د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۵:۴۷

نړۍ

د مولدووا ولسمشر وايي، د دغه هېواد لومړۍ ستونزه د نفوسو کمېدا ده

د مولدووا ولسمشر وايي، د دغه هېواد لومړۍ ستونزه فساد یا بېوزلي نه ده، بلکې د نفوسو کمېدا ده.

ولسمشر ایګور دودان ازادي راډیو ته وویل:

"موږ د خپل نفوس په درو کې یوه برخه له لاسه ورکړې، نو د نفوس کمېدا لومړۍ درجه ستونزه ده چې موږ اوس ورسره مخامخ یوو."

د مولدووا د وروستۍ سرشمېرنې له مخې، د پخواني شوروي اتحاد د دې جمهوریت نفوس په ۲۰۱۴ مېلادي کال ۳ میلیونه و، خو بېلابېل اټکلونه اوس ښيي چې له دې هېواد څخه له ۶ لکه تر ۱ میلیون تنه نورو هېوادونو ته تللي دي.

پوتین د بیلاروس له ولسمشر سره وکتل

کرېملېن وايي، د روسیې ولسمشر ویلادیمیر پوتین او د بیلاروس ولسمشر الکساندر لوکاشینکا د روسیې د تور سمندرګي په ساحلي ښار سوچي کې سره ولیدل.

د روسیې د انترفکس خبري اژانس د راپور له مخې، لوکاشینکا په دې کتنه کې چې پرون چهارشنبه وشوه، له پوتین څخه ده ته د بلنې په خاطر مننه وکړه او ویې ویل چې د دوو هېوادونو په دوه اړخیزو اړیکو کې بېلابېلې ستونزې کوټه شوي دي.

لوکاشینکا وویل چې باید دا ستونزې حل شي.

امریکايي چارواکي وايي د هکرانو د یوې هڅې مخه یې نیولې

امریکايي چارواکي وايي، هکرانو هڅه کړې چې د ډیموکراټ د ملي کمېټې د رای ورکوونکو ستر ډیټابېس یا د معلوماتو زېرمتون ته ننوزي خو مخه یې ونیول شوه.

دا هڅه دوه کاله وروسته له دې وشوه چې پر روسي ایجنټانو د امریکا د ولسمشرۍ د انتخاباتو په لړ کې د دې کمېټې د ایمیلونو د هک کولو او افشا کولو تور پورې شو.

د ډیموکراټ ګوند غړیو پرون چهارشنبه وویل، د ویبپاڼې امنیتي کمپنۍ چې له مصنوعي ذهانته کار اخلي، دا هڅه ناکامه او افشا کړه.

امریکا او چین نن پنجشنبه پر یو بل نوره تعرفه زیاته کړه

د امریکا متحدو ایالتونو او چین نن پنجشنبه پر یو بل نوره تعرفه زیاته کړه او د چین د ټکنالوژۍ د پالیسۍ پر سر سوداګري لانجه یې نوره هم پراخه کړه.

د چین پر تجارتي مالونو د امریکا له لوري د تعرفې ۲۵ فیصده زیاتوالی چې پخوا اعلان شوې وه، په داسې حال کې عملي شوه چې د دوو هېوادونو استازي د سوداګري اختلافاتو په اړه په واشنګټن کې پر خبرو بوخت دي.

تر اوسه پورې د دوی په خبرو کې پرمختګ نه دی شوی.

د یو بل پر خلاف نوې تعرفي ۱۶ میلیارد ډالرو ته رسېږي.

د داعش ډلې د مشر البغدادي صوتي پیغام خپور شوی

د اسلامي دولت سخت دریځي ډلې مشر ابوبکر البغدادي په یوه صوتي پیغام کې چې هغه ته منصوب او په یوه کال کې د هغه لومړنی پیغام بلل کېږي، خپل پلویان دې ته هڅوي چې په نړۍ کې د خپلو دښمنانو په وړاندې جګړې ته دوام ورکړي.

دغه ۵۴ دقیقه یي پیغام د دغې سخت دریځې ډلې د الفاروق فونډیشن د رسنیو څانګې د چهارشنبې په ورځ خپور کړی دی.

د البغدادي د اوسېدو او داچې ایا هغه ژوندی دی که مړ، په اړه په وروستیو کې ضد ونقیض راپورونه خپاره شوي دي.

له کله چې بغدادي د ۲۰۱۴ کال په جون کې خلافت اعلان کړ، له هغه راهیسې دې ډلې په عراق او سوریه کې د ترخپلې ولکې لاندې سیمې په سلو کې نوي برخه له لاسه ورکړې ده.

وروستی ځل د بغدادي صوتي پیغام د ۲۰۱۷ کال په سپټمبر کې خپور شوی و چې هغه پکې له خپلو پلویانو غوښتي وچې له هرې وسلې څخه په استفاده هر چېرې چې وي خپل دښمنان ووژني.

له هغې وروسته دغې ډلې د نړۍ په مختلفو برخو کې د یوشمېر حملو مسولیت اخیستی دی.

په نوي صوتي پیغام کې بغدادي د لوی اختر او د یوه امریکایي پادري د توقیف پرسر د ترکیې او امریکا ترمنځ د لانجې په ګډون د یولړ روانو چارو په اړه خبرې کوي.

که دا ثابته شي چې په دغه صوتي پیغام کې غږ د بغدادي دی نو د هغه د مړینې راپورونه به غلط ثابت شي.

بغدادي وایي، امریکا د خپل موجودیت په ټول تاریخ کې نن ورځ له تر ټولو ناوړه حالت سره مخامخ ده او روسیه هم په منځني ختیځ کې د نفوذ پرسر له امریکا سره پرسیالۍ اخته ده.

پوتین : د امریکا له ولسمشر سره لیدنه کتنه ګټوره وه

د روسیې ولسمشر وایي، د امریکا له ولسمشر سره یې د تیرې میاشتې لیدنه کتنه ګټوره وه.

ولادیمیر پوتین پرون وویل چې دواړو لوریو دا هیله نه کوله چې په دوه ساعته غونډه کې به خپل ټول اختلافات له منځه وړي.

تمه ده چې سبا د پوتین د ملي امنیت سلاکار له خپل امریکایي سیال سره وګوري. پوتین وویل چې د نظر تبادله او مخامخ خبرې تل ګټورې وي.

د ماسکو او واشنګتن اړیکي د اوکراین او سوریې په جګړو کې د روسیې د مداخلې او د امریکا د جمهوري ریاست د تیرې دورې په انتخاباتو کې د روسیې د لاسوهنې د تور له امله تر سړې جګړې راوروسته تر بل هر وخت ساړه شوې دي.

واشنګتن د سې شنبې په ورځ خبرداری ورکړ که چیرته ماسکو خپل چلند ښکاره بدل نه کړي اقتصادي بندیزونه به نور هم پرې سخت کړي.

د ملګرو ملتو په مرکزي دفتر کې د کوفي عنان پر مړینه غمرازي وشوه

په نیویارک کې د ملګرو ملتو په مرکزي دفتر کې پرون د ملګرو ملتو د پخواني سرمنشي کوفي عنان پر مړینه غمرازي وشوه.

د ملګرو ملتو اوسني سرمنشي انتونیو ګوتیریس وویل:

« په دې وختونو کې چې سیاسي اختلافات او سختې شخړې په زیاتیدو دي، موږ تر بل هر وخت د کوفي عنان سولې غوښتونکي روحیې ته ډیره اړتیا لرو»

کوفي عنان د شنبې په ورځ د اتیا کلونو په عمر د سویس په بیرن ښار کې د ورپیښې ناروغي له امله ساه ورکړه.

کوفي عنان لومړی افریقایی تورپوستی و چې په ۱۹۹۷ کې د ملګرو د سرمنشي په توګه غوره شو او تر ۲۰۰۶ کال پورې یې دوې دورې دا دنده مخته یووړه.

د اوکراین د صدراعظم یو همکار روسیې ته په جاسوسۍ تورن دی

د اوکراین د صدراعظم ولودمیر هراسمان یو همکار چې روسیې ته په جاسوسۍ تورن دی پرون محکمې ته حاضر شو.

ستانیسلاف یاژوف دا تور رد کړ او ویې ویل چې څارنوالان هیڅ شواهد نه لرې.

په محکمه کې یوه څارنوال داسې اسناد وړاندې کړل چې یاژوف د انټرنټ له لارې ثبت شوي غږونه یوه نا اشنا کس ته لیږلې دي، همداراز یې د اوکراین د جګپوړیو چارواکو د خبرو په اړه ورته لیکلي دي.

د جزایي محکمې ښځینه قاضي چې دوسیه یې څیړله، محکمه د سپتمبر تر دریمې وځنډوله.

یاژوف چې له صدراعظم سره به په بهرنیو سفرونو کې ملګری و او ډیر کله به یې هغه ته ژباړه کوله په دسمبر کې ونیول شو. که چیرته دا تور پرې ثابت شي نو تر پنځلس کاله پورې به په بند محکوم شي.

جرمني یو روسی وګړی د برید د پلان لرولو په تور نیولی

جرمني چارواکو یو روسی وګړی په دې هېواد کې د چاودونکو موادو پواسطه د برید د پلان لرولو په تور نیولی دی.

جرمني څارنوالانو نن وویل ۳۱کلن ماګومد علي په برلین ښار کې نیول شوی او کور يې پلټل شوی دی.

چارواکو ویلي دي نیول شوي کس په ۲۰۱۶ کال کې زیاته اندازه چاودونکي مواد په خپل اپارتمان کې ساتلي وو چې د برید لپاره ترې کار واخلي.

ټاکل شوې ده چې د جرمني دعدل فدرالي محکمه سبا ته د تروریزم په شک د نیول شوي کس په قضیه کې خپل حکم صادر کړي.

امریکا وايي د ایراني چارواکو په چلند کې بدلون غواړي

د امریکا د ملي امنیت سلاکار وايي، واشنګټن په ایران کې د حکومت ړنګېدل نه غواړي بلکې د ایراني چارواکو په چلند کې د بدلون غوښتونکی دی.

جان بولټن نن په بیت المقدس کې خبریالانو ته وویل د ایران د رژیم بدلول د امریکا پالیسي نه ده خو د نوموړي په خبره دا باید ښکاره وي چې موږ د ایراني رژیم په تګلاره کې لوی بدلون غواړو.

بولټن په بیت المقدس کې له اسرایلي چارواکو سره د سیمې پر حالاتو خبرې وکړې.

جان بولټن تر دې مخکې ویلي وو چې واشنګټن باید په ایران کې د رژیم د بدلون لپاره فشار راوړي.

ټاکل شوې ده چې د امریکا د ملي امنیت سلاکار سبا ته په جینیوا کې له خپل روسيی سیال سره وویني.

بولټن ویلي دي چې دی به په دې کتنه کې له سوريې څخه د ایراني ځواکونو په وتلو ټینګار وکړي.

د سوریې رژيم ته د لوېدیځو قدرتونو ګواښ!

لوېدیځ قدرتونو د سوریې رژيم ته ګواښ کړی چې بیا کیمیاوي وسلې ونه کاروي.

امریکا متحده ایالتونو، فرانسې او بریتانیې د سوریې ولسمشر بشار اسد ته ګواښ کړی چې بیا کیمیاوي وسلې ونه کاروي لکه څنګه چې ده له مخالفینو تر کنټرول لاندې سیمو د نیولو لپاره پخوا کارولې دي.

په یوه ګډه اعلامیه کې چې پرون ناوخته خپره شوې لویدیځو قدرتونو ویلي چې :"موږ قاطع یو چې که د اسد رژیم بیا کیمیاوي وسلې وکاروي عمل وکړو."

د اسد د رژیم له خوا د ادلیب د نیولو لپاره سختې بمبارۍ او جنګ روان دی.

په ادلیب کې له تېر کال راهیسې له مخالفینو څخه ګڼې سیمې بېرته د اسد رژيم نیولې دي.

ادلیب له ترکیې سره په پوله پروت دی او له تېر کال راهیسې د مخالفینو او د اسد د رژیم د یوې معاملې په اساس له ټولې سوریې نه ګڼ مخالفین او کورنۍ یې ور انتقال شوې دي.

په تېرو څو کلونو کې له مخالفینو د سیمو د نیولو لپاره د اسد د رژیم له خوا بمباریو نړیوال اندېښمن کړي ځکه دوی وايي چې د سیمو د بیانیولو لپاره د اسد رژیم کیمیاوي وسلې هم کاروي.

په دوما کې د تېر ۲۰۱۷ کال په اپریل میاشت کې د کیمیاوي وسلو د کارولو په نتیجه کې لږ تر لږه اویا تنه وژل شوي و.

د سوریې رژیم او متحد یې روسیې رد کړې چې پوځیانو یې کیمیاوي وسله کارولي وي.

امریکا له سوریې د ایراني پوځیانو پر وتلو ټينګار کوي

امریکايي چارواکي له سوریې د ایراني پوځیانو پر وتلو ټينګار کوي.

د امریکا د ملي امنیت سلاکار جان بولټن وايي له خپل روسي سیال به په خبرو کې له سوریې د ایراني پوځيانو د وتلو مسله یاده کړي.

تمه ده جان بولټن سبا د اګست ۲۳ په جینیوا کې د روسیې د ملي امنیت له سلاکار نیکولای پتروشیف سره وګوري.

دوی دواړه د امریکا او روسې د ولسمشرانو تر لیدنې وروسته لومړی وار سره ګوري هغه لیدنه چې پکې امریکا او اسرائیل له سوریې د ایراني پوځیانو د وتلو مسله مطرح کړه.

له رویټرز خبري اژانس سره نن په یوه مرکه کې بولټن ویلي په سوریه کې څو زره امریکایي سرتېري ځکه ساتي چې د نورو مسایلو تر څنګ د هغه په خبره په دغه هېواد کې مېشت ایراني ځواکونه امریکا متحده ایالات او اسراییل ته ګواښ پېښوي.

هغه وویل چې په سوریه کې موږ د اسلامي دولت ډلې او د دې ډلې له خوا د پېښ تروریستي ګواښ د له منځه وړلو په لټه کې یو او هم د ایراني ځواکونو حضور اندېښمن کړي یو.

د امریکا ولسمشر ډونالډ ټرمپ له خپل روسي سیال سره ولادمیر پوتین سره په فلنډ کې کتلي و او له سوریې د ایراني ځواکونو د وتلو مسله یې یاده کړې وه.

بولټن وايي په دې لیدنه کې پوتین ولسمشر ټرمپ ته وویل چې روسیه ایراني پوځیان له سوریې وتلو ته نه شي اړ ایستلی.

ایران چې د سوریې په جګړه کې د بشار اسد تر شا ولاړ دی ټینګار کړی چې د اسد د رژیم په خوښه په سوریه کې پاتې دي.

روسيې د مرکزي افریقا له جمهوریت سره پوځي موافقه لاسلیک کړه

روسيې پرون د مرکزي افریقا له جمهوریت سره پوځي موافقه لاسلیک کړه.

روسي رسنیو ویلي دي چې دا موافقه مسکو ته نېږدې د دولتونو د وسلو د نندارتون پر مهال د روسيې د دفاع د وزیر سرګې شویګو او د مرکزي افریقا د جمهوریت د دفاع د وزیر ترمنځ وشوه.

دا په داسې حال کې ده چې په دې وروستیو کې درې روسي خبریالان د مرکزي افریقا په جمهوریت کې مړه موندل شوي دي.

د روسيې د دفاع وزیر ویلي دي چې دا موافقه به د دواړو هېوادونو ترمنځ په پوځي برخه کې همکارۍ ټینګې او زیاتې کړي.

د مرکزي افریقا د جمهوریت زیاترې برخې د حکومت ضد وسله والو په کنټرول کې دي.

مایکروسافت د روسیې له خوا د هک کولو نوې هڅې موندلې

مایکروسافت شرکت ویلي دي، دوی د روسیې له خوا د هک کولو هغه نوې هڅې موندلې چې په نومبر میاشت کې د امریکا د کانګرس تر انتخاباتو مخکې یې د امریکا یو شمېر سیاسي ډلې هدف ګرځولي دي.

مایکروسافټ ویلي، د هاکرانو دا ډله چې د روسیې له حکومت سره تړاو لري، د انټرنیټ جعلي ادرسونه یا ډومینونه یې جوړ کړي چې په وسیله یې غواړي په واشینګټن کې د دوو هغو محافظه کارو څېړنیزو ادارو په نوم ځان معرفي کړي چې د کرېملېن منتقدان دي.

دا شرکت وايي، روسي هاکرانو همدارنګه درې نور ډومینونه هم جوړ کړي چې داسې یې ډیزاین کړي لکه د امریکا په سنا پورې چې اړه ولري.

مایکرو سافت د هاکرانو دا ډله (Strontium ) سټرونټیوم په نوم یاده کړې ده، ځینې نور یې د فنسي بیر ( Fancy Bear) په نوم هم یادوي.

د امریکا په انتخاباتو کې د روسیې د لاسوهنو په اړه د ځانګړي څیړونکي رابرټ مولر له خوا دا ډله د روسیې له استخباراتو سره تړلې بلل شوې ده.

دا هماغه ډله ده چې د امریکا د ۲۰۱۶ مېلادي کال د ولسمشرۍ په انتخاباتو کې د امریکا د ډیموکراټ ګوند د ملي کمېټې او هیلري کلینټن د انتخاباتي کمپاین د ایمیلونو په هک کولو هم تورنه ده.

کرېملېن رد کړې چې ګوندې دا هکران د روسیې له حکومت سره تړاو ولري.

د ډونالډ ټرمپ مدافع وکیل منلې چې د مالي سرغړاوي تورونه قبول کړي

امریکايي چارواکي وايي، د امریکا د ولسمشر ډونالډ ټرمپ د اوږدې مودې شخصي مدافع وکیل منلې چې د انتخاباتي کمپاین د مالي سرغړاوي او نور جرمي تورونه قبول کړي.

دا د ولسمشر ټرمپ لپاره یو بل لوی قانوني ګوزار ګڼل کېږي.

د مایکل کوهین له خوا پر ده د لګېدلو تورونو د منلو خبر د سې شنبې په ورځ په داسې حال کې خپور شو چې د امریکا د ولسمشر لپاره ستونزې په زیاتېدو دي.

تر دې مخکې د ورځې په پیل کې د ویرجینیا ایالت په الکساندریه کې فیدرالي منصفه هییت د ټرمپ د انتخاباتي کمپاین پخوانی مشر پاول منافورټ د بانکي او مالي درغلیو په اتو قضیو کې مجرم وباله.

دا تورونه د اوکراین د پخواني ولسمشر ویکټور یناکویچ په شمول د روس پلوو اوکرایني سیاستوالو سره د منافورټ د کار کولو سره تړلي دي.

د کوهین قضیه په منهاټن کې د څارنوالانو له خوا مخکې بیول کېږي،خو د راپورونو له مخې له هغو څېړنو راپورته شوې چې ځانګړی امریکايي مفتش رابرټ مولیر یې د امریکا د ۲۰۱۶ م کال د ولسمشرۍ په انتخاباتو کې د ټرمپ د همکارانو او روسي چارواکو تر منځ د ممکنو لیدنو په اړه کوي.

هغه تورونه چې کوهین منلي په کې له روسیې سره ارتباط لرونکي فعالیتونه نه شته، خو په کې د امریکا د انتخاباتو له قانون څخه سرغړاوی، او هغو ښځو ته پیسې ورکول شامل دي چې ادعا یې کوله له ټرمپ سره نامشروع اړیکې لرلې.

نور راوښيه

XS
SM
MD
LG