د لاسرسۍ وړ لېنکونه

تازه خبر
یکشنبه ۲۹ مرغومی ۱۳۹۸ کابل ۱۰:۰۶

نړۍ

په سعودي کې د پوليسو پر يوه مرکز يوه حمله شنډه کړاى شوه

ارشیف، د سعودي د پولیسو د موټرو یو انځور

د سعودي عربستان العربيه ټلويزيون نن د ځينو سرچينو په حواله راپور ورکړى چې په رياض ولايت کې د پوليسو پر يوه مرکز يوه حمله شنډه کړاى شوه.

په راپور کې ويل شوي چې څلور حمله کوونکي وژل شوي دي.

العربيه وايي، حمله کوونکو غوښتل چې د پلازمېنې رياض په شمال لوېديځ ښارګوټي زلفي کې دا حمله وکړي.

دغه ټلويزيون وايي، حمله کوونکو ماشينګڼې، بمونه او اورشيندونکې وسيلې له ځانونو سره لېږدولې.

وروسته له هغې چې سعودي عربستان څه باندې يوه لسيزه مخکې د القاعده تحرکات وځپل، افراطي وسله وال له څو کلونو راهيسې پر امنيتي تاسيساتو حملې کوي.

په اوکراين کې نن د جمهوري رياست د ټاکنو دوهم پړاو ترسره کېږي

ارشیف، د اوکراین د ولسمشریزو انتخاباتو د رأیې ورکونې د یوه مرکز انځور

په اوکراين کې خلک نن د جمهوري رياست د ټاکنو په دوهم پړاو کې خپلې رأيې کاروي.

دغه ټاکنې ممکن د اوسني ولسمشر پټرو پروشينکو سياسي برخليک مشخص کړي چې يو له کانديدانو دى.

نظرپوښتنې ښيي چې مخالف کانديد ٤١ کلن ولاديمير زيلينسکي د پام وړ مخکې دى.

په يوه نظرپوښتنه کې چې تېره پنجشنبه خپره شوه، په سلو کې نږدې ٥٨ برخوالو ويلي وو چې دوى به زيلينسکي ته رأيه ورکړي، نږدې ٢٢ فيصده نورو ويلي وو چې دوى پروشينکو ته رأيه ورکوي.

ښاغلي زيلينسکي چې تر ډېره خپل انتخاباتي کمپاين د ټولنيزو رسنيو له لارې پرمخ بیولى، د پالېسيو په اړه يې له بحثونو ډډه کړې ده.

خو په اوکراين کې موجود اقتصادي بحران، اداري فساد او د اوکراين په ختيځ کې پنځه کلنې جګړې د زيلينسکي له کمپاين سره مرسته کړې ده.

زيلينسکي تېره جمعه له ولسمشر پروشينکو سره په کييف کې په يوه مناظره کې وويل، دى يو سياستوال نه، بلکې يو عادي وګړى دى چې د سېستم د ماتولو لپاره راغلى دى.

په سریلانکا کې نن د ګڼو چاودنو د قربانیانو شمېر لوړ شوی

ارشیف، د سریلانکا د سرتېرو یو انځور

په سريلانکا کې نن د څو چاودنو په نتيجه کې تر ۲۰۰ زيات کسان وژل شوي او تر ٥٠٠ زيات نور ټپيان شوي دي..

دا چاودنې د کلیساوو په شمول چې د مسیحیانو اختر پکې لمانځل کېده، په بېلابېلو ځایونو کې شوي دي.

درې چاودنې د پلازمېنې کولمبو د شمال د نیګومبو ښارګي په درېيو کلیساوو کې شوي دي، بله چاودنه د کولمبو د ختیځ په ۲۵۰ کیلومترۍ کې په باتیکالوا کې شوې ده.

پوليس وايي، درې نورې چاودنې په پنځه ستوريزو هوټلونو کې شوي دي.

راپورونه وايي، په پلازمېنه کې د وژل شويو په ډله کې ۲۷ تنه بهرنيان هم شامل دي.

د سريلانکا د ماليې وزير منګالا سمارا ويرا په ټوېټر ليکلي:

"داسې ښکاري چې دا حملې د وژنو، ټپي کولو او انارشۍ لپاره تنظيم شوې وې او ګڼ بې ګناه انسانان يې ووژل."

تر اوسه پورې هېڅ چا د دې حملو مسؤلیت په غاړه نه دی اخیستی.

د سوریې ولسمشر له جګپوړو روسي چارواکو سره ولیدل

ارشیف، د سوریې ولسمشر بشار الاسد

د سوریې ولسمشر بشار الاسد پرون شنبه په دمشق کې له جګپوړو روسي چارواکو سره ولیدل.

د دواړو هېوادونو دولتي رسنیو وویل چې روسیې ته د سوریې د تارتوس بندر د اجارې ورکولو معامله نږدې ده.

د روسیې د بهرنیو چارو وزارت وویل، بشار الاسد په تېرو دوو ورځو کې د سوریې لپاره د مسکو له ځانګړي استازي الکساندر لافرینتییف، د بهرنیو چارو مرستیال وزیر سرګي فیرشینین، مرستیال صدراعظم یوري بوريس اوف او د دفاع وزارت له څو چارواکو سره کتلي دي.

چارواکي وايي چې په دې غونډو کې د سولې د خبرو د راتلونکي پړاو او د روسیې او دمشق ترمنځ پر دوه اړخیزې سوداګرۍ خبرې وشوې.

د روسیې دولتي خبري اژانس تاس د بوریس اوف په قول ویلي چې د روسیې له لوري د سوریې د تارتوس بندر د اجارې کولو قرارداد به ژر لاسلیک شي.

ځينو هېوادونو د عراق په ثبات او ارامښت ټینګار وکړ

د عراق بیرغ

د سعودي عربستان او ایران په ګډون د عراق د ګاونډیو هېوادونو د پارلمانونو رئیسانو له داعش یا اسلامي دولت ډلې څخه د بېرته نیول شویو سیمو د بیارغولو لپاره د بغداد د هڅو ملاتړ ته تیاری وښود.

د عراق حکومت له څلور کلنې خونړۍ جګړې وروسته پراخې سیمې له داعش څخه بېرته ونیولې.

په دې مناسبت پرون شنبه په بغداد کې د یوې غونډې د پای په اعلامیه کې ویل شوي چې د ګاونډیو هېوادونو د پارلمانونو رئیسان پر داعش له ستر بري وروسته په عراق کې د ثبات، ارامښت، ځمکنۍ بشپړتیا او ټولنیز پیوستون پر ملاتړ ټینګار کوي.

دا اعلامیه چې د اردن، کوېټ، ترکیې او سوریې استازو هم لاسلیک کړې، وايي چې د عراق ثبات د سیمې د ارامښت او ثبات لپاره ضروري دی.

د ليبيا د طرابلس په جنوبي سيمو کې پرون درنې جګړې پيل شوې

ارشیف، د لیبیا د ملي ځواکونو یو انځور

د ليبيا د پلازمېنې طرابلس په جنوبي سيمو کې پرون درنې جګړې پيل شوې.

دا په داسې حال کې ده چې پر دغه ښار د ولکې ټينګولو لپاره د دوو اوونيو په جګړه کې د وژل شويو کسانو شمېر تر ٢٢٠ اوښتى دى.

ليبيا په ختيځ او لوېديځ کې د دوو سيالو حکومتونو ترمنځ وېشل شوې ده.

جګړه د قوماندان خليفه حفتر تر مشرۍ لاندې د ليبيا د ملي پوځ په نوم د ځواک او د هغو ملېشه وو ترمنځ روانه ده چې د ملګرو ملتونو له خوا په رسميت پېژندل شوي او د ملي يووالي حکومت ته وفادار دي.

په طرابلس کې د ملي يووالي حکومت ته وفادارو ځواکونو ويلي چې د حفتر د جنګياليو په وړاندې يې پرون ځوابي حمله کړې ده.

حفتر د ملي يووالي حکومت پرخلاف د اپرېل پر څلورمه جګړه پيل کړله.

دى د ليبيا په ختيځ کې د هغه حکومت ملاتړ کوي چې د طرابس د حکومت حاکميت په رسميت نه پېژني.

فعالان: په سوریه کې د داعش او القاعدې نږدې ۵۰ غړي وژل شوي

ارشیف، د سوریې د یوې جنګي سیمې انځور

په سوريه کې فعالان او يوه څارونکې ډله وايي، د داعش او په القاعده پورې د تړلو وسله والو په جلا جلا حملو کې نږدې ٥٠ دولتي سرتېري او د هغوى متحد جنګيالي وژل شوي دي.

د سوريې د بشري حقونو د څار ادارې پرون وويل، په القاعده پورې د تړلې ډلې حيات تحرير الشام وسله والو پرون د حلب ښار په لوېديځ کې پر دولتي ځواکونو حمله وکړه.

د دې ادارې په خبره، په دې پېښه کې ٢١ سرتېري او د هغوى متحد جنګيالي ووژل شول.

که څه هم په دې سيمه کې په سپټمبر مياشت کې پر يوه لنډمهاله اوربند موافقه شوې ده، خو لا هم سخته ناامنه ګڼل کېږي.

په بله پېښه کې، د پنجشنبې پر سهار د داعش افراطي وسله والو د مرکزي ولايت حمص په يوه دښته کې دولتي ځواکونو ته کمين نيولى و چې وروسته دوه ورځنۍ جګړه وشوه.

د سوريې د بشري حقونو د څار اداره وايي، په دې جګړه کې د ٤ افسرانو په ګډون ٢٧ سرتېري ووژل شول.

د ليوا القدس په نوم يوې دولت پلوې ملېشه ډلې د کمين خبر تأييد کړى او ويلي يې دي چې دوى د السُخنا په نوم د ښارګوټي په ختيځ کې د دوو محاصره شويو ساحو د ازادولو لپاره خپل جنګيالي لېږلي وو.

په قزاقستان کې د يوه بس د ټکر په نتيجه ١١ کسان مړه شول

ارشیف، د قزاقستان د پولیسو یو انځور

د قزاقستان په جنوب کې د يوه بس د ټکر په نتيجه کې لږترلږه ١١ کسان مړه او شااوخوا ٣٠ تنه نور ټپيان شول.

پېښه پر هغه لار شوې چې پناه غوښتونکي ورڅخه له منځنۍ اسيا روسيې ته د تګ لپاره ګټه اخلي.

د قزاقستان د کورنيو چارو وزارت پرون شنبه وويل چې پېښه پرون سهار د الماتې- تاشکند پر يوه لار شوې ده.

چارواکي وايي، د پېښې په قربانيانو کې قزاقان او ازبکان شامل دي.

د قزاقستان موقت ولسمشر قاسم ژومرت توکايف د قربانيانو له کورنيو سره خواخوږي ښوولې ده.

پاکستان له ایرانه د یوې ترورېستي ډلې په وړاندې اقدام وغوښت

د پاکستان د بهرنیو چارو وزیر شاه محمود قریشي

پاکستان له ایرانه غوښتي چې د هغو ترورېستي ډلو په ضد دې اقدام وکړي چې د دوی په باور په دې اوونۍ کې د ۱۴ پاکستاني سرتېرو د وژنې په پېښه کې لاس لري.

د پاکستان د بهرنیو چارو وزیر شاه محمود قریشي د شنبې په ورځ په یوه خبري غونډه کې وویل:

"موږ هیله لرو چې ایران به په دې برخه کې څرګند اقدامات وکړي."

قریشي وویل، ۱۵ وسله وال چې پوځي یونیفورم یې په تن و، د اپرېل په اتلسمه نېټه یې په بلوچستان ایالت کې پر یوه بس موټر برید وکړ او د پاکستان د پوځ ۱۴ تنه پروسونل یې وواژه.

د پاکستان د بهرنیو چارو وزارت د ایران حکومت ته په یوه لیک کې لیکلي چې دا برید د بلوڅو د درېیو تروېستي سازمانونو د ائتلاف له خوا چې په ایران کې دي، شوی دی.

دا اعلان له هغې یوه ورځ مخکې کېږي چې ټاکل شوې د پاکستان صدراعظم عمران خان ایران ته سفر وکړي.

قریشي خبریالانو ته وویل چې د صدراعظم عمران خان په دې پلان شوي دوه ورځني سفر کې چې د یکشنبې په ورځ پیلېږي، کوم بدلون نه دی راغلی او عمران خان به دا مسئله له ایراني چارواکو سره یاده کړي.

د پاکستان د بهرنیو چارو وزیر قریشي زیاته کړې، خپل ایراني سیال محمد جواد ظریف سره یې د شنبې په ورځ خبرې کړي او هغه سره یې د پاکستان د امنیتي سرتېرو د وژل کیدو په اړه د خپلې څېړنې جزیات یې شریک کړي دي.

تهران تر اوسه د پاکستان د دې ادعا په اړه څه نه دي ویلي.

د روان میلادي کال په پیل کې ایران له پاکستانه غوښتي وو چې د هغو وسله والو ډلو پر ضد دې اقدام وکړي چې د ایران د سپاه پاسدارن پر ضد بریدونو کې لاس لري.

په فبرورۍ میاشت کې د ایران د سپاه پاسداران ۲۷ سرتېري د پاکستان پولې ته نږدې په یوه ځانمرګي موټري بمي برید کې وژل شوي وو.

له سعودي تښتېدلو ۲ خویندو په ګورجستان کې د پناه غوښتنه کړې

له سعودي عربستانه تښتېدلې دوه خویندې ۲۵ کلنه وفا السُبیعي او ۲۸ کلنه مها السُبیعي

هغه دوه سعودي خویندې چې وايي، له خپل هېواده د زور زیاتي له کبله تښتېدلي، په ګورجستان کې یې د پناه غوښتنه کړې، خو لا هم وېره لري چې ښايي د کورنیو لاس یې ور ورسېږي او بېرته یې سعودي عربستان ته ستنې کړي.

۲۵ کلنې وفا السُبیعي او ۲۸ کلنې مها السُبیعي ته وروسته له هغې چې پر خپل ټوېټر یې د مرستې غوښتنه وکړه، د اپرېل په ۱۸ مه نېټه د ګرجستان د حکومت له خوا ورته د مصؤنیت په برخه کې د همکارۍ وړاندیز وشو.

ګرجستاني چارواکو ویلي، دې خویندو ته یې دا مهال په یو پټ ځای کې سرپناه ورکړې ده، خو دې دواړو خویندو د جمعې په ورځ د ټامسن روېټرز بنسټ ته ویلي، دوی غواړي چې یوه داسې هېواد ته ولاړې شي چې سعودي وګړي له وېزې پرته د ورتلو اجازه ونه لري.

دې خویندو د پنجشنبې په ورځ ازادي راډیو ته ویلي وو، دوی ځکه ګرجستان انتخاب کړ چې سعودي وګړي ګرجستان ته د تلو لپاره وېزې ته اړتیا نه لري.

دې خویندو د خپلې قضیې په اړه پر ټوېټر یو اکاونټ جوړ کړی چې پرې پر ویډیوګانو او پیغامونه پوسټ کوي او په کې د ملګرو ملتونو د کډوالو له ادارې د خوندیتوب غوښتنه کوي.

امریکايي څارنوالانو ماریا بوتینا ته د ۱۸ میاشتو د بند سزا غوښتې

د امریکا بیرغ

امریکايي څارنوالان د خپل هېواد له یوه قاضي غواړي چې روسۍ وګړې ماریا بوتینا ته دې د اتلس میاشتو بند سزا ورکړي.

نوموړې تېر کال د ناراجسټر شوې بهرنۍ ایجنټې په توګه د توطیې تور ومانه.

امریکايي څارنوالانو محکمې ته په یوه یاداښت کې لیکلي:

"په دې قضیه کې ترسره شوي فعالیتونه د روسیې د هغې لویې توطیې برخه ده چې غواړي معلومات راټول کړي او د اړیکو او ارتباطاتو داسې چینلونه رامنځته کړي چې د روسیې د فدراسیون په ګټه ترې کار واخیستل شي."

بوتینا په تېر ډېسمبر کې خپل جرم ومانه او توافق یې وکړ چې له پلټونکو سره به همکاري کوي، ټاکل شوې چې د اپرېل په ۲۶ مه نېټه د واشنګټن فډرالي محکمه پر نوموړې د سزا حکم وکړي.

نوموړې چې په تېره جولای میاشت کې د نیول کېدو راهېسې په زندان کې ده، تر پنځو کلونو پورې په بند محکومېدای شي.

د ماریا بوتینا نیونې او پرې د تورونو لګولو د واشنګټن او مسکو ترمنځ اړیکې ترینګلې کړې دي.

د اوکراین مخکښو کاندیدانو د زرګونو خلکو پر وړانې مخامخ خبرې وکړي

په انځور کې د اوکراین د ولسمشرۍ مخکښ کاندیدان له ښي لوري، د اوکراین پېژندل شوی کمېډین ولادیمیر زيلينسکي او د دغه هېواد ولسمشر پټرو پروشینکو د وینا په حال کې

په اوکراین کې د جمهوري ریاست دوو مخکښو کاندیدانو پټرو پروشینکو او ولادیمیر زيلينسکي پرون د اپرېل په نولسمه د زرګونو کسانو په حضور کې مخامخ بحث وکړ.

د دواړو کاندیدانو دا بحث د کیف ښار د المپيک په لوبغالي کې وشو چې په اوکراین کې ساری نه لري.

د اوکراین ولسمشر پټرو پروشینکو د جمهوري ریاست د یوې بلې دورې لپاره کمپاین کوي.

د هغه په وړاندې د اوکراین پېژندل شوی کمېډین ولادیمیر زيلينسکي له مهمو کاندیدانو دی.

پروشینکو او زيلينسکي په پروني بحث کې یو وار بیا له موقع کار واخیست او په ستډیوم کې له زرګونو اوکراینیانو یې غوښتنه وکړه چې رأیه ورکړي.

د یکشنبې په ورځ به په اوکراین کې د جمهوري ریاست بیا ځلي انتخابات وشي.

په صربیا کې پرون زرګونو کسانو د جمهور رئیس په ملاتړ لاریون وکړ

د صربیا د یوې مظاهرې انځور

د صربیا په پلازمېنه بلګراد کې پرون د اپرېل په نولسمه زرګونو کسانو د جمهور رئیس الکساندر وچیچ د ملاتړ لپاره لاریون وکړ.

له څو اوونیو راهیسې په بلګراد کې د جمهور رئیس وچیچ د حکومت په خلاف مظاهرې کېدې.

د بلګراد ښار مرکزي سیمې پولیسو بندې کړې وې.

د وچیچ ملاتړکوونکي د صربیا له مختلفو سیمو او حتی له ګاونډیو هېوادونو لکه بوسنیا او کوسوو په بسونو کې بلګراد ته لېږدول شوي وو.

په بلګراد کې دا لاریون کوونکي د پارلمان د ودانۍ مخې ته را غونډ شوي وو.

هليکوپټرو د ښار دا برخه څارله.

د الکساندر وچیچ مخالفان وايي چې په صربیا کې یې د ډموکراسۍ اصول کمزوري کړي دي.

د امریکا د کانګرس د استازو جرګې د مولر بشپړ راپور غوښتی

ارشیف، د امریکا د ولسمشرۍ په تېرو انتخاباتو کې د روسیې د مداخلې په تړاو ځانګړی مفتش رابرټ مولر

د امریکا د کانګرس د استازو د جرګې د قضايي چارو کمېټې په رسمي احضارلیک کې غوښتي چې د ځانګړي مفتش رابرټ مولر رپوټ دې په بشپړ ډول ورته وسپارل شي.

دې کمېټې ویلي چې د دې رپوټ هغه خلاصه شوې کاپي چې د لوي څارنوال ویلیم بار له لوري ورته سپارل شوې، د کانګرس د ډېرو غړو له نظره کافي وضاحت نه ورکوي.

ځانګړي مفتش رابرټ مولر په دې اړه چې روسیې په ۲۰۱۶ میلادي کال کې د امریکا د جمهوري ریاست په انتخاباتو کې لاسوهنه کړې که نه او د جمهور رئیس ډونالد ټرمپ انتخاباتي کمپاین له روسیې سره څه ډول اړیکې درلودې، د خپلو څېړنو پایلې په یوه رپوټ کې لوی څارنوال ته وسپارلې.

د مولر رپوټ ۴۴۸ مخه دی.

د لوی څارنوال دفتر دا رپوټ خلاصه کړ، ډېر مواد یې ورڅخه وایستل او بیا یې په کانګرس کې د استازو د جرګې د قضايي چارو کمېټې ته د لوستلو لپاره ور واستاوه.

د دې کمېټې مشر ډموکرات جرولد نادلر پرون د اپرېل په نولسمه وویل چې داسې څرګندېږي چې د مولر د څېړنې مهمې برخې له هغه رپوټه چې دوی ته وړاندې شوی، ایستل شوې دي.

لوی څارنوال ته د مې د میاشتې تر لومړۍ نېټې وخت ورکړ شوی چې بشپړ رپوټ ور واستوي.

هغه څارنوالۍ ته په استولي مکتوب کې لیکلي چې د قضايي چارو کمېټه حق لري چې بشپړ رپوټ تر لاسه کړي.

خو په همدې کمېټه کې جمهوري غوښتونکي دګ کولینز ویلي چې جرولد نادلر د سیاسي ګټې لپاره داغوښتنه کړې ده.

په شمالي ایرلنډ یوه خبریاله وژل شوې ده

په شمالي ایرلنډ کې یو پولیس چېرته چې خبریاله وژل شوې وه. April 19, 2019

د شمالي ایرلنډ په لندندري ښار کې د تېرې شپې تاوتریخوالي له کبله یوه خبریاله وژل شوې ده.

پولیس واېي، د نوي ای آر اې په نوم یوې ناراضي ډلې باندې شک لري چې پر ۲۹ کلنې لیرا مککي یې ډزې کړي دي.

مککي د بلوا پر مهال په لنډرو ورز سیمه کې وه، هغه ځای کې پټرولي بمونه، خښتې او بوتلونه د پولیسو پر لور ویشتل کېدل.

دغې خبریالې په خپل وروستي ټویټ کې د پولیسو او بلواګرو ترمنځ نښته یو لیونتوب بللی وو.

نور راوښيه

XS
SM
MD
LG