د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۶:۲۵

نړۍ

د تاجکستان یوه مدافع وکیله د ۵۵ کلنۍ په عمر مړه شوه

د تاجکستان یوه مدافع وکیله فیض النسا واحدوا چې کلونه يې د دې هېواد له ازاد فکرو، د بشر د حقونو له فعالانو او د حکومت مخالفو سیاسیونو دفاع وکړه، د ۵۵ کلنۍ په عمر مړه شوه.

د واحدووا انګور تهمینه رحیمووا نن ازادي راډیو ته وویل، خواښې يې تېره شپه د سږو د التهاب له امله مړه شوې ده.

واحدووا د مسکو په دولتي پوهنتون کې لوړې زده کړې وې او په ۱۹۹۵ کال کې يې د مدافع وکیلې په توګه کار پیل کړی و.

د بشري حقونو په نړیوال سازمان کې یو څیړونکی سټیف سویردلو د واحدووا مړینه د تاجکستان لپاره یوه لویه ضایعه او هغه يې یوه زړوره مېرمن بللې ده.

ټرمپ د کانګرس له مشرانو د مکسیکو په اړه خبرې کوي

ولسمشر ټرمپ

د امریکا ولسمشر ډونالډ ټرمپ نن د کانګرس له مشرانو سره ویني چې له مکسیکو سره پر پوله د دیوال جوړولو لپاره د ۵ میلیارده ډالرو د غوښتل شوې بودجې په اړه ورسره خبرې وکړي.

له مکسیکو سره پر پوله د دیوال جوړولو په اړه د ولسمشر ټرمپ د غوښتنې له امله د فدرالي حکومت بودجه ځنډېدلې ده چې په نتیجه کې يې د یو شمېر دولتي ادارو چارې درېدلې دي.

ډموکراټان چې د کانګرس د استازو په جرګه کې اکثریت دي، د سرحدونو د بودجې د زیاتولو مخالفت کوي.

دا مهال د متحده ایالاتو په بودجه کې یو عشاریه درې میلیارده ډالر د سرحدونو د چارو لپاره ځانکړي دي او کانګرس له دې زیاتې بیسې نه‌دي تصویب کړي.

ولسمشر ټرمپ وايي، له مکسیکو سره پر پوله د دیوال له جوړولو يې هدف امریکا ته د غیرقانوني کډوالو د راتګ او د نشه يي موادو د قاچاق مخنیوی دی.

نوموړي په خپل انتخاباتي کمپاین کې ویلي و چې مکسیکو به اړ کړي چې پر سرحد د دیوال جوړولو لګښت ورکړي، خو مکسیکو دا غوښتنه ونه منله.

د اسیا د فوټبال جام سیالۍ په متحده عربي اماراتو پیلېږي

ارشیف

د اسیا د فوټبال جام سیالۍ سبا د شنبې په ورځ په متحده عربي اماراتو پیلېږي.

د سږني کال د فوټبال د اسیا جام مسابقې تر پخوانیو سیالیو پراخې دي او په‌کې د ګډون کوونکو ټیمونو شمېر ۲۴ ته لوړ شوی دی.

ایران، ازبکستان، ترکمنستان او قرغزستان هم دا ځل د اسیا جام په سیالیو کې ګډون کوي.

د ۲۰۱۵ میلادي کال د اسیا چام استرالیا ګټلی و او د سږکال په سیالیو کې جاپان تر ټولو مخکښ ټیم بلل کېږي.

د فوټبال نړیوال فدراسیون بیا د ایران ټیم هم له هغو ډلو شمېري چې د جام احتمالي ګټونکی ثابتېدای شي.

په متحده عربي اماراتو کې د اسیا د فوټبال جام مسابقې په داسې وخت کې ترسره کېږي چې په‌دې سیمه کې سیاسي شخړې زیاتې شوي دي.

متحده عربي اماراتو ،بحرین او سعودي عربستان له قطر سره ډیپلوماتیکې ختمې کړي دي.

د راتلونکي ۲۰۲۲ میلادي کال د فوټبال د نړیوال جام کوربه هېوادونه سعودي عربستان او قطر د اسیا جام په سبانیو مسابقو کې په ګروپي لوبو کې له یو بل سره مخامخ کېږي.

د امریکا د ملي امنیت سلاکار جان بولټون اسرائیل او ترکيې ته ځي

د امریکا د ملي امنیت سلاکار جان بولټون

د امریکا د ملي امنیت سلاکار جان بولټون وايي، اسرائیل او ترکيې ته به سفر وکړي او له سوريې څخه د امریکايي ځواکونو د وتلو په اړه به د دې دواړو هېوادونو له چارواکو سره خبرې وکړي.

ښاغلي بولټون په خپل تازه ټویټ کې ویلي دي چې په منځني ختیځ کې د ایران د نفوذ د مخنیوي پر لارو چارو به وغږېږي.

نوموړي ویلي چې ترکيې ته په سفر کې به له ده سره د امریکا د پوځ لوی درستیز جنرال جوزف ډانفورډ هم ملګری وي.

د امریکا ولسمشر ډونالډ ټرمپ د تېرې ډسمبر میاشت په ۱۹مه نېټه له سوريې د امریکايي ځواکونو د ایستلو اعلان وکړ.

د ولسمشر ټرمپ دې اعلان د امریکا پوځي مشران او د کانګرس غړي حیران کړل.

راتلونکې دوشنبه او سې شنبه به د چین او امريکا چارواکي وغږېږي

په پام کې ده د امريکا متحدو ايالتونو او چين چارواکي راتلونکې دوشنبه او سې شنبه په خپلو کې خبرې وکړي.

دوى هڅه کوي په تجارتي برخه کې هغه کړکېچ کم کړي چې په نړيواله سطحه يې بازارونه اغېزمن کړي دي.

د چين د سوداګرۍ وزارت نن ويلي، له امريکا به يوه ډله چې مشري به يې د تجارت لپاره د امريکا د حکومت مرستيال استازى جېفري ګيريش کوي، د هغې مهمې اجماع پر عملي کولو بحث وکړي چې د امريکا ولسمشر ډونالډ ټرمپ او د چين ولسمشر شي جين پينګ ورباندې تېر کال موافقه کړې وه.

د چين د سوداګرۍ وزارت وايي، دواړو لوريو په هغه ټیليفوني مکالمه کې چې نن شوې، د دغو خبرو نېټې تأييد کړې دي. وزارت په دې اړه نور جزئيات نه‌دي ورکړي.

تېرکال واشنګټن او پيکنک په يوه تجارتي جګړه کې ښکېل شول چې هر يوه د مقابل هېواد پر توليداتو د مليارډونو ډالرو په ارزښت تعرفه ولګوله.

ټرمپ پرې دې غور کوي چې جیم وب د دفاع وزير په توګه وټاکي

خوانى ډيموکراټ سناتور جم ويب

يوې امريکايۍ ورځپاڼې راپور ورکړى چې ولسمشر ډونالډ ټرمپ پر دې غور کوي چې پخوانى ډيموکراټ سناتور جم ويب «Jim Webb» د دفاع د نوي وزير په توګه وټاکي او که نه؟

نيويارک ټايمز دغه راپور پرون پنجشنبه خپور کړى چې د ځينو چارواکو په حواله په کې ويل شوي، د ولسمشر ټرمپ د ادارې چارواکو له ٧٢ کلن ويب سره د دفاع وزارت د مسووليت اخېستلو په اړه تماس نيولى دى.

دا مهال د بوينګ شرکت پخوانى اجرائيه مدير پاتريک شنهن د امريکا د دفاع سرپرست وزير دى.

د امريکا پخواني دفاع وزير جېمز مټيس تېره مياشت د ولسمشر ټرمپ پر پاليسيو د اعتراض په ډول استعفا وکړه.

نظرپوښتنه: ۳ پر ۴مه فرانسویان د مکرون له حکومته ناراضه دي

ولسمشر ايمانوئل مکرون

يوه نوې نظرپوښتنه ښيي چې د فرانسې درې پر څلورمه برخه وګړي د ولسمشر ايمانوئل مکرون له پاليسيو او حکومت څخه ناراضه دي.

په دې نظرپوښتنه کې چې پرون پنجشنبه خپره شوې اکثريت برخه‌والو ويلي، دوى د داسې اقداماتو غوښتونکي دي چې د کورنيو د عوايدو د زياتېدو سبب کېږي.

په تېرو دوو مياشتو کې د مکرون او د ده د حکومت پر خلاف د «ژېړ-واسکټو» په نوم مظاهره چيانو اعتراضونه وکړل.

دغه مظاهرې وروسته له هغې پيل شوې چې مکرون پر تېلو د ماليې لوړولو پېشنهاد وکړ.

ولسمشر مکرون په تدريجي ډول پر تېلو د ماليې لوړولو له ملاتړه لاس واخېست او داسې اقدامات يې پېشنهاد کړل چې د کورنيو د عوايدو له زياتېدو سره مرسته کوي.

په نوې نظرپوښتنه کې ٧٥ فيصده برخه‌والو ويلي چې له حکومته راضي نه‌دي، حال دا چې دغه فيصدي په اپرېل مياشت کې ٥٩ فيصده وه.

په ریاض کې د جمال خاشقجي د قتل پرسر د ۱۱ تنو محاکمه پیل شوه

جمال خاشقچي

د سعودي عربستان دولتي رسنۍ وايي چې د سعودي ژورنالېست جمال خاشقجي د قتل پرسر د ۱۱ تنو محاکمه په پلازمېنه ریاض کې پرون پنجشنبه پیل شوه.

څارنوالانو د څلورو تورنو لپاره د اعدام غوښتنه کړې ده.

تراوسه پورې په‌دې قضیه کې د تورنو کسانو نومونه رسماً نه‌دي اعلان شوي.

د سعودي عربستان د حکومت منتقد جمال خاشقجي چې په امریکا کې اوسېده، د تېرکال د اکتوبر په دوهمه نېټه هغه مهال ووژل شو چې د ترکیې په استانبول کې د سعودي عربستان قونسلګرۍ ته ننوت.

د ده مړی تراوسه پورې موندل شوی نه‌دی.

روسیه وايي، فرانسې یو پخوانی مالي مسوول ورسپارلی

روسیه وايي، فرانسې یو پخوانی مالي مسوول ورسپارلی چې د درغلیو په څو قضیو او پیسو سپینولو کې د لاس لرلو په تور محاکمه شي.

الیکسي کوزنیڅوف له اوږدو قانوني ناندریو وروسته پرون پنجشنبه د روسیې د محبس د خدماتو او د انټرپول د روسيې څانګې غړیو ته وسپارل شو.

فرانسوي چارواکو تراوسه پورې په‌دې اړه څه نه‌دي ویلي.

کوزنیڅوف د ۲۰۰۰ او ۲۰۰۸ کلونو ترمنځ د مسکو د سیمې د مالیې د وزیر په توګه کار کړی دی.

د څېړونکو په وینا ده او په جرم کې یې شریکانو سیمه‌ییز حکومت ته د ۱۱ میلیارد روبلو چې ۱۶۰ میلیون ډالره کېږي، تاوان اړولی دی.

روسیې یو پخوانی امریکايي سرتېری په جاسوسۍ تورن کړ

په مسکو کې نیول شوی امریکايي عسکر پول ویلان

روسیې یو پخوانی امریکايي سرتېری چې په مسکو کې نیول شوی، په جاسوسۍ تورن کړ.

د روسیې د فدرالي امنیتي خدماتو ادارې دا متقاعد امریکايي عسکر چې پول ویلان «Paul Whelan» نومېږي، درې ورځې پخوا نیولی و.

دې ادارې د جزییاتو له څرګندولو پرته ویلي چې ویلان پر جاسوسۍ بالفعله نیول شوی دی.

د ویلان مدافع وکیل ولادیمیر ژیریبینکوف پرون پنجشنبه وویل چې په ضمانت یې د خپل مؤکل د خلاصون غوښتنه کړې ده.

سره له دې چې پول ویلان تورونه ردوي، خو که مجرم وګڼل شو، ممکن په ۲۰ کاله بند محکوم شي.

د امریکا د بهرنیو چارو وزارت د چهارشنبې په ورځ د جاسوسۍ په تور د ښاغلي ویلان د نیول کېدو په اړه د توضیحاتو غوښتنه وکړه او ویې ویل چې که ولیدل شي چې نوموړی په خرابو شرایطو کې ساتل کېږي، نو امریکا ته به د هغه د استولو غوښتنه وکړي.

د جمال خاشقجي د قتل په تور د ۱۱ کسانو محاکمه په ریاض کې پیل شوه

د سعودي ژورنالېست، جمال خاشقجي د قتل په تور د ۱۱ کسانو محاکمه نن پنجشنبه د جنورۍ ۳مه په ریاض کې پیل شوه.

د سعودي رسمي خبري اژانس وايي چې څارنوالانو د پنځو تورنو کسانو لپاره د اعدام حکم غوښتی دی.

جمال خاشقجي د نړۍ په کچه پېژندل شوی ژورنالېست و چې د اکټوبر په دوهمه نېټه په استانبول کې د سعودي په قونسلګرۍ کې ووژل شو.

د هغه په قتل د تورنو کسانو نومونه لا نه‌دي خپاره شوي.

جمال خاشقجي د سعودي د ولیعهد شهزاده محمد بن سلمان له سختو منتقدانو و.

په روسیه کې د یوې ودانۍ د نړېدو له امله د مړو شمېر ۳۷ ته ورسېد

په روسیه کې نړېدلې ودانۍ

په روسیه کې د یوې ودانۍ د نړېدو له امله د مړو شمېر ۳۷ ته ورسېد.

د روسیې په ماګنیتوګورسک ښار کې یوه ۱۰ پوړیزه ودانۍ د نوي کال په شپه ونړېده.

روسي چارواکو ویلي چې ودانۍ ښايي د ګاز د انفجار له امله نړېدلې وي.

د ترکمنستان د ولسمشر زوی د «اهال» د والي مرستیال ټاکل شوی

ارشیف، د ترکمنستان ولسمشر قربانقلي بردي محمدوف

د ترکمنستان مستبد ولسمشر قربان قلي بردي محمدف خپل زوی سردار بردي محمدف د هغه هېواد د مرکزي ولایت، اهال د والي مرستیال ټاکلی دی.

د ترکمنستان اهال ولایت له افغانستان او ایران سره ګډه پوله لري.

سردار بردي محمدف ۳۷ کلن دی.

د هغه د مقررۍ د خبر بیان پرون چهارشنبه د جنورۍ ۲مه د ترکمنستان د جمهوري ریاست پر رسمي وېب‌پاڼه خپور شو.

سردار بردي محمدف به له نوې څوکۍ سره د ترکمنستان د پارلمان غړی پاتې شي، خو د هغه هېواد د بهرنیو چارو وزارت د مرستیال له څوکۍ به استعفا وکړي.

په ايټالیا کې د شمالي کوریا یو ډیپلومات ځان پټ کړی

ارشیف، په روم کې د شمالي کوریا سفارت

په ايټالیا کې د شمالي کوریا یو ډیپلومات ځان پټ کړی دی.

دا خبر د جنوبي کوریا د پارلمان یوه غړي کېم من کي نن پنجشنبه د جنورۍ ۳مه په سیول کې خبریالانو ته ورکړ.

هغه ویلي چې د هغوی د ملي استخباراتو ادارې دا معلومات په سري غونډه کې ورسره شریک کړي دي.

کېم خبریالانو ته ویلي چې په روم کې د پیونګ یانګ سرپرست سفیر او د هغه مېرمن د نومبر د میاشتې په پیل کې هلته له خپل رسمي استوګن ځایه وتلي او بې‌درکه دي.

د شمالي کوریا د سرپرست سفیر د کار موده د جنورۍ د میاشتې په پای کې ختمېده.

داسې راپورونه هم خپاره شوي چې په روم کې د شمالي کوریا سرپرست سفیر په یوه غربي هېواد کې سیاسي پناه غوښتې ده.

شمالي کوریا په‌دې اړه غبرګون نه‌دی څرګند کړی.

نانسي پلوسي به د کانګرس د استازو جرګې مشري په غاړه واخلي

د امریکا د کانګرس په استازو جرګه کې د ډموکراتانو مشره نانسي پلوسي په یوه غونډه کې

په پام کې ده چې د امریکا د کانګرس په استازو جرګه کې د ډموکراتانو مشره نانسي پلوسي به د دې جرګې د ۱۱۶مې کاري دورې مشري په غاړه واخلي.

پلوسي چې مخکې له ۲۰۰۷ میلادي کال څخه هم د څلورو کلونو په مخه د استازو د جرګې مشره وه، دغه دنده نن چې د دې جرګې ۴۳۵ غړي غونډه کوي، پیل کړي.

د تېرې نومبر میاشت کې د کانګرس لپاره په منځ‌مهاله انتخاباتو کې د ډموکراتانو بري دې ته زمینه برابره کړه چې ډموکرانان په ۲۳۵ غړو سره د دې جرګې اکثریت چې مخکې له جمهوري غوښتونکو سره و، خپل کړي.

۷۸ کلنه پلوسي د ولسمشر ټرمپ یوه له سختو منتقدینو ده او اکثره ډموکراتانو هم ویلي چې له روسیې سره د هغه د اړیکو، د هغه د سوداګرۍ د معاملو، خیریه ټولنو او نورو کارونو په اړه به جدي څېړنې وکړي.

جمهوري غوښتونکو بیا په سنا جرګه کې چې ۱۰۰ غړي لري، د ۵۳ غړو په لرلو سره خپل اکثریت ساتلی دی.

نور راوښيه

XS
SM
MD
LG