د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۵:۴۸

نړۍ

یو رېل ګاډي چې کېم جونګ اون په‌کې و له پیکېنګه حرکت وکړ

هغه رېل ګاډی چې د شمالي کوریا مشر کېم جونګ اون په‌کې و

خبریالان او عیني شاهدان وایي، یو رېل ګاډی چې د شمالي کوریا مشر کېم جونګ اون په‌کې و، نن د پیکېنګ له مرکزي سټېشن څخه حرکت وکړ.

کېم جونګ اون داسې مهال د چین د ولسمشر شي جین پېنګ په بلنه هغه هېواد ته تللی و چې د امریکا او شمالي کوریا د مشرانو ترمنځ د دوهمې لیدنې په اړه بحثونه دوام لري.

د چین او شمالي کوریا رسنیو د کېم د دغه سفر د جزئیاتو په اړه څه نه‌دي ویلي.

د شمالي کوریا مشر د نوي کال په مناسبت وینا کې خبرداری ورکړی و چې که واشنګټن پر پیونګ یانګ پر خپلو بندیزونو ټینګار وکړي، شمالي کوریا به د خپل اټمي پروګرام د درېدو په اړه پر ژمنو له سره غور وکړي.

چین د شمالي کوریا عمده متحد دی او دا چین ته د کېم څلورم سفر دی.

رضايان: تحقيق کوونکو اړ کړم څو اعتراف وکړم چې ګواکې جاسوس یم

د واشنګټن پوسټ ورځپاڼې خبریال جېسن رضايان

د واشنګټن پوسټ ورځپاڼې يو خبريال چې ١٨ مياشتې په ايران کې بندي و، د امريکا يوې محکمې ته وويل، د ده د نيول کېدو هدف پر اټمي موضوع د مذاکرو لپاره پر واشنګټن يو ډول فشار راوستل وو.

جېسن رضايان پرون د تهران پر ضد د څو میليونه ډالرو دعوا پر مهال شاهدي ورکړه.

رضايان وويل، له ده تحقيق کوونکو مجبوره کړ چې اعتراف وکړي، ګواکې جاسوس دى.

ده زياته کړه، دغو ايراني تحقيق کوونکو ورته ويلي که امريکا هغه څه چې غواړو راکړي، دى به خوشې شي.

جېسن رضايان چې پلار يې ايرانى او مور يې امريکايۍ ده، د دواړو هېوادونو تابعيت لري.

دى په تهران کې د نيول کېدو پر مهال د واشنګټن پوسټ ورځپاڼې د دفتر مسؤل و.

رضايان د ٢٠١٤ میلادي کال د جولاى په ٢٢مه ونيول شو چې ١٨ مياشتې يې په زندان کې تېرې کړې.

دى د ٢٠١٦ میلادي کال د جنورۍ په ١٦مه خوشې شو.

د بشري حقونو د څار اداره: په کُردستان کې ماشومان شکنجه کېږي

ارشیف، د عراق د شمال په کُردستان کې یو امنيتي سرتېری

د بشري حقونو د څار اداره وايي، د عراق د شمال په کُردستان کې امنيتي ځواکونه ماشومان شکنجه کوي.

د دې ادارې په خبره دغه ماشومان ځکه شکنجه کېږي چې اعتراف وکړي چې له داعش وسله‌والو سره اړيکې لري.

په امريکا کې دېره دغې ډلې په هغه راپور کې چې پرون خپور شو ويلي، له ٢٣ هغو زلميانو سره‌يې مرکې کړي چې محکوم شوي يا تور ورباندې لګول شوى چې په داعش پورې تړلي دي.

د بشري حقونو د څار ادارې ويلي، د دغو زلميو له ډلې ١٦ ويلي چې د پوښتنو ګروېږنو په وخت کې شکنجه شوي دي.

ځينو ويلي چې په برښنايي کېبلونو، پلاستيکي پايپونو يا د نلونو په ذريعه وهل ټکول شوي.

څو تنو نورو بيا ويلي چې د برښنا شارټونه ورکول شوي دي.

د راپور په حواله د عراق د شمال په کُردستان کې د امنيتي ځواکونو له‌خوا دغه شکنجې په ٢٠١٧ او ٢٠١٨ میلادي کلونو کې شوي دي.

د کُردستان د محلي حکومت يوه سلاکار ديندار زيباري دغه ادعاوې رد کړې دي.

جان بس: د امریکا او طالبانو د چهارشنبې د خبرو راپورونه ناسم دي

ارشیف، په کابل کې د امریکا سفیر جان بس

په کابل کې د امریکا سفیر هغه راپورونه رد کړي چې ګوندې د چهارشنبې په ورځ د امریکا او طالبانو ترمنځ خبرې په پلان کې وې.

جان بس په‎دې اړه ډېر جزئیات نه‎دي ورکړي، خو پر ټویټر یې لیکلي:

"د امریکا او طالبانو ترمنځ د چهارشنبې په ورځ د خبرو راپورونه ناسم دي. طالبان باید هومره چې رسنیو سره خبرې کوي، خپلو افغان هېوادوالو سره خبرې وکړي."

جان بس دا څرګندونې وروسته له هغې کوي چې د سې شنبې په ورځ طالب چارواکو یو شمېر رسنیو ته وویل، دوی د اجنډا پر سر د اختلاف له کبله هغه خبرې لغوه کړي چې ټاکل شوې وه د چهارشنبې په ورځ د طالبانو او امریکا ترمنځ په قطر کې وشي.

روېټرز خبري اژانس د یو شمېر طالب چارواکو له قوله چې نومونه‌یې نه‎دي یاد شوي ویلي، په اجنډا کې لوی اختلافونه، په خبرو کې د افغان حکومت د شمولیت، د بندیانو پر خوشې کولو او په ۲۰۱۹ میلادي کال کې د اوربند د اعلان پر مسئلو وو.

د ملګرو ملتونو د امنیت شورا د یمن په اړه بحث کوي

د ملګرو ملتونو امنیت شورا نن شپه «د جنورۍ نهمه» غونډه کوي چې په‌کې به د یمن لپاره د دې سازمان د استازي پر راپور بحث وکړي.

ډیپلوماتان وايي، دا بحثونه به په یمن کې پر اوربند او د دې هېواد د کورنۍ جګړې د پای ته رسولو په اړه په وروستیو هڅو متمرکز وي.

د یمن لپاره د ملګرو ملتونو ځانګړي استازي مارتین ګریفیټس تر دې مخکې په سعودي کې د یمن له مشرانو سره خبرې کړې دي.

د دوی خبرې په حدیده بندري ښار کې د اوربند په اړه وې.

تېره میاشت په سویډن کې له خبرو اترو وروسته دغلته اوربند عملي شوی دی.

حوثي یاغیان له څو کلونو راهیسې د یمن پر پایتخت صنعا او څو نورو سیمو کنټرول لري.

ایران د حوثي وسله‎والو ملاتړ کوي.

په وړاندې یې د سعودي عربستان په مشرۍ ائتلاف د عبدالربه منصور هادي د حکومت ملاتړ کوي.

نوموړی دا مهال په سعودي عربستان کې دی.

ویل کېږي چې د یمن د دې کورنۍ جګړې په ترڅ کې تر اوسه نږدې ۱۳ زره کسان وژل شوي دي.

د امریکا یو پخوانی سرتېری په نامعلوم تور په ایران کې بندي شوی

د ايران يو زندان

د امریکا د سمندري ځواک یو پخوانی سرتېری، د تېر کال د جولای میاشتې راهیسې په ایران کې بندي شوی دی.

د دې سرتېري او یو پخواني ایراني زنداني کورنۍ د ۴۶ کلن مایکل وایټ د زنداني کېدو خبر تأیید کړی دی، خو تر اوسه معلومه نه‎ده چې نوموړي په ایران کې په کوم تور بندي دی.

د ښاغلي وایټ مور د نیویارک ټایمز ورځپاڼې ته ویلي، زوی یې هغه مهال ونیول شو چې تېر کال د خپلې ملګرې نجلۍ د لیدو لپاره ایران ته ولاړ.

د امریکا د بهرنیو چارو وزارت وايي، د مایکل وایټ له نیول کېدو خبر دي، خو په‎دې اړه‌یې ډېر جزئیات نه‎دي ورکړي.

وروسته له هغې چې تېر کال ډونالد ټرمپ له ایران سره د ۲۰۱۵ میلادي کال له اټمي موافقې ووت د ایران او امریکا اړیکې ډېرې ترینګلې شوې دي.

اردوغان: بولتون کردي جنګیالیو ته د مصونیت پر غوښتلو تېروتنه کړې

د ترکیې ولسمشر رجب طیب اردوغان

د ترکیې ولسمشر وايي، د امریکا د ملي امنیت سلاکار په سوریه کې کردي جنګیالیو ته د مصونیت پر غوښتلو جدي تېروتنه کړې ده.

رجب طیب اردوغان له هغې وروسته چې د سپینې ماڼۍ د ملي امنیت سلاکار جان بولتون له ترکیې ووت، وویل انقره د کردانو په مسئله کې هېڅ‌چا ته امتیاز نه‌ورکوي.

ښاغلی اردوغان زیاتوي:

"جان بولتون په‎دې برخه کې جدي تېروتنه وکړه او هر څوک چې داسې فکر کوي هم تېروتنه کوي. موږ ته ممکنه نه‎ده چې په‎دې برخه کې جوړ جاړی وکړو."

ولسمشر ډونالد ټرمپ چې هېواد یې د ترکیې پولې ته نږدې په سوریه کې د کردانو ملاتړ کوي، د ډسمبر په میاشت کې اعلان وکړ چې غواړي امریکايي سرتېري له سوریې څخه وباسي.

ترکیه د سوریې کردي ډلې ترهګر بولي او وايي، د دې وسله‎والو ډلو پر ضد به خپلو پولو ته نږدې د سوریې په خاوره کې عملیات وکړي، خو امریکايي چارواکو پر ترکیې ټینګار کړی چې د سوریې له کردي جنګیالیو سره دې کار نه‎لري.

ویل کېږي چې د کردانو مسئلې، دا مهال د امریکا او ترکیې اړیکو کې یو بل کړکېچ رامنځته کړی دی.

ولسمشر ټرمپ به د مهاجرت په اړه خپل ملت ته ټلوېزيوني وينا وکړي

ولسمشر ټرمپ

په پام کې ده د امريکا د متحده ايالاتو ولسمشر ډونالد ټرمپ د مهاجرت په اړه خپل ملت ته ټلوېزيوني وينا وکړي.

د مهاجرت مسئله د دې سبب شوې چې په تېرو ١٨ ورځو کې د امريکا د فدرال حکومت ځينې برخې پرچاو شي.

تمه کېږي په نننۍ وينا کې به ولسمشر ټرمپ د امريکا او مکسيکو پر پوله د لوى دېوال د جوړولو پر پېشنهاد هم تمرکز وکړي.

ولسمشر ټرمپ د دغه دېوال د جوړولو لپاره له کانګرس څخه د نږدې ٦ میليارده ډالرو بودجې غوښتنه کړې ده.

خو ډموکراتانو چې د نومبر د انتخاباتو په نتيجه کې يې د کانګرس د استازو په جرګه کې اکثريت څوکۍ ګټلي، د دغه پېشنهاد مخالفت کړى دى.

د امريکا د اساسي قانون له مخې له ځينو استثناآتو پرته ولسمشر نه‎شي کولاى د کانګرس له موافقې پرته پر پروژو پيسې ولګوي.

ډونالد ټرمپ: د امريکا او مکسيکو پر پوله «بشري بحران» روان دى

د امريکا متحده ايالاتو ولسمشر ډونالد ټرمپ

د امريکا متحده ايالاتو ولسمشر ادعا وکړه چې د امريکا او مکسيکو پر پوله «بشري بحران» روان دى.

ملت ته د ډونالد ټرمپ د ټلوېزيوني وينا هدف پر دغه پوله د دېوال جوړولو د هڅو ګړندي کېدل او د حکومت د ځينو برخو د ١٨ ورځنۍ پرچاوۍ پاى ته رسېدل وو.

په کانګرس کې ډموکراتانو پر ولسمشر ټرمپ انتقاد کړى او غوښتنه‌يې ورڅخه کړې چې د فدرال حکومت تړل شوې برخې دې بېرته پرانيزي.

د حکومت د ځينو برخو تړل کېدل د دې سبب شول چې په سلګونه زره کسان بې‌معاشه کار وکړي.

د ولسمشر ټرمپ نننۍ وينا ښيي چې د امريکا په سياستونو کې څومره کړکېچ شته، په ځانګړي ډول وروسته له هغې چې د نومبر مياشتې په انتخاباتو کې ډموکراتانو د کانګرس د استازو په جرګه کې اکثريت وګټل.

ولسمشر ټرمپ له کانګرسه د امريکا او مکسيکو پر پوله د دېوال جوړولو لپاره د نږدې ٦ میليارده ډالرو غوښتنه کړې، خو ډموکراتانو يې مخالفت کړى دى.

دغه مخالفت د دې سبب شو چې له ۱۸ ورځو راهيسې د فدرال حکومت ځينې برخې وتړل شي.

د اسیا د فوټبال جام سیالیو په لړ کې ایرانۍ لوبډلې یمن ته ماته ورکړه

ارشیف، د ایران د فوټبال لوبډلې ځيني غړي

د اسیا د فوټبال جام سیالیو په لړ کې ایرانۍ فوټبال لوبدلې یمن ته سخته ماته ورکړه.

په دغه لوبه کې ایراني لوبغاړو پنځه ځلې د يمن د ګول دروازه خلاصه کړه، خو یمني لوبغاړي په ګول کولو بریالي نه‌شول او لوبه‌یې پنځه د صفر په وړاندې بایلوده.

د اسیا د فوټبال جام ۱۷م پړاو سیالۍ د ۲۴ اسیايي لوبډلو په ګډون په متحده عربي اماراتو کې روانې دي.

دغه سیالۍ د ۲۰۱۹ کال د جنورۍ په پنځمه پیل شوي چې د فبرورۍ د میاشتې تر لومړۍ نېټې پورې به روانې وي.

جهان ابادي: زیات مصارف به د ایران خلک سړکونو راوتو ته اړ باسي

د ایران ملي بیرغ

د ایران د پارلمان يوه غړي ويلي چې د دې هېواد په بهرني سياست کې داسې مصارف شته چې ډېری يې غير ضروري دي او کولای شي چې ايرانیان د رکود په حالت کې د تهران سړکونو ته راوباسي.

په يوه داسې وينا کې چې تمه‌یې نه‌کېده، جلیل رحيمي جهان ابادي د پارلمان د کاري اجنډا په پيل کې وويل چې درانه مصارف چې لومړيتوب نه‌لري، بايد له‌منځه لاړ شي.

ښاغلي جهان ابادي په خپله وينا کې پخواني شوروي اتحاد ته اشاره وکړه او ويې‌ویل چې هغه هېواد د اټمي وسلو پر زېرمو او د نړۍ پر کچه پر نفوذ لرلو سربېره ونه‌توانېد چې خپل ځان خوندي وساتي.

د جهان ابادي دا خبرې د ایران د بهرنۍ پالېسۍ په اړه د ستر مذهبي مشر ایت‌الله علي خامنه‌اي له رسمي دريځ سره په ټکر کې دي.

جهان ابادي اصلاحات غوښتونکی سياستوال دی چې د ایران په مجلس کې د سني پارلماني ډلې مشري کوي.

دی پخوانی علمي او اکاډميک کس دی او لس کاله د ایران د جمهوري ریاست د اسنادو مسؤل پاتې شوی دی.

د ايسنا خبري اژانس د راپور له مخې، جهان ابادي وویل چې په سیمه کې د ایران نفوذ مهم دی، خو یوه خبره بايد هېره نه‌شي چې ځيني وختونه تر حده زیات مصارف ښايي خلک د تهران سړکونو ته اړ باسي.

جان بولتون په انقره کې د ترکيې د ولسمشر له لوړپوړي سلاکار سره وکتل

ارشیف، د امریکا د ملي امنیت سلاکار جان بولتون

د امریکا د ملي امنیت سلاکار جان بولتون نن د ترکيې له لوړپوړو چاوراکو سره د سوريې په اړه خبرې وکړې.

جان بولتون په انقره کې د ترکيې د ولسمشر له لوړپوړي سلاکار ابراهيم کالين سره وکتل.

د امریکا د ملي امنیت شورا یوه وياند ګاريت مارکیس په يوه اعلاميه کې ويلي چې دواړو لورو نور مسايل هم په ګوته کړي چې بايد ورباندې خبرې وشي.

اعلاميه همداراز وايي، امریکا تمه لري چې نن د دواړو هېوادونو ترمنځ پر نظامي کچه هم سلا مشورې وشي.

په دې اړه معلومات نه‌دي ورکړل شوي چې ايا بولتون نن د ترکيې له دفاع وزیر او استخباراتو له رئیس سره وکتل که نه؟

خو له ولسمشر رجب طیب اردوغان سره ټاکل شوې غونډه یې نن نه ده شوې او بولټن ته ویل شوي چې اردوغان د انتخاباتو په کمپاین بوخت دی.

بولتون ترکيې ته په داسې حال کې تللی چې په ورته وخت کې د امریکا د بهرنيو چارو وزیر مايک پامپيو هم سيمې ته سفر کړی.

دا وروسته له هغه چې د امریکا ولسمشر ډونالد ټرمپ ناببره له سوريې د امریکا د دوه زره سرتېرو د ايستلو پرېکړه اعلان کړه.

د ټرمپ دې اعلان امریکايي متحدان حيران پاتې کړل او همداراز يې په نتيجه کې د امریکا دفاع وزير جېمز مټېس استعفا ته اړ شو.

چارواکي وېره لري چې د امریکايي سرتېرو له وتلو سره به سوریه بې‌ثباته شي او کرد ملېشې به قتل عام شي.

داعش ویلي چې ځانوژونکو یې د سوریې په رقه کې څو تنه وژلي

ارشیف، د سوریې رقه ښار

د اسلامي دولت نومې ډلې یا داعش ویلي چې ځانوژونکو یې پرون د سوریې په رقه کې څو تنه وژلي دي.

د دې ښار کنټرول د هغو کُرد ملېشو په لاس کې دی چې امریکا یې ملاتړ کوي.

داعش په یوې خبرپاڼه کې چې په‌دې ډلې پورې تړلې د اعماق خبري اژانس خپره کړې ویلي چې په‌دې حمله کې یې ۱۷ کسانو ته مرګ ژوبله اړولې ده.

په خبرپاڼه کې نور جزئیات نه‌دي ورکړل شوي دي.

د سوریې ډموکراتیکو ځواکونو تر اوسه د دغې حملې په اړه څه نه‌دي ويلي.

دغو ځواکونو پر رقه ښار چې د سوریې په شمال ختیځ کې پروت دی، په ۲۰۱۷ میلادي کال کې د امریکا په مشرۍ د نړیوالو هوایي ځواکونو په مرسته ولکه ټینګه کړه.

شااوخوا ۳۰۰ فعالانو د قرغزستان په پلازمېنه بېشکک کې مظاهره وکړه

په بېشکک کې مظاهره

شااوخوا ۳۰۰ فعالانو پرون د قرغزستان په پلازمېنه بېشکک کې د هغه څه په وړاندې چې دوی یې په‌دې هېواد کې د چینایي کډوالو د شمېر زیاتوالی بولي، مظاهره وکړه.

مظاهره کوونکو د دې هېواد له چارواکو وغوښتل چې غیر قانوني چینایي کډوال بېرته خپله هېواد ته ستانه کړي.

له چارواکو د دغو معترضانو بله غوښتنه دا وه چې هغو کسانو ته د تابعیت ورکولو پروسه ودروي چې د قرغزستان له اتباعو سره ودونه کوي.

مظاهره کوونکو دغه‌راز د قرغزستان له هغو وګړو سره هم خپل ملاتړ څرګند کړ چې ویل کېږي د چین په شین جین ایالت کې د بیا روزنې په کمپونو کې ورسره ناوړه چلند کېږي.

۵ ازبکستاني یو قرغزستانی د سویډن یوې محاکمې ته حاضر کړای شول

د سویډن بیرغ

د ازبکستان پنځه اتباع او د قرغزستان یو تبعه پرون دوشنبه د سویډن په پلازمېنه ستاکهلم کې یوې محاکمې ته حاضر کړای شول.

دغه شپږ تنه د اسلامي دولت نومې ډلې یا داعش ته د پیسو په لېږدولو تورن دي.

تورن کسان چې عمرونه‌یې د ۲۴ او ۴۶ کلونو ترمنځ دي، په سویډن کې په قانوني توګه ژوند کوي.

د دوی درې تنه هم په سویډن کې د یوې حملې په پلانولو تورن دي.

خو ټولو تورنو پر ځان لګېدلي تورونه رد کړي دي.

نور راوښيه

XS
SM
MD
LG