د لاسرسۍ وړ لېنکونه

تازه خبر
شنبه ۲۸ مرغومی ۱۳۹۸ کابل ۰۸:۰۸

افغانستان

سرچینه: په پروان ولایت کې د ملي امنیت یو کارکوونکی وژل شوی

د پروان ولايت چارواکي وايي، په سيدخېل ولسوالۍ کې د ملي امنيت يو کارکوونکى وژل شوى دى.

د پروان يوې امنيتي سرچينې د نوم نه ښوولو په شرط نن ازادي راډيو ته وويل چې دغه مامور تېره شپه په ډزو وژل شوى دى.

سرچينه وايي، د پېښې په تړاو تر اوسه څوک نه دي نيول شوي، خو په دې اړه پلټنې روانې دي.

چارواکي: د بلخ په زارع ولسوالۍ کې ۶۶ طالبان وژل شوي

د بلخ یو انځور

په بلخ ولايت کې امنيتي چارواکي وايي، په زارع ولسوالۍ کې د ملي اردو په هوايي حملو کې ۶۶ وسله وال طالبان وژل شوي دي.

د ٢٠٩ شاهين قول اردو وياند حنيف رضايي نن ازادي راډيو ته وويل چې په وژل شويو کې د طالبانو درې مهم قوماندانان هم شامل دي.

ښاغلي رضايي ويلي چې په حملو کې ١٢ نور وسله وال طالبان ټپيان شوي دي.

د ٢٠٩ شاهين قول اردو وياند وايي، دغه هوايي حملې په تېرو ٢٤ ساعتونو کې شوي چې په لړ کې يې د طالبانو درې مرکزونه په نښه شوي دي.

٢٠٩ شاهين قول اردو وايي چې د بلخ ولايت په پنځو ولسواليو کې د افغان پوځيانو پوځي عمليات روان دي.

خو ذبيح الله مجاهد چې ځان د وسله والو طالبانو وياند معرفي کوي، ويلي چې په بلخ کې يې تر لسو زيات پوځيان وژلي دي.

د مشهد او هرات ترمنځ مستقيمې الوتنې پيل شوې

د افغانستان او ایران بیرغونه

د ايران يو خبري اژانس وايي چې د ايران د مشهد او هرات ولايت ترمنځ مستقيمې الوتنې پيل شوې.

مهر خبري اژانس نن د ايران د خراسان رضوي هوايي ډګرونو د عمومي رئيس محمد باقر قاسمزاده په حواله خبر ورکړى چې دغه الوتنې به هره جمعه کېږي.

د مشهد او هرات ترمنځ مستقيمې الوتنې چې مخکې د اريانا افغان هوايي شرکت او د ايران د کام هوايي شرکت له خوا ترسره کېدې، ځنډول شوې دي.

تر دې وروسته به دغه پروازونه د ايران د کيش هوايي شرکت له خوا ترسره کېږي.

چارواکي: په فراه کې ٥ وسله وال طالبان وژل شوي

په فراه کې د طالبانو د یو په نښه کړای شوي موټر انځور

په فراه ولايت کې د پوځي عملياتو په نتيجه کې ٥ تنه وسله وال طالبان وژل شوي دي.

د فراه امنيه قومانداني وايي دغه پوځي عمليات چې لا هم دوام لري، د قاطع ملاتړ ماموريت هم په کې برخه لري.

ويل شوي چې عمليات د پُشت رود ولسوالۍ د ناامنو سيمو د تصفيې لپاره پيل شوي دي.

د فراه د امنيې قوماندانۍ وياند محب الله محب نن وويل چې پرون د دغو عملياتو پر مهال بهرنيو ځواکونو د وسله والو مخالفانو يو موټر هم په نښه کړى دی.

ده وویل: د فراه د پشت رود ولسوالۍ د ګجګين کلي په مربوطاتو کې د ناټو د قاطع ملاتړ ماموريت د الوتکو د بمبارۍ له کبله چې د ترورېستو طالبانو پر يوه موټر شوې، د طالبانو د يوه مهم قوماندان حافظ قدرت ٥ کسان وژل شوي او موټر يې چې وسلې او مهمات په کې بار وو، کاملاً له منځه وړل شوی دی.

وسله والو طالبانو په پشت رود ولسوالۍ کې د تازه عملياتو په اړه تبصره نه ده کړې.

د فراه ولايت چارواکو تر دې مخکې هم په پوځي عملياتو کې د دولت وسله والو مخالفانو ته د درنې مرګ ژوبلې د اړولو خبر ورکړى و.

د ننګرهار په خوګیاڼو کې ٥ وسله وال طالبان او ٣ محلي پوليس وژل شوي

د ننګرهار په خوګیاڼو ولسوالۍ کې د وسله والې نښتې له کبله ٥ وسله وال طالبان او ٣ محلي پوليس وژل شوي دي.

ولايتي چارواکي وايي، په غازي اباد سيمه کې نښته تېره شپه وروسته له هغې پيل شوه چې لومړى وسله والو طالبانو پر يوه پوسته ډله ييزه حمله وکړه.

د ننګرهار ولايت مطبوعاتي دفتر نن په يوه اعلاميه کې ويلي، په جګړه کې ٥ وسله وال طالبان او ٣ محلي پوليس وژل شوي، ٨ طالبان او ٢ محلي پوليس ټپيان شوي دي.

په اعلاميه کې ويل شوي چې د وسله والو مړي د جګړې په ځاى کې پاتې دي.

له ننګرهاره په بل خبر کې ويل شوي چې نن سهار په خوګياڼو ولسوالۍ کې د يوه ماين چاودنې يو ملکي کس وژلى او ٩ نور ټپيان کړي دي.

د درېيو ټپيانو وضعيت نازک ښوول شوى دى.

ناټو په افغانستان کې د دوو وژل شويو بهرنيو پوځيانو هويت په ډاګه کړ

د ناټو سرتېري

د ناټو د قاطع ملاتړ ماموریت په افغانستان کې د دوو وژل شويو بهرنيو پوځيانو هويت په ډاګه کړ.

دغه ماموريت دغه وژل شوي پوځيان د امريکا د پوځ د ځانګړو عملياتو د قوماندانۍ غړي بللي دي.

پوځ د پنجشنبې په ورځ وویل، د لویس ډیلیون فیګيروا او خوزه جې ګونځالیز په نوم دا دوه امریکايي پوځيان تېره چهارشنبه په فاریاب ولایت کې د سپکو وسلو په ډزو وژل شوي دي.

په افغانستان کې له ٢٠٠١ میلادي کال راهيسې تر ٢٤٠٠ زیات امریکايي پوځيان مړه شوي دي.

په دې هېواد کې امریکايي سرتېرو ته وروستي تلفات په داسې حال کې اوړي چې د زلمي خلیلزاد په مشرۍ امریکايي هیئت په دوحه کې د طالبانو له استازو سره د سولې پر یوه احتمالي توافق د سلا کېدو لپاره نهم پړاو خبرې پیل کړي دي.

ولسمشر غني: طالبان د دې هېواد دي، خو د هېواد برخلیک ټاکونکي نه دي

ولسمشر اشرف غني وايي چې د ولسمشرۍ انتخابات د سولې له روانو هڅو سره کېږي او د سولې روان بهیر یې مخه نشي نیولی.

ښاغلي غني پرون پنجشنبې د سوالونو او ځوابونو په یوه غونډه کې چې د طلوع د خصوصي ټلویزیون په نوښت جوړه شوې وه، د طالبانو د هغې غوښتنې په اړه چې وايي د ولسمشرۍ انتخابات دې وځنډول شي، د یوې پوښتنې په ځواب کې څرګنده کړه چې د طالبانو دا غوښتنه د خلکو د هیلو خلاف ده.

دی وایي: طالبان د هېواد یوه برخه دي، خو د هېواد د برخلیک ټاکونکي نه دي، انتخابات د خلکو حق دی او د افغانستان خلکو پرېکړه کړې چې مشروع دولت ولري.

د افغانستان د ولسمشرۍ انتخاباتو ته نږدې پنځه اوونۍ پاتې دي، خو په عین حال کې د راپورونو له مخې د افغانستان د سولې لپاره د امریکا ځانګړي استازي زلمي خلیلزاد پرون په دوحه کې د طالبانو له استازو سره د خبرو نهم پړاو پیل کړ.

دواړو لوریو ویلي چې د سولې یوې موافقې ته ډېر نږدې شوي دي.

د خبرو په تېرو اتو پړاوونو کې افغان حکومت حضور نه درلود خو ولسمشر غني په خپلو پرونیو څرګندونو کې وویل، د احتمالي سولې هر راز تړون به د افغانستان له حکومت سره کېږي.

د مهاجرت نړیواله اداره په کندهار او نیمروز ولایتونو کې مرستې ځنډوي

د مهاجرت د نړیوالې ادارې نښان

د مهاجرت نړیواله اداره IOM په پام کې لري چې د بودجې د کموالي له کبله هېواد ته له راستنېدونکو افغان کډوالو سره د مرستې پروګرام په کندهار او نیمروز ولایتونو کې وځنډوي.

IOM په یوه بیان چې پرون خپور شو، ویلي دي چې مرستندویو هېوادونو د اګست د میاشتې تر نیمايي پورې له ایران او پاکستانه له راستنېدونکو افغانانو سره د مرستې د پروګرام د بودجې په سلو کې یوازې ۲۶ ورکړې ده.

له دې پروګرام سره د سویس، ناروې، کاناډا او چک جمهوریت حکومتونه او ځیني نړیوالې ټولنې مالي مرسته کوي.

دا په داسې حال کې ده چې له ایران او پاکستانه د افغان کډوالو د راستنېدو لړۍ روانه ده.

د کډوالو نړیواله اداره وايي چې د تېرې اوونۍ په ترڅ کې له ایرانه نږدې څلور زره (۳۸۷۹) او له پاکستان څخه ۳۵ کسان هېواد ته راستانه شوي او دې ټولنې لږ او ډېره مرسته ورسره مرسته کړې ده.

په خوست کې چاودنو یو ملکي وګړی وژلی او ۱۱نور یې ټپیان کړي

په خوست ولایت کې دوو جلا چاودنو یو ملکي وګړی وژلی او ۱۱نور یې ټپیان کړي.

چارواکي وايي چې پرون پنجشنبه مازیګر مهال د اسماعیل خېلو او مندوزیو ولسوالۍ په اړوند سماوات کلي کې د ولایتي قواوو یا کمپاین ځواکونو پر شخصي موټر موټربم برید وشو چې یو ملکي وګړی پکې ووژل شو او پنځه تنه نور ټپیان شول.

د اسماعیل خېلو او مندوزیو ولسوال محمد اکبر ځدراڼ ازادي راډیو ته وویل، دا حمله د ولایتي قواوو پر سرتېرو چې اکثر په خپلو شخصي موټرو کې تګ راتګ کوي، شوې ده.

دی وایي: موټر شخصي و، خو پرسونل پکې د کمپاین و، پر دوی موټربم حمله شوې چې یو ملکي نفر پکې شهید شوی دی.

له دې حملې لږ ځنډ وروسته د خوست ښار په مرکزي چوک کې حمام مارکېټ ته نږدې یوه بله بمي چاودنه وشوه چې په دې پېښه کې بیا شپږ ملکي وګړي ټپيان شول.

د دې حملو مسؤلیت تر دې دمه کومې ډلی نه دی منلی.

د خوست د امنیې قوماندانۍ ویاند حیدر عادل وویل، چاودنه په یوه دوکان کې شوې او د پېښې ټپيان روغتونونو ته لېږدول شوي چې دا مهال يې روغتیايي حالت د ډاډ وړ دی.

محمد محقق د عبدالله عبدالله له ټیم سره یوځای شو

د افغانستان د وحدت اسلامي ګوند او د ملي وحدت حکومت د اجرائیه ریاست مرستیال مشر محمد محقق

د افغانستان د وحدت اسلامي ګوند مشر محمد محقق د ثبات او همپالنې په نوم له انتخاباتي ډلې سره یوځای شو.

د ثبات او همپالنې ټاکنیزې ډلې مشري د افغانستان د ملي یووالي حکومت اجرائیه رئیس او جمهوري ریاست ته نوماند، عبدالله عبدالله کوي.

د دې ډلې ویاند، فریدون خوځون نن د اګسټ په ۲۲مه ازادي راډیو ته وویل چې محمد محقق به سبا په کابل کې په یوه غونډه کې خپل رسمي موقف اعلان کړ.

محمد محقق مخکې د محمد حنیف اتمر په مشرۍ د سولې او اعتدال په انتخاباتي ډله کې مرستیال و.

ښاغلي محقق د ازادي راډیو پرله‌پسې اړیکو ته ځواب ورنه‌کړ.

ټرمپ: نور هېوادونه باید د اسلامي دولت ډلې پر ضد جګړه وکړي

د امریکا ولسمشر ډونالد ټرمپ

د امریکا د متحده ایالاتو ولسمشر وایي، نور هېوادونه باید د اسلامي دولت ډلې پر ضد جګړه وکړي.

ده د روسیې، ایران، ترکیې، عراق او افغانستان نومونه یاد کړل، بیا یې وویل: "وګورئ هند هلته دی جګړه نه ورسره کوي، موږ جګړه ورسره کوو. پاکستان ورسره یو مخ نږدې دی. دوی ډېره لږه جګړه ورسره کوي، بېخي لږ. دا عادلانه نه‌ده او متحده ایالات اووه زره مایله لیرې پراته دي."

داعش ډلې په کابل کې د واده په یوه محفل کې د شنبې د ورځې د ځان وژونکي برید مسؤلیت ومانه. په دې چاودنه کې ۸۰ تنه ووژل شول.

د روان کال په پیل کې امریکایي ځواکونو په سوریه کې د داعش تر لاس لاندې سیمې ونیولې. بیا وروسته دا اندېښنې پیدا شوې چې د داعش وسله‌وال بېرته په عراق او سوریه کې د پیاوړي کېدو په حال کې دي.

ولسمشر غني د دارالامان ماڼۍ پرانیسته

د دارالامان ماڼۍ د پرانیستې مراسم

د افغانستان ولسمشر اشرف غني تېره شپه د یو لړ مراسمو په ترڅ کې د دارالامان رغېدلې ماڼۍ پرانیسته.

ښاغلي غني په دغو مراسمو کې وویل: "نن موږ د دارالامان له ورانې او ویجاړې ماڼۍ څخه بیا دارالامان جوړ کړ، مبارک مو شه، مبارک مو شه!"

په دې مراسمو کې د امان‌الله خان د لور شهزادګۍ هندیا په ګډون یو شمېر حکومتي چارواکو، سیاستوالو او مدني فعالانو برخه اخیستې وه.

د دارالامان د ماڼۍ د بیارغېدو چارې د ۲۰۱۶ کال د مې په میاشت کې پیل شوې وې. پر دې ماڼۍ نږدې ۱۰ میلیونه ډالر ولګېدل.

دا ماڼۍ د امان‌الله خان د پاچاهۍ پر مهال د ۱۹۲۰ میلادي لسیزې په لومړیو کې ودانه شوې وه، خو په ۱۹۹۰ میلادي لسیزه کې د کورنیو جګړو پر مهال سخته زیانمنه شوه.

په افغانستان کې د ۲ امریکايي سرتېرو وژل کېدل تأیید شو

ارشیف، په افغانستان کې یو وژل شوی امریکايي سرتېری

د ناټو په مشرۍ د غوڅ ملاتړ مأموریت پرون ناوخته دا خبره تأیید کړه چې دوه پوځیان‌یې په افغانستان کې وژل شوي دي.

د غوڅ ملاتړ مأموریت په یوه بیان کې ویلي دي چې دوه امریکایي سرتېري د چهارشنبې په ورځ په افغانستان کې وژل شوي دي.

په دې بیان کې نور معلومات نه‌دي ورکړل شوي چې دا عسکر چېرته وژل شوي دي.

د روان میلادي کال له پیله تر اوسه ۱۶ امریکایي سرتېري په افغانستان کې وژل شوي دي.

البانیا کې یوې بېړۍ ۳۶ افغان کډوال له ډوبېدو ژغورلي

ارشیف، په ترکیه کې یو شمېر پناه غوښتونکي

د البانیا دفاع وزیره وایي چې د البانیا یوې بېړۍ په ایجه سمندرګي کې ۳۶ افغان کډوال له ډوبېدو ژغورلي دي.

د البانیا دفاع وزیرې اولتا شاکا پرون په ټویټر کې ولیکل چې د اروپایي ټولنې د سرحدي ساتونکو په مرسته د البانیا بېړۍ ۱۹ افغان ماشومان، اته مېرمنې او نهه نارینه چې غوښتل‌یې د یونان لور ته پورې وځي، وژغورل او سیمه‌ییزو چارواکو ته‌یې وسپارل.

چارواکي: د کونړ په دانګام کې د دولت ۵ وسله وال مخالفین وژل شوي

د کونړ والي وايي، تېره شپه د ملي امینت ځانګړو ځواکونو په دانګام ولسوالۍ کې د وسله والو مخالفینو په مرکزونو عملیات کړي چې پکې ۱۱ تنو ته مرګ ژوبله اوښتې ده.

والي عبدالستار میرزکوال د ۴ شنبې په ورځ ازادي راډيو ته وويل چې په دغو شپنیو عملیاتو کې د وسله والو دوه مرکزونه له منځه وړل شوي، پنځه تنه يې وژل شوي او ۶ يې ټپیان دي.

هغه وايي، وژل شوي او ټپيان له ډېورند کرښې اخوا ګاونډي هېواد ته اړول شوي.

تر اوسه د دولت وسله والو مخالفینو په دې اړه څه نه دي ویلي.

نور راوښيه

XS
SM
MD
LG