د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۶:۵۹

نړۍ

جرمني د ایران د هوایي شرکت ماهان د الوتنې جواز لغوه کوي

د جرمني ملي بیرغ

د جرمني د هوایي چلند فدرال اداره وایي، په پام کې لري چې روانه اوونۍ د ایران د هوایي شرکت ماهان د الوتنې جواز لغوه کړي.

د جرمني سیمه‌ییزو رسنیو نن دوشنبه راپورونه ورکړل چې د ایران د استخباراتي ادارې له‌خوا د پټو عملیاتو د شک په تړاو دا اقدام شوی دی.

د جرمني رسنیو ویلي چې دا اقدام د هغو وژنو سره تړاو لري چې ادعا کېږي د ایران استخباراتي اداره‌یې په اروپا کې ترسره کوي او په وینا یې چې ایران پلان لري چې داسې نور بریدونه هم وکړي.

ماهان هوایي شرکت په اوونۍ کې څلور الوتنې جرمني ته درلودې.

د جرمني د بهرنیو چارو وزیر په دې اړه له څه ویلو ډډه کړې ده.

د راپورونو له مخې، ماهان یو له هغو هوایي شرکتونو و چې له ۲۰۱۱ میلادي کال راهیسې د امریکا د بندیزونو په لېست کې و او واشنګټن له کلونو راهیسې پر خپلو متحدینو هڅې کولې چې د دغه ایرلاین جواز لغوه کړي.

پاکستان کې نن د پولیو ضد واکسین کمپاین پیل شو

د پاکستان حکومت په‌دغه هېواد کې نن د پولیو ضد واکسین کمپاین پیل کړ.

د پاکستان حکومت په‌دغه هېواد کې نن د پولیو ضد واکسین کمپاین پیل کړ.

دا د حکومت د هغې ژمنې یوه برخه ده چې وایي، د ۲۰۱۹ میلادي کال تر پایه پورې به په پاکستان کې د پولیو ناروغي له‌منځه وړي.

د پاکستان د روغتیا وزارت ویاند رانا صفدر نن ویلي چې په‌دې کمپاین کې به تر ۳۹ میلیونه ډېر ماشومان چې عمرونه‌یې تر پنځو کلونو ښکته دي، واکسین شي او ۲۶۰ زره روغتیایي کارکوونکي به دا کمپاین پر مخ وړي.

پاکستان، افغانستان او نایجیریا د نړۍ په سطح هغه درې هېوادونه دي چې لاهم د پولیو مثبتې پېښې په‌کې ثبت شوي دي.

په ۲۰۱۸ میلادي کال کې په پاکستان کې یوازې یوه د پولیو مثبته پېښه ثبت شوې حال دا چې دا شمېره په ۲۰۱۴ میلادي کال کې څه باندې ۳۰۰ تنه وو.

په مکسیکو کې د چاودنې له امله د وژل شویو شمېر ۸۵ ته لوړ شوی

د مکسیکو چاودنه

په مکسیکو کې د ګازو د پایپ‌لاین په چاودنه کې د وژل شویو کسانو شمېر ۸۵ ته لوړ شوی دی.

دا خبره د مکسیکو د روغتیا وزیر کورښې الکوسېر تأیید کړه.

الوکسېر زیاته کړه چې ۵۸ نور کسان هم بستري شوي دي.

په مرکزي مکسیکو کې د ګازو د پایپ‌لاین دا چاودنه هغه وخت د جمعې په ورځ وشوه چې ۸۰۰ کسانو په تلاهولیپن سیمه کې له لیک شوي پایپ نه تېل وړل.

د چاودنې د علت په اړه څېړنې روانې دي.

اسرائیل وايي، په سوریه کې یې د ایران پر قدس ځواکونو برید کړی

د اسرائیل بیرغ

اسرائیل وايي، په سوریه کې یې د ایران پر قدس ځواکونو هوايي برید کړی دی.

د اسرائیل پوځ نن دوشنبه سهار وختي په یوه بیان کې تأیید کړه چې په سوریه کې یې د ایراني پوځیانو اهداف ویشتي.

اسرائیلو تر دې څو ساعته مخکې هم دمشق نړیوال هوايي ډګر ته نږدې هوايي بریدونه کړي وو.

اسرائیل همداراز سوريايي ځواکونو ته ګواښ کړی چې د اسرائیل د خاورې یا پوځ پر ضد دې له غچ اخیستونکو اقداماتو ډډه وکړي.

هم اسرائیل او هم سوریې په یو بل د متقابلو هوايي او راکټي بریدونو خبرداری ورکړی و.

له دې راپورونو سره په یوه وخت د سوریې د بشري حقونو د څار سازمان رئیس رامي عبدالرحمن ویلي چې د دمشق په جنوب کې په هدف ګرځېدلې سیمه کې د ایراني ځواکونو او د لبنان د حزب‌الله ډلې د وسلو ډیپوګانې وې.

ایراني چارواکو تر اوسه د اسرائیلي پوځ د بیان او د تازه بریدونو د خبر په اړه غبرګون نه‌دی ښودلی.

لبنان: د سوریې د کډوالو د بېرته ستنولو هڅې دې ګړندۍ شي

ارشیف، د لبنان ولسمشر میشل عون

لبنان له نړیوالو قدرتونو غوښتي چې د سوریې د بحران د سیاسي حل په نظر کې نیولو پرته دې د سوریې د کډوالو د بېرته ستنولو هڅې ګړندۍ کړي.

بېروت دغه‌راز د یوه عربي بانک د جوړېدو وړاندیز وکړ چې د سوریې او یمن په څېر د جګړه ځپلو عربي هېوادونو د بیا رغونې چارې تمویل کړي.

د لبنان ولسمشر میشل عون تېره ورځ د عرب د اقتصادي او پراختیایي څلورمې کلنۍ غونډې د پرانیستلو پر مهال دا غوښتنه وکړه.

میشل عون وویل، لبنان له نړیوالې ټولنې غواړي چې له هر ممکن اقدامه په استفادې د سوریې د کډوالو د خوندي بېرته ستنېدو لپاره زمینه برابره کړي.

اوس‌مهال ۵،۶ میلیونه سوریایي وګړي د سیمې په هېوادونو کې د کډوالۍ ژوند تېروي چې په‌دې کې لبنان د ۱،۵ میلیونه سوریایي کډوالو کوربه دی.

ډېری دغه کډوال په سخت حالت کې ژوند کوي او د لبنان لپاره‌یې چې په‌خپله له وړاندې له اقتصادي کړاوونو سره مخامخ دی، ستونزې نورې هم ډېرې کړې دي.

د سوریې په پلازمېنه دمشق کې تېره ورځ یوه سخته چاودنه وشوه

د سوریې بیرغ

د سوریې په پلازمېنه دمشق کې تېره ورځ یوه سخته چاودنه وشوه چې په خپل ډول کې نادره برید بلل شوی دی.

د سوریې د بشري حقونو د څار ادارې چې مرکز یې په لندن کې دی راپور ورکړ چې د دمشق جنوب کې یوه پوځي استخباراتي دفتر ته څېرمه یوه لویه چاودنه وشوه چې څو تنو ته په‌کې مرګ ژوبله واوښته.

دغه اداره وایي، په چاودنې پسې د ډزو غږونه هم واورېدل شول.

د سوریې دولتي خبري اژانس سانا بیا تېره ورځ ناوخته راپور ورکړ چې یوې لویې چاودنې د دمشق جنوب ولړزاوه چې مرګ ژوبله‌یې نه‌درلوده.

راپور وایي، د پېښې په تړاو یو ترورېست ونیول شو.

دا پېښه داسې مهال شوې چې په یوه بل شمالي ښار عفرین کې یوې حملې درې تنه ووژل او ۹ تنه‌یې ټپیان کړل.

تر اوسه د دواړو چاودنو مسؤلیت چا نه‌دی منلی.

د یونان په مرکز اتن کې مظاهرې په تاوتریخوالي واوښتې

په یونان کې مظاهرې

د لسګونه زره کسانو هغه مظاهرې چې په اتن کې د یونان پارلمان ته نږدې پیل شوې وې، په تاوتریخوالي واوښتې.

دا مظاهرې پرون د یونان د حکومت د هغه توافق په اعتراض پیل شوي دي چې د خپل ګاونډي مقدونیې سره‌یې د مقدونیې د نوم د بدلون په اړه کړی دی.

اعتراض کوونکو د بلوا ضد پولیس په ډبرو ویشتل.

پولیسو هم چې پارلمان ته‌یې د هغوی د ننوتلو مخه نیوله له اوښکې بهوونکي ګازه کار واخیست.

په‌دې مظاهرو کې نهه پولیس افسران ټپیان شول.

د یونان د صدراعظم الیکس سیپراس حکومت د مقدونیې له صدراعظم زوران زایف سره د تېر کال په جون میاشت کې موافقه وکړه چې د مقدونیې نوم په شمالي مقدونیه بدل شي او اتن به په بدل کې په اروپایي اتحادیه کې د مقدونیې د شاملېدو له مخالفته لاس واخلي.

د دغو دوو هېوادونو د نوم پر سر دعوا له‌دې کبله ده چې د یونان یوه سیمه چې له مقدونیې سره پر پوله موقعیت لري هم مقدونیه نومېږي.

په راتلونکي کې د احتمالي سرحدي سوء تفاهم د مخنیوي لپاره دواړو هېوادونو پرېکړه وکړه چې د مقدونیې نوم په شمالي مقدونیې بدل شي.

په مالي کې د ملګرو ملتونو د سوله ساتو ځواکونو ۸ سرتېري وژل شوي

د مالي په شمال کې د ملګرو ملتونو پر سوله ساتو ځواکونو په حمله کې لږترلږه اته سوله ساتي سرتېري وژل شوي او نولس نور ټپیان دي.

لوېدیځو خبري اژانسونو په سیمه کې د ملګرو ملتونو د سوله ساتي ماموریت د سرچینو په حواله ویلي چې وژل شوي (ن د چاد) سرتېري وو چې په دې ماموریت کې یې خدمت کاوه.

دغه پېښه نن د مالي په شمال ۲۰۰ کیلومټرۍ کې الجزایر پولې ته نږدې د کیدال سیمه کې شوې.

د ملګرو ملتونو د ماموریت یوه چارواکي اسوشېټېډ پرېس ته ویلي چې دغه حمله هغو سخت دریځو وسله والو کړې چې له القاعده سره اړیکې لري.

وروسته له هغې چې اسلامي ملېشو د مالي شمالي برخه په ۲۰۱۲ کې ونیوه او په ۲۰۱۳ کې فرانسوي ځواکونو بېرته له سیمې په شا کړل، ملګرو ملتونو له ۱۳ زرو زیات سوله ساتي سرتېري په سیمه کې ځای پرځای کړي دي.

سوریې د دمشق پر هوایي ډګر د اسرائیل د هوایي بریدونو مخه نیولې

د سوریې ملي بیرغ

سوریه وايي چې د پلازمېنې دمشق پر هوایي ډګر یې د اسرائیل د هوایي بریدونو مخه یې نیولې ده.

د سوریې د دولتي ټلویزیون د خبرله مخې، د سوریې د هوایي مدافعې ځواکونو مخکې له دې چې د اسرائیل له خوا توغول شوي پنځه توغندي د دمشق په نړیوال ډګر کې پر هدف ولګېږي، هغه یې رانسکور کړل.

د خبر له مخې، شپږم توغندی هم پر یوې کروندې را پریوتی دی.

د اسوشېټېډ پرېس اژانس د راپور له مخې، په دې وروستیو کې د اسرائیل جنګي الوتکې د سوریې دننه د حملو لپاره د لبنان له هوایي قلمروه استفاده کړې ده.

د اسرائیل صدراعظم بنيامین نتانیاهو په دې وروستیو کې په ښکاره وویل چې اسرائیل په سوریه کې په سلګونو هغه ځایونه ویشتي چې ایران او د لبنان حزب الله ډلې ورڅخه کار اخیست.

د دمشق پر هوایي ډګر د وروستي برید په اړه اسرائیل تراوسه څه نه دي ویلي.

په مکسیکو کې د تېلو په یوه پایپلاین کې چاودنې ۷۳ تنه وژلي

دود ناشی از انفجار در یک پایپ لاین گاز در مکسیکو

په مکسیکو کې د تېلو په یوه پایپلاین کې د چاودنې له کبله د مړو شمېر ۷۳ تنو ته ورسېد.

په دې چاودنه کې چې پرون د مکسیکو سیټي په شمال ۸۵ کیلومټرۍ کې د هیدالګو په ایالت کې شوې، ۷۴ تنه نور ټپیان دي.

د دې ایالت ګورنر عمر فیاض پرون ناوخته په یوه خبري کنفرانس کې وویل چې د پېښې له ځایه د پنځو تنو مړي موندل شوي دي.

ویل کېږي چې غلو له دغه پایپلاینه تېل لیک کړي وو چې وروسته د ماشومانو په ګډون سلګونو کسانو هڅه کوله چې په ګیلنو کې تېل راټول کړي چې د کوم شي له امله تېل اور اخلي او لمبې یې هرې خواته خپرېږي.

د مکسیکو لوی څارنوال وویل، په دې اړه څېړنه کوي چې ایا د خلکو له خوا چې پر دغه پایپلاین راټول شوي وو، د برښنا د شارټۍ له امله دغه چاودنه شوې ده؟

هغه وویل، تراوسه د دې پېښې په تړاو څوک نه دي نیول شوي.

په مسکو او یو شمېر نورو ښارونو کې خلکو مظاهرې وکړې

آرشیف

په مسکو او یو شمېر نورو ښارونو کې جاپان ته د کوریل د ټاپوګانو د احتمالي سپارلو په وړاندې خلکو مظاهرې وکړې.

د ګوندونو د یوه ائتلاف او ملتپالو ډلو له خوا نننیو مظاهرو ته رسمي اجازه ورکړل شوې وه.

د لېرې ختیځې روسیې په خبروفسک ښار کې شااوخوا پنځه سوه کسان په دې مظاهره کې راټول شوي وو.

مظاهره کوونکو شعارونه وکول چې کوریل زموږ دی او مړ دې وي د پوتین حکومت.

پرون هم د روسیې د لېرې ختیځ د یوژنو ساخالین په ښار کې هم شااوخوا ۳۰۰ کسانو په مظاهرې کې ګډون کړی و.

دغه لانجمن ټاپوګان چې روسیه او جاپان دواړه یې د ملکیت ادعاوې کوي، د دوهمې نړیوالې جګړې په پای کې پخواني شوروي اتحادې لاندې کړي دي.

د دغې لانجې د هواري لپاره مسکو او توکیو په دې وروستیو کې خبرې تېزې کړي دي.

د سوریې په پلازمېنې دمشق کې د ګڼې ګوڼې په وخت چاودنه وشوه

د سوریې ملي بیرغ

د سوریې دولتي ټلویزیون وايي چې نن د دغه هېواد په پلازمېنه دمشق کې د ګڼې ګوڼې په وخت چاودنه وشوه.

تراوسه پورې د دې چاودنې په اړه چې د دمشق د جنوب په قزاز سیمه کې وشوه، د مرګ ژوبلو جزیات نه دي څرګند.

دولتي ټلویزیون دا چاودنه ترورېستي حمله بللې ده.

د پېښې ځای امنیتي ځواکونو محاصره کړی دی.

د امریکا یوه جنګي بېړي د تور سمندرګي په لور روانه ده

د امریکا سمندري ځواک وايي، د دغه هېواد جنګي بېړۍ (یو. اېس. اېس ډانلډ کوک) په اوبو کې د امنیتي عملیاتو او په تور سمندرګي کې د ناټو له نورو متحدانو سره د دې سیمې د ثبات د ډېرولو لپاره د تور سمندرګي لور ته روانه ده.

د امریکا سمندري ځواک په یوه خبرپاڼه کې ویلي، دا بېړۍ چې تور سمندرګي ته روانه ده، پرون شنبه د ترکیې له داردانیل تنګي تېره شوه.

په خبرپاڼه کې ویل شوي چې د امریکا سمندري ځواک له نړیوال قانون او د مونټریکس له کنوانسیون سره سم په تور سمندرګي کې عملیات کوي.

په خبرپاڼه کې نه دي ویل شوي چې (یو. اېس. اېس ډانلډ کوک) بېړۍ به کله تور سمندرګي ته ورسېږي.

بلغاریا ۲ تنه له ترورېستي ډلو سره د مرستې په تور تورن کړي

د بلغاریا ملي بیرغ

د بلغاریا حکومت د سوریې یو وګړی او یوه بلغارۍ ښځه په دې تورن کړي چې په منځني ختیځ کې یې ترورېستي ډلو ته پیسې برابرولې.

د بلغاریا د لویې څارنوالۍ یوې ویاندې رومیانیا ارنودوفا پرون شنبه وویل، دغو دوو تنو په تېرو ۴ کلونو کې له ترورېستي ډلو سره د ۲۵ ميلیونو یورو چې ۲۹ ميلیون ډالره کېږي، مالي مرسته کړې ده.

د راپورونو له مخې، د دې شبکې له لوري ترورېستي ډلو ته د پیسو لېږد له ۲۰۱۶ کال راهیسې پیل شوی و.

د بلغاریا امنیتي ځواکونو د جمعې په ورځ په دې تړاو ۳ تنه ونیول.

دا کسان همداراز د لسګونو موټرو په رانیولو او له بلغاریا څخه د ترکیې له لارې سوریې ته د هغو پر استولو هم تورن شوي دي.

امریکایي ځواکونو په سومالیا د الشباب ډلې ۵۲ غړي وژلي

د سومالیا ملي بیرغ

د امریکا هوايي ځواکونو په سومالیا کې د الشباب ترهګرې ډلې ۵۲ غړي په یوه هوايي برید کې وژلي دي.

په افریقا کې د امریکا پوځي قوماندانۍ په یوه بیان کې ویلي چې دا برید یې په سومالیايي پوځيانو د الشباب ډلې د یوې لویې حملې په غچ کې کړی دی.

تر هواِيي برید وروسته په اخیستل شویو عکسونو کې ښکاري چې یوه لویه لارۍ سوځېدلې او د ګڼو کسانو مړي یې شااوخوا پراته دي.

د الشباب لسګونه غړي داسې وخت د امریکا په هوايي برید کې ووژل شول چې دې ډلې څلور ورځې مخکې د کینیا په پلازمېنې نایروبي کې په یوه هوټل کې ۲۱ کسان په ډزو ووژل.

الشباب ډله چې له القاعده سره اړیکې لري، په یو شمېر افریقايي هېوادونو کې د ترهګریزو فعالیتونو مسؤله بلل کېږي.

نور راوښيه

XS
SM
MD
LG