د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۷:۵۱

نړۍ

روسیې د اسرائیلو لخوا د خپلې یو الوتکې د ویشتلو ادعا بیا تکرار کړه

روسيې نن خپله هغه ادعا بيا تکرار کړه چې اسرائيل يې په کې د يوې روسۍ پوځي الوتکې د ويشتل کېدو علت بللى و.

روسيه وايي دغه الوتکه د اسرائيل د پوځ د ”ناسمو معلوماتو“ له کبله ويشتل شوې ده.

دغه پوځي الوتکه تېره دوشنبه د مديترانې سمندرګي په ختيځ کې وويشتل شوه چې په کې سپاره ١٥ روسي پوځيان ووژل شول.

د سوريې دولتي ځواکونو فکر کړى و چې دغه il-20 ډوله اکتشافي الوتکه د اسرائيل ده او د بمبارۍ په ماموريت يې الوتنه کړې، ځکه يې په لاذقيه ولايت کې وويشتله.

د روسيې د دفاع وزارت وايي د اسرائيل يوې الوتکې هڅه وکړه، له دې روسۍ الوتکې د سپر په توګه کار واخلي.

د روسيې د دفاع وزارت وياند دا د اسرائيل د پيلوټ لږ مسلکيتوب او يا هم ناغېړي وبلله.

تورن جنرال ايګور کوناشينکوف نن وويل، د اسرائيل هوايي ځواک د خپلو F-16 ډوله الوتکو د اهدافو په اړه د روسيې پوځ ته ناسم معلومات ورکړي وو.

پاپ په لتوانيا کې د ځورېدلو کسانو د درناوي مراتم پر ځاى کړل 

د نړۍ د کاتوليک عيسويانو مشر پاپ فرانسيس په لتوانيا کې د هغو کسانو د درناوي مراتم پر ځاى کړل چې د شوروي او نازيانو د اشغال په وخت کې يې کړاو ليدلى او په لتوانيا کې مړه شوي دي.

پاپ نن د بالتيک حوزې دغه هېواد ته د خپل سفر په دويمه ورځ په دې مناسبت مراسمو کې برخه واخيسته.

ده د هغو يهودانو د درناوي مراتب هم پرځاى کړل چې د نازيانو د درې کلن اشغال پر مهال مجازات شوي يا د ډله ييزو وژنو کمپونو ته لېږل شوي وو.

د لتوانيا د هغو خلکو لپاره يې هم د درناوي مراتب پر ځاى کړل چې د شوروي اتحاد د پنځوس کلن اشغال پر مهال له دغه هېواد څخه اخراج کړاى شول، د شاقه کارونو کمپونو ته لېږل شول يا هم په کورونو کې وځپل شول.

لتوانيا، لاتويا او ايستونيا د روسيې د لويې امپراطورۍ او بيا د لنډې مودې لپاره د شوروي برخه وو، خو دغو هېوادونو ١٠٠ کاله مخکې خپله خپلواکي اعلان کړه.

دغه کوچني هېوادونه په ١٩٤٠مېلادي کال کې د شوروي اتحاد له خوا اشغال شول، وروسته بيا د دويمې نړيوالې جګړې پر مهال د جرمني له خوا.

عمران خان د هند له خوا له اسلام اباد سره د خبرو لغوه کول غندلي

د پاکستان صدراعظم د هند له خوا له اسلام اباد سره د خبرو د لغوه کولو پرېکړه وغندله.

عمران خان پرون شنبه په ټوېټر کې لیکلي:

"د سولې د دیالوګ د بیا پیل لپاره زما غوښتنې ته د هند له خوا منفي او کبرجن ځواب مایوسوونکی دی."

ټاکل شوې وه چې د دواړو هېوادونو د بهرنیو چارو وزیران په نیویارک کې د ملګرو ملتونو د عمومي اسمبلۍ په څنډه کې له یو بل سره وویني.

عموماً د هند او پاکستان چارواکي دا ډول کتنې ډېرې نه کوي.

د هند د بهرنیو چارو وزارت د جمعې په ورځ وویل چې په کشمیر کې د هند پر ګټو د حملو په خاطر، له پاکستان سره خبرې د اوس وخت لپاره لغوه کوي.

په شمالي وزیرستان کې ۷ پاکستاني پوځیان وژل شوي

اووه پاکستاني پوځیان وروسته له دې ووژل شول چې دوی په شمالي وزیرستان کې د وسله والو سختدریځو پر یوه پټنځای برید وکړ.

د پاکستان پوځ وايي، په دې نښته کې ۹ تنه وسله وال سختدریځي هم وژل شوي دي.

د پاکستان پوځ ادعا کړې چې دا کسان د افغانستان له خاورې وزیرستان ته اوښتي وو.

پوځ دغه راز ویلي، د وژل شویو پاکستاني پوځیانو په منځ کې یو تورن هم شامل دی.

په ویکټوریا جهیل کې د ډوبې شوې بېړې د مړو شمېر ۲۰۹ ته لوړ شوی

د تنزانیا د ټرانسپورت وزیر پرون شنبه وویل چې په ویکټوریا جهیل کې د بېړې د ډوبېدو له امله د مړو شمېر ۲۰۹ ته لوړ شوی دی.

په سیمه کې د ژغورنې مامورین لا هم په کار لګیا دي.

د تنزانیا د ټرانسپورت وزیر اسحاق کموي ویلي چې د ژغورنې په عملیاتو کې ډېر جسدونه موندل شوي، خو یو تن ژوندی موندل شوی دی.

د ویکټوریا په نوم دا جهیل د تنزانیا، کینیا او یوګندا ترمنځ پروت دی.

د تېرې پنجشنبې په ورځ په ویکټوریا جهیل کې یوه بېړۍ چې د ۱۰۱ کسانو لپاره یې ځای درلود، له ډېرو خلکو ډکه شوې وه او ساحل ته نېږدې ډوبه شوه.

لا نه ده څرګنده شوې چې څومره کسان په دې بېړۍ کې سپاره وو.

د تنزانیا ولسمشر دا پېښه د خپل ولس لپاره ستره غميزه بللې او امر یې کړی چې هغه کسان چې دا بېړۍ یې په غیرمسؤلانه ډول له ډېرو خلکو ډکه کړې وه، وبه نیول شي او مجازات به شي.

کریسټین فورد: حاضره یم چې په سنا مجلس کې پر برت کوانا شاهدي ورکړم

برَت کوانا

د امریکايي رسنیو په حواله، د کرسټین بلاسي فورد په نوم یوې ښځې چې د امریکا د سترې محکمې د مشرتابه د ۹ کسیز پلاوي غړیتوب ته یې د ولسمشر ډونالد ټرمپ پر کاندید برت کوانا د جنسي تېري تور پورې کړی، موافقه کړې چې د سنا مجلس ته به د شاهدۍ لپاره ورشي.

کرسټین بلاسي فورد ادعا کړې چې برت کوانا تقریباً دوه لسیزې مخکې جنسي زیاتی ورسره کړی دی.

د فورد له ادعا سره سم، برت کوانا په ۱۵ او بیا ۱۷ کلنۍ کې تېری ورباندې کړی دی.

د امریکا د سنا د قضايي چارو د کمېټې مشر چک ګراسلي د سپتمبر په ۱۹مه مېرمن فورد ته په یوه لیک کې بلنه ورکړې وه چې د سپټمبر په ۲۴مه غونډې ته ورشي او مخامخ معلومات ورکړي.

برت کوانا پر ځان لګېدلي تورونه رد کړي دي.

کرسټین فورد تر دې مخکې د خپلو ادعاو په اړه د امریکا د استخباراتو د فدرالي ادارې (اف. بي. ای) له لوري د هر اړخیزو څېړنو غوښتنه کړې وه.

په ایران کې پر پوځي پرېد برید کې ۳تنه وژل شوي

په ایران کې پر یوه پوځي پریډ د برید په نتیجه کې لږ تر لږه درې تنه وژل شوي او ۲۰ تنه نور ټپیان دي.

د ایران دولتي رسنیو وویل چې وسله والو کسان نن د سپتمبر ۲۲ په اهواز ښار کې پر یوه پوځي پرېډ دزې وکړې.

اهواز د ایران د خوزستان ایالت مرکز دی.

د ایران دولتي ټلوېزیون وایي، په دې برید کې هغه ایراني چارواکي په نښه شوي و چې د همدې پریډ د لیدو لپاره راټول شوي و.

دغه مراسم د ایران او عراق ترمنځ د تېرې اته کلنې جګړې د کلیزې په مناسبت جوړ شوي وو.

د دې برید د تلفاتو په اړه ضد او نقیض راپورونه ورکول کېږي.

د ایران نیمه رسمي خبري آژانس ایرنا ویلي چې د دوو برید کوونکو په ګډون درې تنه وژل شوي دي.

تسنیم نیمه رسمي خبري آژانس بیا وایي، د ایران د اسلامي انقلاب د سپاه پاسدارانو لږ تر لږه اته تنه وژل شوي دي.

دغې رسنۍ وړاندي ویلي وو چې پدې برید کې یوه ښځه او یو ماشوم ټپي شوي دي.

تر اوسه د دې برید مسولیت چا نه دی منلی.

د ایران ولسمشر وايي له خپلو میزائلو به لاس وانه خلي

د ایران ولسمشر حسن روحاني ژمنه وکړه چې تهران به د امریکا د فشار سره سره له خپلو میزایلو لاس وانه خلي.

روحاني دا څرګندونې د ایران او عراق تر منځ د ۱۹۸۰ کال د جګړو د پیل په مناسبت جوړو شویو مراسمو کې وکړې.

د و لسمشر روحاني خبري د دولتي ټلوېزیون له لارې خپرې شوې، هغه وویل:

"ایران به نه له خپلو دفاعي وسلو لاس واخلي او نه به خپله دفاعي وړتیا راکمه کړي."

په دې کې هغه توغندي هم شامل دي چې امریکا یې په غوصه کړې ده.

د امریکا ولسمشر ډونالډ ټرمپ وړاندي له ایرانه غوښتي وو چې خپل توغندویې پروګرام وځنډوي.

ولسمشر ټرمپ په مې میاشت کې د ایران د اټمي تړونه د وتلو اعلان وکړ او ویې ویل چې دغه تړون نه دی توانېدلی د ایران د توغندویې پروګرام مخه ونیسي.

ایران داسي بالستیک توغندي لري چې کولی شي ۳۵۰۰ کېلومتره واټن ووهي او په منځني ختیځ کې د اسرائیل او امریکا مرکزونو ته ورسېږي.

د ایران ولسمشر نن وویل چې امریکا به د عراق په څیر له ایران سره مقابله وبایلې. دی وایي، ټرمپ به هم د صدرام حسین په برخلیک اخته شي.

جواد ظریف: د ولسمشر ټرمپ اداره د منځني ختیځ لپاره یو ګواښ دی

د ایران د بهرنیو چارو وزیر د امریکا ولسمشر ډانلډ ټرمپ اداره د منځني ختیځ او نړیوالې ټولنې لپاره یو ګواښ بللی دی.

محمد جواد ظریف پرون پر خپل ټویټر ولیکل چې د سیمې او د نړیوال امنیت او سولې لپاره ریښتینی ګواښ موجود دی او دا ګواښ د ډانلډ ټرمپ اداره ده چې د سیمې او نړۍ د بې ثباتۍ مسووله ده.

ظریف دا څرګندونې په ملګرو ملتونو کې د امریکا د سفیرې نیکې هیلي د وروستیو خبرو په عکس العمل کې کړي دي.

میرمن هیلي د پنجشنبه په ورځ فاکس نیوز ته وویل چې ولسمشر ډانلډ ټرمپ به راتلونکې اونۍ د امنیت د نړیوالې شورا مشري وکړي چې د ایران په اړه به په کې بحث کیږي.

نیکې هیلي ویلي دي چې ولسمشر ټرمپ ایران یو خطرناک هیواد ګڼي او په دې باور دی چې ځینې مسئلې شته چې نړیواله ټولنه باید ورته پاملرنه وکړي.

ولسمشر ټرمپ د روان کال په می میاشت له ایران سره د نړیوالو قوتونو د ۲۰۱۵ کال له اټومي موافقې ووت او یوه میاشت وړاندې يې پر تهران هغه بندیزونه بیا بر حاله کړل چې ددغې موافقې له مخې ځنډول شوي وو.

له اروپايي ټولنې څخه د برتانيي د وتلو موضوع له خنډ سره مخ ده

د برتانيي صدراعظمه تریزا می وايی له اروپايی ټولنې څخه د برتانيي د وتلو پر موضوع خبرې اترې له خنډ سره مخ دي.

تریزا می دا خبره پرون په لندن کې په یوې تلویزوني وینا کې وکړه.

اروپايي ټولنې تر دې مخکې له دې اتحاديي څخه د برتانيي د وتلو په اړه د صدراعظمې د پیشنهاد شوي پلان مهمې برخې رد کړې.

د اروپايی شورا رئیس ډانلډ توسک په روانه اونۍ کې وویل د برتانيي د صدراعظمې پلان به نتیحه ورنکړي.

خو د برتانيي صدراعظمې په خپله وینا کې وویل پرته له کوم بدیل وړاندې کولو د اروپايي ټولنې لخوا ددې د پلان ردول د منلو وړ نه دی.

نوموړې وویل دابه له اروپايی ټولنې څخه دبرتانيي د وتلو په اړه د ۲۰۱۶ کال د ټولپوښتنې نتیجه له مینځه یونسي.

برتانویانو د ۲۰۱۶ کال په ټولپوښتنه کې له اروپايی اتحاديی څخه وتلو ته رای ورکړه.

ټاکل شوې ده چې برتانیه د ۲۰۱۹ م کال په مارچ میاشت کې په رسمپي او مکمل ډول له اروپايي ټولنې جلا شي.

د ولسمشر ټرمپ او کیم جونګ اوون تر منځ د دوهمې کتنې لپاره کار روان دی

د امریکا د بهرنیو چارو وزیر وايي هیواد يې د ولسمشر ډانلډ ټرمپ او د شمالي کوریا د مشر کیم جونګ اوون ترمنځ د دوهمې کتنې په برابرولو کار کوي.

مایک پومپیو پرون له فاکس نیوز سره په مرکه کې وویل د ولسمشر ټرمپ او کیم جونګ اوون تر منځ د دوهمې کتنې لپاره کار روان دی څو یقیني شي چې دې کتنې ته شرایط برابر دي.

مایک پومپیو له ان بي سي نیوز سره په جلا مرکه کې هیله څرګنده کړې ده چې ولسمشر ټرمپ او کیم جونګ اوون به ژر وګوري او د شمالي کوریا د غیر اټومي کولو پر مسله خبرې وکړي.

نوموړي ویلي دی هیله مند دی چې تر هغې مخکې دی پیونګ یونګ ته سفر وکړي او د شمالي کوریا له چارواکو سره خبرې وکړي.

خو د امریکا د بهرنیو چارو وزیر ویلي دي چې پر شمالي کوریا به تر هغې پورې بندیزونه پر ځای پاتي وي ترڅو چې دا هیواد خپل اټومي پروګرام ختم نه کړي.

ولسمشر ډانلډ ټرمپ د لومړي ځل لپاره د تیرې جون میاشت په ۱۲ نیټه د شمالي کوریا له مشر کیم جونک اوون سره په سنګاپور کې ولیدل.

ريابکوف پر روسي شرکتونو او اشخاصو د امريکا پر بنديزونو انتقاد وکړ

د روسيې د بهرنيو چارو مرستيال وزير پر روسي شرکتونو او اشخاصو د امريکا پر تازه بنديزونو انتقاد وکړ.

سرګي ريابکوف وويل، دغه اقدام د مسکو او واشنګټن ترمنځ کړکېچ نړيواله بې ثباتي زياته کړې ده.

ريابکوف دا څرګندونې نن په داسې حال کې وکړې چې د امريکا د بهرنيو چارو وزارت پرون د څه باندې دېرشو روسانو او کمپنيو تور لېست اعلان کړ.

ويل شوي دغو اشخاصو او کمپنيو د «مسکو د ناوړه اقداماتو» په تړاو د روسيې له پوځي او استخباراتي ادارو سره اړيکې درلودې.

د روسيې د بهرنيو چارو وزارت معين د امريکا دغه بنديزونه «بې معنى» وبلل او ويې ويل، واشنګټن به پر روسيې «د پاروونکو شرايطو په تپلو کې» بريالى نه شي.

په هغو کسانو کې چې بنديزونه ورباندې لګول شوي، د روسيې د پوځي استخباراتو ١٢ افسران هم شامل دي چې د امريکا ځانګړي مفتش رابرټ مولر د روان کال په پيل کې د امريکا د جمهوري رياست په تېرو انتخاباتو کې په لاسوهنې تورن کړي دي.

تانزانیا: د یوې کښتۍ د چپه کېدو پېښې تر ١٠٠ ډېر کسان وژلي

د تانزانیا دولتي رسنيو راپور ورکړى چې په ويکتوريا جهيل کې د کښتۍ د چپه کېدو په پېښه کې تر ١٠٠ ډېر کسان مړه شوي دي.

د موانا سيمې والي جان مونګيلا نن سهار وويل، لږ تر لږه ٣٧ نور کسان ژغورل شوي دي.

تر سلو د زياتو قربانيانو مړي نن تر غرمې پورې ترلاسه شوي او فکر کېږي چې په لسګونو نور کسان به لادرکه وي.

کښتۍ په هغه جهيل کې ډوبه شوې چې شا و خوا يې تانزانيا، کينيا او يوګاندا هېوادونه دي.

په لومړنيو معلوماتو کې ويل شوي چې په دې کښتۍ کې تر ٣٠٠ ډېر کسان سپاره وو، خو د دوى دقيق شمېر لا معلوم نه دى.

انتونیو ګوترش: برما دې د رویټرز خبري اژانس ۲ خبریالان وبخښي

د ملګروملتونو عمومي منشي انتونیو ګوترش د برما له حکومت څخه غوښتي چې د رویټرز خبري اژانس هغه دوه خبریالان دې وبخښي چې د روهنګیا اقلیت د ډله‎ییزو وژنو په اړه د راپورونو له ورکولو وروسته په اووه کاله بند محکوم شوي دي.

ګوترش پرون وویل، دا د منلو نه‎ده چې د رویټرز دا ژورنالېستان دې د خپلې دندې د ترسره کېدو په خاطر په بند محکوم شي.

نوموړي پرون په ملګرو ملتونو کې په یوه خبري غونډه کې وویل، هیله‎مند دی چې د برما حکومت هر څومره ژر چې ممکنه وي، د دې دوو خبریالانو د بخښنې فرمان صادر کړي.

برما په‎دې وروستیو کې د رویټرز خبري اژانس دوه ژورنالېستان وا لون او کیاو سو او په‎دې تور چې ګوندې دولتي اسرار یې رابرسېره کړي په اووه کاله بند محکوم کړل.

دې ژورنالېستانو د برما په رخین ایالت کې د روهنګیا مسلمانانو پرضد د برما د پوځ د هغو ځپونکو عملیاتو په اړه راپورونه خپرول چې له کبله یې له دې ایالت څخه تر۷۰۰ زرو زیات روهنګیا وګړي بنګله‎دیش ته وتښتېدل.

د ویتنام ولسمشر ټران ډای کوانګ د ۶۱ کلونو په عمر مړ شو

د ویتنام رسمي رسنیو اعلان وکړ چې د دې هېواد ولسمشر ټران ډای کوانګ، د ورپېښې ناروغۍ له کبله د ۶۱ کلونو په عمر مړ شو.

د ویتنام رسمي خبري اژانس نن وویل، ولسمشر ټران ډای نن سهار په سیمه‎ییز وخت پنځه بجې او لس دقیقې په روغتون کې ساه ورکړه.

په‎دې اړه زیات معلومات نه‎دي ورکړل شوي.

ټرای ډان کوانګ په ۲۰۱۶ میلادي کال کې د بې سیاله کاندید په توګه د کمونېست ګوند له‎خوا د ویتنام د جمهوري ریاست پر څوکۍ ټاکل شوی و.

نور راوښيه

XS
SM
MD
LG