د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۶:۱۵

نړۍ

مېلر: تر اوسه مو د امریکایي ځواکونو د وتلو امر نه دی تر لاسه کړی

په افغانستان کې د ناټو او امریکایي ځواکونو عمومي قوماندان سکاټ مېلر

په افغانستان کې د ناټو او امریکایي ځواکونو عمومي قوماندان وایي، تر اوسه یې له دې هېواده د یو شمېر امریکایي ځواکونو د وتلو امر نه دی تر لاسه کړی.

امریکایي جنرال سکاټ مېلر چې پرون یې د ننګرهار له والي سره په کتنه کې څرګندونې کولې، پر دې ټینګار وکړ چې که د ځواکونو د وتلو امر تر لاسه کړي، هم دوی بیا هم کولای شي چې په دې هېواد کې په موجوده نړیوالو ځواکونو خپل ماموریت مخ ته یوسي.

څو ورځې مخکې رسنیو د امریکایي چارواکو له قوله خبر ورکړ چې ولسمشر ډونالد ټرمپ غواړي چې له افغانستانه د امریکايي ۱۴ زره سرتېرو نیمایي اووه زره به یې له دې هېواده وباسي.

د میانمار محکمې د روېټرز د دوو خبریالانو د استېناف دلایل واورېدل

په میانمار کې د محرمو اسنادو د ترلاسه کولو په تور تورن دوه خبریالان ۳۲ کلن وا لون او ۲۸ کلن کیاو سو یو

د میانمار یا پخوانۍ برما یوې محکمې د روېټرز خبري اژانس د هغو دوو خبریالانو د استېناف د غوښتنې په اړه نن په غونډه کې د دواړو لورو دلایل واورېدل چې د امنیتي عملیاتو په جریان کې د محرمو اسنادو د ترلاسه کولو په تور هر یو په اوو کلونو بند محکوم شوی دی.

۳۲ کلن وا لون او ۲۸ کلن کیاو سو یو د ۲۰۱۷ میلادي کال په ډيسمبر کې ونیول شول او روان کال په سپټمبر کې د دولتي محرمو اسنادو د لاس ته راوړلو په تور ورته دغه سزا ورکړل شوه.

د دغې قضیې پر سر ډیپلوماتانو او د بشري حقونو مدافعانو سخت انتقادونه کړي دي.

د دواړو خبریالانو مدافع وکیلانو تېره میاشت د محکمې د فیصلې په وړاندې د استېناف غوښتنه وکړه او ویې ویل چې دغه شواهد چې د پولیسو له خوا وړاندې شوي، د هغوی جرم نشي ثابتولای.

محکمې نن د دغو خبریالانو د مدافع وکیلانو او څارنوالانو دلایل واورېدل، خو په دې اړه چې کله به وروستۍ پرېکړه کوي، نور جزیات ورنه کړل.

د روېټرز اژانس دغو خبریالانو د میانمار د پوځ له خوا د هغو ځپونکو عملیاتو په اړه راپورونه ورکول چې په نتیجه کې یې شااوخوا اووه سوه زره روهینګیا مسلمانان بنګله دېش ته تښتېدلي دي.

نواز شریف په ۷ کاله بند محکوم شو

د پاکستان پخوانی صدراعظم نواز شریف

د پاکستان د فساد ضد محکمې د پاکستان پخوانی صدراعظم نوازشریف د خپلو عوایدو د سرچینو د پټ ساتلو په خاطر په اوو کلونو بند محکوم کړ.

په اسلام اباد کې محکمې نن دغه حکم د هغه پرضد د فساد د تورونو په دوو مواردو کې اعلان کړ.

هغه ته له دوهم توره برأت ورکړل شو.

شریف پر ځان لګول شوي تورونه رد کړي او ویلي یې دي چې کوم غلط کار یې نه دی کړی.

تر دې مخکې په جولای میاشت کې نوموړی په لندن کې د عصري اپارتمانونو د پیرلو په خاطر په لسو کلونو بند محکوم شوی و.

هغه د دغه حکم په اړه د استېناف غوښتنه کړې وه او په سپټمبر کې په ضمانت له بنده خوشې شوی و.

نواز شریف تېره کال د خپلې صدراعظمۍ په درېیمه دوره کې وروسته له هغې له دندې لېرې شو چې د پاکستان سترې محکمې هغه د دې مقام لپاره مناسب ونه باله.

د امریکا د دفاع وزارت: له سوريې د سرتېرو د ایستلو امر لاسلیک شوی

په سوریه کې د امريکايي ځواکونو یو ټانک

د امریکا د دفاع وزارت وايي، له سوريې څخه د سرتېرو د ایستلو امر لاسلیک شوی دی.

د متحده ایالاتو پوځ هم تأیید کړې ده چې له سوريې نه د ۲۰۰۰ امریکايي سرتېرو د ایستلو پلان لاسلیک شوی دی.

د امریکا ولسمشر د ډسمبر په ۱۹مه نېټه له سوريې څخه د امریکايي سرتېرو د ایستلو پرېکړه اعلان کړه او ویې ویل چې په سوریه کې داعش ځپل شوی دی او سرتېري بېرته ستنېږي.

د امریکا د کانګرس ډموکراټو او جمهوري غوښتونکو غړو او د واشنګټن نړیوالو متحدانو د ولسمشر ټرمپ پر دې پرېکړه انتقادونه کړي دي.

ځینو منتقدانو له سوريې نه د امریکايي سرتېرو د ایستلو پرېکړه په دغه هېواد کې له کُرد وسله‌والو سره خیانت بللی او یو شمېر نورو بیا ویلي دي چې دا به ایران او روسيې ته چې په سوریه کې فعال دي، بری ورکړي.

متحده ایالاتو په ۲۰۱۵ میلادي کال کې سوريې ته خپل ځمکني ځواکونه استولي وو.

ټرمپ، پاتريک شاناهان د دفاع وزارت د سرپرست وزير په توګه ونوماوه

آرشیف، د امریکا د دفاع وزارت سرپرست پاتریک شاناهان

د امريکا د متحده ايالاتو ولسمشر ډونالد ټرمپ د دفاع وزارت مرستيال پاتريک شاناهان «Patrick Shanahan» د سرپرست وزير په توګه ونوماوه.

ولسمشر ټرمپ پرون د ټويټر په يوه پيغام کې شاناهان د يوه «ښه استعداد لرونکي» شخص په توګه ستايلى دى.

ښاغلي ټرمپ ويلي چې پاتريک شاناهان به د جنورۍ له لومړۍ نېټې د دفاع وزير په توګه خپله دنده پر مخ بيايي.

شاناهان د جېمز مټېس پر ځاى د امريکا دفاع وزير ټاکل کېږي.

جېمز مټېس د ولسمشر د هغې پرېکړې له کبله تېره پنجشنبه استعفا وکړه چې له سوريې يې د امريکايي ځواکونو د ايستلو په اړه کړې ده.

ښاغلي مټېس ويلي چې د فبرورۍ مياشتې تر پایه به د واک له بې‌جنجاله انتقال سره د مرستې په هدف خپلې دندې ته دوام ورکړي.

د نسرين ستوده خاوند رضا خندان په ايران کې له توقيفه خوشې شوى

رضا خندان

د ايران د بشري حقونو د زنداني مدافع وکيلې نسرين ستوده خاوند رضا خندان په ايران کې له توقيفه خوشې شوى.

دا خبره د هغه مدافع وکيل محمد مقيمي پرون يکشنبه پر فېس‌بوک کړې ده.

د مقيمي په خبره د خندان تر خوشې کېدو وروسته هم مېرمن ستوده او هم بل فعال فرهاد ميثمي خپل غذايي اعتصاب پاى ته رسولى دى.

دوى دواړو د خندان د ملاتړ لپاره په زندان کې غذايي اعتصاب پيل کړى و.

خندان د سپټمبر پر څلورمه وروسته له هغې ونيول شو چې په فېس‌بوک کې يې په ايران کې له بشري حقونو د سرغړونو په اړه شکايت وکړ.

نتانیاهو: په سوریه کې د ایران حضور پرضد اقداماتو ته دوام ورکوو

بنیامین نتانیاهو

د اسرائیل صدراعظم بنیامین نتانیاهو وايي، له سوريې څخه د امریکايي سرتېرو د ایستلو په اړه د ولسمشر ډونالد ټرمپ پرېکړه به په سوریه کې د ایران د دایمي حضور د مخنیوي لپاره د اسرائیل هڅې بندې نه‌کړي.

نتانیاهو پرون یکشنبه وویل، موږ به په سوریه کې د ایران د پوځي حضور پر ضد خپلو اقداماتو ته دوام ورکړو او دغلته به خپل فعالیتونه پراخ کړو.

له سوريې څخه د ۲ زره امریکايي سرتېرو د ایستلو په اړه د ولسمشر ډونالد ټرمپ پر پرېکړه سخت انتقادونه شوي دي.

زیاتره منتقدان په دې باور دي چې له سوريې څخه د امریکايي سرتېرو ایستل په‌دې هېواد کې ایران او روسيې ته د بري ورکولو په معنی ده.

متحده ایالاتو په ۲۰۱۵ میلادي کال کې سوريې ته ځمکني ځواکونه واستول.

د لندن محکمه: روسى تجار شماتکو دې روسيې ته نه‌سپارل کېږي

آرشیف، روسى تجار الیکسي شماتکو

د لندن د عدالت عالي محکمې حکم ورکړ چې روسى تجار الیکسي شماتکو دې روسيې ته نه‌سپارل کېږي.

دغې محکمې پرون په يوه حکم کې ويلي، که شماتکو روسيې ته سپارل کېږي، په داسې شرايطو کې به په توقيف کې وي چې د بشري حقونو لپاره د اروپايي کنوانسيون په درېيمه ماده کې د ده له درج شويو حقونو سره په ټکر کې وي.

ښاغلى شماتکو د روسيې په پينزا ښار کې د اداري فساد د تورونو له کبله تر تعقيب لاندې دى.

دى وايي، دغه دوسيه ورته ځکه پرانیستل شوې چې ده د روسيې د امنيتي خدماتو د فدرال ادارې يوه عالي رتبه چارواکي ته په خپل تجارت کې ونډه نه‌ده ورکړې.

الیکسي شماتکو په ٢٠١٠ میلادي کال کې د اداري فساد له کبله په تعليقي بند محکوم شو.

دى وايي، د دې قضيې په تړاو د نيول کېدو پر مهال ډبول شوى او شکنجه شوى دى.

هغه په ٢٠١١ میلادي کال کې له روسيې څخه ووت او په ٢٠١٤ میلادي کال کې په بريتانيا کې د پناه درخواست وړاندې کړ.

په بامیان کې درې ټولګټې پروژې پرانیستل شوي

ارشیف/ د پرانیستلو مراسم

په بامیان ولایت کې پرون درې ټولګټې پروژې پرانیستل شوې دي.

د بامیان د والي ویاند عبدالرحمن احمدي ازادي راډیو ته وویل، د ۸۵ میلیونه افغانیو په لګښت دا پروژې د دې ولایت په ورس ولسوالۍ کې ترسره شوې دي.

د هغه په وینا په دې پروژو کې د یوه ۳۰ کېلو متره سړک بیارغونه، د یوه ۵ کېلو متره سړک او د یوه پول جوړول شامل دي.

د دې پروژو لګښت د بامیان ولایت د کلیو د پراختیا ریاست ورکړی دی.

امانوئل مکرون: د ټرمپ پر وروستۍ پرېکړه په ژوره توګه خواشينى یم

د فرانسې ولسمشر امانوئل مکرون

د فرانسې ولسمشر وايي، د امريکا د جمهور رئيس ډونالد ټرمپ پر وروستۍ پرېکړه په ژوره توګه خواشينى دى چې له سوريې څخه د امريکايي ځواکونو د وتلو په باب‌یې کړې ده.

امانوئل مکرون پرون يکشنبه په چاد کې يوه خبري کنفرانس ته وويل:

"ټول متحدان بايد پر يوه او بل اعتماد ولري."

د امريکا ولسمشر ډونالد ټرمپ تېره شنبه د خپلې پرېکړې په دفاع کې خپله خبره بيا تکرار کړله چې ګواکې په سوريه کې د اسلامي دولت ډلې يا داعش له ماتې سره مخامخ شوې ده.

د امريکا دفاع وزير جېمز مټېس د ولسمشر ټرمپ د دې پرېکړې له کبله تېره پنجشنبه استعفا وکړه.

تر دې دوه ورځې وروسته د داعش پر ضد د امريکا د تشکيل شوي نړيوال ائتلاف لپاره د واشنګټن ځانګړي استازي برېت مک‌ګُرک «Brett McGurk» هم استعفا وکړه.

ګڼو پوځي رهبرانو ويلي چې له سوريې څخه د امريکايي ځواکونو وتل به د سوريې له عرب او کُرد متحدانو سره خيانت وي.

په اندونیزیا کې د څونامې د څپو د مړو او ټپیانو شمېر زرو ته رسېږي

د اندونیزیا په یوه ټاپو کې د اتشفشان په نتیجه کې د څونامې د څپو له امله د مړو او ټپیانو شمېر شااوخوا زرو تنو ته ورسېد.

د اندونیزیا د طبعي پېښو په وړاندې د مبارزې د ادارې ویاند پوروو نوګروهو وویل، لږترلږه ۲۲۲ تنه مړه شوي، شااوخوا ۸۰۰ نور ژوبل شوي او ۲۸ تنه تر اوسه تری تم دي.

هغه وویل، باور کېږي چې د مرګ ژوبلو شمېر به تر دې ډېر وي، ځکه چې ټول قربانیان تر اوسه نه دي لېږدول شوي او ټولو روغتیایي مرکزونو هم د قربانیانو بشپړ فهرستونه نه دي وړاندې کړي.

د اندونیزیا د هواپېژندنې او جیولوژۍ په اداره کې ساینسپوهان په دې باور دي چې د انک کراکاتاو تر ټاپو لاندې اتشفشان به د څونامې سبب شوی وي چې له امله یې د اوبو څپو په دغه ټاپو کې سلګونه کورونه، هوټلونه او دولتي دفترونه لاندې کړل.

چارواکي وايي، له اتشفشانه ۲۴ دقیقې وروسته څونامې راغله.

د سږکال په سپټمبر کې د اندونیزیا په پالو ښار او سولاوسي ټاپو کې د څونامې او زلزلې له کبله تر دوه نیم زره زیات خلک مړه شول.

اکیهیټو د جاپان د امپراطور په توګه د خپلې زوکړې وروستۍ کلیزه لمانځي

د جاپان امپراطور اکیهیټو

د جاپان امپراطور اکیهیټو مخکې تر دې چې تقاعد وکړي، د یوه امپراطور په توګه د خپلې زوکړې وروستۍ کلیزه لمانځي.

په هغې ثبت شوې وینا کې چې نن خپره شوې، ۸۵ کلن امپراطور له جګړې وروسته له سوله ییزې لارې د خپل هېواد د کړاونو د لېرې کولو ستاینه کړې او د دې خبرې پر اهمیت یې ټینګار کړی چې ځوان نسل د دې هېواد پخوانی پوځي تاریخ هېر نه کړي.

هغه ویلي، مهمه ده چې هېر نه شي چې په دوهمه نړیواله جګړه کې ‌‌ډېرو کسانو خپل ژوند له لاسه ورکړی او له جګړې وروسته په دې هېواد کې سوله او سوکالي هم د جاپان د وګړو په بې حده قربانیو او نه ستړې کېدونکو هڅو تر لاسه شوې ده.

اکیهیټو چې د ۱۹۳۳ کال د ډيسمبر په ۲۳مه زېږېدلی، اعلان کړی چې د اپرېل له دېرشمې به له دغې دندې چې تر ډېره تشریفاتي ده، لاس واخلي او پر ځای به یې د ده مشر زوی ۵۸ کلن ولیعهد ناروهیټو د مې له لومړۍ نېټې په رسمي توګه دغه دنده پیل کړي.

ټرمپ یو وار بیا له سوریې د ځواکونو د ایستلو له پرېکړې دفاع وکړه

په سوریه کې مېشت امریکایي ځواکونه

د امریکا ولسمشر ډونالد ټرمپ یو وار بیا له سوریې د ځواکونو د ایستلو د پرېکړې دفاع وکړه.

ده پر ټورېټر لیکلي چې په پیل کې امریکايي ځواکونه یوازې د درېیو میاشتو لپاره سوریې ته تللي وو، خو په کلونو پاتې شول.

ولسمشر ټرمپ په خپل ټوېټري پیغام کې چې پرون شنبه یې خپور کړی، لیکلي:

"په اصل کې ټاکل شوې وه چې موږ په سوریه کې د درېيو میاشتو لپاره واوسو او اوس له هغې مودې ۷ کاله تېرېږي، موږ ونه وتو، کله چې زه ولسمشر شوم، د اسلامي دولت ډلې وحشت پیل کړ او دې ترورېستي ډلې ځان د شام او عراق اسلامي دولت باله، اوس دا ډله تر ډېره ځپل شوې او د ترکیې په شمول د سیمې نور هېوادونه باید د هغه څه چې پاتې دي، غم وخوري."

امریکايي رسنیو تېره اوونۍ راپور ورکړ چې ولسمشر ټرمپ غواړي له افغانستانه هم خپل نیمايي ځواکونه وباسي، خو ټرمپ تراوسه پورې په دې اړه رسماً څه نه دي ویلي.

ایران په فارس خلیج کې نمایشي جنګي تمرینونه پیل کړي

د ایران د اسلامي انقلاب د ساتونکو ګارد په نوم ځواکونو د فارس په خلیج کې د جنګي قدرت څرګندولو لپاره نمایشي تمرینونه پیل کړي دي.

تر دې یوه ورځ مخکې، د الوتکو د لېږدولو لپاره یوه ځانګړې امریکايي بېړۍ د فارس خلیج ته ور ننوتې وه.

د تهران او واشنګټن ترمنځ سیاسي کړکېچ د زیاتېدو په حال کې دی.

د ایران رسنیو پرون شنبه وویل چې د اسلامي رژیم دې خاصو ځواکونو د هرمز ابنا ته نېږدې په ټاپو ګانو کې د خپل قدرت د څرګندولو لپاره جنګي هليکوپټر هم کارولي دي.

د نړۍ د تېلو تقریباً درېیمه برخه د اوبو له دې لارې تېرېږي.

د ایران د اسلامي انقلاب د ساتونکو ګارد قوماندان جنرال محمد علي جعفري ویلي:

"هیله لرو چې زموږ دښمنان به وپوهېږي چې که کوچنی حرکت هم وکړي، له څومره سخت عکس العمل سره به مخ شي."

په نړیوال ائتلاف کې د امریکا استازي بریټ مک ګورک استعفا وکړه

آرشیف، په نړیوال ائتلاف کې د امریکا استازي بریټ مک ګورک په کویټ کې په یوه نړیوال کنفرانس کې د خبرو په حال کې، ۲۰۱۸ د فبرورۍ ۱۳ مه

د اسوشېټېډ پرېس په حواله، له داعش سره د مبارزې لپاره په نړیوال ائتلاف کې د امریکا استازي بریټ مک ګورک له دندې استعفا کړې ده.

اسوشېټېډ پرېس ویلي چې مک ګورک د امریکا د ولسمشر ډونالد ټرمپ له پرېکړې سره چې غواړي له سوریې خپل عسکر وباسي، د مخالفت څرګندولو لپاره له کاره لاس اخیستی دی.

اسوشېټېډ پرېس پرون شنبه د باخبرو سرچینو له خولې ویلي چې مک ګورک د دې میاشتې په پای کې خپله دنده پای ته رسوي.

هغه په خپل استعفا لیک کې لیکلي چې د داعش وسله وال تر اوسه لا نه دي مات شوي.

هغه ویلي چې له سوریې د امریکا مخکې له وخته وتل به دې ډلې ته موقع ورکړي چې بیا ځان تنظیم کړي.

نور راوښيه

XS
SM
MD
LG