د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۷:۳۶

نړۍ

جان بولتون نن د روسیې له دفاع وزیر سرګي شوېګو سره وکتل

د امریکا د ملي امنیت سلاکار جان بولتون نن سې شنبه د اکټوبر په ۲۳مه د روسیې له دفاع وزیر سرګي شوېګو سره وکتل.

بولتون به نن وروسته د روسیې له ولسمشر ولادیمیر پوتین سره وګوري او له ده سره په خبرو کولو دغلته خپل دوه ورځنی سفر پای ته ورسوي.

هغه پرون د روسیې د ملي امنیت له سلاکار نیکولای پاتروشیف او د بهرنیو چارو له وزیر سرګي لاوروف سره وکتل او د منځني واټن ویشتونکو اټمي مزائیلو د بندیز له تړونه چې په ۱۹۸۷ میلادي کال کې لاسلیک شوی و، د امریکا د وتلو پر پلان‌يې خبرې وکړې.

جان بولتون پرون د روسیې له ورځپاڼې کومېرسانټ سره په مرکه کې وویل، متحده ایالات غواړي چې له دې تړونه ووځي، ځکه چې روسیه پر دې تړون تېری کوي.

بولتون وویل، چین، ایران او شمالي کوریا چې باید ممنوع وی، اټمي وسلې جوړوي.

واشنګټن وايي چې یوازې امریکا د دې تړون د شرایطو درناوی کوي.

بولتون دا خبره کومېرسانټ ته کړې او د هغه ترجمان ویلي چې بولتون ټینګار کړی چې دا مسئله د امریکا لپاره د منلو وړ نه‌ده.

ټرمپ وایي، د خاشقجي په اړه د سعودي معلوماتو نه‌دی قانع کړی

د امریکا ولسمشر ډونالد ټرمپ وايي، لاهم هغو توضیحاتو نه‌دی قانع کړی چې د ژورنالېست جمال خاشقجي د وژل کېدو د قضیې په اړه‌یې له سعودي چارواکو څخه اورېدلي دي، خو ښاغلي ټرمپ په عین حال کې ویلي دي چې نه‌غواړي د سعودي عربستان پانګونې له لاسه ورکړي.

٥٩ کلن خاشجقي د اکټوبر په ۲مه د واده د اسنادو د ترلاسه کولو لپاره په استانبول کې د سعودي قونسلګرۍ ته له ننوتو وروسته لادرکه شو، خو ریاض د شنبې په ورځ تأييد کړه چې نوموړی دننه قونسلګرۍ کې د فزيکي شخړې په نتيجه کې وژل شوى دى.

ټرمپ پرون په سپینه ماڼۍ کې خبریالانو ته وویل، هغو خبرو چې ده تر اوسه اورېدلې دي، دی نه‌دی قانع کړی او زیاته‌یې کړه چې پرون‌یې د سعودي له ولیعهد سره د خاشقجي د قضیې په اړه خبرې وکړې.

ټرمپ که څه هم څرګنده کړه چې نه‌غواړي په امریکا کې د سعودي پانګونې له لاسه ورکړي، خو ټینګار یې وکړ چې متحده ایالات به د دې قضیې حقیقت معلوم کړي.

عمران خان د سعودي عربستان د پانګونې په نړیوال کنفرانس کې ګډون کوي

د پاکستان صدراعظم عمران خان وايي، دی به په سعودي عربستان کې د پانګونې په اړه په هغه نړیوال کنفرانس کې ګډون وکړي چې نورو هېوادونو تحریم کړی دی.

عمران خان وویل چې هېواد یې له سعودي عربستان څخه د پور تمه لري، ځکه په دې غونډه کې ګدون کوي.

نوموړي پرون د منځني ختیځ له یوې خبري رسنۍ سره په مرکه کې وویل، په دې غونډه کې د ګډون لپاره زما دلیل دا دی چې د ۲۱۰ میلیونه وګړي لرونکی هېواد مې اوس‌مهال د پورونو له بحران سره مخ دی.

خان زیاته کړه، که پاکستان له خپلو دوستو هېوادونو یا د پیسو له نړیوال صندوق «IMF» څخه پور وانه‌خلي، نو په راتلونکو دوو یا درېیو میاشتو کې به د خپلو پورونو د خدماتو او وارداتو د پرې کولو لپاره د بهرنیو اسعارو کافي زېرمه ونه‌لري.

د نړۍ نورو هېوادونو په سعودي عربستان کې د پانګونې کنفرانس په استانبول کې د سعودي په قونسلګرۍ کې د ریاض د مخالف خبریال جمال خاشقجي د وژل کېدو د قضیې په وړاندې د اعتراض په دود تحریم کړی دی.

د پاکستان صدراعظم وویل چې د خاشقجي پر مړینه خواشینی شوی، خو زیاته‌یې کړه چې په دې اړه د سعودي عربستان د حکومت وضاحت ته انتظار کوي.

د چک جمهوریت پوځ تأیید کړې چې یو سرتېری یې په هرات کې وژل شوی

د چک جمهوریت پوځ تأیید کړې چې یو سرتېری یې په هرات ولایت کې د ډزو په پرونۍ پېښه کې وژل شوی دی.

ناټو د دوشنبې په ورځ وویل چې د دوی د لومړنیو تحقیقاتو له مخې، په هرات کې د یوه افغان سرتېري په ډزو د غوڅ ملاتړ د مأموریت یو عسکر وژل شوی او دوه نور ټپیان دي.

د چک جمهوریت پوځ وايي، ټپي سرتېري چې هغوی هم چکان دي، د علاج لپاره د بګرام پوځي روغتون ته استول شوي او صحي وضعیت‌یې ډاډمن دی.

د دې حملې مسؤلیت طالبانو منلی او قاري يوسف احمدي چې ځان د طالبانو وياند بولي، په يوه اعلاميه کې ويلي دي چې دا حمله د دې ډلې يوه غړي وحيد الله ننګرهاري کړې ده.

په پاکستان کې د روسي او پاکستاني پوځیانو ګډ پوځي تمرینونه پیل شوي

د پاکستان پوځي مقامات وايي، د روسي پوځیانو یوه ډله له پاکستاني پوځیانو سره د ګډو پوځي تمرینونو لپاره پاکستان ته تللې ده.

د پاکستاني پوځ مطبوعاتي څانګې «ISPR» د دوشنبې په ورځ په دې اړه یو لنډ بیان او د روسي پوځیانو تصویرونه خپاره کړي چې پاکستان ته تر رسېدو وروسته له الوتکې د کوزېدو په حال کې دي.

که څه هم د پاکستان پوځي مقامات وايي چې دا د پاکستاني او روسي پوځیانو ترمنځ درېیم ګډ پوځي تمرینونه دي، خو دا یې نه‌دي ویلي چې دا تمرینونه به تر څو ورځو دوام وکړي.

د پاکستان په خپره کړې خبرپاڼه کې دا تمرینونه د پاکستان او روسيې ترمنځ د دوه اړخیزو پوځي تمرینونو د تړون د لړۍ ۳مه کړۍ بللې ده.

د روسیې د دفاع وزارت هم د تېرې پنجشنبې په ورځ د دغو ګډو پوځي تمرینونو په اړه ویلي وو چې په دې کې به ۷ روسي پوځیان برخه واخلي.

د سیاسي چارو کارپوهان د روسیې او پاکستان د اړیکو د پراخېدو لامل، د پاکستان او امریکا د اړیکو ترینګلتیا او په افغانستان کې د داعش نفوذ چې روسیه‌یې ځان ته ستر ګواښ ګڼي، یادوي.

روسيه د ځينو اوکرايني شرکتونو په وړاندې اقتصادي اقدامات کوي

د روسيې ولسمشر ولاديمير پوتين يو فرمان لاسليک کړ چې پر اساس‌يې د ځينو اوکرايني شرکتونو او اتباعو په وړاندې ځانګړي اقتصادي اقدامات کېږي.

د فرمان له مخې دغه اقدامات د روسي اتباعو او کمپنيو په وړاندې د اوکراين د "غير دوستانه کړنو" په ځواب کې کېږي.

دغه فرمان چې لاسليک شوى او د کرملېن په وېب‌سايټ کې خپور شوى، پوتين حکومت ته سپارښتنه کړې، د اوکراين د هغو شرکتونو او اشخاصو يو لېست برابر کړي چې اقتصادي بنديزونه ورباندې ولګول شي.

په فرمان کې حکومت ته امر شوى چې دغه بنديزونه مشخص کړي او په‌کې ويل شوي چې په هغه صورت کې لغوه کېداى شي که اوکراين خپل هغه محدوديتونه چې پر روسي اتباعو او کمپنيو يې لګولي، ليرې کړي.

د امريکا د متحده ايالاتو او اروپايي ټولنې په څېر کيف هم پر روسي سوداګرو، کمپنيو او نورو اشخاصو بنديزونه لګولي دي.

دغه بنديزونه په ٢٠١٤م کال کې د اوکراين د کريميا ټاپو وزمې د الحاق او د اوکراين په ختيځ کې د وسله‌والو بېلتون‌پالو د ملاتړ له کبله پر مسکو لګول شوي دي.

د ترکيې حکومت د جمال خاشقجي په اړه خپلې څېړنې لا ژورې کړې

د ترکيې حکومت د دوشنبې په ورځ د سعودي د وتلي خبريال جمال خاشقجي د مړينې په اړه خپلې څېړنې لا ژورې کړې.

ويل شوي چې دغه خبريال په استانبول کې د سعودي عربستان په قونسلګرۍ کې وژل شوى دى.

غربي قدرتونو هم پر سعودي عربستان د دې قضيې په تړاو خپل فشارونه زيات کړي دي.

د ترکيې دولتي اژانس انادولو خبر ورکړى چې ګڼو ترکي څارنوالانو پرون دوشنبه د خاشقجي د مړينې په اړه له پنځو عيني شاهدانو چې ويل کېږي ټول د قونسلګرۍ کارکوونکي وو، پوښتنې ګروېږنې کړې دي.

پرون د ورځې په جريان کې تر ٢٠ له زياتو عيني شاهدانو کې تُرکان او بهرنيان وو، د دې قضيې په اړه پوښتنې شوې دي.

٥٩ کلن جمال خاشجقي وروستى ځل د اکټوبر په دوهمه ليدل شوى چې په استانبول کې د سعودي عربستان قونسلګرۍ ته داخلېږي چې د واده ځيني اسناد ترلاسه کړي.

د سعودي عربستان حکومت د شنبې په ورځ تأييد کړه چې دغه خبريال په قونسلګرۍ کې د فزيکي شخړې په نتيجه کې مړ شوى دى.

سعودي ويلي چې د دې قضيې په تړاو ١٨ کسان نيول شوي دي.

د روسيې يوه خپلواکه ورځپاڼه وایي، پريګوژين په ګڼو حملو کې لاس لري

د روسيې يوې خپلواکې ورځپاڼې د روسيې د يوه وتلي تجار يوګيني پريګوژين د يوه امنيتي همکار په حواله راپور ورکړى چې وايي، پريګوژين د خپلو مخالفانو په وړاندې په ګڼو حملو کې دخيل دى.

د هغه په خبره دغه تجار لږ تر لږه په يوه وژنه کې هم لاس لري.

پريګوژين چې د روسيې د ولسمشر ولادیمير پوتين په "سراشپز" مشهور دى، امريکايي څېړونکو يې يادونه کړې چې د امريکا د ٢٠١٦م کال په انتخاباتو کې يې د لاسوهنې هڅه کړې ده.

دى په دې هم تورن دى چې د اوکراين په ختيځ کې له روس پلوه بېلتون غوښتونکو د روسيې په ملاتړ کې کليدي رول لري.

پر پريګوژين دغه تورونه د نووايا ګزيت ورځپاڼې د خبريال دانيس کوروتکوف په مقاله کې چې پرون خپره شوې لګول شوي دي.

دا په داسې حال کې ده چې تر يوې اوونۍ کمه موده کېږي د دغه خبريال کور ته اخطاريه ليک لېږل شوى او دى په‌کې خپل هېواد ته په خيانت تورن شوى دى.

واشنګټن: روسيې يو نوى منځ واټنه اټمي توغندی جوړ کړى

د امريکا متحده ايالاتو د ملي امنيت سلاکار د روسيې تورونه چې ګواکې امريکا د اټمي وسلو د کنټرول له يوه تړون څخه د وتلو په خبرداري له مسکو څخه د باج اخيستنې هڅه کوي، رد کړل.

خو واشنګټن وايي روسيې يو نوى منځ-واټنه اټمي ميزائيل جوړ کړى دى.

راپورونه وايي جان بولتون پرون ناوخته د روسيې د بهرنيو چارو له وزير سرګي لاوروف سره په مسکو کې تر بحثونو وروسته په دې اړه تبصره وکړه.

د امريکا ولسمشر ډونالد ټرمپ تېره شنبه اعلان وکړ چې په پام کې لري د ١٩٨٧م کال د منځ-واټنه اټمي وسلو د کنټرول له تړون څخه ووځي.

ښاغلي ټرمپ تور ولګاوه چې روسيې له کلونو راهيسې له دغه تړون څخه سرغړونه کړې ده.

ډونالد ټرمپ: سعودي د خاشقجي په اړه دروغ ویلي

د امریکا متحده ایالاتو ولسمشر ډونالد ټرمپ د جمال خاشقجي د تري تم کېدو په اړه د سعودي عربستان په توضیحاتو په انتقاد سره وویل چې هغوی په ډاګه دوکه کړې او دروغ‌یې ویلي دي.

په واشنګتن پوسټ کې په‎دې اړه د یوې خپرې شوې مرکې پر اساس ډونالد ټرمپ له خپل پخواني دریځ په شا شوی چې ویلي یې و د سعودي دریځ چې جمال خاشقجي په یوه شخړه کې وژل شوی د باور وړ دی.

ټرمپ داسې وخت خبره کړې چې پرون د اکټوبر په ۲۱مه بریتانیا، فرانسې او جرمني هم په یوه ګډه اعلامیه کې د جمال خاشقجي وژنه غندلې او د هغه څه په اړه چې شوي د سپیناوي غوښتنه کړې.

جمال خاشقجي په استانبول کې د سعودي عربستان په قونسلګرۍ کې وژل شوی دی.

د ترکیې جمهور رئیس رجب طیب اردوغان وویل، سې شنبه به د دې وژنې په اړه رښتیا په ډاګه ووايي.

جمال خاشقجي په امریکا کې اوسېده، خو د خپل اصلي هېواد سعودي عربستان په اوسني رژيم‌یې انتقادي لیکنې کولې.

خاشقجي د یوه رسمي سند د اخیستلو لپاره د اکټوبر په دوهمه په استانبول کې د سعودي عربستان قونسلګرۍ ته ورغلی و چې بیا یې مړی او ژوندی تر څو ورځو ورک و او اوس عربستان منلې چې دی د سعودي له ځینو چارواکو سره په لانجه کې وژل شوی.

ټایوان کې د یوه اورګاډي د بې‌پټلۍ کېدو پېښې ۱۸ کسان وژلي

ټایواني چارواکي وايي، د یوه اورګاډي د بې‌پټلۍ کېدو په پېښه کې لږ تر لږه ۱۸ کسان وژل شوي دي.

د ټایوان د اور وژنې ملي ادارې ویلي چې په‎دې پېښه کې لږ تر لږه ۱۶۰ تنه ټپیان هم دي.

د ټایوان د اورګاډو او رېل پټلیو ادارې ویلي چې په‎دې اورګاډي کې ۳۶۶ کسان ناست وو.

د اورګاډو اته واړه برخې له پټلۍ وتلې وې او پنځه‌یې چپه شوي.

د ټایوان د خبر د مرکزي اژانس په حواله شااوخوا ۳۰ کسان لا هم په واګونونو کې ایسار پاتې دي.

امریکايي او ترکي ځواکونه د سوريې د منبج ښار شااوخوا ګزمې پیلوي

ټاکل شوې ده چې امریکايي او ترکي ځواکونه تر راتلونکو څو ورځو د سوريې د منبج ښار شااوخوا ګډې ګزمې پیل کړي.

دا خبره په منځني ختیځ کې د امریکا د پوځ د مرکزي قوماندانۍ مشر جنرال جوزف ووټل کړې ده.

جنرال ووټل پرون خبریالانو ته وویل، دا ګزمې به د پوځیانو تر روزنې وروسته پیل شي.

منبج ښار دا مهال د هغو کُرد وسله‌والو په کنټرول کې دی چې ترکیه‌يې ترورېستان بولي.

ترکيې تر دې مخکې ګواښ کړی و چې له کُرد وسله‌والو څخه د دې ښار د تصفيې لپاره به پوځي عملیات وکړي.

د ترکيې پر پوله د دې هېواد او امریکا د ګډو پوځي ګزمو موضوع د هغې موافقې برخه ده چې واشنګټن او انقرې په سیمه کې د شخړې د کمولو په هدف په تېر جون میاشت کې کړې وه.

ترکیه او امریکا د سوريې په جګړه کې د وسله‌والو یاغیانو له مختلفو ډلو ملاتړ کوي او روسیه او ایران بیا د سوريې د حکومت تر څنګ ولاړ دي.

اردوغان: سې شنبه به د خاشقجي د وژلو په اړه ټول حقایق په ډاګه شي

د امریکا او ترکيې ولسمشرانو پرون په یوه ټیلیفوني تماس کې موافقه وکړه چې په استانبول کې د سعودي عربستان په قونسلګرۍ کې د سعودي خبریال جمال خاشقجي د وژل کېدو په اړه باید پوره سپیناوی ورکړل شي.

د ترکيې انادولو خبري اژانس ویلي دي چې ډونالد ټرمپ او رجب طیب اردوغان سلا کړې ده چې د خاشقجي د وژل کېدو د قضيې ټول اړخونه باید روښانه شي.

ولسمشر اردوغان تر دې مخکې وویل، چې سې شنبه به د جمال خاشقجي د وژل کېدو په اړه ټول حقایق په ډاګه کړي.

سعودي د شنبې په ورځ د لومړي ځل لپاره تأیید کړه چې خاشقجي په استانبول کې د دې هېواد په قونسلګرۍ کې وژل شوی دی.

د سعودي حکومت ویلي، ۶۰ کلن خاشقجي په قونسلګرۍ کې د یوې فزیکي شخړې په نتیجه کې وژل شوی هغه څه چې نړیوالې ټولنې يې په اړه شک او تردید څرګند کړی دی.

ترکيې او امریکايي مقاماتو چې نومونه‌يې نه‎دي یاد شوي ویلي چې خاشقجي قونسلګرۍ ته تر داخلېدو وروسته د سعودي چارواکو د یوې ډلې له‎خوا شکنجه او وژل شوی دی.

په همدې حال کې جرمني، فرانسې او بریتانيا پرون په یوه ګډ بیان کې د سعودي په قونسلګرۍ کې د خبریال خاشقجي وژنه غندلې ده او ویلي دي چې د دې قضيې په اړه باید هغه څه چې دقیق دي، ښکاره شي.

په ټایوان کې د رېلګاډي نسکورېدو ۱۷ تنه مړه کړي

چارواکي وايي، د ټايوان په ختيځ کې لږ تر لږه ١٧ کسان هغه وخت مړه شول چې يو مسافروړونکى رېلګاډى نسکور شو.

د ټايوان د رېلګاډو اداره وايي، په نننۍ پېښه کې چې په شمال ختيځ يلان کې شوې، ١٦٠ تنه نور ټپيان شوي دي.

په دغه چټک رېلګاډي کې ٣٦٦ کسان سپاره وو چې له پټلۍ واوښت.

تر اوسه معلومه نه ده چې د پېښې اصلي علت څه دى.

په نايجريا کې د فرقوي اخ و ډوب په نتيجه کې ٥٥ کسان وژل شوي

د نايجريا په شمال کې د فرقوي اخ و ډوب په نتيجه کې ٥٥ کسان وژل شوي دي.

چارواکي وايي، دغه پېښې په تېرو څو ورځو کې په کادونا ايالت کې شوي دي.

د ايالت د پوليسو يوه چارواکي احمد عبدالرحمن نن وويل چې په کاسوان مګاني سيمه کې د اخ و ډب پر مهال ٢٢ کسان نيول شوي هم دي.

چارواکو په ښارګوټي کې د څو ساعتونو لپاره ګرځ-بنديز اعلان کړى دى.

محلي رسنۍ وايي دغه اخ و ډب تېره پنجشنبه په يوه مارکېټ کې د دوو مخالفو مذهبي ډلو ترمنځ پيل شو.

ولسمشر محمد بخاري وويل، هېڅ کلتور او مذهب د ژوند د تقدس بې احترامي نه کوي.

هغه وويل چې د هرې ټولنې د پرمختګ او ښېګڼې لپاره ګډ سوله ييز ژوند مهم دى.

پخوا هم په کادونا ايالت کې د ځايي مسلمانانو او عيسويانو ترمنځ اخ و ډب پېښ شوى دى.

نور راوښيه

XS
SM
MD
LG