د لاسرسۍ وړ لېنکونه

تازه خبر
چهارشنبه ۲ سلواغه ۱۳۹۸ کابل ۰۵:۴۷

نړۍ

په پاریس کې په یوه نانوايي کې چاودنې دوه تنه اور وژونکي وژلي

د پاریس په مرکزي سیمه په یوه نانوايي کې چاودنې لږترلږه دوه تنه اور وژونکي وژلي دي.

چارواکي وايي، دوی باور لري چې د شنبې د ورځې دا چاودنه د سون د ګازو له کبله رامنځته شوې ده.

په پېښه کې ۴۷ کسان ټپیان شوي هم دي چې د لسو تنو روغتیايي وضعيت ښه نه دی.

یو عیني شاهد د اسوشېټېډ پرېس خبري اژانس ته ویلي، اور وژونکي تر چاودنې تقریباً یو ساعت مخکې دې نانوايي ته ننوتي وو.

د فرانسې د کورنیو چارو وزیر کریسټوف کاستانر خبریالانو ته ویلي، شااوخوا دوه سوه اور وژونکي یې سیمې ته استولي، څو لګېدلی اور ووژني او د شااوخوا ودانیو څخه خلک وباسي.

په پاریس کې د پرله پسې نهمې شنبې لپاره د زېړ واسکټو په نوم د معترضانو د اعتراضونو تمه کېږي او په همدې خاطر په دې ښار کې جدي امنیتي تدابیر نیول شوي دي.

د پاریس د ښار د مرکز ډېرې برخې د بلوا ضد پولیسو له خوا تړل شوي دي.

دا اعتراضونه په لومړي سر کې د سون پر موادو د مالیې د لوړولو په وړاندې راپورته شول، خو وروسته چې فرانسوي ولسمشر ایمانوئل مکرون له خپلې پرېکړې بېرته په شا شو، معترضینو خپلې غوښتنې زیاتې کړې او اوس د ولسمشر د استعفا سربېره د تنخواګانو د لوړولو او نورو مالیو د کمولو غوښتنه کوي.

په اوکراین کې د اروپا د امنیت او همکارۍ سازمان یوه الوتکه غورځول شوې

د اوکراین په ختیځ کې د اروپا د امنیت او همکارۍ د سازمان د څارونکو یوه ډرون الوتکه د حکومت تر کنټرول لاندې د لوهانسک اوبلاسټ د سیمې په یو کلي کې په ډزو غورځول شوې ده.

په اوکراین کې د اروپا د امنیت او همکارۍ د سازمان د څارنې ماموریت په یو راپور کې ویلي چې پېښه د جمعې په ورځ شوې ده.

دا بې پیلوټه الوتکه د واورې د پاکولو د عملیاتو د څارنې لپاره کارېدله چې د سپکې وسلې ډزې پرې شوې دي.

اټکل کېږي چې پر دې ډرون له ختیځې خوا له تقریباً دوه کیلومټره واټن ډزې شوي دي.

د اوکراین په ختیځ کې د څارنې دې ځانګړي ماموریت په ورستیو میاشتو کې د څار څو بې پیلوټه الوتکې له لاسه ورکړي دي.

د ۲۰۱۸ م کال په نومبر میاشت کې د دې ماموریت یوه بې پیلوټه الوتکه له روسیې سره د اوکراین پر پوله وغورځول شوه او د جنورۍ په دوهمه نېټه یې یوه بله ډرون الوتکه د لوهانسک په سیمه کې نسکوره کړی شوه.

ملګري ملتونه وايي، د اکراین په ختیځ کې د ۲۰۱۴ میلادي کال د اپرېل راهيسې د حکومت او روس پلوو بېلتون غوښتونکو ترمنځ په جګړو کې تر لسو زرو زیات کسان وژل شوي دي.

د امریکا په مشرۍ ائتلاف له سوریې د پوځیانو ایستل پیل کړي

ارشیف: په سوریه کې امریکایي ځواکونه

د امریکا د متحدو ایالتونو د پوځ یوه ویاند وویل چې د امریکا په مشرۍ ائتلاف له سوریې د خپلو پوځیانو د ایستلو پروسه پیل کړې ده.

شان راین پرون په یوې اعلامیې کې دا هم څرګنده کړه چې له سوریې څخه موږ په خپله خوښه وځو، خو نوموړي په دې برخه کې نور جزیات نه دي ورکړي.

د سوریې د بشري حقونو د څار ډلې ویلي دي چې د امریکا په مشرۍ ائتلاف د سوریې په حسکه ولایت کې له یوې اډې د پوځیانو د ایستلو بهیر پیل کړی دی.

اسوشېټېډ پرېس اژانس بیا د دفاعي چارو د مسؤلانو په وینا خبر ورکړی دی چې د امریکا پوځ له سوریې د خپلو تجهیزاتو ایستل شروع کړي دي او تر اوسه یې کوم سرتېری له دې هېواده نه دی بهر کړی.

چارواکو ویلي دي چې په راتلونکو اوونیو کې به امریکا له سوریې خپل دوه زره سرتېري وباسي.

د امریکا د فډرالي ادارو د یوې برخې د تړل کېدو نن ۲۱مه ورځ ده

د امریکا د حکومت د د فډرالي ادارو د یوې برخې د تړلو نن ۲۱مه ورځ ده.

دا د امریکا په تاریخ کې د فډرالي ادارو تر ټولو اوږده رخصتي ده.

د دې ستونزې د پای ته رسولو لپاره تر اوسه د کانګرس د ډموکراټو غړو او سپېنې ماڼۍ خبرو اترو کومه نتیجه نه ده ورکړې.

د امریکا یو شمېر فډرالي ادارې د ډېسمبر د ۲۲ مې نېټې راهېسې وروسته له هغې وتړل شوې چې د امریکا د کانګرس ډموکراټو غړو د یو دېوال د جوړولو لپاره د ولسمشر ټرمپ له خوا غوښتل شوې بودجه رد کړه.

د امریکا ولسمشر ډنالد ټرمپ له مکسیکو سره پر پوله د دېوال جوړول د ملي امنیت سره یوه تړلې مسئله بولي، خو د امریکا ډموکراټان بیا دا چاره یو بېځایه لګښت بولي.

د کاناډا صدراعظم د یوې عربستانۍ پېغلې د پناه غوښتنه ومنله

ارشیف، عربستانۍ پېغله رهف محمد ال کنون

د کاناډا صدراعظم جسټن تروډو د یوې عربستانۍ پېغلې د پناه غوښتنه ومنله.

رهف محمد ال کنون ادعا کړې چې کورنۍ یې ورسره بد چلند کړی او دا اړه شوې چې له سعودي عربستانه وتښتي.

د کاناډا صدراعظم جسټن تروډو وویل، کاناډا واضح کړې چې د بشري حقونو او د ښځو د حقونو لپاره درېدلي یوو.ده وویل:

"د کډوالو په چارو کې د ملګرو ملتونو عالي ادارې له موږ وغوښتل چې رهف ال کنون د کډوالې په توګه ومنو، موږ د ملګرو ملتونو دا غوښتنه ومنله او هغې ته مو پناه منظوره کړه."

رهف د ټایلنډ د بنکاک ښار له هوايي ډګره په ټولنیزو شبکو کې خپلې ویډیوګانې خپرې کړې او د مرستې غوښتنه یې کوله.

رهف ته داسې وخت د کاناډا پناه منظوره شوه چې د رد مرز له خطر سره مخ وه.

د ټایلنډ د کډوالو د ادارې یوه مسؤل وویل چې اتلس کلنه رهف ال کنون په یوه پرواز کې کاناډا ته لېږل کېږي.

د مقدونیا پارلمان په اساسي قانون کې د تعدیل لپاره مثبته رأیه ورکړه

د مقدونیا پارلمان په اساسي قانون کې د تعدیل لپاره مثبته رأیه ورکړه چې له مخې به یې د دغه هېواد نوم د شمالي مقدونیې په جمهوریت بدل شي.

د پارلمان په پرونۍ رأیګیرۍ کې له ۱۲۰ کسانو اتیاوو د دغه بدلون لپاره مثبته رأیه ورکړه.

ځیني مخالف استازي له جرګې ووتل، د مقدونیا په پارلمان کې دا رأیګیري د مقدونیا د صدراعظم او د مخالفینو د استازو تر درې ورځنیو خبرو وروسته وشوه.

د مقدونیا د نوم بدلون به مرسته وکړي چې له یونان سره د دغه هېواد د یوې لسیزې ستونزې هوارې شي او د اروپايي ټولنې او ناټو سازمان په غړیتوب اخیستلو کې به هم دغه هېواد ته زمینه برابره شي.

په میانمار کې محکمې د روېټرز د ۲ خبریالانو د استيناف غوښتنه رد کړې

ارشیف، د روېټرز اژانس خبریالان ۳۲ کلن وا لون او ۲۸ کلن کیاو سیو وو 

په میانمار کې یوې محکمې د روېټرز د خبري اژانس د هغو دوو خبریالانو د استيناف غوښتنه رد کړې چې د امنیتي عملیاتو په اړه پټو اسنادو ته د لاسرسي په تور په اووه کاله بند محکوم شوي دي.

د میانمار د ینګان د سیمه يیزې محکمې قاضي اونګ نیانګ نن رسنیو وویل:

"هغه پرېکړه چې لومړنۍ محکمې کړې، د قانون له مخې ناسمه نه ده، نننۍ محکمې پرېکړه وکړه چې د استيناف دا غوښتنه رد کړي."

۳۲ کلن وا لون او ۲۸ کلن کیاو سیو وو د ۲۰۱۷ میلادي کال د ډېسمبر په میاشت کې نیول شوي وو او په تېر سپټمبر کې دواړه په هغو تورونو چې ګوندې د دولت رازونه یې رسوا کړي، په اووه کاله بند محکوم شول.

دې دواړو خبریالانو په میانمار کې د روهنګیا مسلمان اقلیت په وړاندې د دې هېواد د امنیتي ځواکونو د ځپونکو عملیاتو په اړه راپورونه چمتو کول چې د میانمار پر حکومت یې د ډیپلوماټانو او د بشري حقونو د فعالانو انتقادونه راپورته کړل.

د میانمار د راخین په ایالت کې د دې هېواد د پوځ او امنیتې ادارو له دې عملیاتو څخه تر ۷۰۰ زرو زیات روهنګیان ګاونډي بنګله دېش ته وتښتېدل او زرګونه ووژل شول.

د روېټرز خبري اژانس مشر اېډېټر سټفین جي اډلر په یو بیان کې ویلي:

"د نن ورځې پرېکړه د وا لون او کیاو سیو وو په حق کې بله بې عدالتي وه، دوی یوازې په یو سبب د زندان د میلو تر شا دي او هغه دا دی چې د دې هېواد واکمن غواړي رښتیا ویوونکي خاموشه کړي."

ډونالد ټرمپ وايي، تيار دى چې ملي بېړنى حالت اعلان کړي

د امريکا د متحدو ايالتونو ولسمشر ډونالد ټرمپ

د امريکا د متحدو ايالتونو ولسمشر ډونالد ټرمپ وايي، تيار دى چې ملي بېړنى حالت اعلان کړي.

دا په داسې حال کې ده چې ښاغلي ټرمپ د امريکا او مکسيکو پر پوله د دېوال جوړولو لپاره پر خپل استدلال د ټينګار په هدف، دغې سرحدې سيمې ته سفر وکړ.

ولسمشر ټرمپ پرون سرحدي ښارګوټي مک الن ته په داسې حال کې لاړ چې د فډرال حکومت د ځينو برخو د تړل کېدو شل ورځې پوره شوې.

د دغو ادارو تړل کېدل د دې سبب شول چې اته لکه دولتي کارکوونکي يا له معاش پرته کار ته ادامه ورکړي، يا بې معاشه رخصت شي.

ډونالد ټرمپ او په کانګرس کې ډموکراتان په خپلو کې په جنجال کې دي.

ټرمپ له کانګرسه د سرحدي دېوال جوړولو لپاره نېږدې ٦ ميليارده ډالر غواړي او دا ملي امنيت يوه مسئله ګڼي، خو ډموکراتان يې دا غوښتنه ردوي او وايي چې دا يو بې ګټې کار دى.

روحاني: ایران د ځمکې په مدار کې ٢ سپوږمکۍ ځاى پر ځاى کوي

ارشیف، د ايران ولسمشر حسن روحاني

د ايران ولسمشر وايي، هېواد به يې ډېر ژر له هغو توغنديو په استفادې چې په دغه هېواد کې جوړ شوي، د ځمکې په مدار کې ٢ سپوږمکۍ يا سټلايټونه ځاى پر ځاى کړي.

حسن روحاني ويلي، تهران به د امريکا له هغو اندېښنو سره سره چې ويلي يې دي، دا کار به د ايران د بالسټيک ميزايلو له پرمختيا سره نوره مرسته هم وکړي، دا اقدام کوي.

د ايران د دولتي ټلويزيون په حواله، حسن روحاني پرون وويل:

"په راتلونکو اوونيو کې به له هغو راکټونو په استفادې چې په ايران کې جوړ شوي، دوه سپوږمکۍ مدار ته ولېږو."

ښاغلي روحاني د دغو توغنديو او سپوږمکيو په اړه نور جزيات ورنه کړل.

څو ورځې مخکې د امريکا د بهرنيو چارو وزير مايک پامپيو خبردارى ورکړى و چې ايران دې د درېيو راکټونو د توغولو ”لمسوونکي“ پلانونه نه عملي کوي.

پامپيو دا فضا ته توغول کېدونکي وسايط بللي وو او ادعا يې کړې وه چې دغه وسايط د اټمي سروکو لېږدوونکو بالسټيک ميزايلو ته ورته دي چې توغول به يې د ملګرو ملتونو له پرېکړه ليکه سرغړونه وي.

امریکا له سوریې د ایراني ځواکونو د ایستلو لپاره هڅو ته دوام ورکوي

د امریکا د بهرنیو چارو وزیر مایک پامپیو

د امریکا د بهرنیو چارو وزیر ټینګار کوي چې له سوریې خپل پوځیان باسي، خو له دې هېواده د ایراني ځواکونو د ایستلو لپاره هڅو ته دوام ورکوي.

مایک پامپیو چې پرون پنجشنبه د قاهرې په امریکايي پوهنتون کې یې خبرې کولې، وویل:

"امریکا به له سوریې څخه د وروستني ایراني سرتېري د ایستلو لپاره له ډیپلوماسۍ او له خپلو شریکانو سره له همکارۍ کار واخلي، امریکا همداراز هڅه کوي چې د ملګروملتو په مشرۍ د یوې پروسې له لارې د سوریې خلکو ته چې له ډېره وخته کړېږي، سوله او ارامښت راوړي."

د امریکا د بهرنیو چارو وزیر زیاته کړه، ترڅو چې ایراني پوځیان او نیابتي ځواکونه له سوریې ونه وځي او د یوه سیاسي حل خوا ته یې کلک ګامونه نه وي اخیستل شوي، واشنګټن به د بشار د رژیم تر کنټرول لاندې سیمو په بیارغونه کې ونډه وانه خلي.

د مقدونیا د نوم پر سر د دغه هېواد د پارلمان بحث تر نن جمعې ځنډېدلی

د مقدونیا د نوم د بدلون پر سر د دغه هېواد د پارلمان بحث تر نن جمعې پورې ځنډېدلی.

د دغه هېواد صدراعظم زوران زایف پرون ظاهراً بریالی نه شو چې د نوم د بدلون لپاره د پارلمان اکثریت ترلاسه کړي.

د مقدونیا پارلمان له ګاونډي یونان سره د څو لسیزو لانجې د پای ته رسولو او په ناټو او اروپايي اتحادیې کې د غړیتوب د ترلاسه کولو په هدف پرون پنجشنبه پر شمالي مقدونیا د خپل هېواد د نوم د بدلېدو لپاره بحث پیل کړ.

د مقدونیا له اساسي قانون سره سم، پر شمالي مقدونیا د دې هېواد د نوم د بدلېدو لپاره د پارلمان په درېیو کې د دوو برخو ملاتړ پکار دی.

اروپايي ټولنه: روسیه دې په کریمیا کې نیول شوي اوکراینيان خوشې کړي

اروپايي اتحادیې له روسیې وغوښتل په خپله خاوره او غصب شوې کریمیا کې هغه ټول اوکراینیان خوشې کړي چې په غیر قانوني ډول یې نیولي دي.

د اروپايي اتحادیې د بهرنۍ پالېسۍ د مشرې فيدریکا موګريني ویاندې پرون پنجشنبه په یوه بیان کې د مثال په توکه د ۲۰ کلن اوکرایني پافلو هریب او یوه تاتار فعال ایدم بیکیروف یادونه کړې چې لومړنی د ترورېزم په تور نیول شوی او دوهم تېره میاشت کریمیا ته له ننوتو سره سم ونیول شو.

ویاندې ویلي، اروپايي اتحادیه هیله لري چې دا کسان به ژر تر ژره خوشې او ځانګړي طبي خدمات به ورته برابر کړای شي.

د امریکا د متحده ایالاتو د بهرنیو چارو وزیر قاهرې ته ورسېد

مایک پامپیو د مصر د ولسمشر عبدالفتاح السیسي سره

د امریکا د متحده ایالاتو د بهرنیو چارو وزیر مایک پامپیو نن د مصر پلازمېنې قاهرې ته ورسېد.

پامپیو نن د منځني ختيځ نهو هېوادونو ته په رسمي سفر وتلی دی.

هغه به هڅه وکړي چې په منځني ختیځ کې د امریکا شریکانو ته ډاډ ورکړي.

له کله راهیسې چې له سوریې د امریکايي ځواکونو د وتلو خبره شوې، په منځني ختيځ کې یو شمېر هېوادونه شدیده اندېښنه لري.

د امریکا د بهرنیو چارو وزیر به نن په قاهره کې د مصر د ولسمشر عبدالفتاح السیسي او د بهرنیو چارو د وزیر، سامح شکري سره پر سیمه‌ییز امنیت او د اقتصادي همکاريو پر پراختیا وغږېږي.

پامپیو مصر ته تر تګ مخکې، عراق او اردن ته تللی و او تر قاهرې وروسته به د خلیج عربي هېوادونو ته روان شي.

اوغلو: که شرایط سم وو، له امریکا به د پاټريوټ مزائیلو سیستم واخلو

ارشیف، د ترکیې د بهرنیو چارو وزیر مولود چاووش‌اوغلو

د ترکیې د بهرنیو چارو وزیر مولود چاووش‌اوغلو وايي چې که شرایط سم وو، له امریکا به د پاټريوټ مزائیلو سیستم واخلي.

خو که واشنګټن پر انقره فشار راولي چې له روسیې سره قرارداد لغوه کړي، دا معامله امکان نه‌لري.

ترکیې له روسیې د «S-400» مزائیلو د اخیستلو موافقه کړې ده.

د مزائیلو دا سیستم د الوتکو ضد دی.

مولود چاووش‌اوغلو نن د جنوري ۱۰مه، د ترکیې «NTV» ته په مرکه کې وویل چې حکومت‌يې د واشنګټن له لوري د شرایطو تحمیل نه‌شي زغملی.

ترکیه د ناټو غړې ده.

چاووش‌اوغلو همداراز وویل چې د سوریې په شمال کې د کُرد ملېشه ځواکونو پر ضد د عملیاتو پلان نه‌بدلوي او له سوریې د امریکايي ځواکونو په وتلو پورې تړاو نه ورکوي.

د چاووش‌اوغلو دا وینا د واشنګټن او انقرې د اړیکو د خرابوالي بله نښه ده.

امریکا د سوریې په شمال کې د کُرد ملېشه قواوو ملاتړ کوي.

چاووش‌اوغلو په نننۍ مرکه کې ویلي، دا توقع به واقعبینانه نه‌وي چې امریکا هغه وسلې چې په سوریه کې یې د کُردانو وسله‌والو ته ورکړي، بېرته ټولې کړي.

انقره هغو کُردانو ته چې د سوریې په شمال کې د بشارالاسد پر ضد جنګېږي، ترورېستان وايي.

روسیې او جرمني په سوریه کې د سولې په اړه یوه موافقه وکړه

ارشیف، د روسیې ولسمشر ولادیمیر پوتین او د جرمني صدراعظمه انګلا مېرکل

د روسیې ولسمشر ولادیمیر پوتین او د جرمني صدراعظمې انګلا مېرکل په ټیلیفوني خبرو کې په سوریه کې د سولې لپاره د هڅو د همغږي کولو په اړه موافقه وکړه.

کرملېن وویل، دواړو مشرانو څرګنده کړه چې په اوږدمهال کې د سوریې د بحران د هواري لپاره دې له ملګرو ملتونو سره په نږدې همغږۍ سیاسي پروسې ته پراختیا ورکړل شي.

مېرکل او پوتین دغه‌راز د سوریې د نوي اساسي قانون د تدوین لپاره د یوې کمېټې پر جوړولو هم بحث وکړ.

دواړه مشران د سوریې په اړه وروسته له هغې خبرې کوي چې له دې هېواده د امریکایي ځواکونو د وتلو پلان یو ابهام رامنځته کړی دی.

د امریکا ولسمشر ډونالد ټرمپ د ډسمبر په ۱۹مه اعلان وکړ چې داعش په سوریه کې ځپل شوی او ټول امریکایي سرتېري بېرته خپل هېواد ته ستوني، خو د هغه د ملي امنیت سلاکار جان بولتون د جنورۍ په ۶مه وویل چې له سوریې د امریکایي ځواکونو د وتلو پرېکړه په‌دې پورې تړلې چې ترکیه د دې ډاډ ورکړي چې په سوریه کې به پر هغو کُرد ملېشو چې امریکا یې ملاتړ وکړ، بریدونه نه‌کوي.

نور راوښيه

XS
SM
MD
LG