د لاسرسي لېنکونه

تازه خبر
سه شنبه ۲۱ لړم ۱۳۹۸ کابل ۰۵:۱۷

نړۍ

پاکستان اصف علي زرداري او ۱۷۱ نور کسان ممنوع‌الخروج اعلانوي

پاکستاني چارواکي وايي چې د هغه هېواد پخوانی ولسمشر اصف علي زرداري او ۱۷۱ نور کسان ممنوع‌الخروج اعلانوي.

دا پرېکړه په پاکستان کې له مالي تورم او د پيسو سپینېدو له مسئلې سره په تړاو شوې ده.

د پاکستان د اطلاعاتو وزیر، فواد چوهدري نن پنجشنبه د ډسمبر ۲۷مه وویل چې د فدرال پولیسو څېړونکي په‌دې باور دي چې اصف علي زرداري جعلي بانکي حسابونه درلودل.

اصف علي زرداري د پاکستان د مرکزي پارلمان غړی دی.

د هغه پر ضد د دوسیې پر برابرولو کار پېل شوی دی.

پر اصف علي زرداري له پاکستانه د وتلو ممنوعیت نن ولګېد چې د پاکستان د پخوانۍ صدراعظمې بې‌نظیر بوټو د قتل ۱۱مه کلیزه ده.

د پاکستان پخوانۍ صدراعظمه، بې‌نظیر بوټو د ۲۰۰۷ میلادي کال د ډسمبر په ۲۷مه نېټه ووژل شوه.

د روسیې په خبروفسک ښار چاودنه کې یو تن وژل شوی

د روسیې رسنۍ وايي چې د هغه هېواد په لیرې ختیځ کې د لاسي بم په چاودنه کې یو وګړی وژل شوی او درې تنه زخمیان شوي دي.

د خبروفسک ښار چارواکو ویلي چې مشکوک وګړي په یوه دفتر کې غلا کوله او لاسي بم چې ورسره و، انفجار کړی دی.

په خپله مشکوک د پېښې په ځای کې وژل شوی او زخمیان روغتون ته لېږدول شوي دي.

په زخمیانو کې دوه ښځې دي.

ولسمشر ټرمپ په جرمني کې هم له امریکایي ځواکونو سره ولیدل

ولسمشر ټرمپ په جرمني کې له امریکايي سرتېرو سره

د امریکا ولسمشر ډونالد ټرمپ وروسته تر دې چې پرون په یوه ناڅاپي سفر عراق ته لاړ او هلته‌یې له امریکایي پوځیانو سره ولیدل، بېرته واشنګټن ته په لاره نن په جرمني کې د امریکایي ځواکونو په یوه اډه کې تم شو او هلته‌یې هم له امریکایي ځواکونو سره ولیدل.

د ټرمپ الوتکه د تېلو د اخیستو لپاره د جرمني د رامشټاین په هوایي اډه کې راښکته شوه.

په یو شمېر تصویرونو کې لیدل کېږي چې ټرمپ له یو شمېر سرتېرو سره روغبړ کوي.

ولسمشر ټرمپ پرون د بغداد په لوېدیځ کې د الاسد په نوم هوایي اډې ته تللی و.

په‌دغه سفر کې له ولسمشر ټرمپ سره د هغه مېرمن میلانیا هم ملګرې ده.

تر دې وړاندې پر ډونالد ټرمپ له‌دې کبله انتقادونه کېدل چې ولسمشرۍ ته تر رسېدو راهیسې یې په هېڅ جګړه‌ییزه سیمه کې د خپلو ځواکونو لیدنه نه‌ده کړې.

شااوخوا پنځه زره امریکایي پوځيان په عراق کې دېره دي چې د اسلامي دولت ډلې یا داعش په وړاندې جګړه کې د عراق د سیمه‌ییزو امنیتي ځواکونو ملاتړ کوي.

ولسمشر ټرمپ پرون وویل چې له عراقه د خپلو پوځیانو د کمولو پلان نه‌لري او له عراقه کولای شي په سوریه کې د داعش وسله‌والو پر وړاندې د بریدونو لپاره د یوې اډې په توګه کار واخلي.

ټرمپ تېره اوونۍ اعلان وکړ چې له سوریې دوه زره امریکایي سرتېري باسي.

د بلوڅانو ازادي بخښونکي غورځنګ تأیید کړه چې یو مشر یې وژل شوی

ارشیف، په کراچۍ کې د چین پر قونسلګرۍ شوې حمله

د بلوڅانو ازادي بخښونکي غورځنګ تأیید کړه چې یو مشر یې چې په کراچۍ کې د چین پر قونسلګرۍ د وروستۍ حملې طراح بلل شوی، وژل شوی دی.

د بلوڅانو د ازادي بخښونکي غورځنګ ویاند جیاند بلوچ د چهارشنبې په ورځ «۱۳۹۷ کال د مرغومې ۰۵» په یوه خپاره کړي بیان کې ویلي چې د دې ډلې مشر اسلم بلوچ او د هغه پنځه ملګري په یوه چاودنه کې چې ځای یې نه‌دی ښودلی وژل شوي.

خو افغان چارواکو ویلي چې وړمه ورځ د کندهار په عینو مېنه کې په یوې ځان‌وژونکې حمله کې د بلوڅانو یو کور په نښه شوی و.

د بلوڅ بېلتون‌پالو مشر او ملګري یې وروسته له هغې وژل کېږي چې تېره میاشت درې وسله‌والو په کراچۍ کې د چین پر قونسلګرۍ حمله کړې وه چې په نتیجه کې یې درې واړه برید کوونکي، دوه پولیس او دوه ملکیان ووژل شول.

د پاکستان د بهرنیو چارو وزیر په مسکو کې له خپل روسي سیال سره ولیدل

د پاکستان د بهرنیو چارو وزیر په مسکو کې له خپل روسي سیال سرګي لاوروف سره د لیدنې پر مهال

د پاکستان د بهرنیو چارو وزیر د چهارشنبې په ورځ «۱۳۹۷ کال د مرغومې ۰۵» په مسکو کې له خپل روسي سیال سره ولیدل.

شاه محمود قریشي له سرګي لاوروف سره د خبرو پر مهال روسیه د پاکستان یو مهم شریک وباله او د سیمې د امنیت په برخه کې یې د دغه هېواد د رول ستاینه وکړه.

ښاغلي قریشي همداراز د افغانستان ستونزو د هواري لپاره د غونډې د جوړېدو په برخه کې د مسکو د هڅو مننه وکړه.

مسکو د نومبر په نهمه نېټه د افغانستان د سولې په اړه د غونډې کوربه‌و چې د امریکا او پاکستان په ګډون څه باندې ۱۰ هېوادونو ګډون کړی وو.

د روسیې د بهرنیو چارو وزیر سرګي لاوروف ویلي چې له شاه محمود قریشي سره د پرونیو خبرو عمده موضوع افغانستان و.

ډونالد ټرمپ په عراق کې د امریکایي سرتېرو لیدنې ته ورغی

ډونالد ټرمپ په عراق کې د امریکایي سرتېرو څخه د لیدنې پر مهال

د امریکا ولسمشر ډونالد ټرمپ په یوه نااعلان شوي سفر په عراق کې د امریکایي سرتېرو لیدنې ته ورغی.

سپینې ماڼۍ د ډسمبر په ۲۶مه اعلان وکړ چې ولسمشر ټرمپ د بغداد په لوېدیځ کې د الاسد په نوم هوایي اډې ته ورسېد.

نوموړی تر دې یوه ورځ دمخه له واشنګټنه روان شوی و.

په‌دغه سفر کې د ولسمشر ټرمپ مېرمن میلانیا ټرمپ هم د ده ملګرې ده.

تر دې وړاندې پر ډونالد ټرمپ له‌دې کبله انتقادونه کېدل چې ولسمشرۍ ته له رسېدو راهیسې یې په هېڅ جګړه‌ییزه سیمه کې د خپلو ځواکونو لیدنه نه‌ده کړې.

ډونالد ټرمپ په اکټوبر کې ویلي و چې تصور نه‌کوي دا لیدنه دومره لازمه وي.

شااوخوا پنځه زره امریکایي پوځيان په عراق کې دېره دي چې د اسلامي دولت ډلې یا داعش پر وړاندې جګړه کې د عراق د سیمه‌ییزو امنیتي ځواکونو ملاتړ کوي.

ولسمشر ټرمپ د ډسمبر په ۲۶مه وویل چې له عراقه د خپلو پوځیانو د کمولو پلان نه‌‌لري او له عراقه کولای شي په سوریه کې د داعش وسله‌والو پر وړاندې د بریدونو لپاره د یوې اډې په توګه کار واخلي.

د اوکراین ولسمشر په‌دغه هېواد کې پوځي حالت ختم کړ

آرشیف، د اوکراین ولسمشر پترو پروشنکو په کیف کې د یوې خبري غونډې پر مهال

د اوکراین ولسمشر په‌دغه هېواد کې پوځي حالت ختم کړ.

پترو پروشنکو د ډسمبر پر ۲۶مه په کیف کې د اوکراین د پوځي کابینې په غونډه کې وویل:

"سر له دوو بجو پوځي حالت ختمېږي. دا زما اصولي پرېکړه وه چې د هېواد د روان امنیتي وضعیت د ټولو برخو د ارزونې لپاره مې کړې وه."

وروسته له هغه چې روسیې درې اوکرایني کښتۍ او د هغو ۲۳ تنه عمله د کرچ تنګي ته نږدې ونیولې، د اوکراین ولسمشر د نومبر پر ۲۶مه په هغه هېواد کې پوځي حالت اعلان کړ.

دا پوځي حالت د ۳۰ ورځو لپاره د روسي پلوه بېلتون غوښتونکو تر واک لاندې سیمو په شمول د اوکراین په ۱۰ سیمو کې اعلان شوی وو.

په چین کې د یوه پېژندل شوي وکیل محاکمه پیل شوه

د چین ملي بیرغ

په چین کې د وانګ ګوانګژانګ په نوم د یوه پېژندل شوي وکیل محاکمه نن د ډېسمبر په ۲۶مه تر شدیدو امنیتي ترتیباتو لاندې پیل شوه.

هغه درې کاله مخکې په چین کې د بشري حقونو پر مدافعانو د حکومت د کنټرول د کړۍ له تنګېدو سره سم ونیول شو.

د وانګ د محاکمې غونډه د چین د شمالي ښار تیانجین د ښاروالۍ په تالاره کې وه.

رپوټونه وايي چې په ملکي جامو کې امنیتي کسان د دې سیمې شااوخوا ته ځای پر ځای شوي وو.

وانګ ګوانګژانګ ۴۲ کلن دی.

پر هغه د حکومت د تخریب تور لګېدلی چې لږترلږه سزا يې عمري بند دی.

هغه په ۲۰۰ وکیلانو او قانونپوهانو کې و چې د چین حکومت په ۲۰۱۵ میلادي کال کې ونیول.

د روسیې یوې محکمې یو بلاګ لیکونکی په شپږ کاله بند محکوم کړ

د روسیې ملي بیرغ

د روسیې یوې محکمې یو بلاګ لیکونکی الکساندر والوف نن د ډېسمبر په ۲۶مه په شپږ کاله بند محکوم کړ.

الکساندر والوف د روسیې د پارلمان د استازو مجلس له یوه غړي د ۴۳۰۰ ډالرو د اخاذې په تور نیول شوی و.

خو الکساندر والوف د بې ګناهۍ ادعا کړې ده.

د هغه وکیل ویلي چې د محکمې پرېکړه ظالمانه وه او سیاسي اړخ لري.

الکساندر والوف د بلاګسوچي په نوم د یوې انټرنيټي پاڼې اېډېټر و خو دا پاڼه نور فعالیت نه کوي.

محکمې پر هغه لس زره ډالر جریمه هم لګولې ده.

د پاکستان په کراچۍ کې وسله‌والو یو پېژندل شوی سیاستوال وژلی

د پاکستان ملي بیرغ

د پاکستان په کراچۍ ښار کې پرون ماښام وسله‌والو کسانو پر یوه پېژندل شوي سیاستوال علي رضا عابدي ډزې وکړې او ويې‌واژه.

علي رضا عابدي ۴۶ کلن و او په پیل کې زخمي شوی و، خو وروسته‌یې په روغتون کې ساه ورکړه.

د کراچۍ د پولیسو یوه مشر جاوید علم اودو خبریالانو ته وویل چې حمله کوونکي د پېښې له ځایه وتښتېدل.

د حملې مسؤلیت چا نه‌دی اخیستی.

پولیسو ویلي چې د پېښې ځای یې کلابند کړی دی.

عابدي مخکې د متحده قومي حرکت ګوند مشر و او په ۲۰۱۳ میلادي کال کې د پاکستان ملي اسامبلۍ ته هم ټاکل شوی و.

متحده قومي حرکت ګوند نن د ډېسمبر ۲۶مه پر پولیسو غږ وکړ چې د هغه قاتلان ونیسي.

امریکا: د ګواتمالا يو ٨ کلن هلک نيو مکسيکو کې مړ شوى

د امريکا په متحده ايالاتو کې چارواکي وايي، د ګواتمالا يو ٨ کلن هلک د جنوب لوېديځ ايالت نيو مکسيکو په يوه دولتي توقيف‌ځاى کې مړ شوى دى.

امريکايي چارواکو پرون وويل، په دغه ماشوم کې تېره دوشنبه د شديدې ناروغۍ نښې ليدل شوې وې چې وروسته‌يې د شپې په روغتون کې ساه ورکړه.

د ګواتمالا د بهرنيو چارو وزارت په حواله دغه ماشوم او پلار يې اته ورځې مخکې د تکزاس ايالت د ايلپاسو «El Paso» له لارې د امريکا خاورې ته ننوتلي وو.

د دوى په خبره دغه ماشوم او پلار يې د امريکايي چارواکو له‌خوا د نيو مکسيکو ايالت الاموګوردو ته ولېږدول شول.

د دغه ماشوم او د هغه د پلار د هويت په اړه تر اوسه څه نه‌دي ويل شوي.

دا دوهم ماشوم دى چې روانه مياشت د امريکا په يوه توقيف‌ځاى کې ساه ورکوي.

دا په‌داسې حال کې ده چې د سرحدي امنيت او د مهاجرت د مسايلو له کبله په امريکا کې کړکېچ زيات شوى دى.

سانا: د سوريې هوايي مدافع د اسرائيل ګڼ ميزائيلونه له‌منځه وړي

د سوريې دولتي خبري اژانس وايي، د دغه هېواد هوايي مدافع د يو لړ حملو په نتيجه کې د اسرائيل ګڼ ميزائيلونه له‌منځه وړي دي.

ويل شوي په‌دغو حملو کې د سوريې درې سرتېري ټپيان شوي دي.

د سوريې دولتي خبري اژانس سانا پرون راپور ورکړ چې اکثريت میزائيل چې د اسرائيل د جېټ الوتکو له‌خوا توغول شوي وو، اهدافو ته تر رسېدو مخکې يې مخه ونيول شوه.

اژانس د يوې پوځي سرچينې په حواله راپور ورکړى چې ويلي يې دي:

"زموږ هوايي مدافع د هغو ميزائيلو مخه ونيوله چې د لبنان له فضايي قلمرونو د اسرائيل د الوتکو له‌خوا توغول شوي وو. زياتره دغه توغندي هدفونو ته تر رسېدو مخکې لاندې غورځول شوي دي."

دغې سرچينې ويلي چې د وسلو يوه ډيپو ويشتل شوې او د سوريې درې سرتېري په دې حمله کې ټپيان شوي دي.

بل‌خوا د اسرائيل پوځ د خپل ټويټر په رسمي حساب کې يوازې دا ليکلي چې له سوريې د الوتکو ضد ميزائيل د توغولو په ځواب کې يې خپل هوايي مدافع سيستم فعال کړى دى.

په بريتانيا کې دېره د سوريې د بشري حقونو د څار اداره بيا وايي، دغه میزائيل چې د لبنان له فضا توغول شوي وو، د دمشق په جنوب لوېديځ کې يې لیرې پرتې سيمې ويشتلې دي.

د عراق په تلعفر ښار کې داعش د موټر بم برید مسؤلیت منلی

په عراق ښار کې چاودنه

په عراق کې د داعش وسله‌والې ډلې په تلعفر ښار کې د موټر بم برید مسؤلیت منلی دی.

د سې شنبې «۱۳۹۷ کال د مرغومې ۰۴» د ورځې په‌دې برید کې دوه کسان ووژل شول او ۱۱ نور ټپیان شول.

عراقي چارواکي وايي، چاودېدونکي مواد په یوه بار وړونکي موټر کې ځای پر ځای شوي وو.

د داعش وسله‌والې ډلې په ټولنیزو رسنیو کې خپاره شوي پیغام کې د دې برید مسؤلیت منلی.

وروسته له هغې چې د ۲۰۱۷ میلادي کال په اګسټ میاشت کې د تلعفر ښار د داعش له وسله‌والې ډلې پاک شو، د سې شنبې «۱۳۹۷ کال د مرغومې ۰۴» د ورځې برید لومړنی برید و چې په‌دې ښار کې یې خلکو ته مرګ ژوبله واړوله.

د لیبیا په طرابلس کې انتحاري حملو ۳ تنه وژلي او ۲۰یې ټپیان کړي

د لیبیا د بهرنیو چارو د وزارت له ودانۍ پورته کېدونکې لوګي

د اسلامي دولت نومې ډلې يا داعش د ليبيا د بهرنيو چارو وزارت پر ودانۍ د پرونۍ حملې مسؤليت واخيست.

په پلازمېنه طرابلس کې د دې حملې په نتيجه کې ٣ کسان ووژل شول او شااوخوا ٢٠ تنه نور ټپيان شول.

پرون د سې شنبې ورځې «۱۳۹۷ کال د مرغومې ۰۴» حمله په يوې موټربم چاودنې پيل شوه، وروسته درېيو وسله‌والو ډزې پيل کړې او هڅه‌يې وکړه ودانۍ ته ننوځي.

دوه حمله کوونکي د وزارت ودانۍ ته په ننوتلو او هلته په ځان پورې د تړلو منفجره موادو په چوولو بريالي شول، خو درېيم تن له امنيتي ساتونکو سره د ډزو په تبادله کې ووژل شو.

د سايټ «SITE» په نوم استخباراتي ډله چې د افراطي سازمانونو انلاين فعاليتونه څاري، وايي داعش د دې حملې مسؤليت منلى دى.

په ليبيا کې د ملګرو ملتونو مرستندویه مأموريت دغه حمله غندلې ده.

د بلاروس ولسمشر په مسکو کې له خپل روسي سیال سره کتلي

د بلاروس ولسمشر الکساندر لوکاشنکو له خپل روسي سیال ولادیمیر پوتین سره

د بلاروس ولسمشر الکساندر لوکاشنکو په مسکو کې له خپل روسي سیال ولادیمیر پوتین سره کتلي دي.

د راپورونو له مخې دواړو مشرانو د څلورو ساعتونو لپاره خپلو کې خبرې کړي.

ویل کېږي چې د پوتین او لوکاشنکو بحثونه د انرژۍ په بیه، سوداګرۍ او دوه اړخیزو مسئلو راڅرخېدل.

لوکاشنکو خبریالانو ته ویلي، تمه‌یې دا ده چې د ولسمشر پوتین سره به د انرژۍ د بیې په اړه چې د روسیې او بلاروس روابط‌یې اغېزمن کړي یو توافق ته ورسېږي.

روسیې د روان میلادي کال په پیل کې بلاروس ته د نفتو او ګازو پر صادراتو مالیه لوړه کړه چې د هغه هېواد انتقادونه‌یې راپورته کړل.

خو مسکو وویل، بلاروس تر اوسه پورې د روسیې د تېلو او ګازو بیه تر نورو هېوادونو کمه ورکوي او باید چې په دې برخه انتقاد ونه‌کړي.

د بلاروس د ولسمشر یو ویاند د سې شنبې په ورځ وویل، الکساندر لوکاشنکو او ولادیمیر پوتین سلا شوي چې ډېر ژر به بیا سره وګوري او د تېلو او ګازو د بیې په اړه به یو توافق ته ورسېږي.

یو ایراني الاصل پروفیسور له زندانه تر خوشې کېدو وروسته لندن ته ورسېد

یو ایراني الاصل پروفیسور عباس عدالت په ایران کې له زندانه تر خوشې کېدو وروسته نن لندن ته ورسېد.

نوموړی په تېره اپرېل میاشت کې د ایران د حکومت ضد په یوې نفوذي شبکه کې د غړیتوب په تور زنداني شوی و.

تر دې مخکې د ایران یوې خبري رسنۍ ویلي وو چې عباس عدالت چې د لندن په امپیریال پوهنځي کې د کمپیوټر ساینس او ریاضیاتو پروفیسور دی، د هغو بریتانوي جاسوسانو له ډلې څخه دی چې په ایران کې نیول کېږي.

په ایران کې د زنداني نورو دوه تابعیته اشخاصو په ډله کې ایراني الاصله مرستندویه کارکوونکې نازنین زغاري هم ده چې د دسیسې جوړولو په تور په پنځه کاله بند محکومه شوې ده.

ترکیه: ډېر ژر به د فرات سیند ختیځې غاړې ته ځان ورسوو

ترکیه وايي، دا هېواد به ډېر ژر د فرات سیند ختیځې غاړې ته چې د سوريې په شمال کې ده، ځان ورسوي.

د ترکيې د بهرنیو چارو وزیر مولود چاووش اوغلو نن وویل، کله چې يې هېواد وايي چې سوريې ته ځواکونه استوي، نو بیا يې دا کار کوي.

تر دې یوه ورځ مخکې ترکيې ویلي وو چې له سوريې سره پر پوله خپل ځواکونه زیاتوي.

د ترکيې ولسمشر په دې ورستیو کې ګواښ کړی دی چې د سوريې په شمال کې به د کرد وسله والو پر ضد چې انقره يې ترورېستان ګڼي، پراخ پوځي عملیات وکړي.

خو ترکیې وروسته له هغې د عملیاتو پلان وځنډاوه چې امریکا له سوريې د خپلو سرتېرو ایستل اعلان کړل.

په اندونیزیا کې د سونامي څپو له امله د مړو شمېر ۴۲۹ ته لوړ شوی

په اندونیزیا کې د شنبې د ورځې د سونامي څپو له امله د مړو شویو شمېر ۴۲۹ ته لوړ شوی دی.

د ژغورنې ډلې وايي چې په دې طبیعي پېښه کې ۱۲۸ کسان لا درکه دي او څه د پاسه ۱۴ سوه نور ژوبل دي.

د اندونیزیا له طبیعي پېښو سره د مبارزې اداره وايي، ښايي د تلفاتو شمېر تر دې هم لوړ شي.

د اندونیزیا ولسمشر له ټولو حکومتي ادارو غوښتي دي چې سونامي ځپلو خلکو ته بېړنۍ مرستې ورسوي.

د اندونیزیا په سوماترا او جاوا ټاپوګانو کې سلګونه کورونه، هوټلونه او نورې ودانۍ د څونامي څپو له امله چې ښايي د اور غورځونکي غره د پارېدو له امله پورته شوې، تخریب کړي دي.

پاپ فرانسېس د پرمختللې نړۍ له خلکو غوښتي چې ساده ژوند غوره کړي

د نړۍ د کاتولیکانو مذهبي مشر پاپ فرانسېس د پرمختللو هېوادونو له خلکو غوښتي دي چې ساده او له مادیاتو لیرې ژوند غوره کړي.

پاپ فرانسېس پرون دوشنبه په واتیکان کې د عیسیویانو د مذهبي جشن کرېسمس په مناسبت په وینا کې د شتمنو او بې‌وزلو ترمنځ واټن هم وغانده.

هغه وویل، راځئ له ځانه وپوښتو چې ایا د ژوند لپاره دومره دنیايي شیانو او پېچلو نسخو ته اړتیا لرو؟

ټاکل شوې چې پاپ به نن سې شنبه د ډسمبر په ۲۵مه نېټه د سینت پیټرز کلیسا له بالکن څخه د کرېسمس جشن په مناسبت خپله اصلي وینا واوروي.

پاپ فرانسېس بې‌وزلو خلکو ته پاملرنه د خپل مذهبي مأموریت په یوه مهم اصل اړولی دی.

د ترکیې ولسمشر خپل امریکايي سیال ته ترکیې ته د سفر بلنه ورکړه

د ترکیې ولسمشر رجب طیب اردوغان له خپل امریکايي سیال ډونالد ټرمپ سره په بروکسل کې.

د ترکیې ولسمشر رجب طیب اردوغان خپل امریکايي سیال ډونالد ټرمپ ته په راروان ۲۰۱۹ میلادي کال کې ترکیې ته د سفر بلنه ورکړې ده.

د سپینې ماڼۍ یوه ویاند پرون وویل، که څه هم ترکیې ته د ټرمپ د سفر ځانګړی پلان نه‌دی جوړ شوی، خو ولسمشر په راتلونکي کې له ترکي چارواکو سره خبرو ته چمتو دی.

له سوریې څخه د امریکايي ځواکونو د ایستلو په اړه د ولسمشر ټرمپ له اعلان وروسته د سوریې کړکېچ، په استانبول کې د سعودي عربستان په قونسلګرۍ کې د سعودي ژورنالېست جمال خاشقجي قتل او ترکیې ته په امریکا کې د دېره ترک دیني عالم فتح‌الله ګولېن سپارل د ناټو د دې دوو غړو په اړیکو کې تر ټولو مهم مسایل دي.

دا په‌داسې حال کې ده چې د اردوغان یوه ویاند پرون وویل، د امریکا د پوځ چارواکي به په روانه اوونۍ کې ترکیې ته ولاړ شي، څو له سوریې څخه د امریکايي ځواکونو د وتلو پر جزئیاتو له چارواکو سره بحث وکړي.

د ایران پخوانی قاضي‌القضات ایت‌الله محمد هاشمي شاهرودي مړ شوی

د ایران پخوانی قاضي‌القضات ایت‌الله محمد هاشمي شاهرودي

راپورونه وايي چې د ایران یو ځواکمن ملا او د دې هېواد پخوانی قاضي‌القضات ایت‌الله محمد هاشمي شاهرودي له اوږدې ناروغۍ وروسته په تهران کې مړ شوی.

۷۰ کلن شاهرودي په جرمني کې تر درملنې لاندې و، خو وروسته له هغې تهران ته ستون شو چې یو شمېر فعالانو له جرمني څارنوالانو وغوښتل چې د نوموړي له‌خوا د تأیید شوي اعدام سزاګانو په اړه دې څېړنې وکړي.

دې فعالانو په ایران کې شوي اعدامونه د بشر ضد جنایت بللي و.

محمد هاشمي شاهرودي د ایران د مذهبي مشر ایت‌الله علي خامنه‌اي نږدې متحد و او د نوموړي د احتمالي ځای ناستي په توګه یادېده.

شاهرودي له ۱۹۹۹ میلادي کال څخه تر ۲۰۰۹ میلادي کال پورې د ایران د قضايي قوې مشري کوله.

په اندونیزیا کې د سمندري توپان له کبله د مړو شمېر ۳۷۳ ته ورسېد

د اندونیزیا سوماترا سیمه

په اندونیزیا کې د وروستۍ سونامي له کبله د مړو شمېر ۳۷۳ کسانو ته رسېدلی دی.

د دې هېواد د طبیعي افاتو ملي اداره وايي، تر ۱۴۰۰ زیات کسان په دې سونامي کې ټپیان شوي دي.

د شنبې په ورځ د سونامي څپو د دې هېواد د سوماترا او جاوا ټاپوګان وځپل.

د ژغورنې کارکوونکي لاهم په ځپل شویو سیمو کې د ژوندي پاتې شویو کسانو لټون کوي.

تر دې مخکې د اندونیزیا د طبیعي افاتو د ملي ادارې ویاند ویلي و:

"دوی شک لري چې یو شمېر قربانیان لا هم د هغو ماتو ګوډو لاندې پاتې دي چې د سونامي څپو له ځانه سره وړي دي."

د اندونيزيا ولسمشر جوکو ویدودو له قربانیانو سره غمرازي کړې او حکومتي ادارو ته‌یې امر کړی چې د دې ناورین په وړاندې چټک اقدامات وکړي.

واشنګټن: شمالي کوریا دې د اُټو وارمبیر کورنۍ ته تاوان ورکړي

اُټو وارمبیر

په واشنګټن ډي سي کې د امریکا یوې محکمې شمالي کوریا ته حکم کړی چې د اُټو وارمبیر «Otto Warmbier» په نوم د هغه زده‌کوونکي کورنۍ ته ۵۰۱ میلیون ډالر تاوان ورکړي، څوک چې په شمالي کوریا کې له زندانه تر خوشې کېدو لږ وروسته مړ شو.

راپورونه وايي چې د ډسمبر په ۲۴مه نېټه د امریکايي محکمې دا پرېکړه تر ډېره سمبولیکه ده، ځکه داسې کوم مېکانیزم نه‌شته چې پیونګ یانګ د دې تاوان ورکولو ته اړ کړي، خو څارونکي وايي، د محکمې دا پرېکړه به د ولسمشر ټرمپ هغه هڅې نورې هم پېچلې کړي چې غواړي د امریکا او شمالي کوریا ترمنځ اړیکې بهتره شي.

اُټو وارمبیر د ۲۰۱۶ میلادي کال په جنورۍ کې شمالي کوریا ته د یوې ډلې سیاحانو سره د سفر پر مهال نیول شوی و.

نوموړی وروسته له هغې چې له خپل هوټله د یو تبلیغاتي پوسټر په پټولو تورن شو په ۱۵ کاله بند محکوم کړای شو.

نوموړی د ۲۰۱۷ میلادي کال په جون کې خوشې او بېرته امریکا ته واستول شو.

خو هغه امریکا ته په ناوړه روغتیايي وضعیت کې ورسېد او تر رسېدو شپږ ورځې وروسته مړ شو.

مېلر: تر اوسه مو د امریکایي ځواکونو د وتلو امر نه دی تر لاسه کړی

په افغانستان کې د ناټو او امریکایي ځواکونو عمومي قوماندان سکاټ مېلر

په افغانستان کې د ناټو او امریکایي ځواکونو عمومي قوماندان وایي، تر اوسه یې له دې هېواده د یو شمېر امریکایي ځواکونو د وتلو امر نه دی تر لاسه کړی.

امریکایي جنرال سکاټ مېلر چې پرون یې د ننګرهار له والي سره په کتنه کې څرګندونې کولې، پر دې ټینګار وکړ چې که د ځواکونو د وتلو امر تر لاسه کړي، هم دوی بیا هم کولای شي چې په دې هېواد کې په موجوده نړیوالو ځواکونو خپل ماموریت مخ ته یوسي.

څو ورځې مخکې رسنیو د امریکایي چارواکو له قوله خبر ورکړ چې ولسمشر ډونالد ټرمپ غواړي چې له افغانستانه د امریکايي ۱۴ زره سرتېرو نیمایي اووه زره به یې له دې هېواده وباسي.

د میانمار محکمې د روېټرز د دوو خبریالانو د استېناف دلایل واورېدل

په میانمار کې د محرمو اسنادو د ترلاسه کولو په تور تورن دوه خبریالان ۳۲ کلن وا لون او ۲۸ کلن کیاو سو یو

د میانمار یا پخوانۍ برما یوې محکمې د روېټرز خبري اژانس د هغو دوو خبریالانو د استېناف د غوښتنې په اړه نن په غونډه کې د دواړو لورو دلایل واورېدل چې د امنیتي عملیاتو په جریان کې د محرمو اسنادو د ترلاسه کولو په تور هر یو په اوو کلونو بند محکوم شوی دی.

۳۲ کلن وا لون او ۲۸ کلن کیاو سو یو د ۲۰۱۷ میلادي کال په ډيسمبر کې ونیول شول او روان کال په سپټمبر کې د دولتي محرمو اسنادو د لاس ته راوړلو په تور ورته دغه سزا ورکړل شوه.

د دغې قضیې پر سر ډیپلوماتانو او د بشري حقونو مدافعانو سخت انتقادونه کړي دي.

د دواړو خبریالانو مدافع وکیلانو تېره میاشت د محکمې د فیصلې په وړاندې د استېناف غوښتنه وکړه او ویې ویل چې دغه شواهد چې د پولیسو له خوا وړاندې شوي، د هغوی جرم نشي ثابتولای.

محکمې نن د دغو خبریالانو د مدافع وکیلانو او څارنوالانو دلایل واورېدل، خو په دې اړه چې کله به وروستۍ پرېکړه کوي، نور جزیات ورنه کړل.

د روېټرز اژانس دغو خبریالانو د میانمار د پوځ له خوا د هغو ځپونکو عملیاتو په اړه راپورونه ورکول چې په نتیجه کې یې شااوخوا اووه سوه زره روهینګیا مسلمانان بنګله دېش ته تښتېدلي دي.

نور راوښيه

XS
SM
MD
LG