزارت په یوې خبرپاڼې کې ویلي، په سیمه کې وضعیت جدي دی او اړتیا ده چې ټول لوري د خبرو اترو له لارې مسایل هوار کړي.

متحده ایالاتو د روانې میاشتې په لومړیو کې منځني ختیځ او فارس خلیج کې خپل پوځي حضور زیات کړی.

امریکا دغلته د اضافي پوځي تجهیزاتو د ځای پر ځای کولو هدف د ایران د احتمالي ګواښونو سره مقابله بللې ده.

د بلوچستان په مرکز کوټه کې په یو جومات کې چاودنې ۲ کسان وژلي

د بلوچستان په مرکز کوټه کې په جومات کې د چاودنې یو انځور May 24, 2019

د بلوچستان په مرکز کوټه کې په یو جومات کې چاودنې دوه کسان وژلي او تر لسو زیات نور یې ټپیان کړي دي.

پولیس وايي، چاودېدونکي مواد د کوټې ښار په پښتون اباد سیمه کې په یو جومات کې ځای پر ځای شوې وو او هغه مهال وچاوېدل چې خلک د جمعې د لمانځه لپاره په جومات کې راټول شوي وو.

تر اوسه چا د پښتون اباد د دې برید مسؤلیت په غاړه نه دی اخیستی.

فرقه يي تاوتریخوالي چې ډېر کله یې هدف د پاکستان اقلیت شیعه مسلمانان وي، په وروستیو کلونو کې د بلوچستان په ایالت کې سلګونه کسان وژلي، خو د پښتون اباد سیمه سني مېشته سیمه ده او چاودنه هم د سني مسلمانانو په یوه جومات کې شوې ده.

په بلوچستان کې اسلامي اورپکي او بلوچ بیلتون پالي دواړه فعال دي.

د بریتانیا صدراعظمې تریزا مې له دندې د استعفا اعلان وکړ

د بریتانیا صدراعظمه تریزا مې

د بریتانیا صدراعظمې تریزا مې اعلان کړی چې د جون په اوومه نېټه د بریتانیا د محافظه کار ګوند له مشرتابه استعفا کوي.

مې نن په لندن کې وویل، د ګوند د نوي مشر تر ټاکنې پورې به د بریتانیا د سرپرستې صدراعظمې په توګه دنده ترسره کړي.

ګومان کېږي چې د بریتانیا د محافظه کار ګوند د نوي مشر ټاکل به څو اوونۍ وخت ونیسي.

تریزا مې له اروپايي ټولنې د بریتانیا د وتلو سرسخته ملاتړې ده.

نوموړې په ۲۰۱۶ میلادي کال کې له اروپايي ټولنې د بریتانیا د وتلو په اړه تر یوې ټولپوښتنې وروسته د راپورته شوې ترینګلتیا په ترڅ کې د بریتانیا د صدارت څوکۍ ته لاره ومونده.

نوموړې د هغه څه له کبله چې له اروپايي ټولنې څخه پر وخت د بریتانیا په ایستلو کې د دې ماتې ګڼل کېږي، د خپل ګوند له خوا تر فشار لاندې وه.

اوس ټاکل شوې ده چې بریتانیا به د اکټوبر په ۳۱مه له اروپايي ټولنې ووځي، خو د بریتانیا پارلمان تر اوسه هم له اروپايي ټولنې څخه د دې هېواد د وتلو شرایط نه دي تصویب کړي.

نور راوښيه

XS
SM
MD
LG