د لاسرسي لېنکونه

تازه خبر
چهارشنبه ۱ لړم ۱۳۹۸ کابل ۱۲:۲۲

نړۍ

بحرین له خپل هېواد څخه د ایران سفیر وشاړه

د رویټرز خبري اژانس د یوې ډپلوماتیکې منبع له قوله لیکي چې بحرین له دې هیواد څخه د ایران سفیر شړلې دی.

دې منبع همدا راز ادعا کړې ده، چې له ده څخه هم غوښتنه شوې وه، چې له دې هیواد څخه بهر ووزي. د دواړو هیوادونو ترمنځ د وروستیو ترنیګلتیاو پسې، د ایران سفیر دمخه لا له بحرین څخه وتلی دی.

بحرین هم د منځني ختیځ د هغو هیوادونو له ډلې دی، چې د حکومت ضد مظاهره کونکي لاروسرکونوته را ووتل.

دې اکثریت شیعه اعتراض کونکو د بحرین له سني حکومت څخه د زیاتو حقونو غوښتنه کوله.

د یمن ولسمشر خپله ټوکابینه منحل کړه

د یمن جمهور ریس علي عبدالله صالح د خپل حکومت ټوله کابینه برطرفه کړه. دا په داسې حال کې ده، چې مظاهره کونکو د ده د برطرفه کیدو لپاره خپلو اعتراضونو ته دوام ورکړی دی.

د ولسمشر له دفتره په دې اړه په خپره شوې اعلامیه کې راغلي چې کابینه له واکه لرې شوې ده خو داسې هم ویل کیږي، چې کابینې د مظاهره کونکو په ضد د خونړي اقدام په ضد خپله د استعفی وړاندې کولو پلان درلود خو ولسمشر صالح وار د مخه کړ.

د یمن د بهرنیوچارو وزارت مخکې تر دې غربي خبري اژانسونو ته ویلي وو، چې په ملګرو ملتوونو کې د دې هیواد سفیر عبدالله السعیدي په صنعا کې د جمعې په ورځ پر لږترلږه پينځوس تنو مظاهره کونکو د ډزو سره په مخالفت کې له دندې استعفي کړې ده.

مولن په لیبیا کې خپل پوځي عملیات بریالي وبلل

د امریکا د ګډو ځواکونو لوی درستیز ادمایرال مایک مولین له یو شمیر امریکايي ټلویزیونو سره په مرکه کې ویلي، چې په بریالیتوب سره یې د لیبیا پر فضا د پروازونو ممنوعه ساحه رامنځ ته کړې ده.

خو دې امریکايي مقام په عین حال کې خبرداری ورکړی چې په لیبیا کې د روانوچارو عواقب لا تراوسه هم د ډاډ وړ نه دی.

مایک مولین وویل، چې د شنبې د ورځې هوايي حملو د لیبیا دفاعي هوایي سیسټم له پښو غورځولی اوهم یې په بنغازي کې د معمر القذافي د پلويانو ځواکونو د پرمختګ مخنیوی کړی دی .

په مصر کې د القاعده شبکې د دوهم مشر ورور ونیول شو

مصري مقاماتو د القاعده د تروریستي شبکې د دوهم مشر ایمن الزواهیري ورو محمد الزواهیري نیولی دی.

دی دوې ورځې وړاندې د سیاسی بندیانو لپاره د وسله والو قواوو د عالي محکمې د عفوې د یوې لایحې پر اساس خوشي شوی وو.

امنیتي مقاماتو په دې اړه چې ولې محمد الزواهیري بیرته نیول شوی دی د دلایلو له وړاندي کولو ډډه کړې ده.

محمد الزواهیري په متحده عربي اماراتو کې نیول شوی او مصري قواوو ته تر سپارل کیدو وروسته له نونس سوه نه نوي کال راهیسې په زندان کې وو.

په سوریه کې له مظاهرو وروسته پر ودانیو ډزې شوي

د سوریې د جنوب په دییرا ښار کې د یو شمیر مظاهره کونکو له وژل کیدو څخه وروسته، په سیمه کې د بعث ګوند په مرکزي دفتر او د موباییل ټیلیفونو په دوو کمپنیو ډزې وکړې.

له مظاهره کونکو سره د شاوخوا کلیو خلک هم ملګري شوي وو. د سوریې په جنوب د دییرا په سیمه کې د جمعې له ورځې راهیسې مظاهرې کیږي.

رپوټونه وايي، چې پولیسو پر اعتراض کونکو اوښکې بهونکې ګاز کارولې او د ربړینو مرمیو ډزې یې کړې دي. په دې ترځ کې د یوه تن د مړینې او د ګڼ شمیر مظاهره کونکو د زخمیانیدو خبره ورکړې شوی دی.

مصريان د پرونۍ ټولپوښتنې نتايجو ته سترګې په لار دي

په فبرورۍ مياشت کې د استبدادي مشر حسني مبارک له ليرې کېدو وروسته دغه ټولپوښتنه په اساسي قانون کې د تغييراتو لپاره وشوه.

پرون په مليونونو کسانو خپلې رايې وکارولې، د څو لسيزو تر انتخاباتو وروسته چې د مبارک رژيم به په کې درغلۍ کولې، د رايې اچونې پرونى بهير ازاد ګڼل شوى دى.

په قاهره کې يوه ګډونوال محمد بدر د ازادۍ راډيو عراقۍ څانګې ته خپل احساسات بيان کړل:

”ما په دې رايه اچونه کې برخه واخيسته خو ما منفي رايه ورکړه، ځکه زما په عقيده پخوانى اساسي قانون د انقلاب په نتيجه کې بې اعتباره شو، د انقلاب مشروعيت هم اساسي قانون لغو کوي“

د اساسي قانون اصلاحات د يوې پوځې شورا له لوري ترسره کېږي، چې د مبارک تر ليرې کېدو وروسته يې مسووليت په خپل لاس اخيستى، د اصلاحاتو پر اساس به سږکال په مصر کې پارلماني او د جمهوري رياست انتخابات کېږي.

راپورونه څرګندوي، چې پرونۍ رايه اچونه ډېره سوله ييزه وه، خو يوه پېښه چې وشوه هغه دا وه چې په قاهره کې د رايې اچونې تر يوه مرکز دباندې، پر ډيموکراسۍ او اصلاح پلوه او د سولې لپاره د نوبل جايزې پر ګټونکي محمد البرادعي باندې د ډبرو او بوتلونو ګوزارونه وشول.

جاپان: د اټومي بټۍ کارکوونکي د ۲ نمبر ري اکټور ته د برېښنا رسولو هڅه کوي

د جاپان د فوکوشيما په ويجاړې شوې اټومۍ بټۍ کې کارکوونکي نن دويم نمبر ري اکټور ته د برېښنا د برابرولو هڅه کوي. دوى تمه لري چې په دې توګه به د ري اکټور سړوونکى سيسټم فعال او د يوې سترې اټومي فاجعې مخه ونيول شي.

د برېښنا موجوديت د انجنيرانو هغو هڅو ته مهمه ده، چې غواړي زلزله او څونامي ځپلي شپږ ري اکټورونه ساړه وساتي او په دې توګه د راډيو اکتيف وړانګو د مرګوني خپرېدو مخنيوى وکړي.

جاپاني چارواکي وايي د ويجاړوونکې زلزلې او څونامي له کبله د وژل شويو کسانو رسمي شمېر اته زره يوسل او درې دېرشو ته پورته شو او تر دوولسو زرو زيات نور خلک ورک دي.

پوليس وايي دوى فکر کوي چې يوازې به په مياګي کې پنځلس زره کسان مړه شوي وي، چې د اعلان شويو شمېر دوه برابره دى، دا د جاپان په شمال ختيځ کې د څلورو زلزله ځپلو سيمو يوه ده.

وروسته تر هغه چې په ځينو غذايي موادو او اوبو کې په لوړه کچه د خطرناکو وړانګو نښې وموندل شوې، د دغو وړانګو د خپرېدو په باب اندېښنې په زياتېدو دي.

يو ښه خبر دا دى چې نن د جاپان په شمال ختيځ کې ژغورونکو، يوه ٨٠ کلنه مېرمن او يو تنکى هلک تر زلزلې ٩ ورځې وروسته له يوه ويجاړ شوي کور څخه ژوندي وايستل.

پاکستان: د ډبرو سکرو په یو کان کې د چاودنې شوې

په پاکستان کې د کانونو يو چارواکي وايي، په جنوب لوېديځ کې نن د ډبرو د سکرو په يوه کان کې د ميتان ګاز د چاودنې په نتيجه کې لږ تر لږه شپږ کان کيندونکي ووژل شول او شپږڅلوېښت نور په کان کې راګير شول.

ژغورونکي هڅه کوي په کان کې راګيرو کسانو ته ځانونه ورسوي، خو ميتان ګازونو د دوى هڅې ناکامې کړې دي.

دغه کان د بلوچستان ايالت د مرکز کوټې د ختيځ په څلوېښت کيلومترۍ کې پروت دى، چې دوې اوونۍ مخکې خطرناک وبلل شو. خو د کانونو مفتش افتخار احمد وايي چا د دې خبرداري پروا ونه کړه.

دغه کان د پاکستان په دولت پورې اړه لري خو يوه خصوصي قراردادي ته په اجاره ورکړل شوى.

د بحرین امنیتي ځواکو د بشري حقونه د عالي شورا یوغړی نولی

له بحرين څخه رارسېدلي راپورونه وايي، امنيتي ځواکونو نن وختي د بشري حقونو د يوې عالي ډلې نامتو مشر څو ورځې وروسته تر هغه ونيوه چې تر فشارونو وروسته شيعه ګان د مظاهرې په ډول کوڅو ته راووتل.

په بحرين کې د بشري حقونو د مرکز غړي سيد يوسف وويل، د تاوتريخوالي ضد پوليس د شپې ناوخته د نبيل رجب کور ته ورغلل او هغه يې ونيوه.

نوموړى د بشري حقونو يو فعال و، د بحرين ځواکونه او د هغوى متحدين لکه سعودي او امارات يې په عام وژنه او د اپاچي په نامه د امريکا ساخت د پوځي الوتکو په کارولو تورن کړل.

فکر کېږي له تېرې چهارشنبې چې په بحرين کې مظاهرې پيل شوي، د مظاهره چيانو په وړاندې د فشارونو له پيله رجب لسم کس وي، چې نيول کېږي.

ایټالیا: د لیبیايي ځواکونو له خوا د یوې ایلټیاوي بیړۍ د نیولو راپورونه څېړو

د ايټاليا د بهرنيو چارو وزارت وايي هغه راپورونه څېړي چې ويل شوي نن د ليبيا د واکمن معمر القذافي د رژيم چارواکو په مرکز طرابلس کې د يوې ايټالوۍ بېړۍ عمله نيولې او له بندر څخه يې د بېړۍ د تللو مخنيوى کړى دى.

د ايټاليا انسا خبري اژانس رپوټ ورکړى چې د اګوستا د حمل او نقل د کمپنۍ د دې بېړۍ په عمله کې اته ايټالويان، دوه هنديان او يو اوکراييني شامل دي.

د رپوټونو پر اساس، وسلوالو کسانو، چې ګومان کېږي يو په کې د طرابلس د بندر قوماندان و، پرون له بېړۍ څخه سپاره ليبيايي کارکوونکي وايستل او د بېړۍ عمله يې ونيوله.

رپوټونه وايي، ويل شوي چې د بېړيو دغه کمپني له خپلې دې نيول شوې عملې سره په تماس کې ده.

ايټاليا چې پخوا د ليبيا استعماري واکمنه وه، په خپل قلمرو کې يې اووه پوځي اډې د نړيوالو ځواکونو په واک کې ورکړې، چې دوى ورڅخه په استفادې پر ليبيا د ملګرو ملتونو د الوتکو د ممنوعه زون د عملي کولو لپاره کار واخلي.

په ایران کې د لېبرال ګوند نیول شوی ۸۰ کلن مشر خوشې شو

د ايران دولتي اژانس ايرنا خبر ورکړى، چې د ممنوع ليبرال ګوند اتيا کلن مشر ابراهيم يزدي، چې د تېرې اکتوبر مياشتې پر لومړۍ نېټه نيول شوى و، نن له زندانه ازاد شو.

يزدي په اصفهان کې د خپل ګوند له نورو غړو سره نيول شوى و. د ٢٠٠٩م کال په جولاى مياشت کې هم، د ولسمشر په توګه د محمود احمدي نژاد تر بيا ټاکل کېدو وروسته د کړکېچ د زياتېدو پر مهال نيول شوى و. په ايران کې مخالفان وايي دغه انتخابات له پراخو درغليو سره ملګري وو.

په یمن کې د وژل شویو سیاسي فعالانو په جنازو کې ګڼو خلکو ګډون کړی و

د يمن په مرکز کې نن د سياسي فعالانو په جنازې کې د خلکو يوې لويې ډلې برخه واخيسته، دا فعالان د پنځوسو وژل شويو مظاهره چيانو په ډله کې شامل دي، چې په مرکز صنعا کې د مظاهرې پر مهال د نښه ويشتونکو په ډزو وژل شوي دي.

نن د صنعا پوهنتون ته نژدې تر سختو امنيتي تدابيرو لاندې لږ تر لږه د ٢٨ کسانو مړي ايښوول شوي وو، تر يوې مياشتې زياته موده کېږي، چې دغه ځاى د مظاهرو مرکز دى، دغو مظاهرو د ولسمشر علي عبداله صالح رژيم ته هم ټکان ورکړى.

مخالفان، سږ کال د ولسمشر علي عبدالله صالح استعفى غواړي، چې په سيمه کې د القاعده په وړاندې په جګړه کې د امريکا متحد ګڼل کېږي.

خو ولسمشر وايي د جمهوري رياست د دورې تر بشپړېدو، يعنې ٢٠١٣م کاله پورې به له واکه ليرې نه شي.

ښاغلي صالح نن ورځ د ملي ماتم د ورځې په توګه اعلان کړی او وژل شوي کسان يې د ډيموکراسۍ لپاره شهيدان بللي دي.

قذافي: شمالي افریقا د جنګ پر میدان بدله شوې ده

د ليبيا واکمن معمرقذافي وايي چې شمالي افريقا د جنګ پر يوه حقيقي ميدان بدله شوې ده.

قذافي دا خبره وروسته له دې وکړه، چې څو مليتي ځواکونو پر ليبيا د الوت د ممنوعه سيمې د عملي کولو او د ده د رژيم پرخلاف د پاڅون کوونکو له ځپلو څخه د قذافي د راګرځولو لپاره د قذافي پر ځواکونو هوايي بريدونه وکړل.

قذافي په يوه تلويزيوني پيغام کې وويل، د وسلو ديپوګان يې پرانستي چې د ليبيا خلک په خپله د خپل هيواد دفاع وکړاي شي:

"اوس ضروري ده، چې سلاکوټونه پرانيزو او ټولې پرګنې په هرراز وسلو سمبال کړو څو د ليبيا د خپلواکۍ، يووالي او عزت دفاع وکړي. "

قذافي دا څرګندونې وروسته له دې وکړې، چې فرانسوي جنګي الوتکو يو لړ هوايي بمبارۍ وکړې او د امريکا او بريتانيا ځواکونو د اوديسې سباوون په نوم د څومليتي ځواکونو د عملياتو په لړ کې تر يو سلو لس زيات توغندي وويشتل.
چارواکي وايي، چې نړيوال ځواکونه به په لومړي پړاو کې د قذافي هوايي دفاع له کاره وغورځوي څو د دغه هيواد پر فضا ګزمه کوونکي جټ الوتکې د الوت ممنوعه سيمه عملي کړاي شي.

کلنټن: ایران دې په خلیجي هېوادونو کې لاسوهنې بندې کړي

د امريکا د بهرنيو چارو وزيرې هليري کلنټن پرون ايران ته خبردارى ورکړ، چې په بحرين او د فارس خليج په نورو هېوادونو کې خپلې لاسوهنې بندې کړي.

په پاريس کې د ليبيا د بحران په باب تر جوړې شوې غونډې وروسته، مېرمن کلنټن وويل، په خليج کې د ايران فعاليتونه، دغه راز د ايران دا هڅې چې په ګاونډيو هېوادونو کې خپله اجنډا تقويه کوي، سوله او ثبات ته زيان اړوي.

د پاريس په غونډه کې د راپورونو پر اساس کلنټن له عرب چارواکو سره هم وکتل، دوى شکايت وکړ، چې ايران په بحرين او نورو ځايونو کې ناکراريو ته لمن وهي.

د سني چارواکو له خوا اداره کېدونکى بحرين د شعيه ګانو له لوري چې د دې هېواد اکثريت دي، د پيل شوي کړکېچ له کبله ځپل شوى دى.

په مصر کې د ټولپوښتنو لپاره د رایو مرکزونه وتړل شول

په مصر کې د ټولپوښتنې لپاره د رايو مرکزونه پرون وتړل شول. په فبرورۍ کې د ولسمشر حسني مبارک له ليرې کېدو وروسته، دا ټولپوښتنه په اساسي قانون کې د اصلاحاتو لپاره وشوه.

راپورونه وايي، په ټول مصر کې د خلکو ډېر لوى کتارونه ښکارېدل، چې د خپلو رايو کارولو ته راوتلي وو.

څارونکي وايي، په مصر کې د دې رايه اچونې د ګډونوالو شمېر بېسارى و. تر اوسه نتايج نه دي اعلان شوي.

په يوه پېښه کې د سولې لپاره د نوبل د جايزې پر ګټونکي او د مخالفانو پر مشر محمد البرادعي هغه وخت د خلکو ګڼه ګوڼې حمله وکړه، چې نوموړي هڅه کوله په قاهره کې د رايو په يوه مرکز کې خپله رايه وکاروي.

د ټولپوښتنې له مخې په اصلاحاتو کې دا مساله هم شامله ده، چې ولسمشر يوازې دوه ځلې ځان کانديدولاى شي.

جاپان: د ویجاړ شوي اټومي بټیو په سیمه کې د خوراکي توکو خرڅلاو منع شوي

جاپان د ويجاړو شويو اټومي بټيو په سيمه کې د توليد شويو خوراکي توليداتو پر خرڅلاو بنديز ولګاوه.

د ملګرو ملتونو د اټومي انرژۍ د څار اداره وايي، دا پرېکړه په دغو خوراکي توليداتو کې د راډيو اکټيف وړانګو د کثافيت د موجوديت له کبله شوې ده، که چېرې د انسان بدن دغه مواد جذب کړي، صحت ته يې تاوان کوي.

پرون هم جاپاني انجنيرانو هڅه کوله زلزلې او څونامي ځپلې اټومي بټۍ ته برېښنا ورسوي.

تمه وه چې د برېښنا په برابرېدو سره به د اوبو پمپ فعال شي، چې د اټومي بټۍ د تېلو تودې شوې ميلې سړې کړي او په دې توګه د وړانګو د خونړي خپرېدو مخه ونيول شي.

بارک اوباما لاتینې امریکا ته خپل ۵ ورځنی سفر بیل کړ

د امريکا ولسمشر بارک اوباما پرون برازيل ته لاړ، چې لاتينې امريکا ته د خپل پنځه ورځني سفر په لړ کې اقتصادي اړيکې او د سيمه ييز امنيت په برخه کې همکاري پیاوړې کړي.

د برازيل په پايتخت براسيليا کې ولسمشر او د هغه مېرمن ميشل اوباما د برازيل له نوې ټاکل شوې ولسمشرې ديلما روزيف سره وکتل.

تر برازيل وروسته به اوباما چيلي ته لاړ شي، چې په جنوبي امريکا کې يې د يوه شتمن هېواد په توګه ځان ثابت کړى دى. د اوباما د دې سفر وروستى ټپال به ايلسلوادور وي.

د ایتلافي ځواکونو جنګي الوتکو پر لیبیا حمله پیل کړه

فرانسه وايي، د ليبيا د مشر معمر القذافي د وفادارو ځواکونو په وړاندې د پوځي اقدام له پيل سره يې يوې جنګي الوتکې يو پوځى ګاډى ويجاړ کړ.

د فرانسې پوځ وايي، د مخالفانو د مهم مرکز بن غازي ښار په شا و خوا کې د قذافي د ځواکونو په وړاندې عملياتو کې ۲۰ الوتکې برخه لري.

تمه کېږي، چې نور هوايي او سمندري ځواکونه به د فرانسې له پوځ سره ملګري شي.

د فرانسې ولسمشر نيکولاس سارکوزي وويل، فرانسه او متحدان یې د بن غازي پر خلکو د هر ډول بريد مخالفت کوي.

پرون د امريکا د بهرنيو چارو وزيرې هليري کلنټن هم د ليبيا پر وضعيت څرګندونې وکړې.

د مېرمن کلېنټن په خبره، امریکايي چارواکي ډاریږي، چې قذافي به داسې جنايتونه وکړي، چې د بيانولو به نه وي.

په عين حال کې راپورونه ورکړل شوي، چې د قذافي ځواکونو پر بن غازي د توپچي او ټانکونو په مرسته حمله وکړه.

رابرټ کېټس روسیې ته خپل سفر وځنډاوه

د امريکا د دفاع وزير رابرټ ګېټس د ليبيا په برخه کې د پرمختګونو د څارنې په خاطر روسيې ته خپل سفر وځنډاوه.

ټاکل شوې وه، ښاغلى ګېټس پرون په درې ورځني سفر سنټ پټرزبرګ او روسيې ته لاړ شي.

د امريکا د دفاع وزارت يا پنټاګون مطبوعاتي مشر جيف موريل خبريالانو ته وويل، دغه سفر لږ تر لږه د څلرويشتو ساعتونو لپاره ځنډول شوى.

دا اعلان په داسې حال کې شوى، چې د معمر القذافي د وفادارو ځواکونو په وړاندې پوځي اقدام پيل شوى دى.

مصریان نن په اساسي قانون کې د بدلون لپاره رایي ورکوي

پوځي شورا له خلکو غوښتي دي، چې په دې نظرپوښتنه کې ډیره برخه واخلي. دغه شورا د فبروري د میاشتې له مظاهرو وروسته هغه مهال واکمنه شوه، چې پخواني دیکتاتور حسني مبارک استعفی ورکړه.

پوځ وایي، د دې راییو له ورکولو سره به د راتلونکې کال په وروستیو کې د انتخاباتو له لارې د یوه پارلماني یا ریاستي رژیم لپاره لاره هواره شي.

د دې نظر پوښتنې له لارې به د ولسمشر د واک دوره هم مشخصه شي. تر اتلس کلن پورته هر مصری چې تذکره لري کولای شي، چې په دغې نظرپوښتنې کې برخه واخلي. له دې حسابه شاوخوا څلویښت میلیونه مصریان د راییو د ورکولو حق لري.

اروپایي پارلمان وایي، چې د دوی څوارلس غړي به د دې راییو د ورکولو بهیر څاري.

م.م او امریکا په سوریې کې د مظاهر کوونکو ځپل وغندل

ملګرو ملتو او امریکا د سوریې د چارواکو له لورې د مظاهره کوونکو ځپل غندلې دي. رپوټونه خپاره شوې دي چې لږ تر لږه څلور تنه مظاهره کوونکي وژل شوې دي.

شخړې پرون د سوریې په جنوبي ښار (داره) کې وشوې. له رپوټونو سره سم دلته امنیتي ځواکونو د سلګونو مظاهره کوونکو د خورولو لپاره ډزې وکړې.

پرون د سوریې په څو نور ښارونو کې هم مظاهرې وشوې او لاریون کوونکو په خپل هیواد کې د سیاسي ازادیو غوښتنه کوله.

د ملګرو ملتو سرمنشي بان کي مون وویل، د سوله ییزو مظاهره کوونکو پر ضد له ځواکه کار اخیستل او د مظاهره کوونکو نیول د منلو نه دي. د ملګرو ملتو سرمنشي د سوریې پر حکومت غږ وکړ، چې له تشدده لاس واخلي.

د سپینې ماڼۍ د ملي امنیت شورا وایي، د اوباما اداره زورزیاتی غندي او د سوریې له حکومته غواړي، چې مظاهره کوونکي پریږدي چې سوله ییزې مظاهرې وکړي.

په روسیې کې د غنمو بیې ۱۲ سلنه لوړې شوې

د جمعې په ورځ د غنمو بیې وروسته له هغې پورته شوې، چې روسیې د روان کال په حاصلاتو کې د کمښت اټکل وکړ او اندیښنې یې را تازه کړې، چې نړۍ ته به یې د سږکال صادرات کم وي.

د روسیې د صدراعظم مرستیال ویکتور زوبکوف وویل، اټکل کیږي، چې سږ کال به د روسیې د غنمو حاصلات د ۸۴ او ۸۵ میلونو ټنو په شاوخوا کې وي. په مخکني اټګل کې ویل شوي وو، چې روسیه به سږ کال د ۸۵ نه تر اوه اتیا میلونو ټنو پورې غنم تولید کړي.

د مې میاشتي لپاره د غنمو په بیو کې په سلو کي ۱۲ اعشاریه ۷۵ سنټه جګوالی راغلی.

روسیه په نړۍ کې د غنمو ستر تولیدونکی هیواد و خو د تېر کال وچکالیو له وجې یې حاصلات کم شول او صادرات یې هم کم کړل.

جاپان له بشري او هستوي بحران سره مخامخ دی

انجینیرانو هڅه کوله چې زیانمن شویوهستوي بټیو ته بیرته برښنا برابره کړي او د ملګرو ملتونو د اټومي انرژۍ کارپوهان وایي، د دغه کار لپاره وخت په چټکۍ سره تیریږي.

د فوکوشیما اټومي بټۍ چې د توکیو د شمال په ۲۵۰ کیلومترۍ کې پرتې دې، یوه اوونۍ وړاندې د ریختر په مقیاس د ۹ درجو سختې زلزلې زیانمنې کړې.

جاپاني انجینیران زیار باسي چې د هستوي بټۍ د سړولو په مقصد د الوتکو له لارې په ټنونو اوبه وروغورځوي او دغه راز د سړونکي سیستم لپاره بیرته برښنا چالانه کړي.

په ویانا کې د ملګرو ملتونو د اټومي انرژۍ چارواکي ګراهام اندریو د جمعې په ورځ خبریالانو ته د جاپان د اټومی بټيو د حالت په اړه معلومات ورکړل. ده وویل:

"په فوکوشیما کې د دای ایچي اټومي بټیو وضعه هماغسي ډېره جدي ده، خو د تېر کنفرانس له وخت راهیسې یې وضعه ډېره نه ده خرابه شوي.

په جاپان کې د تېرې اوونۍ زلزلې او سمندري توپان یا څونامي له وجې لا هم په شمالي سواحلو کې شاوخوا نیم میلیون کسان بې کوره شوي، په سختو شرایطو کې ژوند کوي او زیارباسي، چې په سړې هوا کې ځانونه ګرم وساتي. د سېمې اوسیدونکي د خوراکي موادو او تیلو له کمښت سره هم مخامخ دي.

د مارچ د ۱۱ مي زلزلې او سمندري توپان له امله د مړو شمېر ۷ زره تنه تایید شوی او شاوخوا لس زره نور تري تم دي.

قرغزستان حاصر دی د ملي غازو ۷۵ سلنه په روسیې وپلوري

د قرغزستان صدراعظم الماس بیک حاتمبایف د جمعې په ورځ وویل، هیواد یې چمتو دی چې د غازو د ملي کمپنۍ په سلو کې ۷۵ برخه د روسیې په ګازپروم کمپنۍ وپلوري.

خبري رسنۍ وایي، حاتمبایف له مسکو څخه بهر د روسیې له صدراعظم ولادمیر پوتین سره په یوې ګډې غونډې کې خبرې کولې.

د روسیې کومرسانت ورځپاڼه لیکي، قرغز چارواکي د اکتوبر د میاشتې له انتخاباتو مخکي زیار باسي چې په هیواد کې د ټولنیزو شخړو د مخنیوي په مقصد، عاجلې اقتصادي مرستې تر لاسه کړي.

پاکستان: د کابل، اسلام اباد او واشګټن ترمنځ غونډه کې ګډون نه کوو

پاکستان د جمعې په ورځ وویل، د امریکا د بې پيلوټه الوتکې د برید په اعتراض کې به د افغانستان په اړه مهمې غونډې کې ګډون ونه کړي. په دې حملې کې ۳۵ کسان وژل شوي دي.

د پاکستان د بهرنیو چارو وزارت وایي، په اسلام اباد کې د متحده ایالاتو سفیر کامرون منټر یې احضار کړ او ورته وویل شول، پاکستان به د مارچ د میاشتي د ۲۶ مې نیټې په غونډه کې چې د کابل، اسلام آباد او واشنګټن د استازو تر منځ جوړیږي، ګډون ونه کړي.

په پیښور کې استخباراتي منابع وایي، د پنجشنبې په ورځ یوې بې پيلوټه الوتکې د شمالی وزیرستان په دتاخیلو کې، په یوې کلا باندې برید وکړ او ۱۲ کسان یې په کي ووژل. دا سېمه د طالبانو او القاعده شبکې مرکز بلل کیږي.

پاکستاني چارواکي وایي، د توغندیو په دې حملې کې ملکي خلک او پولیس هم وژل شوي دي.

نور راوښيه

XS
SM
MD
LG