د لاسرسۍ وړ لېنکونه

تازه خبر
سه شنبه ۸ سلواغه ۱۳۹۸ کابل ۰۹:۱۹

نړۍ

ترکیې او روسیې له سوریې د امریکا له وتلو وروسته په همغږۍ سلا کړې

ترکیه او روسیه په دې سلا شوي چې له سوریې د امریکايي سرتېرو له وتلو وروسته دغلته خپلو کې همغږي رامنځته کړي.

دا خبره د روسیې د بهرنیو چارو وزیر سرګي لاوروف نن شنبه په مسکو کې له ترکي چارواکو سره له غونډې وروسته وکړه.

انټرفاکس خبري اژانس د لاوروف له خولې ویلي:

”یقیناً موږ هغو شرایطو ته ځانګړې پاملرنه کوو چې د امریکايي سرتېرو د وتلو له اعلان وروسته سوریه کې رامخې ته شوي دي.“

د ترکیې د بهرنیو چارو وزیر مولود چاوش اوغلو بیا له دې خبرو وروسته ویلي، ترکیه او روسیه په سوریه کې شریک هدف لري او هغه دا چې دا هېواد له ترورېستي سازمانونو پاک شي.

د چاوش اوغلو له قوله دا خبره د ترکیې دولتي خبري اژانس انادولو نقل کړې.

دې خبرې اژانس د چاوش اوغلو له خولې زیاته کړې چې ترکیه به له روسیې او ایران سره د سوریې او سیمې په مسئلو کې نېږدې همکارۍ ته دوام ورکړي.

په دې وروستیو کې د امریکا ولسمشر ډونالد ټرمپ اعلان کړی چې له سوریې د امریکا شااوخوا ۲۰۰۰ سرتېري وباسي.

مصر د ترهګرو په وړاندې په بریدونو کې ۴۰ کسان وژلي

د مصر پولیس

په مصر کې پولیس وايي، یوه ورځ وروسته له هغې چې په جیزه کې واقع اهرامونو ته نېږدې بمي برید څلور تنه ووژل، په امنیتي چاپو کې یې څلوېښت وسله وال وژلي دي.

د مصر د کورنیو چارو وزارت د شنبې په ورځ وویل، په جیزه او شمالي ښار سینا کې یې د ترهګرو په درې پټنځایونو په همغږو بریدونو کې ۴۰ کسان وژلي.

د مصر دولتي ټلویزیون د کورنیو چارو د وزارت په حواله ویلي، ترورېستي عناصرو پلان درلود چې پر دولتي ادارو، د سیلانیانو پر سیمو، امنیتي ځواکونو او کلیساګانو یو لړ بریدونه ترسره کړي.

د مصر د کورنیو چارو وزارت همدارنګه ویلي چې پولیسو په دې عملیاتو کې په زیاته اندازه وسلې، چاودېدونکي مواد او بم جوړونکي وسایل نیولې دي.

د جمعې په ورځ د مصر اهرامونو ته نېږدې د ویتنامي سیلانیانو پر یوه بس بمي چاودنه وشوه چې په کې درې ویتنامي سیلانیان او د هغوی مصري لارښود ووژل شول.

یولس نور ویتنامي سیلانیان او د هغوی مصري موټر چلوونکي په دې چاودنه کې ټپیان شوي وو.

د یمن په حدیده کې د حوثي ځواکونو د بیا ځای پرځای کېدو بهیر پیل شوی

ارشیف، په یمن کې د حوثي ځواکونو یو انځور

د یمن په بندري ښار حدیده کې د مېشتو حوثي ځواکونو د بیا ځای پر ځای کېدو بهیر پیل شوی دی.

د ملګرو ملتونو یوې شرچینې نن وویل، دا اقدام د هغې هوکړې د یوې برخې په توګه ترسره کېږي چې د دې سازمان په منځګړیتوب د روانې میلادي میاشتې په پیل کې سویډن کې د یمن د ښکېلو لوریو ترمنځ وشوه.

په یمن کې حوثي یاغیانو څخه ایران او له حکومت څخه سعودي عربستان ملاتړ کوي.

دواړه لوري د سویډن په مذاکراتو کې پر دې سلا شوي وو چې په حدیده ښار کې به اوربند کوي او خپل وسله وال به له دې ښاره وباسي.

مېرکل له پوتین سره د اوکراین د ختیځ او کریمیا په اړه خبرې وکړې

ارشیف، د جرمني صدراعظمه انګیلا مېرکل

د جرمني صدراعظمې انګیلا مېرکل د روسیې له ولسمشر ولادیمیر پوتین سره د اوکراین د ختیځ او کریمیا په اړه خبرې وکړې.

د دې ټیليفوني خبرو پرمهال انګیلا مېرکل د روسیې پر ولسمشر پوتین فشار راوست، تر څو هغه ۲۴ اوکرایني ماڼوګان خوشې کړي چې روسي ځواکونو د کیرچ له تنګي نیولي او زنداني کړي یې دي.

د جرمني د حکومت ویاندې اولریک ډیمر پرون وویل، په اوکراین سربېره د سوریې په اړه خبرې وشوې چې متحده ایالتونو له دې هېواده د خپلو سرتېرو د ایستلو پرېکړه کړې ده.

په کریمیا کې وروسته تر دې کړکېچ زیات شو چې د نومبر په ۲۵مه روسیي ځواکونو د کیرچ په تنګي کې ډزې وکړې، یو شمېر اوکرایني بېړۍ یې وګرځولې او ۲۴ ماڼوګان یې ونیول.

روسیې تور پورې کړی دی چې دا کسان په غیر قانوني ډول د روسیې اوبو ته داخل شوي دي.

روسیې په دوه زره څوارلسم کې کریمیا له خپلې خاورې سره یوځای کړه.

اوکراین او د ملګرو ملتونو اکثریت غړي هېوادونه تر اوسه کریمیا د روسیې د خاورې په توګه په رسمیت نه ده پېژندلې.

مېرکل پرون د فرانسې له ولسمشر ایمانوئل مکرون سره هم پر ټیليفون وغږېده او د اوکراین په ختیځ کې یې د نوي اوربند ستاینه وکړه، دا اوربند تېره شپه دولس بجې پیل شو.

په مصر کې یوې چاودنې ۳ کسان وژلي او ۱۲ یې ژوبل کړي دي

ارشیف

د مصر په پلازمېنه قاهره کې پرون لرغونو اهرامونو ته نېږدې د بهرنیو ګرځندویانو پر یوه بس چاودنه شوې ده چې ۳ کسان يې وژلي او ۱۲ نور یې ژوبل کړې دي.

د مصر د کورنیو چارو وزارت په یوه بیان کې ویلي دي چې وژل شوی سیلانیان ویتنامیان دي او په ټپیانو کې هم لس تنه د دغه هېواد وګړي دي، دوه نور ټپي شوي مصریان دي.

پولیسو ویلي دي چې د دې چاودنې په اړه پلټنې پیل شوي دي.

دا په تېرو دوه کلونو کې لومړۍ ځل دی چې په قاهره کې بهرني سیلانیان په نښه کېږي.

د مصر پوځ له کلونو راهیسې په سینا ټاپووزمه کې له سخت دریځو وسله والو سره جګړې کوي.

انجلینا جولي: هر چېرته چې راته اړتیا وي، هلته به کار کوم

ارشیف: د هالیووډ فلمي ستورې او د کډوالو په چارو کې د ملګرو ملتونو استازې انجلینا جولي

د هالیووډ فلمي ستورې او د کډوالو په چارو کې د ملګرو ملتونو استازې انجلینا جولي وايي، کېدای شي یوه ورځ په سیاسي ډګر کې داخله شي.

له بي بي سي نړیوالې راډیو سره په مرکه کې چې پرون خبره شوه، د اوسکار جایزې ګټونکې انجلینا جولي د دې پوښتنې په ځواب کې چې ایا سیاست ته به مخه کړي او که نه؟ وویل، هر چېرته چې دې ته اړتیا وي، هلته به کار وکړي.

۴۳کلنې جولي د نړۍ پر مشرانو غږ وکړ چې په جګړه ځپلو سیمو کې د کډوالو او د ښځو د حقونو لپاره لا نور کار وکړي.

انجلینا جولي د کډوالو په چارو کې د ملګرو ملتونو د استازې په توګه افغانستان، پاکستان او منځني ختیځ ته سفرونه کړي او د کډوالو ستونزې يې له نېږدې لیدلي دي.

په سوډان کې پولیسو د جمعې له لمانځه وروسته د پراخو مظاهرو مخه ونیوه

ارشیف: د سوډان اوسېدونکي

د سوډان په مرکز خرطوم کې پرون پولیسو د جمعې له لمانځه وروسته د پراخو مظاهرو مخه ونیوه.

پولیسو د مظاهره چیانو د مخنیوي لپاره چې د ډودۍ په بیه کې د لوړوالي په اعتراض کې راوتلي وو، پر هغوی اوښکې بهونکي ګاز استعمال کړ .

د سوډان په مرکز او یو شمېر نورو ښارونو کې له نېږدې دوه اوونیو راهیسې زرګونو کسانو مظاهرې پیل کړې دي.

راپورونه وايي چې تر اوسه د سوډان په مظاهرو کې د دوه سرتېرو په ګډون ۱۹ کسان وژل شوي دي.

چارواکو ویلي دي چې اکثره مظاهره چیان د دوکاونو او بازارونو د چور او لوټ کولو پر مهال مړه شوي دي.

په همدې حال کې ملګرو ملتونو د سوډان پر حکومت غږ کړی دی چې له زغمه کار واخلي او د مظاهره چیانو حقونو ته درناوی وکړي.

سعودي: په حکومتي تشکیل کې مو وروستي بدلونونه متوقع وو

سعودي عربستان وايي، په حکومتي تشکیل کې يې وروستي بدلونونه متوقع وو او په هرو څلورو کلونو کې باید په کابینه کې بدلونونه راشي.

د سعودي د حکومت دا بیان د هغه څه وضاحت بلل کېږي چې منتقدانو د بحران د وخت مدیریت بللی دی.

د سعودي عربستان پاچا سلمان بن عبد العزیز د پنجشنبې په ورځ د هېواد د بهرنیو چارو د وزیر په ګډون د کابینې یو شمېر مهم غړي له دندو لېرې او نوې څېرې یې وګمارلې.

کارپوهان وايي، سعودي په مهمو حکومتي پوسټونو کې د نویو کسانو په ګمارلو سره هڅه کوي چې هغه زیان او ضربه کمه کړي چې د خبریال جمال خاشقجي د وژل کېدو قضيې د دې هېواد حکومت ته ورکړې ده.

جمال خاشقجي د تېرې اکتوبر میاشتې په دوهمه په استنبول کې د سعودي په قونسلګرۍ کې ووژل شو.

د متحده ایالاتو مرکزي استخباراتو ویلي چې د خاشفجي د وژلو امر د سعودي ولیعهد محمد بن سلمان ورکړی و، خو سعودي دا خبره ردوي او وايي چې خاشقجي د خپلسري استخباراتي عملیاتو په نتیجه کې چې سعودي حکومت ترې خبر نه و، وژل شوی دی.

پوتین منعه شویو لاریونونو ته د ځوانانو د جلبوونکو د سزا قانون توشېح کړ

ارشیف، د روسيې ولسمشر ولاديمير پوتين

د روسيې ولسمشر يو قانون توشېح کړ چې له مخې يې هغو کسانو ته سزا ورکول کېږي چې د محکمو د معلوماتو پر اساس منعه شويو اعتراضونو، لاريونونو او مظاهرو ته کشران راولي.

دغه قانون چې نن د ولاديمير پوتين له خوا توشېح شو، وايي چې د هغو منعه شويو اعتراضونو چې تر ١٨ کلنۍ کم عمره کسان په کې برخه اخلي، تنظيموونکي به له ١٥ ورځني بند او شااوخوا ٧٢٠ ډالرو نقدي جريمې سره مخامخ شي.

د ورته سرغړونو په تور ځينو تنظيموونکو ته تر دې لا درنه مالي جريمه ټاکل شوې ده.

په وروستيو کلونو کې په روسيه کې زرګونه کم عمره ځوانانو په دولت ضد مظاهرو کې برخه اخيستې ده.

په پاکستان کې د ډبرو د سکرو په يوه کان کې چاودنې درې تنه مړه کړي

ارشیف، په پاکستان کې د ډبرو د سکرو یو کان

د پاکستان د بلوچستان ايالت د ډبرو د سکرو په يوه کان کې د ګازو چاودنې درې کان کيندونکي مړه کړي دي.

دغه چاودنه پرون د بلوچستان ايالت په دُکۍ کې د ډبرو د سکرو په يوه کان کې شوې ده.

محلي چارواکي وايي، دغه کان کيندونکي د سوځېدنې له کبله مړه شوي او د ژغورونکو تر څو ساعته پلټنې وروسته يې مړي وموندل شول.

ويل شوي چې درې واړه مړه شوي کان کيندونکي افغانان دي.

په سپټمبر مياشت کې د پاکستان په شمال لوېديځ کې د ډبرو د سکرو د يوه کان د چت د نړېدو له کبله ٩ کان کيندونکي مړه او ٤ تنه نور ټپيان شوي وو.

په پاکستان کې د خونديتوب د کمزورو معيارونو له کبله زيات وخت د ډبرو د سکرو په کانونو کې دا ډول پېښې کېږي.

د پاکستان چارواکي وايي، په دغسې پېښو کې هر کال د کانونو شااوخوا ٢٠٠ کارګران مري.

روسیه: له اوکراینه د کریمیا د جلاکېدونکو موانعو چارې بشپړې شوي

د روسیې ملي بیرغ

د روسيې چارواکي وايي، د هغو موانعو جوړول يې بشپړ کړي چې کريميا ټاپووزمه له اوکراينه جلا کوي.

مسکو له اوکراينه دغه سيمه په ٢٠١٤ میلادي کال کې لاندې کړه.

په کريميا کې د امنيتي خدماتو د فډرال ادارې د سرحدونو څانګې نن جمعه وويل، د دغو موانعو يا د انجنيرۍ او تخنيکي کمپلکسونو د رغولو چارې بشپړې شوې دي.

دغې ادارې په هغه اعلاميه کې چې د روسيې خبري اژانسونو خپره کړې، ويلي چې د ٦٠ کيلومترو په اوږدوالي دغه موانع په سېنسرونو او امنيتي کېمرو سمبال شوي دي.

د دغو موانعو د جوړولو پېشنهاد په ٢٠١٥ میلادي کال کې وړاندې شوى و چې هدف يې د جنايتکارو ډلو د سبوتاژوونکو فعاليتونو او هڅو مخنيوى ښوول شوى دى.

د امریکا تر ټولو د ډېر عمر لرونکی پوځي ریچارډ اورټون ومړ

د امریکا ملي بیرغ

د دوهمې نړیوالې جګړې هغه امریکايي سرتېری چې باور کېده د امریکا تر ټولو د ډېر عمر لرونکی سړی به وي، د ۱۱۲ کلونو په عمر مړ شو.

دا خبره د نوموړې کورنۍ کړې ده.

د رسمي اسنادو پر بنسټ، ریچارډ اورټون چې د تکزاس ایالت په په اوسټین ښار کې د پنجشنبې په ورځ مړ شو، د امریکا تر ټولو زوړ پخوانی پوځي و چې په دوهمه نړیواله جګړه کې یې برخه لرله.

ریچارډ اورټون په ۱۹۰۶ میلادي کال کې زېږېدلی و او په ۱۹۴۲ میلادي کال کې له هغې اووه میاشتې وروسته چې جاپان په پرل هاربر برید وکړ، عسکرۍ ته ولاړ او د امریکا د هوايي انجنيرۍ په ځواک کې یې خدمت وکړ.

نوموړي په نورو بېلابېلو جګړو کې هم برخه اخیستې وه.

امریکا او ملګرو ملتونو د بنګله دېش په اړه اندېښنه ښودلې

د بنګله دېش ملي بیرغ

د امریکا متحدو ایالتونو او ملګرو ملتونو په بنګله دېش کې تر انتخاباتو د مخه وضعيت په اړه اندېښنه ښودلې ده.

دا په داسې حال کې ده چې په دې هېواد کې د اپوزیسيون د ملاتړو او ژورنالېستانو د نیول کېدو او پرې د بریدونو په اړه راپورونه خپاره شوي دي.

د صدراعظمې شیخ حسینه ملاتړو د پنحشنبې په ورځ د ډاکې په کوڅو کې لاریون وکړ، خو د نوموړې مخالفان شکایتونه کوي چې په دې هېواد کې به د ډېسمبر د ۳۰ مې نېټې انتخابات ازاد او عادلانه نه وي.

حسینه چې په دې انتخاباتو کې یې د بریا ډېره تمه کېږي، پر اپوزیسون تور پورې کوي چې بمي چاودنې تنظیموي.

د بنګله دېش د ملي ګوند په نوم اپوزیسيون بیا وايي، د واکمن عوامي لیګ په مشرۍ حکومتي ځواکونه د اپوزیسيون پر ملاتړو بریدونو او د دوی په وړاندې پارېدنو کې لاس لري.

د امریکا متحدو ایالتونو د بنګله دېش سره چې اکثریت وګړې یې معتدل مسلمانان دي، اړیکې تودې کړې او دې هېواد ته د افراطیت ضد جګړه کې د یو متحد په سترګه ګوري، خو واشنګټن د بنګله دېش د وضعيت په اړه په داسې حال کې اندېښنه ښودلې چې د بشري حقونو ډلې وايي، دا هېواد د استبداد خوا ته روان دی.

په سوډان کې د ژورنالستانو یوې شبکې درې ورځنی اعتصاب پیل کړ

د سوډان د لاریونوالو یو انځور

په سوډان کې د ژورنالستانو یوې شبکې د ډوډۍ په بیه کې د لوړوالي پر ضد د مظاهرو پر وړاندې د حکومت د اقداماتو په اعتراض کې درې ورځنی اعتصاب پیل کړی دی.

د سوډان حکومتي چارواکو تأیید کړې ده چې د مظاهره چیانو او امنیتي ځواکونو ترمنځ په شخړو کې د دوه سرتېرو په ګډون، ۱۹ کسان وژل شوي دي.

په سوډان کې د وچې ډوډۍ په بیه کې د لوړوالي په اعتراض کې د روانې ډيسمبر میاشتې له ۱۹ نېټې مظاهرې شوي دي.

په همدې حال کې د بخښنې نړیوال سازمان یا امنسټي انټرنشل ویلي دي چې د د امنیتي ځواکونو له خوا ۳۷ مظاهره چیان وژل شوي دي.

خو حکومت وايي، مظاهره چیانو ته زیاته مرګ ژوبله د چور او لوټ کولو پر مهال اوښتې ده.

ارمنستان په ایورو ایشین ټولنه کې د لا نور مدغم کېدو هڅې کوي

د ارمنستان ملي بیرغ

د ارمنستان سرپرست صدراعظم نیکول پاشینیان وايي، هېواد يې هوډ لري چې د روسيې په مشرۍ په ایورو ایشین اقتصادي ټولنه کې د لا نور مدغم کېدو هڅو ته دوام ورکړي.

پاشینیان دا خبرې پرون په مسکو کې د روسيې له ولسمشر ولاديمیر پوتين سره په کتنه کې وکړې.

ایوروایشین اقتصادي ټولنه چې روسیه، بلاروس، قزاقستان، ارمنستان او قرغزستان يې غړي دي، په ۲۰۱۵ کال کې جوړه شوه.

د روسيې ولسمشر د خپل هېواد او ارمنستان سره دوه اړخیزې اړیکې او مخ په زیاتېدونکې تجارتي همکاري وستایله.

د نیکول پاشینیان په مشرۍ ائتلاف د ډيسمبر د میاشتې د ۹ نېټې په پارلماني انتخاباتو کې اویا په سلو کې رأیې وګټلې.

پاشینیان د ارمنستان له تاریخي متحد روسيې سره نېږدې اړیکې غواړي او په عین حال کې له امریکا او اروپايي ټولنې سره هم د ټینګو روابطو غوښتونکی دی.

نور راوښيه

XS
SM
MD
LG