د لاسرسي لېنکونه

تازه خبر
دوشنبه ۲۷ لړم ۱۳۹۸ کابل ۰۰:۲۵

افغانستان

موسی قلعه کې د ملکیانو د وژل کېدو په اعتراض لښکرګاه کې لاریون وشو

د موسی قلعه په عملیاتو کې دطالبانو او القاعدې غړو د وژل کېدو ترڅنګ د ولسي تلفاتو په اړه بېلابېلې شمېرې وړاندې کېږي، خو رسمي سرچینو ویلي چې تر څېړنو وروسته به څرګنده شي.

د افغانستان په جنوبي ولایت هلمند کې د لښکرګاه ښار اوسېدونکو په موسی قلعه کې د دولتي ځواکونو په عملیاتو کې ولسي خلکو ته پر اوښتې مرګ ژوبلې اعتراضي لاریون وکړ.

په دغو بریدونو کې چې حکومت د ۲۲ طالبانو او القاعده جنګیالیو د وژلو خبره کوي، ولسي وګړو ته د درنې مرګ ژوبلې ادعاوې هم کېږي.

ځینو سیمه ییزو سرچینو د څلوېښتو په شاوخوا کې د ولسي خلکو د وژل کېدو خبره کړې، خو رسمي سرچینې که څه هم ملکي تلفات مني، لا یې شمېرې نه دي وړاندې کړي.

لاریون کوونکو له حکومت او طالبانو وغوښتل چي د ملکي وګړو له وژلو لاس واخلي او سوله وکړي.

د دوشنبې په شپه د ملي امنیت ځانګړو ځواکونو موسي قلعه ولسوالۍ کې ځمکني او هوايي عملیات وکړل چې د چارواکو په وینا د طالبانو تر څنګ د القاعده یو شمېر غړي هم پکې ووژل شول.

د وژل شويو ولسي وګړو د کورنیو غړو ازادي راډیو ته وویل چي په دغو عملیاتو کې ۱۴ ملکي کسان وژل شوي او ۹ نور ټپیان شوي. د هلمند د ولایتي شورا یوه غړي د پنځه دیرشو او بل د څلوېښتو ملکیانو د وژل کېدو ادعا وکړه.

ولسمشر اشرف غني د دې پيښې د څیړلو لپاره د هلمند والي ته د یوه پلاوي جوړولو امر کړی.

کونړ کې د دانګام لپاره د طالبانو نومول شوی ولسوال چاودنه کې وژل شوی

ولایتي چارواکي وايي دغه طالب ته له وړاندې په سیمه کې ماین ځای پرځای شوی و.

د افغانستان په ختیځ کې د کونړ ولایت چارواکې وايي، د دانګام لپاره د وسله والو طالبانو نومول شوی ولسوال په یوه چاودنه کې وژل شوی او دوه ملګري يې ټپيان شوي دي.

د کونړ د والي ویاند عبدالغني مصمم د سې شنبې په ورځ (تلې دویمه) ازادي راډیو ته وویل، د خلیل په نوم دا طالب تېره ورځ د شلتن ولسوالۍ په چوګام کې وژل شوی.

ښاغلي مصمم وویل، ماین له وړاندې په سیمه کې ځای پرځای شوی و.

تر اوسه طالبانو د دې پيښې په اړه څه نه دي ویلي.

کندهار کې یوه افغان سرتېري درې امریکايي پوځیان ټپیان کړي

د بهرنیو سرتېرو په متقابلو ډزو کې بریدګر وژل شوی.

د کندهار په هوايي ډګر کې په یوه داخلي برید کې یوه افغان سرتېري درې امریکايي پوځيان په ډزو ټپیان کړي دي.

د بهرنیو سرتېرو په متقابلو ډزو کې بریدګر وژل شوی.

د کندهار د والي ویاند بهیر احمدي وایي، پېښه پرون ورځ ناوخته رامنځته شوې.

د کندهار یوې امنیتي سرچنې ازادي راډیو ته ویلي چې برید د عامه نظم یوه سرتیري لخوا شوی دی. تراوسه د برید انګېزه معلومه نه ده.

بلخوا طالبانو ددغه برید مسئولیت منلی دی.

قاري یوسف احمدي چې ځان د طالبانو ویاند بولي ویلي چې برید د صفي الله په نوم د دوی یوه نفوذي غړي کړی او ادعا کوي چې ۱۲ بهرني سرتېري یې وژلي دي. خو حکومتي چارواکي دا ادعا ردوي.

اشرف غني په هلمند کې د ولسي مرګ ژوبلې په اړه د څېړنو امر کړی

ښاغلي غني ویلي چې ملکي تلفات ورته د منلو او زغم وړ نه دي او دولتي ځواکونو ته یې سپارښتنه کړې چې د مخنیوي په هدف یې لا زیات تدابیر ونیسي.

د افغانستان ولسمشر محمد اشرف غني د هلمند په موسی قلعه کې د دوشنبې شپې (وږي ۳۱مه) په عملیاتو کې ولسي خلکو ته د اوښتې مرګ ژوبلې د څېړلو لپاره د یوه پلاوي ټاکلو امر کړی.

د ارګ په اعلامیه کې ویل شوي چې د موسی قلعه ولسوالۍ په تخته پل کې پر کورنیو او بهرنیو وسله والو د دولتي ځواکونو په عملیاتو کې یو شمېر ولسي وګړي هم وژل شوي.

ارګ د وژل شویو ملکي کسانو د شمېر په اړه څه نه دي ویلي، خو د پېښې د قربانیانو د یوې کورنۍ غړي پرون ازادي راډیو ته وویل چې په برید کې ۱۴ ولسي کسان وژل شوي.

خو د هلمند د ولایتي شورا یوه غړي مجید اخندزاده بیا په دغو عملیاتو کې د څلوېښتو ملکیانو د وژل کېدو ادعا وکړه.

د ارګ په اعلامیه کې ویل شوي: "جمهوررئیس غني په دغه پېښه کې د ملکي وګړو په شهادت سخت خواشینی شو او د هلمند والي ته یې د یادې پېښې د هراړخیزې څېړنې په موخه د یو پلاوی د ټاکلو لارښوونه وګړه چې خپلې موندنې ژر له حکومت سره شریکې کړي؛ دغه راز یې ټپیانو او د شهیدانو کورنیو ته د رسیدګۍ په خاطر اړوندو مسوولینو ته لازمې لارښوونې وکړې."

ښاغلي غني ویلي چې ملکي تلفات ورته د منلو او زغم وړ نه دي او دولتي ځواکونو ته یې سپارښتنه کړې چې د مخنیوي په هدف یې لا زیات تدابیر ونیسي.

خو ارګ د ملکي تلفاتو اصلي عاملین طالبان بولي چې په وینا یې له عامو خلکو د سپر په توګه کار اخلي.

د پاکستان صدراعظم له زلمي خلیلزاد سره لیدلي

عمران خان په نیویارک کې له زلمي خلیلزاد سره لیدلي

د پاکستان صدراعظم عمران خان د افغانستان د سولې لپاره د امریکا ځانګړي استازي زلمي خلیلزاد سره په لیدنه کې هېله څرګنده کړې چې د افغانستان د سولې خبرې بیرته پیل شي.

د پاکستان دولتي راډیو (راډیو پاکستان) د راپور له مخې، عمران خان په نیویارک کې په دې لیدنه کې په افغانستان کې د سولې ټینګښت ضروري بللی او په دې برخه کې یې د ټولو هڅو څخه د خپل هېواد د ملاتړ ډاډ ورکړی.

د پاکستان صدراعظم ویلي چې د افغانستان کړکیچ له پوځي لارو نه شي هواریدای.

له هغې راوروسته چې د امریکا ولسمشر ډونالد ټرمپ له طالبانو سره د سولې خبرې لغوه کړې، دا لومړی ځل دی چې د افغانستان د سولې لپاره د امریکا ځانګړی استازی زلمی خلیلزاد د پاکستان له صدراعظم سره ګوري او ورسره د افغانستان د سولې په اړه خبرې کوي.

خپله زلمي خلیلزاد ددې لیدنې په اړه کومه تبصره نه ده کړې، خو د پاکستان دولتي راډیو په دې لیدنه کې د نوموړې له خولې ویلي چې په افغانستان کې د سولې لپاره له پاکستان سره د شریک کار د دوام غوښتونکی دی.

دوه اونۍ مخکې په کابل کې د طالبانو تر یوه ځانمرګي برید وروسته چې د یوه امریکايي سرتیري په شمول یې ۱۲ کسان ووژل، ښاغلي ټرمپ له طالبانو سره د زلمي خلیلزاد په مشرۍ د امریکا هغه مذاکرات لغوه کړل چې په کې له نهو پړاوه خبرو وروسته دواړه لوري د هوکړه لیک پر یوې مسودې سره سلا شوي وو.

د پاکستان صدراعظم عمران خان، د ملګرو ملتونو د عمومي اسامبلۍ په غونډه کې د ګډون لپاره نیویارک ته تللی دی.

چارواکي: په پکتیا کې اته وسله وال مخالفین وژل شوي

د پکتیا امینتي چارواکي وایي چې د افغان ځواکونو په هوایي برید کې اته وسله وال مخالفین وژل شوي.

د پکتیا د امنیې قوماندانۍ ویاند سردارولي تبسم نن دوشنبه د میزان د میاشتې په لومړۍ نېټه ازادي راډیو ته وویل چې یاد برید د لومړۍ حوزې اړوند د چوڼۍ په سيمه کې پر وسله مخالفینو هغه مهال شوی چې د څلورو موټرسایکلونو په واسطه له یوې سیمې بلې سیمې ته د حرکت په حال کې وو.

تر اوسه وسله والو مخالفینو رسنیو ته د دې برید په اړه کوم غبرګون نه دی ښودلی.

د یورو اشیا د پارلماني مشرانو غونډه نن په قزاقستان کې پيلېږي

د اروپا او اسیا یا یورو اشیا هېوادونو د پارلماني مشرانو څلورمه غونډه نن د قزاقستان په پلازمېنه نورسلطان ښار کې پيلېږي.

د افغانستان د ولسي جرګې د رئیس میر رحمان رحماني په مشرۍ یو پلاوی له افغانستانه هم دې غونډې ته ورغلی دی.

د افغانستان د ولسي جرګې رئیس میر رحمان رحماني تېره ورځ له خپل قزاقستاني او قطري سیالانو او ځینو نورو چارواکو سره لیدلي او د دوه اړخیزو همکاریو په اړه یې بحث کړی.

له خپل قزاقي سیال نورلان نغمتولین سره په لیدنه کې د افغانستان د ولسي جرګې رئیس میر رحمان رحماني له قزاقستانه د لوړو زده کړو، بنسټیزو پروژو او په سوداګریزو چارو کې د همکارۍ د لا زیاتېدو غوښتنه کړې ده.

د اروپا او اسیا د ۵۹ هېوادونو د پارلمانونو د مشرانو څلورمه غونډه له یو بل سره د اړیکو د جوړولو او د هېوادونو د همکاریو په زیاتېدو څرخېږي.

سبا د افغانستان او بنګله دېش د کرکټ لوبډلې د سیالۍ ډګر ته ځي

د افغانستان د کرکټ ملي لوبډله

سبا سې شنبه به د افغانستان او بنګله دېش د کرکټ ملي ټيمونه د درې اړخیزو سیالیو پایلوبه کوي.

د کرکټ نړیوالې شورا ویلي، د افغانستان، بنګله دېش او زمبابوې ترمنځ د کرکټ د درې اړخیزو شل اوریزو کرکټ لوبو دا فاینل به داسې وخت ترسره شي چې ښايي راشد خان پکې ونه شي لوبېدلی.

د کرکټ نړیوالې شورا ویلي چې د افغانستان د لوبډلمشر چپه پښه په تېره لوبه کې ژوبل شوی، نو ځکه یې په فاینل کې لوبېدل په شک کې دي.

د افغانستان او بنګله دېش ټیمونه د شنبې په ماښام ولوبېدل چې د افغانستان ملي ټیم د ماتې د منلو تر څنګ د دې ټیم کپټان راشد خان په فیلډېنګ کې ژوبل هم شو.

د افغانستان، بنګله دېش او زمبابوې ترمنځ د کرکټ شل اوریزې سیالۍ له شااوخوا لسو ورځو راهیسې د بنګله دېش په کوربه توب روانې دي.

په دې لوبو کې افغانستان په ګروپي دور کې د زمبابوې او بنګله دېش په وړاندې څلور لوبې کړي چې دوه یې ګټلي او دوه یې بایللي دي.

دولتي ځواکونو د غزني جغتو ولسوالي له طالبانو بېرته ونیوله

جغتو ولسوالي چې له دوو کلونو راهیسې د طالبانو په ولکه کې وه

د افغانستان امنیتي سرچینې وایي، دولتي ځواکونو په عملیاتو کې د غزني ولایت د جغتو ولسوالي د طالبانو له ولکې آزاده کړې ده.

د ۲۰۳ تندر قول اردو ویاند ایمل مومند نن (یکشنبه، وږي ۳۱مه) آزادۍ راډیو ته وویل، جغتو چې له دوو کلونو راهیسې د طالبانو په ولکه کې وه، د پوځي عملیاتو په لړ کې بېرته د دولت لاسته ولوېده.

هغه زیاته کړه: "د مبین په نوم د عملیاتو په ترڅ کې دښمن ته ډېر تلفات اوښتي چې دقیقه شمېره به یې وروسته خپره شي. د جغتو ولسوالۍ له آزادېدو سره مالستان، جاغوري، اجرستان او ناور ولسوالۍ هم د غزني له مرکز سره ونښلول شوې."

ښاغلي مومند وویل، د مبین د عملیاتو بل پړاو به د غزني د یو نمبر لویې لارې خلاصولو په هدف ډېر ژر پيل شي.

په وروستیو اونیو کې دولتي ځواکونو په یو شمېر نورو ولایتونو کې هم ځینې ولسوالۍ د طالبانو له ولکې خلاصې کړې دي.

د بدخشان وردوج او یمګان ولسوالۍ چې له تېرو څلور او پنځو کلونو راهیسې د طالبانو تر کنټرول لاندې وې، دوه اونۍ وړاندې دولتي ځواکونو بېرته ونیولې.

د پکتیا په ډنډ پټان ولسوالۍ کې چاودنې شپږ کسان وژلي

د پکتیا چارواکي وایي په چاودنه کې درې سرحدي پولیس او درې عام خلک وژل شوي دي.

د افغانستان په جنوب ختیځ کې ولایت پکتیا کي امنیتي چارواکي وایی، په ډنډ پټان ولسوالۍ کې د سړک غاړې ماین چاودنې شپږ کسان وژلي دي.

د پکتیا د پولیسو ویاند سردار ولي تبسم ازادي راډیو ته وویل چې چاودنه نن له غرمي مخکي شاوخوا لس بجي پر یوه سراچه ډوله موټر شوې.

ښاغلي تبسم وویل چې په پېښه کې درې سرحدي پولیس او درې عام خلک وژل شوي دي.

تراوسه د برید مسوولیت چا نه دی منلی.

چارواکي: په لوګر کې یو طالب قوماندان له یوه بل طالب سره وژل شوی

د لوګر مرکز پل علم

د لوګر امینتي چارواکي وایي چې تېره شپه د دې ولايت د محمداغې ولسوالۍ اړونده سیمه کې افغان امنيتي ځواکونو د حشمت په نوم د طالبانو يو مهم قوماندان له يو تن بل طالب سره وژلی.

د لوګر د پولیسو ویاند شاپور احمدزي ازادي راډیو ته په لېږلې خبرپاڼه کې ویلي چې حشمت د سړکونو په سر د چېک پاینټونو په اچولو او د خلکو په ښکته کولو کې مهمه ونډه لرله چې څه موده وړاندې یې د لوګر د ټرافيکو سرپرست مدير هم له موټره ښکته او بیا وژلی و.

تر اوسه وسله والو طالبانو په دې اړه رسنیو ته څه نه دي ویلي.

په هلمند کې نیول شوې روسۍ او ایرانۍ وسلې خبریالانو ته وښودل شوې

په هلمند کې یو شمېر روسۍ او ایرانۍ وسلې خبریالانو ته وښودل شوې چې چارواکي وايي، له وسله والو طالبانو څخه یې نیولي دي.

د هلمند د ملي امنیت چارواکو پرون شنبه وویل چې د دوی ځواکونو د شپې د دوربینونو په شمول ۱۰۰ ډوله وسایل او ګڼې وسلې د دولت له وسله والو مخالفانو څخه نیولي دي.

دوی همداراز وویل چې د وسلو ترڅنګ یې یو شمېر وسله وال مخالفان هم نیولي دي.

په چاریکار ښار کې د هاوان مرمۍ یوه ښځه وژلې او ۸ تنه ټپیان دي

د چاريکار ښار د شاه مست قلندر په سیمه کې د هاوان د مرمۍ د چاودنې له امله یوه ښځه وژل شوې او ۸ تنه زخمیان شوي دي.

د پروان د امنیې قوماندانۍ د امنیت امر عبدالواسع ګلبهاري پرون د سپټمبر په یویشتمه ازادي راډیو ته وویل چې په زخمیانو کې ۶ کوچنیان دي.

ګلبهاري وویل چې زخمیان روغتون ته لېږدول شوي دي.

دفاع وزارت: د زابل د وروستۍ پېښې مشکوک طراحان ونیول شول

د افغانستان دفاع وزارت وايي چې په قلات کې پر روغتون د وروستۍ حملې مشکوک طراحان او د حمله کوونکو ملګري ونیول شول.

دفاع وزارت ویلي چې دا کسان د جمعې په شپه په غزني کې په پوځي عملیاتو کې نیول شوي دي.

د دفاع وزارت ویاند روح الله احمدزي پرون د سپټمبر په یویشتمه ازادي راډیو ته وویل چې عملیات ځانګړو ځواکونو کړي او مشکوک کسان کابل ته لېږدول شوي دي.

احمدزي وویل، له نیول شویو کسانو تحقیق کېږي.

په قلات کې د پنجشنبې په ورځ د ملکي روغتون مخې ته چاودنه وشوه چې ۴۱ تنه په کې ووژل شول او تر سلو زیات زخمیان وو.

وسله والو طالبانو د حملې مسؤلیت اخیستی دی.

کرکټ بورډ د بند امیر، بُست او امو زونونو مسؤلین له دندو لېرې کړل

د افغانستان کرکټ بورډ د بند امیر، بُست او امو زونونو مسؤلین له خپلو دندو د ناوړه ګټې اخیستنې او فساد له امله له دندو لېرې کړل.

د کرکټ بورډ ویاند فرید هوتک نن ازادي راډیو ته وویل چې د افغانستان د کرکټ بورډ مشرتابه د يادو زونونو د مسؤلینو د کاري پروګرامونو او کړنو له ارزونو وروسته دغه پرېکړه کړې.

د دوی په خبره، د بند امیر زون مشر میر مبارز، د بُست زون مشر مسعود رحماني او امو زون مشر نور عالم فرید چې له شااوخوا پنځو کلونو راهیسې یې د زونونو رهبري کوله، د پام وړ لاسته راوړنې نه درلودې.

د افغانستان د کرکټ بورډ اداره وايي، هېڅ چاته اجازه نه ورکوي چې له کرکټه ناوړه استفاده وکړي او د خپلو شخصي ګټو لپاره کرکټ قرباني کړي.

د افغانستان تر ۱۶ کلنو کم عمره فوټبال لوبډلې نیپال ته ماته ورکړه

د افغانستان تر ۱۶ کلنو کم عمره فوټبال ملي لوبډلې د اسیا د ملتونو جام په مقدماتي سیالیو کې نیپال ته ماتې ورکړه.

د افغانستان د فوټبال فدراسیون رسنیز مسؤل شمس امیني ازادي راډیو ته وویل چې افغان ۱۶ کلنې فوټبال لوبډلې په دغه لوبه کې نیپال ته ۳ د صفر پر وړاندې ماته ورکړه.

د افغانستان تر ۱۶ کلنو عمره فوټبال ملي لوبډلې په دغو سیالیو کې خپله لومړۍ لوبه د فلسطین پر وړاندې ۲ پر ۲ مساوي کړې وه.

د اسیا د ملتونو جام په مقدماتي سیالیو کې د افغان لوبډلې بله لوبه د يکشنبې په ورځ د کوربه ایران پر وړاندې ده چې په بریا سره به یې د دغو سیالیو بل پړاو ته لار پیدا کړي.

د کرکټ افغان لوبډله نن د بنګله دېش پر وړاندې د لوبې ډګر ته ځي

ټاکل شوې چې د افغانستان، بنګله دېش او زمبابوې ترمنځ د درې اړخیز کرکټ سیالیو په لړ کې افغانستان نن د بنګله دېش پر وړاندې د لوبې ډګر ته ولاړ شي.

دغه شل اوریزه لوبه نن مازدیګر مهال په پنځو بجو د بنګله دېش په چټاګروم لوبغالي کې پېلېږي.

افغان لوبډلې په دغه سیریز کې تېره شپه د زمبابوې پر وړاندې لوبه وکړه، چې په اوو وکټو یې ماتې وخوړه.

د افغانستان د کرکټ ملي لوبډله په روانو سیالیو کې په دوو بریاوو او يوې ماتې سره د نومرو په جدول کې لومړی، بنګله دېش په ورته پوزېش سره دوهم او زمبابوې بیا په څلورو لوبو کې له یوې بریا سره درېیم ځای خپل کړی دی.

د ارزګان بزګران د خپلو حاصلاتو لپاره باراز غواړي

ځایي بزګران وایي چې په ارزګان کې سږکال د وچو او تازه میوو حاصلات زیات شوي خو بازار نه لري.

د ارزګان د مرکز ترینکوټ یو شمېر بزګرانو ازادي راډيو ته وویل چې د وچو او تازه مېوو حاصلات يې د پخوا په پرتله دوه چنده شوي او لامل يې سږکال زیات بارانونه یادوي.

خو دوی وايي، که څه هم حاصلات يې زیات شوي، خو بازار نه لري.

غوښتنې يې دا دي چې دولت دې د حاصلاتو لپاره بازار ورته پیدا کړي.

په ورته وخت کې د ارزګان ولایت د کرنې ریاست مسؤلین وايي، پلان لري چې څو په دغه ولایت یخې خونې جوړې کړي.

کندهار کې هوايي برید۱۰ طالبان وژلي دي

د طالبانو او امریکا ترمنځ د مذاکراتو تر لغوه کېدو وروسته امریکايي چارواکو پر طالبانو د پوځي فشار ډېرېدو خبره کړې.

د افغانستان په جنوبي ولایت کندهار کې چارواکي وایي، په ارغستان ولسوالۍ کې په یوه هوایي برید کې ۱۰ طالبان وژل شوي او دوه نور ټپیان دي.

د کندهار دوالي ویاند بهیر احمدي ازادي راډیو ته وویل چې دغه طالبان تېره شپه ناوخته د بهرنیو ځواکونو په عملیاتو کې وژل شوي.

ښاغلي احمدي وویل چې دغو وسله والو غوښتل د دولتي ځواکونو پر پوستو برید وکړي خو پلان یې افشا شو او پخپله ووژل شول.

طالبانو لا په دې اړه څه نه دي ویلي.

د طالبانو او امریکا ترمنځ د سولې مذاکراتو تر لغوه کېدو وروسته، په افغانستان کې د بهرنیو ځواکونو هوايي عملیات ډېر شوي دي.

امریکايي چارواکو او په تېره بیا د امریکا ولسمشر ډونالد ټرمپ پر طالبانو د پوځي فشار ډېرولو خبره کړې.

ښاغلي ټرمپ د مذاکراتو لغوه کېدو ته اشارې پرون (سپټمبر ۲۰مه) ویلي چې وسله والو طالبانو سخته اشتباه وکړه او داسې سخت وهل شوي چې په ۱۹ کلنې جګړه کې ساری نه لري.

د افغانستان حکومت هم د طالبانو پروړاندې خپل عملیات ډېر کړي دي.

چارواکي: په لوګر کې هوايي برید پنځه وسله وال طالبان وژلي

د لوګر مرکز پل علم

په لوګر کې امنیتي چارواکو ویلي چې د جمعې په شپه د کمال خېلو په سیمه کې په هوايي حمله کې پنځه وسله وال طالبان وژل شوي دي.

د ازادي راډیو د خبریال په حواله، په دې حمله کې د وسله والو یو مشر بابک هم وژل شوی دی.

په لوګر کې د څلورمې پلې لوا ویاند احمد شکیل تسل دا خبر تأیید کړی، خو د نورو جزیاتو له ورکولو یې ډډه کړې ده.

وسله والو طالبانو لا په دې اړه خبرې نه دي کړي.

شیدا محمد ابدالي د محمد اشرف غني په ګټه له کاندیدۍ تېر شو

شیدا محمد ابدالي

د افغانستان د جمهوري ریاست لپاره کاندید شیدا محمد ابدالي پرون د سپټمبر په شلمه د جمهور رئیس محمد اشرف غني له انتخاباتي کمپاین سره یوځای او له کاندیدۍ تېر شو.

ولسمشر محمد اشرف غني پرون په دې اړه په مراسمو کې له شیدا محمد ابدالي مننه وکړه.

شیدا محمد ابدالي د جمهوري ریاست لپاره د کاندیدانو له ابتدايي لېسته چې د ټاکنو خپلواک کمېسيون تأیید کړي وو، دوهم کاندید دی چې د محمد اشرف غني په ګټه له کاندیدۍ تېر شو.

تر ابدالي مخکې زلمی رسول د اشرف غني په ګټه تېر شوی و.

د جمهوري ریاست ټاکنې د میزان په شپږمه یا د سپټمبر په اته ویشتمه دي.

د فوټبال د غوره لیګ سیالیو اتم دور طوفان هریرود لوبډلې وګاټه

په افغانستان کې د فوټبال د غوره لیګ سیالیو اتم دور د طوفان هریرود لوبډلې ګټلی دی.

د غوره لیګ فاینل مسابقه پرون د سپټمبر په شلمه ماښام د طوفان هریرود او شاهین اسمايي لوبډلو ترمنځ وه.

په پرونۍ سیالۍ کې یوازې د طوفان هریرود لوبډلې یو ګول وواهه چې د لوبډلې په ګټه دغه ګول هم حاتم شېردل وهلی دی.

مسابقه یو پر صفر پای ته ورسېده.

په دې سیالیو کې د افغانستان د اتو زونونو د فوټبال لوبډلو ګډون درلود.

د نړۍ زرګونه کسانو د اقلیم د ککړتیا د مخنیوي په اړه لاریونونه وکړل

د نړۍ په مختلفو هېوادونو کې پرون د سپټمبر په شلمه زرګونه کسانو د اقلیم د ککړتیا د مخنیوي او د چاپېریال ساتنې لپاره لاریونونه وکړل.

د اسټرالیا له سډني ښاره تر کابل او اسلام اباده خلکو په سوله ییزو لاریونونو کې له نړیوالو رهبرانو غوښتنه وکړه چې داسې پرېکړې وکړي چې پر اساس يې په نړۍ کې د زهرجنو ګازونو تولید کم شي او چاپېریال ته له دې امله متوجې ګواښونه کم شي.

له تقریباً یوه کال راهیسې یوه ۱۶کلنه سویډنۍ نجلۍ چې ګرېتا تونبرګ نومېږي، د جمعې په ورځو د اقلیمي تغییراتو د مخنیوي لپاره سوله ییز لاریون کوي.

په نړۍ کې پرونيو لاریون کوونکو هم له هغې الهام اخیستی و.

په کابل کې هم پرون سلګونه کسان په لاریون کې را یوځای شوي وو چې لویه برخه یې ښځې وې چې (له جګړې به ونه مرو خو له ککړې هوا به ومرو) شعارونه لېږدول.

په ننګرهار کې څه د پاسه دوه سوه کیلو ګرامه نشه يي مواد ونیول شول

په ننګرهار ولایت کې څه د پاسه دوه سوه کیلو ګرامه نشه يي مواد ونیول شول.

د ننګرهار د امنیې قوماندانۍ ویاند اتل مبارز ازادي راډیو ته وویل، پولیسو د سنبلې د میاشتې په ۲۴مه نېټه د جلال اباد ښار په پنځمه او نهمه ناحیه کې (۲۲۶) کیلو ګرامه هیروئین او چرس ونیول.

دغه ډول پولیسو په روداتو ولسوالۍ کې په یوه موټر کې د تلاشۍ پر مهال (۴۷) کیلو ګرامه چرس او (۱۵) کیلو ګرامه هیروئین ونیول.

د دې موادو د قاچاق او ساتلو په تور شپږ کسان هم نيول شوي دي.

په سرپل کې څه د پاسه یو نیم ټن نشه يي مواد وسوځول شول

په سرپل ولایت کې څه د پاسه یو نیم ټن نشه يي مواد وسوځول شول.

د سرپل ولایت امنیه قوماندان جیلاني ابوبکر د نشه يي موادو د سوځولو پر مهال رسنیو ته وویل، له نشه يي موادو سره د مبارزې پولیسو د تېر یوه کال په بهیر کې په څو ولسوالیو کې څه د پاسه یو نیم ټن نشه يي مواد لکه هیروئین، ښیښه، تاریاک، چرس او شراب نیولي دي.

ده وویل: موږ (۱۹) واړه او لوی قاچاق کوونکي نیولي او د دوی دوسیې مو د یو نیم ټن نشه يي موادو له اسنادو سره یوځای عدلي او قضايي ادارو ته سپارلي دي.

له قاچاق کوونکو سره یو شمېر وسلې او موټرونه هم نیول شوي او عدلي او قضايي مرکز ته سپارل شوي دي.

نور راوښيه

XS
SM
MD
LG