د لاسرسۍ وړ لېنکونه

تازه خبر
پنجشنبه ۲۱ لیندۍ ۱۳۹۸ کابل ۱۲:۳۲

نړۍ

مسعود اوزېل: د جرمني د فوټبال په ملي لوبډله کې نور نه‌لوبېږم

د جرمني د فوټبال نامتو او مشهور لوبغاړي مسعود اوزېل د هغه څه له امله چې دی یې نسلي تعصب بولي، نور د جرمني د فوټبال په ملي لوبډله کې د نه‌لوبېدو اعلان وکړ.

اوزېل ترکي‌الاصله جرمنی دی چې له اوږدې مودې راهیسې د جرمني د فوټبال په ملي لوبډله کې لوبېږي.

نوموړي په ټویټر خپره شوې وېډیو کې ویلي دي چې د روان کال د مې په میاشت کې د ترکيې له ولسمشر رجب طیب اردوغان سره له لیدو وروسته له ده سره توپیري چلند کېږي.

تر دې چې په تېر نړیوال جام کې د ټول ټیم پر ځای یوازې ده ته د انتقاد ګوته نیول کېږي.

په کاناډا کې د ډزو په پېښه کې یوه ښځه وژل شوې او ۱۴ کسان ټپیان دي

د کاناډا په ټورنټو ښار کې د ډزو په یوه پېښه کې یوه ښځه وژل شوې او ۱۴ کسان ټپیان شوي دي.

پولیس وايي چې د کریګ ټاون په سیمه کې یو وسله‌وال کس له ډزو وروسته پر خپل ټوپک ځان هم وژلی دی.

د دې ډزو انګېزه لا څرګنده نه‌ده.

پولیس وايي چې دې وسله‌وال کس د یکشنبې په ورځ ناوخته پر خلکو ډزې وکړې او په ټپیانو کې لږ تر لږه یو ماشوم هم شامل دی.

رسنیو د ټورنټو د پولیسو د سرچینو له قوله ویلي دي چې مشکوک کس مخکې له دې چې ځان ووژني، پر پولیسو هم ډزې کړې دي.

د پولیسو ویاند مارک پوګاش ویلي، دا ډېره وختي ده چې وویل شي چې ایا دا پېښه دې یو ترورېستي پېښه وي کنه.

فلسطین: اسرائیلي ځواکونو سره په نښتو کې یو زلمکی وژل شوی

په فلسطین کې روغتیايي چارواکي وايي، په لوېدیځه غاړه کې له اسرائیلي ځواکونو سره نښتو کې یو فلسطینی زلمکی وژل شوی دی.

د فلسطین د روغتیا وزارت ویلي، دا ۱۵ کلن هلک د لوېدیځې غاړې د بیت ال لحم د کډوالو په کمپ کې د اسرائیلي ځواکونو له‎خوا په سینه په مرمۍ ویشتل شوی دی.

د اسرائیلو پوځ وايي، ځواکونه‌یې دې کمپ ته ننوتي او دوه مشکوک کسان‌یې نیولي دي چې پر مهال‌یې د معترضانو د خورولو لپاره د بلوا ضد اقدامات کړي دي.

د اسرائیلو پوځ په یوې اعلامیه کې ویلي چې د عملیاتو پر مهال په سیمه کې له تاوتریخوالي ډک اعتراضونه وشول چې په‎کې فلسطینیانو په اسرائیلي سرتېرو، د اور بمونه، لاسي بمونه او کاڼي ورورولي دي.

اعلامیه زیاتوي چې سرتېرو یې پر معترضانو ډزې کړي دي.

که څه هم د فلسطین د غزې په تړانګه کې د میاشتو راهیسې د اسرائیلو د محاصرې پر ضد اعتراضونه روان دي، خو لوېدیځه غاړه په‎دې موده کې ارامه وه.

یمن کې جګړو او د بې‌پیلوټه الوتکو بریدونو د القاعده ۱۰ غړي وژلي

په یمن کې د تازه جګړو او د امریکا د بې‌پیلوټه الوتکو په بریدونو کې د القاعده شبکې اړوند ۱۰ وسله‌وال وژل شوي دي.

د یمن امنیتي چارواکو او قبایلي مشرانو پرون وویل وسله‌والو ته دا تلفات په مآرب او شبوه ولایتونو کې اوښتي دي.

که څه هم د امریکا دفاع وزارت په یمن کې د بې‌پیلوټه الوتکو بریدونه نه‌دي تأیید کړي، خو په سیمه کې هوايي حملې یوازې د متحده ایالاتو پوځ کوي.

القاعده شبکې په یمن کې له روانې کورنۍ جګړې څخه په ګټه پورته کولو په دې هېواد کې خپل فعالیت پراخ کړی دی.

په ۲۰۱۴ میلادي کال کې په یمن کې وروسته تر هغې کورنۍ جګړې زور واخیست چې حوثي شیعه یاغیانو د دې هېواد د پایتخت صنعا په ګډون شمالي برخې ونیولې.

د سعودي عربستان په مشرۍ د سیمې د هېوادونو پوځي ائتلاف د حوثیانو په مقابل کې د یمن د ولسمشر عبد ربه منصور هادي له حکومت نه ملاتړ کوي.

ټرمپ: لیدل کېږي چې زما پر کمپاین، غیر قانوني جاسوسي کېدله

د امریکا ولسمشر ډونالد ټرمپ وایي، هغه نوي اسناد چې د ده د انتخاباتي کمپاین د پخواني سلاکار کارتر پیج د ټیلیفوني مکالمو د اورېدو په اړه خپاره شوي، ښیي چې استخباراتي ادارو هغه محکمه غولولې ده چې د همدې مکالمو د اورېدو حکم‌یې کړی وو.

«اف بي ای» یا د امریکا فدرال تحقیقاتي ادارې د شنبې په ورځ د کارتر پیج په اړه هغه اسناد خپاره کړل چې یوه برخه‌یې په دې اړه وه چې ایا د ټرمپ دغه انتخاباتي سلاکار د ۲۰۱۶ انتخاباتو د کمپاین پر مهال له روسیې سره اړیکه درلوده، که څنګه؟

ولسمشر ټرمپ تېره ورځ په یو شمېر ټویټونو کې لیکلي وو:

"لیدل کېږي چې د ټرمپ پر کمپاین غیر قانوني جاسوسي کېدله."

ولسمشر ټرمپ د کارتر پیج اړوند اسنادو ته په اشارې لیکلي:

"دغه اسناد د تل په څېر مسخره دي، خو پرته له شکه ښیي چې د عدلیې وزارت او «اف بي ای» محاکم غولولي دي، دا شرم دی."

د یادونې ده چې ولسمشر ټرمپ په انتخاباتو کې تر بریالیتوب وړاندې تر اوسه پورې له سختو انتقادونو سره مخامخ دی چې ګواکې د انتخاباتي کمپاین ځیني غړو یې له روسیې سره اړیکې درلودې او روسیه په یو ډول د ده په بریالیتوب کې لاس لري.

د پاکستان پوځ هڅه کوي د قضائیه قوې په چارو کې مداخله وکړي

د پاکستان ستره محکمه وایي د یوه قاضي د هغې ادعا په اړه‌یې پلټنې پیل کړي چې وایي د پاکستان پوځ هڅه کوي د جولای د ۲۵مې تر انتخاباتو دمخه د قضائیه قوې په چارو کې مداخله وکړي.

د نواز شریف په مشرۍ د پاکستان مسلم لیګ ګوند تر انتخاباتو دمخه د ځینو تقلب کاریو په اړه خبرې کړي او پوځ‌یې تورن کړی چې په قضائیه قوه کې یې نفوذ کړی دی.

نواز شریف په دې وروستیو کې د فساد په تور په غیاب کې په ۱۰ کاله زندان محکوم شو او د جولای په ۱۳مه له لندن څخه خپل هېواد ته له ستنېدو سره سم په هوایي ډګر کې ونیول شو او بندي شو.

نواز شریف د استېناف غوښتنه کړې ده.

د پاکستان د سترې محکمې یوه قاضي شوکت عزیز صدیقي د دغه هېواد استخباراتي اداره «ای اس ای» تورنه کړې چې په عدلي او قضایي چارو کې یې مداخله کړې ده.

صدیقي د شنبې په ورځ څارنوالانو ته په وینا کې وویل چې «ای اس ای» په عدلي پروسو کې د مداخلې هڅه کوي او وایي چې شریف باید تر انتخاباتو پورې خوشې نه‌شي.

نواز شریف د پاکستان د پوځ یو سخت منتقد دی.

د پاکستان پوځ د هغه هېواد په کورنیو او بهرنیو چارو کې ډیر نفوذ لري.

اسرائیلي ځواکونو د سوریې یو پوځي مرکز په نښه کړی

د سوریې دولتي ټلوېزیون وایي، اسرائیلي هوایي ځواکونو د سوریې په مصیاف «Misyaf» ښار کې یو پوځي مرکز په نښه کړی دی.

راپورونه وایي، په دې برید کې ځاني زیان نه‌دی اوښتی.

په دې راپور کې د دقیق هدف په اړه څه نه‌دي ویل شوي، خو یوې استخباراتي سرچینې ویلي چې د کیمیاوي وسلو د تولید لپاره د څېړنو یو لوی پوځي مرکز دغه ښار ته څېرمه موقعیت لري.

تېره اوونۍ هم د سوریې دولتي رسنیو ویلي وو چې اسرائیلي توغندیو د نیرب «Nairab» هوایي ډګر ته نږدې د سوریې یو پوځي مرکز ویشتلی وو.

دغه هوایي ډګر د حلب ښار په څنډو کې دی.

د سوریې د حکومت د اپوزېسیون ځینو سرچینو ویلي وو چې په هغه برید کې څو تنه ایرانیان وژل شوي وو.

اسرائیل په سوریه کې د ایران ډېرېدونکي حضور ته اندېښنه لري او هغه خپلې خاورې ته یو ګواښ بولي.

په پاکستان کې د تحریک انصاف ګوند یو کاندید ووژل شو

د خیبر پښتونخوا په ډېره اسماعیل خان سیمه کې د پاکستان د پارلماني ټاکنو لپاره د عمران خان په مشرۍ د تحریک انصاف ګوند یو کاندید اکرام الله ګنډاپور په ځانمرګي برید کې ووژل شو.

پولیس وايي، د اکرام الله ګنډاپور پر موټر دا برید د یکشنبې په ورځ د ډېره اسمعیل خان په کولاچي سیمه کې هغه وخت شوی چې ګنډاپور د انتخاباتي کمپاېن په لړ کې یوې غوندې ته روان و.

که څه د لومړنیو راپورونو له مخې، په دغه برید کې اکرام الله ګنډاپور سخت ټپي شوی و، خو پاکستاني رسنۍ د ډېره اسمعیل خان د امنیتي او روغتیايي چارواکو په حواله وايي چې اکرام الله ګنډاپور په روغتون کې د ور اوښتو ټپونو له امله ساه ورکړه.

په دغه برید کې پر ګنډاپور سربېره د هغه ډرېور هم وژل شوی دی.

د پاکستان تحریک انصاف مشر عمران خان او ددغه ګوند نورو چارواکو په خیبر پښتونخوا کې پر خپل کاندید برید غندلی او دا یې بزدلانه عمل بللی دی.

بل خوا بیا په بنو کې د جمیعت علمای اسلام (ف) پر یوه سیاستوال او د پاکستان په پارلماني ټاکنو کې د اسامپاله ګوندونو د اتحاد (متحده مجلس عمل) کاندید اکرم خان دراني هم برید شوی، خو نوموړی پکې روغ وتلی دی.

دا په روانه میاشت کې پر اکرم خان دراني دوهم برید دی.

د یادونې وړ ده چې په خیبر پښتونخوا کې پر دغو کاندیدانو د برید مسؤلیت لا تر دې دمه کومې وسله والې ډلې نه دی منلی.

اسرائيل وایي، د سوريې د يوه رضاکار مدني سازمان غړي یې ژغورلي

د اسرائيل پوځ وايي چې په وروستيو کې يې د سوريې د يوه رضاکار مدني سازمان غړي ژغورلي دي.

رسنۍ د دغه سازمان رضاکارانو ته د سپينو خوليو لرونکي اصطلاح کاروي.

دغه کسان او د هغوى د کورنيو غړي د ګولان غونډيو ته څېرمه له يوې ناکرارې سرحدي سيمې ژغورل شوي او بيا ګاونډي هېواد اردن ته لېږدول شوي دي.

نننى اعلان د اول وار لپاره د سوريې په کورنۍ جګړه کې د اسرائيل ښکېلتيا ښيي.

د اسرائيل پوځ په ټوېټر ليکلي:

"دغه ملکيان د سوريې په جنوب کې له يوې جنګي ساحې د دوى ژوند ته د ورپېښ ګواښ له کبله بلې سيمې ته ايستل شوي دي."

پوځ دغه کار استثنايي بشري اقدام بللى دى.

د اسرائيل پوځ راپور ورکړى چې ٨٠٠ کسان اردن ته لېږدول شوي چې له هغه ځايه به بريتانيا، جرمني او کاناډا ته سفر کوي.

د سپينې خوليو لرونکي رضاکاران له ٢٠١٣ میلادي کال راهيسې د ياغيانو تر ولکې لاندې له سيمو د ملکيانو د ژغورنې لپاره کار کوي.

قرغزستان کې څو هېوادونو له ترهګرۍ سره د ګدې مبارزې موافقه کړې

د منځنۍ اسیا د څو هېوادونو د بهرنیو چارو وزیرانو موافقه کړې چې د نړیوالې ترهګرۍ او مذهبي بنسټپالنې په وړاندې مبارزه کې به خپلو کې همکارۍ زیاتوي.

د راپورونو له مخې، د قرغزستان، ازبکستان، تاجکستان، قزاقستان او ترکمنستان لوړ پوړي ډیپلوماټان د قرغزستان په ساحلي ښار چالپای اتای کې سره راټول شوي وو.

د شنبې په ورځ په یوه شریکه اعلامیه کې د یادو هېوادونو استازو ویلي چې د نړیوالې ترهګرۍ او سخت دریځۍ، د نشه يي موادو د قاچاق، تنظیم شویو جرمونو او سیمه ییزو ستونزو په وړاندې به ټول شریک کار کوي.

د ازبکستان د بهرنیو چارو وزیر عبدالعزیز کاملوف په دې غونډه کې د منځنۍ اسیا له چارواکو وغوښتل چې په هغه سیمه ییزه اقتصادي غونډه کې دې ګډون وکړي چې د اکټوبر په میاشت کې جوړېږي.

د قرغزستان په غونډه کې د تاجکستان، ازبکستان، قزاقستان او قرغزستان د بهرنیو چارو وزیرانو او د ترکمنستان د بهرنیو چارو د وزارت مرستیال ګډون کړی و.

د ډونالد ټرمپ تفریح ځای ته یوه نېږې کېدونکې الوتکه ستنه کړای شوې

د امریکا هوايي ځواک پرون هغه کوچنۍ الوتکه چې په نیو جرسي کې د دې هېواد د ولسمشر ډونالد ټرمپ د ګلف د شخصي تفریح ځای سره نېږدې ولیدل شوه، بل مسیر ته رهنمايي کړه.

د امریکا په شمال کې د هوايي دفاع د ټولي قوماندانۍ د شنبې په ماښام وویل، وروسته له هغې چې دا وړه الوتکه له سیمې بل خوا رهنمايي شوه، د نیو جرسي په پیټس ټاوون هوايي ډګر کې له کومې حادثې پرته په ځمکه ښکته شوه.

د راپورونو له مخې، امریکايي چارواکو د الوتکې له پیلوټ سره کتلي، او ډاډمن شوي چې هېڅ ډول خطر موجود نه و.

په عین حال کې ولسمشر ټرمپ چې په نیوجرسي کې و، ټاکل شوې چې نن بېرته واشنګټن ته ستون شي.

ایران د هرمز له تنګي د تېلو انتقال بندوي

د ایران مذهبي مشر ایت الله علي خامنه ای له فارس خلیج څخه د تیلو د انتقال د مخنیوي په اړه د ولسمشر حسن روحاني له خبرداري ملاتړ څرګند کړی دی.

د خلامنه ای انترنت پاڼې خبر ورکړ چې نوموړي پرون د ایران د بهرنیو چارو د وزارت له چارواکو سره په کتنه کې ویلي دي چې د ولسمشر روحاني خبرداری د ایران د نظام د سیاست او تګلارې څرګندونه کوي.

حسن روحاني د جولايي میاشت په لومړیو کې ویلي وو چې که متحده ایالات د ایران د تیلو د وارداتو مخه ونیسي او پر تهران نور بندیزونه ولګوي ،نو ایران به په خلیج کې د هرمز له تنګي څخه د تیلو انتقال بند کړي.

له هرمز تنګي څخه په ورځني ډول ارام سمندر ته د نړی د تیلو شل په سلو کې برخه انتقالیږي.

د ایران مذهبي مشر خامنه ای له امریکا سره د ۲۰۱۵ کال د اټومي تړون په اړه چې ولسمشر ډانلډ ټرمپ ترې په تیره می میاشت کې د وتلو اعلان وکړ، خبرې کول خطا بللې ده او ویلي دي چې امریکا د باور وړ نه ده.

د چین ولسمشر افریقايي هېواد سینیګال ته ورسېد

د چین ولسمشر له څلورو ا هیوادونو څخه د کتنې لپاره پرون افریقايي هیواد سینیګال ته ورسید.

شي جين پینګ به له سینیګال نه جنوبي افریقا ته لاړ شي او بیا به له روندا او د هند د سمندرله ټاپو موریشیس څخه هم کتنه وکړي.

چینيي مشر د سینیګال له چارواکو سره د دوه اړخیزو پوځي او اقتصادي اړیکو په پراخولو خبرې کوي.

شي جین پینګ به په جنوبي افریقا کې د بریکس هیوادونو په سرمشریزه کې هم برخه واخلي.

چین د افریقا تر ټولو ستر تجارتي شریک دی او پیکینګ په ۲۰۱۷ کال کې په افریقايي هیواد جیبوټي کې خپله پوځي اډه هم پرانسته.

روسیه: پر ماریا بوتینا لګېدلي تورونه جعلي دي

د روسي د بهرنیو چارو وزیر خپل امریکايي سیال ته په متحده ایالاتو کې د روسي وګړې ماریا بوتینا د زنداني کیدو له امله شکایت کړی دی.

سرګې لاوروف پرون د امریکا د بهرنیو چارو له وزیر مایک پامپیو سره تیلفوني خبرې وکړې .

ماریا بوتینا د دسیسې جوړولو او په امریکا کې د غیر راجستر شوي بهرني اجنټ په توګه د فعالیت په تور زنداني شوې ده.

د روسيي د بهرنیو چارو وزارت په یوه بیان کې ویلي دي چې سرګې لاوروف په دې تیلفوني تماس کې ښاغلي پومپیو ته ویلي دي چې پر ماریا بوتینا لګیدلي تورونه جعلي دي او هغه باید سمدستي خوشې شي.

۲۹کلنه بوتینا تورنه ده چې دروسيي د ګټو په هدف يې د امریکا د ټوپک د ځواکمنې ټولنې په ګډون په سیاسي ډلو کې د نفوذ هڅه کړې ده.

د روسيي د بهرنیو چارو وزارت وايي لاوروف او پومپیو د امریکا او روسيي د جولايي میاشت د ۱۶ نیټې تر سرمشریزې وروسته د واشنګټن او مسکو ترمنځ د اړیکو په اړه هم خبرې وکړې.

د ایران د "ګارد سپاه پاسداران انقلاب" ځواک۱۰ عسکر وژل شوي

د ایران نیمه دولتي خبري اژانس تسنیم نن د ایران د " ګارد سپاه پاسداران انقلاب" ځواک د ۱۰ عسکرو د وژل کېدو خبر ورکړ.

د تسنیم په حواله، پر هغوی تېره شپه د عراق پولې ته نېږدې حمله شوې وه.

د عراق او ایران په ګډو سرحدي سیمو کې د کردانو وسله والې ډلې فعالې دي.

د تسنیم د رپوټ په حواله، "سپاه" په یوه بیان کې ادعا کړې چې په حمله کې زیات شمېر "ترهګر" وژل شوي او د وسلو یو ډیپو هم سوځېدلی دی.

د ایران فارس خبري اژانس ویلي چې په نښته کې د ایران سرحدي ځواکونو هم ګډون درلود.

نور راوښيه

XS
SM
MD
LG