د لاسرسۍ وړ لېنکونه

تازه خبر
سه شنبه ۱ سلواغه ۱۳۹۸ کابل ۰۳:۱۱

نړۍ

په پاکستان کې یوې تروریستي ضد محکمې دوه تنه په عمر قید محکوم کړل

مشال خان

په پاکستان کې یوې تروریستي ضد محکمې دوه تنه پهدې خاطر چې د پوهنتون یو محصل یې بدنامه کړی وه، په عمر قید محکوم کړل.

په مردان کې د خان عبد ولي خان پوهنتون د ژورنالېزم د پوهنځي ۲۳ کلن محصل مشال خان د ۲۰۱۷ د اپریل په ۱۳ مه په پوهنتون کې د یو شمېر خلکو له لوري ووژل شو.

پر ده تهمت شوی و چې په ټولنیزو رسنیو کې یې کفري مطالب لیکلي دي.

د مشال خان پر وژل کېدو مدني ټولنې او د بشري حقونو د دفاع فعالانو اعتراضونه وکړل او حکومت یې مجبوره کړ چې په حمله کې په لاس لرلو تورن کسان ونیسي.

ټرمپ د رابرټ مولر د نهایي څېړنیز راپور د خپریدو غوښتنه وکړه

د امریکا ولسمشر ډونالډ ټرمپ

د امریکا ولسمشر ډونالډ ټرمپ د ۲۰۱۶ میلادي کال د ولسمشرۍ په انتخاباتو کې د روسیې د مداخلې په اړه په عام محضر کې د ځانګړي مفتش رابرټ مولر د نهایي څیړنیز راپور د خپریدو غوښتنه وکړه.

ډونالډ ټرمپ پرون په واشنګټن کې خبریالانو ته په خبرو کې یو ځل بیا پر دغې څېړنې چې له دوو کالو راهیسې روانه ده انتقاد وکړ او هغه یې مسخره وبلله.

ټرمپ وویل، پریږدئ چې دغه راپور خپور شي او خلک یې وویني چې هغه قانوني دی او که نه؟

ولسمشر دغه څرګندونې داسې مهال کوي چې د راپورونو له مخې د مولر څیړنې بشپړیدو ته نژدې شوي دي.

مولر د ولسمشرۍ په انتخاباتو کې له روسیې سره د ټرمپ د انتخاباتي کمپاین د همکارۍ په اړه څېړنه کوي.

مولر به خپل دغه محرم راپور لومړی د امریکا د عدلیې وزیر او لوی څارنوال ویلیام بار ته سپاري او بار به وروسته په یوه راپور کې د هغه مهمې برخې له کانګرس سره شریکوي.

بار غواړي له قانون سره سم هر څومره ډېر چې کیدای شي خلک د مولر له دغې څیړنې خبر شي.

نیوزیلنډ: پر پوځي ډوله وسلو او ورته اټوماټیک ټوپکو بندیز لګول کېږي

د نیوزیلنډ صدراعظمه جاسینډا ارډرن

د نیوزیلنډ صدراعظمه وایي، د هغه نوي قانون له مخې چې تېره اوونۍ په‌دې هېواد کې پر دوو جوماتونو د ډله‌ییزې وژنې د پېښې وروسته تصویب شوی، پر پوځي ډوله وسلو او ورته اټوماټیک ټوپکو بندیز لګول کېږي.

جاسینډا ارډرن دغه څرګندونې نن وروسته له هغې وکړې چې شپږ ورځې وړاندې د مارچ په ۱۵مه د کرایست چرچ ښار پر دوو جوماتونو د ډله‌ییزې وژنې په حملو کې چې ۵۰ تنه ووژل شول، بریدګر له همدې ډول وسلو کار اخېستی و.

ارډرن وویل، تمه کوي چې دغه نوی قانون د اپریل له ۱۱مه تطبیق شي او حکومت به هم یو پروګرام تنظیم کړي چې له خلکو بېرته دا ډول وسلې وپېري.

په عین حال کې پولیسو وویل چې د ټولو پنځوسو قربانیانو د پیژندنې پروسه بشپړه شوې ده.

پرون د لومړي ځل لپاره د دې پیښې د لومړنیو دوو قربانیانو مړي خاورو ته وسپارل شول چې له هغې وروسته د نورو مړو د ښخولو لړۍ تراوسه روانه ده.

ټاکل شوې چې سبا په‌دې ښار کې په یوه لویه غونډه کې د دغې حملې قربانیانو د دوعا او فاتحې مراسم ترسره شي.

روحاني په کور دننه د سیاسي ډلو ترمنځ د شخړو د پای غوښتنه وکړه

د ایران ولسمشر حسن روحاني

د ایران ولسمشر په هېواد کې دننه د سیاسي ډلو ترمنځ د شخړو د پای ته رسېدو غوښتنه وکړه او ویې ویل چې دغه دلې باید د بهرنیو دښمنانو په وړاندې یو موټی شي.

حسن روحاني د نوي کال د نوروز په مناسبت په یوه وینا کې چې د دولتي ټلوېزېون له لارې نن خپره شوه، دغه څرګندونې وکړې.

روحاني چې د نړۍ له قدرتونو سره د ایران د ۲۰۱۵ میلادي کال له تړونه د متحده ایالتونو تر وتلو وروسته په ایران کې دننه د تُندلارو تر فشارلاندې لاندې دی، د خپلو اقتصادي پالیسیو دفاع وکړه او په هېواد کې د ناوړه اقتصادي وضعیت ملامتي یې پر متحدو ایالتونو واچوله چې له دغه تړونه تر وتلو وروسته یې پر تهران بېرته بندیزونه لګولي دي.

د امریکا د بهرنیو چارو وزیر د اسرائیل صدراعظم سره پر ایران غږیدلی

د امریکا د متحد ایالتونو د بهرنیو چارو وزیر د اسرائیل له صدراعظم سره

د امریکا د متحد ایالتونو د بهرنیو چارو وزیر د اسرائیل له صدراعظم سره د ایران په اړه خبرې وکړې.

مایک پامپئو پرون په بیت‌المقدس کې د اسرائیل له صدراعظم بنیامین نتانیاهو سره وکتل.

تردې لیدنې کتنې وروسته پامپئو د ایران مشران د نورو په له‌منځه وړلو تورن کړل او ویې ویل چې اسرائیل ته هره ورځ ګواښونه متوجه دي، خو متحد ایالتونه د اسرائیل امنیت ته ژمن دي او د هغه ملاتړ کوي.

د اسرائیل صدراعظم بنیامین نتانیاهو په داسې حال کې د امریکا د متحد ایالتونو د بهرنیو چارو وزیر یې څنګ ته ولاړ و، د هغو فشارونو هرکلی وکړ چې واشنګټن له ایران سره د ۲۰۱۵ میلادي کال له اټمي تړونه وروسته پر تهران راوستي، خو نتانیاهو زیاته کړه چې دا فشارونه باید پسې ډېر شي.

یوه پاکستاني محصل خپل استاد وژلی

یوه پاکستاني محصل خپل استاد په‌دې تور وژلی چې هغه غوښتل د فراغت په غونډه کې نارینه او ښځینه سره یوځای شي.

په بهاولپور کې د اګرتون کالج محصل خطیب حسین پرون د نورو محصلانو له لوري د پیښې په ځای کې ونیول شو.

د پولیسو په وینا دا محصل د انګلیسي ژبې د استاد خالد حمید په قتل تورن شوی دی.

پولیس وایي چې خالد حمید د فراغت د محفل په تیاریو بوخت و چې خطیب حسین ورباندې په چاړې حمله وکړه.

پولیسو د تورن په وینا ویلي دي چې د نارینه او ښځینه ګډ محفل د اسلام له نظره ناروا دی او ده مخکې له مخکې استاد خالد حمید ته خبرداری ورکړی و.

د پاکستان د اپوزسیون د یوه مهم ګوند له مشرانو څېړنې پیل شوې

د پاکستان د پخواني ولسمشر اصف علي زرداري زوی بلاول بوټو

د پاکستان د اپوزسیون د یوه مهم ګوند له مشرانو د دغه هېواد د فساد ضد ادارې تحقیقات پيل کړل.

د پاکستان له پخواني ولسمشر اصف علي زرداري او د هغه له زوی بلاول بوټو څخه چې د پیپلز ګوند مشران دي، پرون په اسلام اباد کې د ځواب ورکولو ادارې «NAB» تحقیقات وکړل.

د پوښتنو ګرویږنو پر مهال د فساد ضد ادارې بهر د پیپلز ګوند په سلګونو پلویان راغونډ شوي وو او مرګ پر عمران خان شعارونه یې ورکول.

بلاول بوټو په اسلام‌اباد کې خبري غونډې ته د خبرو پر مهال عمران خان تورن کړ چې خپل سیاسي مخالفان ځپي.

د پاکستان د ځواب ورکولو ملي ادارې په یوې اعلامیې کې ویلي چې له اصف علي زرداري او بلاول بوټو څخه د درېیو قضیو په اړه دوه ساعته تحقیقات وشول او دوی ته سوالونه وسپارل شول چې په لسو ورځو کې ځواب ورکړي.

د بخښنې نړیوال سازمان: امریکا په سومالیا کې ملکيان وژلي

ارشیف، د موټر بم په یوه چاودنه کې یو تن وژل شوی دی.

د بخښنې نړیوال سازمان ویلي، د امریکا د متحده ایالاتو پوځ په وروستیو دوو کلونو کې په سومالیا کې هوايي حملې کړي چې ملکي وګړي په‌کې وژل شوي دي.

د بخښنې نړیوال سازمان ویلي چې دا کار ښايي جنګي جنایت وګڼل شي، خو په افریقا کې د امریکايي ځواکونو قوماندانۍ دا ادعاوې رد کړې دي.

د بخښنې نړیوال سازمان په څېړنه کې څرګنده شوې چې په ۱۱۰ هوايي حملو کې چې د ۲۰۱۷ میلادي کال له دوبي راهیسې شوي، ۱۴ ملکي وګړي وژل شوي دي.

د بخښنې نړیوال سازمان ویلي چې حملې ظاهراً د جګړې پر نړیوالو قوانینو تېری کوي او په ځيني مواردو کې جنګي جنایت بلل کېدلی شي.

د امریکا پوځ دا راپور رد کړی او وايي چې په سومالیا کې یې په‌دې موده کې ۸۰۰ وسله‌وال وژلي دي.

د امریکا پوځ ویلي چې په یاده موده کې یو ملکي وژلی یا زخمی شوی نه‌دی.

امریکا: د ترکیې په جنوب ختیځ کې ۵.۷ درجې زلزله شوې

په ډنیزلي کې د زلزلې له امله نړېدلې ودانۍ

د امریکا د جیولوژیکي سروې اداره وايي چې د ترکیې په جنوب ختیځ کې ۵.۷ درجې زلزله شوې ده.

په ترکیه کې د بېړنیو حالاتو ځانګړې ادارې ویلي چې د زلزلې دوه ټکانونه احساس شوي دي.

د ترکیې د ډنیزلي سیمې والي حسن کرهان وویل چې د ودانیو د نړېدو له امله خلک ژوبل شوي او ډېرو کسانو چې ځانونه‌یې له برنډو لاندې غورځولي، زخمیان شوي دي.

د زلزلې له امله ځیني کورونه تخریب شوي هم دي.

په بلوچستان کې وسله‌والو طالبانو شپږ ملېشه عسکر وژلي

ارشیف، په کوټه کې پر امنیتي سرتېرو د انتحاري حملې عکس

په بلوچستان کې وسله‌والو طالبانو شپږ ملېشه عسکر وژلي دي.

حمله نن چهارشنبه د مارچ ۲۰مه د بلوچستان په زیارت سیمه کې شوې ده.

د حملې مسؤلیت د پاکستاني طالبانو ډلې، تحریک طالبان پاکستان اخیستی دی.

دې ډلې په یوه بیان کې ویلي چې دا حمله‌یې په بلوچستان کې د ملېشه ځواکونو په عملیاتو کې د خپلو ملګرو د قتل د غچ اخیستلو لپاره کړې ده.

دارېګه نظربایف د قزاقستان د پارلمان د سنا مشره وټاکل شوه

د قزاقستان د مخکېني جمهور رئیس لور دارېګه نظربایف

د قزاقستان د مخکېني جمهور رئیس لور دارېګه نظربایف نن چهارشنبه د مارچ ۲۰مه د هغه هېواد د پارلمان د سنا مشره وټاکل شوه.

دارېګه نظربایف ۵۵ کلنه ده او په اکثریت رأیو د سنا مشره وټاکل شوه.

نور سلطان نظربایف تقریباً ۳۰ کاله د هغه هېواد ولسمشر و.

هغه پرون استعفا وکړه.

د ولسمشر تر استعفا وروسته د قزاقستان د اساسي قانون له مخې، د سنا مشر قاسم جومارت توکایف د جمهوري ریاست لپاره وټاکل شو.

د قزاقستان سرپرست ولسمشر هم نن د خدمت لوړه وکړه.

د رادوان کاراجیچ په برخه کې د "م. م" پرېکړې ته شېبې شمېرل کېږي

رادوان کاراجیچ

په سربرنیڅه کې د عام وژنې د قربانیانو خپلوان او د کورنیو غړي نن چهارشنبه د مارچ ۲۰مه د رادوان کاراجیچ په برخه کې د ملګرو ملتونو قضاوت ته شېبې شمېري.

په ۱۹۹۵ میلادي کال کې په سربرنيڅه کې ۸ زره مسلمان نارینه چې هلکان او د پاخه عمر سړي په‌کې وو، ووژل شول.

رادوان کاراجیچ د بوسنیا له صربانو څخه دی او په دې عام وژنه کې په لاس درلودلو تورن دی.

هغه همداراز د سرایوو د څلور کلنې محاصرې چې نږدې ۱۰ زره کسان په‌کې ووژل شول، له پلان جوړونکو ګڼل کېږي.

هغه په ۲۰۱۶ میلادي کال کې په عام وژنه، د بشري ضد جرمونو په ترسره کولو او جنګي جنایت په جرم په ۴۰ کاله بند محکوم شو.

خو څارنوالانو په هاګ کې د نړیوالې محکمې له قاضیانو غوښتنه کړې چې د دوهمې عام وژنې له توره د هغه برائت لغو کړي او په عمر قید یې محکوم کړي.

د هاګ قاضیان به نن په‌دې اړه پرېکړه کوي.

د نيوزيلنډ په پېښه کې د وژل شویو کسانو د جنازې مراسم ترسره شول

د نیوزیلنډ پېښه

په نيوزيلنډ کې خاورو ته د هغو کسانو د سپارلو مراسم ترسره شول چې پر دوو جوماتونو په حمله کې وژل شوي دي.

نن په کرايست‌چرچ ښار کې سلګونه کسانو د خالد مصطفى او د هغه د ۱۵ کلن زوى حمزه چې له سوريې کډوال شوي وو، د جنازې په مراسمو کې برخه واخیسته.

تېره جمعه په دغه ښار کې پر دوو جوماتونو په ډزو ٥٠ کسان ووژل شول او نږدې ٤٠ تنه نور ټپيان شول.

د استراليا يو ٢٨ کلن وګړی برينټون تارنت، پر لمونځ کوونکو په ډزو تورن شوى دى.

په غير رسمي ډول ويل شوي چې په قربانيانو کې د پاکستان، افغانستان، بنګله‌دېش، ترکيې، سعودي عربستان، اردن، اندونيزيا، ماليزيا، مصر او امريکا وګړي شامل دي.

جومارت توکایف به د قزاقستان د سرپرست ولسمشر په توګه لوړه وکړي

قاسم جومارت توکایف

په پام کې ده قاسم جومارت توکایف «Qasym-Zhomart Toqaev» به نن چهارشنبه د قزاقستان د سرپرست ولسمشر په توګه لوړه وکړي.

له دې سره په‌دغه هېواد کې د پخواني ولسمشر نور سلطان نظربايف نږدې ٣٠ کلنه واکمني پاى ته رسېږي.

نظربايف چې د ولسمشرۍ له څوکۍ لیرې شو، تمه کېږي چې لاهم په‌دغه هېواد کې له پراخ نفوذه برخه‌مند وي.

۶۵ کلن توکايف چې په مسکو کې يې زده‌کړې کړي، د قزاقستان د صدراعظم او د بهرنيو چارو وزير په توګه‌يې هم دنده ترسره کړې ده.

ده نن سبا د قزاقستان د مشرانو جرګې د رئيس په توګه دنده ترسره کوله.

دى به له ۷۸ کلن نظربايف څخه چې په پام کې وه دوره‌يې په ٢٠٢٠ میلادي کال کې پاى ته ورسېږي، قدرت په لاس کې واخلي.

نظربايف چې کله توکايف د سرپرست ولسمشر په توګه اعلاناوه، ويې‌ويل چې د قزاقستان د رهبرۍ لپاره خلک ورباندې باور کولاى شي.

توکايف چې په جنيوا کې يې هم د ملګرو ملتونو د ډيپلومات په توګه دنده ترسره کړې، پر قزاقۍ، روسۍ، انګرېزي او چينايي ژبو حاکم دى.

پابليتې: د ايران د ميزائيلو پروګرام منځنى ختيځ بې‌ثباته کوي

د وسلو د کنټرول تأييد او تطبيق لپاره د امريکا د بهرنيو چارو وزارت مرستياله يليم پابليتې

د امريکا متحده ايالاتو د وسلو د کنټرول يوه چارواکې وايي، د ايران د ميزائيلو پروګرام منځنى ختيځ بې‌ثباته کوي او «د سيمه‌ييزې وسله‌والې سيالۍ» خطر ته زمينه برابروي.

د وسلو د کنټرول تأييد او تطبيق لپاره د امريکا د بهرنيو چارو وزارت مرستيالې يليم پابليتې وويل:

"د ايران د ميزائيلو پروګرام د کړکېچ په زياتولو او د سيمې په بې‌ثباتۍ کې عمده رول لوبولى چې د سيمه‌ييزې وسله‌والې سيالۍ خطر يې زيات کړى دى."

پابليتې پرون په جنيوا کې د ملګرو ملتونو له‌خوا د بې‌وسلې کولو پر موضوع رابلل شوي کنفرانس ته دا خبره وکړه.

هغې زياته کړه، ايران بايد سم دلاسه د هغو بالیستيک توغنديو چې د اټمي وسلو د لېږد توان لري، اړوند فعاليت محدود کړي، دغه‌راز ترورېستي ډلو او نورو غير دولتي لوبغاړو ته د میزائیلو او د میزائيلو د ټکنالوژۍ تکثير ودروي.

هغې په ځانګړي ډول په يمن کې د ايران له‌خوا د حوثي ياغيانو او په لبنان کې د حزب‌الله افراطي ډلې د ملاتړ يادونه وکړه.

امريکا د ملګرو ملتونو له امنيت شورا غوښتنه کړې چې پر ايران د دغه هېواد له‌خوا د بالیستيک توغنديو د ازموينې او د دوو سپوږمکيو د توغولو له کبله بنديزونه ولګوي، دوى وايي دا اقدامات د امنيت شورا له پرېکړه‌ليکونو سرغړونه ده.

نور راوښيه

XS
SM
MD
LG