د لاسرسۍ وړ لېنکونه

تازه خبر
چهارشنبه ۲ سلواغه ۱۳۹۸ کابل ۰۶:۴۰

نړۍ

په اندونیزیا کې د څونامې د څپو د مړو او ټپیانو شمېر زرو ته رسېږي

د اندونیزیا په یوه ټاپو کې د اتشفشان په نتیجه کې د څونامې د څپو له امله د مړو او ټپیانو شمېر شااوخوا زرو تنو ته ورسېد.

د اندونیزیا د طبعي پېښو په وړاندې د مبارزې د ادارې ویاند پوروو نوګروهو وویل، لږترلږه ۲۲۲ تنه مړه شوي، شااوخوا ۸۰۰ نور ژوبل شوي او ۲۸ تنه تر اوسه تری تم دي.

هغه وویل، باور کېږي چې د مرګ ژوبلو شمېر به تر دې ډېر وي، ځکه چې ټول قربانیان تر اوسه نه دي لېږدول شوي او ټولو روغتیایي مرکزونو هم د قربانیانو بشپړ فهرستونه نه دي وړاندې کړي.

د اندونیزیا د هواپېژندنې او جیولوژۍ په اداره کې ساینسپوهان په دې باور دي چې د انک کراکاتاو تر ټاپو لاندې اتشفشان به د څونامې سبب شوی وي چې له امله یې د اوبو څپو په دغه ټاپو کې سلګونه کورونه، هوټلونه او دولتي دفترونه لاندې کړل.

چارواکي وايي، له اتشفشانه ۲۴ دقیقې وروسته څونامې راغله.

د سږکال په سپټمبر کې د اندونیزیا په پالو ښار او سولاوسي ټاپو کې د څونامې او زلزلې له کبله تر دوه نیم زره زیات خلک مړه شول.

اکیهیټو د جاپان د امپراطور په توګه د خپلې زوکړې وروستۍ کلیزه لمانځي

د جاپان امپراطور اکیهیټو

د جاپان امپراطور اکیهیټو مخکې تر دې چې تقاعد وکړي، د یوه امپراطور په توګه د خپلې زوکړې وروستۍ کلیزه لمانځي.

په هغې ثبت شوې وینا کې چې نن خپره شوې، ۸۵ کلن امپراطور له جګړې وروسته له سوله ییزې لارې د خپل هېواد د کړاونو د لېرې کولو ستاینه کړې او د دې خبرې پر اهمیت یې ټینګار کړی چې ځوان نسل د دې هېواد پخوانی پوځي تاریخ هېر نه کړي.

هغه ویلي، مهمه ده چې هېر نه شي چې په دوهمه نړیواله جګړه کې ‌‌ډېرو کسانو خپل ژوند له لاسه ورکړی او له جګړې وروسته په دې هېواد کې سوله او سوکالي هم د جاپان د وګړو په بې حده قربانیو او نه ستړې کېدونکو هڅو تر لاسه شوې ده.

اکیهیټو چې د ۱۹۳۳ کال د ډيسمبر په ۲۳مه زېږېدلی، اعلان کړی چې د اپرېل له دېرشمې به له دغې دندې چې تر ډېره تشریفاتي ده، لاس واخلي او پر ځای به یې د ده مشر زوی ۵۸ کلن ولیعهد ناروهیټو د مې له لومړۍ نېټې په رسمي توګه دغه دنده پیل کړي.

ټرمپ یو وار بیا له سوریې د ځواکونو د ایستلو له پرېکړې دفاع وکړه

په سوریه کې مېشت امریکایي ځواکونه

د امریکا ولسمشر ډونالد ټرمپ یو وار بیا له سوریې د ځواکونو د ایستلو د پرېکړې دفاع وکړه.

ده پر ټورېټر لیکلي چې په پیل کې امریکايي ځواکونه یوازې د درېیو میاشتو لپاره سوریې ته تللي وو، خو په کلونو پاتې شول.

ولسمشر ټرمپ په خپل ټوېټري پیغام کې چې پرون شنبه یې خپور کړی، لیکلي:

"په اصل کې ټاکل شوې وه چې موږ په سوریه کې د درېيو میاشتو لپاره واوسو او اوس له هغې مودې ۷ کاله تېرېږي، موږ ونه وتو، کله چې زه ولسمشر شوم، د اسلامي دولت ډلې وحشت پیل کړ او دې ترورېستي ډلې ځان د شام او عراق اسلامي دولت باله، اوس دا ډله تر ډېره ځپل شوې او د ترکیې په شمول د سیمې نور هېوادونه باید د هغه څه چې پاتې دي، غم وخوري."

امریکايي رسنیو تېره اوونۍ راپور ورکړ چې ولسمشر ټرمپ غواړي له افغانستانه هم خپل نیمايي ځواکونه وباسي، خو ټرمپ تراوسه پورې په دې اړه رسماً څه نه دي ویلي.

ایران په فارس خلیج کې نمایشي جنګي تمرینونه پیل کړي

د ایران د اسلامي انقلاب د ساتونکو ګارد په نوم ځواکونو د فارس په خلیج کې د جنګي قدرت څرګندولو لپاره نمایشي تمرینونه پیل کړي دي.

تر دې یوه ورځ مخکې، د الوتکو د لېږدولو لپاره یوه ځانګړې امریکايي بېړۍ د فارس خلیج ته ور ننوتې وه.

د تهران او واشنګټن ترمنځ سیاسي کړکېچ د زیاتېدو په حال کې دی.

د ایران رسنیو پرون شنبه وویل چې د اسلامي رژیم دې خاصو ځواکونو د هرمز ابنا ته نېږدې په ټاپو ګانو کې د خپل قدرت د څرګندولو لپاره جنګي هليکوپټر هم کارولي دي.

د نړۍ د تېلو تقریباً درېیمه برخه د اوبو له دې لارې تېرېږي.

د ایران د اسلامي انقلاب د ساتونکو ګارد قوماندان جنرال محمد علي جعفري ویلي:

"هیله لرو چې زموږ دښمنان به وپوهېږي چې که کوچنی حرکت هم وکړي، له څومره سخت عکس العمل سره به مخ شي."

په نړیوال ائتلاف کې د امریکا استازي بریټ مک ګورک استعفا وکړه

آرشیف، په نړیوال ائتلاف کې د امریکا استازي بریټ مک ګورک په کویټ کې په یوه نړیوال کنفرانس کې د خبرو په حال کې، ۲۰۱۸ د فبرورۍ ۱۳ مه

د اسوشېټېډ پرېس په حواله، له داعش سره د مبارزې لپاره په نړیوال ائتلاف کې د امریکا استازي بریټ مک ګورک له دندې استعفا کړې ده.

اسوشېټېډ پرېس ویلي چې مک ګورک د امریکا د ولسمشر ډونالد ټرمپ له پرېکړې سره چې غواړي له سوریې خپل عسکر وباسي، د مخالفت څرګندولو لپاره له کاره لاس اخیستی دی.

اسوشېټېډ پرېس پرون شنبه د باخبرو سرچینو له خولې ویلي چې مک ګورک د دې میاشتې په پای کې خپله دنده پای ته رسوي.

هغه په خپل استعفا لیک کې لیکلي چې د داعش وسله وال تر اوسه لا نه دي مات شوي.

هغه ویلي چې له سوریې د امریکا مخکې له وخته وتل به دې ډلې ته موقع ورکړي چې بیا ځان تنظیم کړي.

قاسمي: په سوریه کې د امریکايي ځواکونو شتون له پیله یوه تېروتنه وه

د ایران د بهرنیو چارو د وزارت ویاند بهرام قاسمي

د ایران د بهرنیو چارو وزارت وايي، په سوریه کې د امریکايي ځواکونو حضور له هماغه پیل راهېسې غیر منطقي او د ترینګلتیا سرچینه وه.

دا له هغې وروسته چې د امریکا ولسمشر ډونالد ټرمپ له سوریې د امریکايي ځواکونو د ایستلو پرېکړه اعلان کړه، د ایران لومړی رسمي عکس العمل دی.

ډونالد ټرمپ تېره اوونۍ وویل چې امریکا له سوریې خپل ټول دوه زره سرتېري په دې خاطر وباسي چې د ده په وینا، دغلته د اسلامي دولت د وسله والې ډلې یا داعش پر ضد جګړه بریالۍ شوې ده.

د ایران رسنیو د بهرنیو چارو وزارت د ویاند بهرام قاسمي له خولې ویلي، په سوریه کې د امریکايي ځواکونو موجودیت له هماغه پیل راهیسې یوه لویه تېروتنه وه.

ایران د بشار الاسد د رژیم یو مهم متحد دی.

د راپورونو له مخې، ایران دا مهال په سوریه کې سلګونه پوځي سلاکاران او زرګونه ایراني جنګیالي لري چې د بشار الاسد د ځواکونو ترڅنګ په جګړه کې برخه لري.

د سومالیا په پلازمېنه کې دوو چادونو ۱۶ کسان وژلي

په سومالیا کې پولیس وايي، په پلازمېنې موګادیشو کې د ولسمشرۍ ماڼۍ ته نېږدې په دوو چادونو کې لږترلږه ۱۶ کسان وژل شوي دي.

یوه پوځي چارواکي ویلي، د شنبې په سهار د دې چاودنو په قربانیانو کې سرتېري او ولسي خلک دواړه شامل دي.

په وژل شویو کې د یو یاد ژورنالېست اوِل ظاهر صلاد په شمول، د یونیورسل ټلویزیوني سټېشن چې مرکز یې په لندن کې دی، درې کارکوونکي هم شامل دي.

له القاعده شبکې سره تړلې د الشباب ډلې د دې بریدونو مسؤلیت پر غاړه اخیستی دی.

الشباب په سومالیا کې د حکومت د نسکورولو لپاره له څو کلونو راهېسې جنګېږي.

په تېره یوه لسیزه کې د الشباب وسله والو په خپلو بریدونو کې په زرګونو سومالیایان او همدارنګه په ختیځه افریقا کې سلګونه نور ملکیان وژلي دي.

سرچینې:په ایران کې نن پر یوه سوداګر د اعدام حکم اجرا کېږي

په ایران کې قضايي سرچینې وايي، د دې هېواد پر یو مشهور سوداګر د اعدام حکم نن شنبه اجرا کېږي.

سلطان باقري درمني چې په سلطان قیر مشهور دی، په فساد او جرمي اعمالو تورن دی.

د سلطان باقري د اعدام حکم د روان کال په اکټوبر میاشت کې د ایران سترې محکمې تأیید کړی و.

ایران په تېر دوبي کې د هغو کسانو د مجازاتو لپاره د ځانګړو محاکمو د جوړولو اعلان وکړ چې په مالي فساد کې په لاس لرلو تورن دي.

له هغه وخته راهېسې د دې محکمو په حکم درې ایراني سوداګر اعدام شوي دي.

د ملګرو ملتونو امنيت شورا په يمن کې د څارونکو په اړه رأيه ورکړه

د ملګرو ملتونو امنيت شورا د رأيو په اتفاق په يمن کې د څارونکو د ګمارنې لپاره رأيه ورکړه.

دغه څارونکي به د جګړه ځپلي يمن په يوه برخه کې د اوربند څارنه کوي.

د دې پرېکړه ليک مسوده چې د بريتانيا له خوا وړاندې شوې وه او مخکې هم څو څو واورې ورباندې مباحثې شوې وې او اصلاحات په کې راوستل شوي وو، پرون تصويب شوه.

دغه اقدام د سره سمندرګي په حديده بندري ښار کې د ملګرو ملتونو د څارونکو لېږل تأييدوي چې د يمن د دولتي ځواکونو او حوثي ياغيانو ترمنځ لنډمهاله اوربند وڅاري.

سعودي عربستان د يمن د حکومت او ايران د شيعه حوثي ياغيانو ملاتړ کوي.

سعودي عربستان او اتو نورو عرب هېوادونو په ٢٠١٥ میلادي کال کې د يمن په کورنۍ جګړه کې پوځي مداخله وکړه.

د دې مداخلې هدف د ولسمشر عبدالربُه منصور هادي د حکومت برحاله کول وو چې نړيوال يې په رسميت پېژني.

کوټس: ځينو هېوادونو د امریکا په منځمهالو ټاکنو کې د نفوذ هڅه کړې

د امريکا متحدو ايالتونو يوه عالي رتبه استخباراتي چارواکي وويل چې روسيې، چين، ايران او نورو بهرنيو قدرتونو د امريکا د ٢٠١٨ میلادي کال په منځمهالو انتخاباتو کې پر رأيې ورکوونکو د نفوذ هڅه کړې ده.

خو د دغه چارواکي په خبره، داسې نښې نه شته چې وښيي چې د لاسوهنو د دغو هڅو له کبله دې د انتخاباتو نتيجه اغېزمنه شوې وي.

د امريکا د ملي استخباراتو رئيس دان کوټس پرون وويل:

"د چين او ايران په ګډون روسيې او نورو بهرنيو هېوادونو د خپلو ستراتيژيکو ګټو په خاطر، په انتخاباتو کې د نفوذ هڅه وکړه."

ښاغلي کوټس وويل، د امريکا د استخباراتي ادارو تحقيقاتو داسې شواهد نه دي موندلي چې وښيي چې بهرني لوبغاړي دې د انتخاباتو په بنسټونو کې په نفوذ بريالي شوي وي.

د امريکا د ملي استخباراتو د رئيس دغه موندنې په هغه راپور کې شاملې دي چې ولسمشر ډونالد ټرمپ او د امريکا هغو ادارو ته چې د انتخاباتو په امنيت کې دخيلې دي، سپارل شوى دى.

د ولسمشر د يوه اجرائيه فرمان پر اساس چې په سپټمبر مياشت کې لاسليک شوى، دغه معلومات ولسمشر او اړوندو ادارو ته سپارل شوي دي.

امريکا اوکراين ته د ١٠ ميليونو ډالرو په ارزښت پوځي مرسته ورکوي

د امريکا متحدو ايالتونو ويلي چې اوکراين ته به د ١٠ ميليونو امريکايي ډالرو په ارزښت اضافي پوځي مرسته ورکړي.

د دې مرستې هدف دا دى چې وروسته له هغې چې تېره مياشت روسيې د کييف درې کښتۍ ونيولې، اوکراين وکړاى شي خپل سمندري ځواک پياوړى کړي.

د واشنګټن د دې پوځي مرستې اعلان د امريکا د بهرنيو چارو وزارت پرون وکړ.

دا په داسې حال کې ده چې بريتانيا هم پلان لري چې د اوکراين له سمندري ځواکونو سره مرسته وکړي.

د روسيې ساحلي ساتونکو د نوامبر په ٢٥مه په کرچ تنګي کې چې تور سمندرګى له ازوف سمندرګي سره تړي، اول د اوکراين پر کښتيو ډزې وکړې، بيا يې د اوکراين درې کښتۍ او ٢٤ ماڼوګان ونيول.

مسکو ادعا کړې چې دغه کښتۍ کريميا ته نېږدې په غير قانوني ډول د روسيې د قلمرو اوبو ته داخلې شوې وې.

روسيې کريميا سيمه په ٢٠١٤ میلادي کال کې له اوکراينه جلا او په خپلې خاورې پورې الحاق کړه.

په بريتانيا ۲ تنه د ډرون د غير قانوني کارونې په تړاو نيول شوي

د بريتانيا پوليس وايي چې دوه کسان د بې پيلوټه الوتکو د غير قانوني کارونې په تړاو نيول شوي دي.

د دغو ډرون د الوتنو له کبله تېره چهارشنبه ناوخته د لندن ګات وېک هوايي ډګر کې د ټرافيکو جريان ګډوډ او په سلګونو الوتنې لغوه شوې.

د سسيکس سيمې د پوليسو سرپرست جېمز کوليس وويل، دغه دوه کسان پرون ناوخته د روانو تحقيقاتو په لړ کې نيول شوي دي.

د نيول شويو کسانو په اړه نور جزيات نه دي خپاره شوي او چارواکي وايي چې پر دوى تور هم نه دى لګول شوى.

چارواکي وايي، بې پېلوټه الوتکو ته په لوى لاس الوتنه ورکړل شوې وه چې د کرسمس په درشل کې د هوايي ډګر نظم اخلال کړي.

د امریکا یوه جنګي الوتکه وړونکې بېړۍ پرون فارس خلیج ته ورسېده

آرشیف

د امریکا یوه جنګي الوتکه وړونکې بېړۍ پرون فارس خلیج ته ورسېده.

دا د ایران او نړیوالو قوتونو ترمنځ د ۲۰۱۵ میلادي کال له اټمي موافقې د امریکا له وتلو وروسته لومړی ځل دی چې د متحده ایالاتو جنګي بېړۍ خلیج ته داخلېږي.

یو اېس اېس سي سټنیس وروسته له هغې خلیج ته ورسېده چې ایران په وار وار د هرمز تنګي د تړولو ګواښونه وکړل.

خلیج ته د امریکا د دې جنګي بېړۍ له رسېدو سره سم د ایران د سمندري ځواک کښتیو هغه تعقیب کړه او ایراني سرتېري لیدل کېدل چې د امریکايي بېړۍ تصویرونه او وډیوګانې يې جوړوي.

د امریکا او ایران ترمنځ اړیکې وروسته له هغې زیاتې ترینګلې شوې چې د امریکا ولسمشر ډونالد ټرمپ له ایران سره د نړیوالو له اټمي موافقې ووت.

اروپايي ټولنې پر روسيې خپل اقتصادي بندیزونه وغځول

اروپايي ټولنې پرون په رسمي ډول پر روسيې خپل اقتصادي بندیزونه چې ۴ کاله وړاندې يې لګولي وو، وغځول.

پر روسيې دا بندیزونه د مسکو له خوا له خپلې خاورې سره د کریمیا ټاپو وزمې د یو ځای کولو په خاطر لګول شوی وو.

د ۲۸ هېوادونو جوړې اروپايي شورا په یوه بیان کې ویلي دي چې دا بندیزونه به د راتلونکي ۲۰۱۹ کال تر جولای میاشتې پر ځای پاتې وي.

د اروپايي هېوادونو اقتصادي بندیزونه د روسيې د انرژي، بانکداري او دفاعي سکټورونه په نښه کوي.

په روانه اوونۍ کې اروپايي ټولنې پر هغو پنځو روسي وګړو د ویزو پر بندلو او په اروپا کې د هغوی د پانګو پر کنګل کولو موافقه وکړه چې په بریتانیا کې د یوه پخواني روسي جاسوس او د هغه پر لور د کیمیاوي موادو په برید کې په لاس لرلو تورن دي.

په صربیا کې د ټکر په یوه پېښه کې ۵ کسان وژل شوي او ۳۰ ژوبل دي

د صربیا چارواکي وايي، د دې هېواد په جنوبي ښار نیس کې له یوه بس سره د ریل د ټکر په نتیجه کې لږترلږه ۵ کسان وژل شوي او ۳۰ نور ژوبل دي.

پولیسو ویلي چې داسې ښکاري چې دا پېښه د بس د چلوونکي د غلطۍ په نتیجه کې شوې ده.

پولیس وايي، په بس کې زیاتره سپرلۍ د یوه ښوونځي زده کوونکي وو.

د پېښې په یوې ویډیو کې ښکاره کېږي چې د ټکر له امله بس په منځ کې نیم شوی دی او ریل ته سرسري زیان اوښتی دی.

نور راوښيه

XS
SM
MD
LG