د لاسرسي لېنکونه

تازه خبر
دوشنبه ۲۷ لړم ۱۳۹۸ کابل ۰۰:۵۶

افغانستان

چارواکي: طالبانو په هرات کې د عامه محافظت شپږ سرتېري وژلي

په هرات کې چارواکي وايي، طالبانو د هرات – خواف د اوسپنۍ د پټلۍ د عامه محافظت د ځواکونو شپږ سرتېري وژلي دي.

د غوریان ولسوال فرهاد خادمي نن سهار ازادي راډیو ته وویل، دا سرتېري د طالبانو په هغه برید کې وژل شوي چې د دې ولسوالۍ د ساغر په نوم پر امنیتي پوستې یې تېره شپه کړی دی.

د هرات یو امنیتي چارواکي چې نه یې غوښتل نوم یې واخیستل شي، په سیمه کې د ازادي راډیو خبریال ته ویلي، په دې برید کې د عامه محافظت ځواکونو لس سرتېري وژل شوي او ۱۱ نور طالبانو اسیران کړي دي.

بل خوا د هرات چارواکي په کرخ ولسوالۍ کې هم د طالبانو او ولسي پاڅوانوالو ترمنځ نښته کې د مرګ ژوبلې د اوښتو خبر ورکوي.

د هرات امنيه قوماندان نن ازادي راډيو ته وويل، د وسله والو طالبانو د سرې قطعې غړو تېره شپه د کرخ ولسوالۍ په تګاب سيمه کې حمله پيل کړه چې تر نن سهاره روانه وه.

مل پاسوال امین الله امرخېل وايي، په پېښه کې ٥ تنه پوليس او ولسي پاڅونوال وژل شوي او ٥ نور ټپيان شوي دي.

قوماندان وايي، په دې پېښه کې وسله وال طالبان هم وژل شوي دي.

ده وویل: دواړو لوريو ته مرګ ژوبله اوښتې ده، هم د ولسي پاڅونوالو ځواک ته او هم ملي او محلي پوليسو ته، موږ لس تنه مړه او ټپيان لرو چې پنځه تنه وژل شوي او پنځه تنه يې ټپيان دي، د دښمن ٨ تنه هم وژل شوي او د ټپيانو شمېر يې معلوم نه دى.

په دې وروستيو کې وسله والو طالبانو د هرات پر ختيځو ولسواليو خپلې حملې زياتې کړې دي.

چارواکي: په کندهار کې پوليسو او وسله والو ته مرګ ژوبله اوښتې

د کندهار د ښار یو انځور

د کندهار په خاکرېز او معروف کې د جګړو له امله پوليسو او وسله والو ته مرګ ژوبله اوښتې ده.

د کندهار د پوليسو ویاند جمال ناصر بارکزي ازادي راډيو ته وويل چې په خاکرېز کې تېره شپه د جګړې له امله شپږ وسله وال او دوه پوليس وژل شوي دي.

ده وویل: د خاکرېز ولسوالۍ د شُرغي په سیمه کې د طالبانو شپږ کسان وژل شوي او اته یې ټپیان دي، دوه پولیس هم ټپیان او دوه شهیدان شوي دي.

بل خوا د کندهار امنیه قوماندان جنرال تادين خان په پر خپل ټوېټر لیکلي چې تېره شپه وسله والو د معروف ولسوالۍ پر مرکز بريد کړی چې له امله یې يو شمېر افغان سرتېري وژل شوي دي.

نوموړي د وژل شویو سرتېرو دقیق شمېر نه دی یاد کړی، خو زیاته کړې یې ده چې په دې برید کې د ولسوالۍ مرکز زيانمن شوی او د افغان ځواکونو په دفاعي غبرګون کې ۲۵ وسله وال وژل شوي.

بل خوا يوې امنيتي سرچنې د نوم نه ښودلو په شرط ازادي راډيو ته وويل چې د وسله والو طالبانو په بريد کې په معروف ولسوالۍ کې تر ۳۰ زياتو پوليس سرتېرو ته مرګ ژوبله اوښتې ده.

طالبانو تراوسه په دې اړه رسنیو ته څه نه دی ویلي.

چارواکي: د سرپل په سانچارک کې د طالبانو یو برید په شا تمبول شوی

د سرپل پا سانچارک کې افغان ځواکونه

په سرپل کې چارواکي وايي، دغلته یې د سانچارک ولسوالۍ پر یوه کلي د طالبانو برید په شا تمبولی دی.

د سانچارک ولسوال نقیب الله دقیق نن سهار ازادي راډیو ته وویل، تېره شپه وسله والو طالبانو له څلورو خواو د اب کلان پر کلي بریدونه پیل کړل.

د سانچارک د ولسوال په وینا، دې جګړې د شپې له پیله تر سهاره دوام وکړ چې په کې یو سیمه ییز پولیس وژل شوی او یو بل ټپي دی.

د نوموړي په وینا، طالبانو غوښتل د اب کلان کلی ونیسي، خو د امنیتي ځواکونو او ولسي پاڅونوالو مقاومت په شا تمبولي دي.

د نقیب الله دقیق په وینا، د سانچارک د اب کلان کلی له درې کلونو راهیسې د طالبانو محاصره کې دی او خلک یې له ډېرو سختو او غرنیو لارو څخه تګ راتګ کوي.

چارواکي: غزني کې د طالبانو د ۲ ولسوالانو په ګډون ۱۱ طالبان وژل شوي

د غزني د ښار یو انځور

په غزني کې چارواکي وايي، تېرو ۲۴ ساعتونو کې د غزني ولایت جغتو او خواجه عمري ولسوالیو ته د طالبانو د تش په نامه ولسوالانو په ګډون ۱۱ تنه وسله وال طالبان وژل شوي دي.

د غزني د والي ویاند عارف نوري په دې اړه رسنیو ته په یوه استولي پیغام کې ویلي، د غزني ولایت په مرکز، قره باغ، اندړ او مقر ولسوالیو کې درې هوايي بریدونه شوي او یو ځای وسله واله نښته شوې ده.

ده وویل: په دې پېښو کې د طالبانو د دوو تش په نامه ولسوالانو په شمول ۱۱ وسله وال وژل شوي، په وژل شویو کې جغتو ولسوالۍ ته د طالبانو تش په نامه ولسوال عبدالخالق مشهور په ابو محمد او خواجه عمري ولسوالۍ ته د طالبانو تش په نامه ولسوال ملا منیر شامل دي.

د ښاغلي نوري په وینا، د جمعې په ورځ د غزني ولایت په اندړو او قره باغ ولسوالیو کې د هوایي بریدونو او د مقر ولسوالۍ په میرزاخېلو کلي کې د وسله والې نښتې په ترڅ کې ۹ تنه نور وسله وال طالبان هم وژل شوي دي.

تر دې مخکې د افغانستان د کورنیو چارو وزارت ویلي وو چې په غزني کې تېر ماښام په یوه جومات کې د ايښودل شوي ماین چاودنې يو تن وژلی او ٢٠ تنه نور یې ټپيان کړي دي.

د دې وزارت ویاند نصرت رحیمي د دې ماین ځای پر ځای کول د افراطي وسله والو کار بللی دی.

د سيمې اوسېدونکي وايي، په دې چاودنه کې ٢ تنه وژل شوي او ٢٧ نور ټپيان شوي دي.

د دې پېښې مسؤليت تر اوسه چا نه دى منلى.

وسله والو طالبانو د غزني د دې پېښو په اړه په مشخصه توګه څه نه دي ویلي، خو د دې ډلې ویاند قاري یوسف احمدي رسنیو ته په یوه استولې خبرپاڼه کې ادعا کړې چې د جمعې د ورځې راهيسې یې په ۱۹ ولایتونو کې پر حکومتي اهدافو تر ۵۱ پورې کوچني او لوی بریدونه کړي او په وینا یې چې لسګونو افغان امنیتي سرتېرو ته یې مرګ ژوبله اړولې ده.

نن په قطر کې د امریکا او طالب استازو ترمنځ خبرې بیا پيلېږي

ارشیف، د امریکا او طالب استازو د ناستې یو انځور

نن په قطر کې د امریکايي هيئت او طالبانو ترمنځ د اووم پړاو خبرې له یوې ورځې دمې وروسته بیا پيلېږي.

د زلمي خلیلزاد په مشرۍ د امریکا مرکچي پلاوی له یوې اوونۍ راهیسې د قطر په پلازمېنه دوحه کې د طالبانو له سیاسي ډلې سره خبرې کوي.

ويل شوي چې د دوی خبرې له افغانستانه د بهرنیو ځواکونو د وتلو پر مهالوېش او له افغان خاورې د ترورېزم د نه استفادې پر تضمین متمرکزې دي.

طالبانو ویلي چې په همدغو دوو مسئلو کې ډېر پرمختګ شوی.

زلمی خلیلزاد چې د افغان سولې لپاره د امریکا خاص استازی دی، ټینګار لري چې باید په ټولو مواردو موافقه وشي.

د غزني مرکز ته څېرمه په یوه جومات کې چاودنې ۲۱ تنه ټپیان کړل

د غزني ولايت مرکز ته څېرمه تېر ماښام په یوه جومات کې چاودنې ۲۱ تنه ټپیان کړل.

د والي ویاند محمد عارف نوري تر پېښې وروسته ازادي راډیو ته وویل: د خاک غريبان سيمې په مسجد کې چاودنه شوې چې په نتيجه کې يې ٢١ تنه ټپيان شوي، په ټپيانو کې د درېيو کسانو وضعيت خراب و چې د ښې درملنې لپاره مرکز کابل ته لېږدول شوي او پاتې ټپيان په غزني کې تداوي کېږي، ممکن د ټپيانو شمېر تر دې هم زيات وي.

بل خوا د غزني د ملکي روغتون رئیس ډاکټر باز محمد همت تېره شپه ازادي راډیو ته وویل، له دغې پېښې څخه تر اوسه پورې یو تن وژل شوی او ۲۰ ټپیان د دوی روغتون ته وروړل شوي دي.

خو د سیمې خلک بیا وايي، په برید کې ۲۷ تنه ټپیان دي او دوه تنه وژل شوي دي.

د پېښې پړه تر اوسه پورې چا پر غاړه نه ده اخیستې.

د کابل په شمالي سرای سیمه کې اور ګڼې هټۍ سوځولي

ارشیف

د افغانستان د پلازمېنې کابل ښار په شمالي سرای سیمه کې بېګاه شپه اور لګېدلی او ګڼې هټۍ یې سوځولي دي.

اور د شپې شااوخوا لس نیمې بجې لګېدلی او معلومه نه ده چې څومره زیان یې اړولی دی.

لا نه ده روښانه چې د کابل ښار له ګڼې ګوڼې ډکې دې سیمه کې دې اور لګېدنې کوم څوک ژوبل کړي هم دي که څنګه؟

په ټولنیزو رسنیو کې د دې اور عکسونه او ویډیوګانې ډېرې زیاتې خپرې شوي.

چارواکو په دې اړه تر اوسه څه نه دي ویلي، خو په عکسونو کې ښکارېدل چې اور وژونکو د اور د مهارولو هڅې کولې.

د خبریالانو د خوندیتوب کمېټې له خبریالانو سره د پولیسو بد چلند غندلی

ارشیف، ځيني افغان خبریالان

د افغانستان د خبریالانو د خوندیتوب کمېټې د افغان – ترک ښوونځیو د زده کوونکو د اعتراضونو پر مهال له خبریالانو سره د پولیسو بد چلند غندلی دی.

د دې کمېټې رئیس نجیب شریفي پرون ماښام له ازادي راډیو سره په خبرو کې د پولیسو چلند ټکان ورکوونکی وباله.

ده وویل: موږ دا مسئله تعقیبوو او له کورنیو چارو وزارت سره مو اړیکه نیولې، هغوی ډاډ راکړی چې یو کمېسیون په دې اړه موظف شوی او موضوع څېړي، دا یې هم وویل چې د دې کار عاملین نیول شوي او تحقیقات روان دي.

د رپوټونو په اساس، پرون یوه ډله خبریالان او د افغان – ترک ښوونځیو د زده کوونکو د اعتراض د خبري پوښښ پر مهال د پولیسو له بد چلند سره مخ شوي او ان وهل شوي دي.

د افغان – ترک ښوونځي زده کوونکي د ترکیې د پوهنې بنسټ ته د دغو ښوونځیو د ادارې د انتقال پر ضد له ډېره وخته اعتراض لري.

اخوا د افغانستان د کورنیو چارو وزارت ویاند نصرت رحیمي په خپله فېسبوک پاڼه لیکلي چې د کابل د امنیې قوماندانۍ دوه منسوبین د خبریالانو د وهلو ټکولو په خاطر بندیان شوي دي.

په ننګرهار کې۹۰ کيلوګرامه نشه يي مواد ونيول شول

د ننګرهار ولايت د دوو جلا جلا عملياتو په نتيجه کې۹۰ کيلوګرامه نشه يي مواد ونيول شول.

د کورنيو چارو وزارت له نشه يي موادو سره د مبارزې معينيت وياند اسدالله يادګاري ازادي راډيو ته وويل، لومړي عملیات په غني خېلو او سره رود ولسواليو کې له نشه يي موادو سره د مبارزې ځانګړو پولیسو وکړل چې په نتيجه کې يې تر شلو کيلوګرامو ډېر چرس او ۲۶ کيلوګرامه تارياک ونيول شول.

په دوهمو عملياتو کې پولیسو د ننګرهار په روداتو ولسوالۍ کې د موټرو د تلاشۍ پر مهال په يوه موټر کې لس کيلو تارياک وموندل چې په پام کې وه يوې ګاونډۍ ولسوالۍ ته قاچاق شي.

د دې دوو پېښو په تور شپږ تنه هم نيول شوي دي.

په نيمروز کې لسګونه کيلوګرامه نشه يي او کېمياوي مواد ونيول شول

ارشیف، په نیمروز کې د نیول شویو نشه یي توکو یو انځور

د نيمروز ولايت پوليسو په يوه کور کې لسګونه کيلوګرامه نشه يي او کېمياوي مواد ونيول.

د نيمروز ولايت مقام په خبرپاڼه کې راغلي چې د دې ولايت پولیسو د سرطان د مياشتې په نهمه نېټه په کنګ ولسوالۍ کې پر يوه کور چاپه ووهله چې په نتيجه کې يې ۲۴۴ کيلوګرامه تارياک او نهه کيلوګرامه هغه کېمياوي مواد هم ونيول شول چې د هېروينو په جوړولو کې کار ځنې اخیستل کېده.

تر دې مهاله د دې موادو د ساتلو په تور څوک نه دي نيول شوي.

په هرات کې تر ۳۰ ټنو ډېر نشه يي او کېمياوي مواد وسوځول شول

ارشیف، نشه یي توکي د سوځېدو په حال کې

په هرات ولايت کې تر دېرشو ټنو ډېر نشه يي او کېمياوي مواد وسوځول شول.

د کورنيو چارو وزارت له نشه يي موادو سره د مبارزې معين محمد هاشم اورتاق په هرات ولايت کې د دې نيول شويو موادو د سوځولو پر مهال وويل، افغان امنيتي ځواکونو د ۱۳۹۷ شمسي کال له پيله بيا سږکال د جوزا د مياشتې تر پايه پورې (۳۳۲) کيلوګرامه هيروئين، (۱۷) کيلوګرامه مورفين، (۳۸۹) کيلوګرامه تارياک، (۴۷۵) کيلوګرامه چرس او سلګونه کيلوګرامه کېمياوي مواد نيولي چې د سرطان د مياشتې په لسمه نېټه يې وسوځول.

د يادولو وړ ده چې د دې موادو د قاچاق په تور د دوو بهرنيانو په ګډون (۴۹۵) تنه نيول شوي او دوسيې يې د عدلي او قضايي مرکز له خوا نهايي شوي دي.

په کابل کې نږدې اووه کيلوګرامه نشه يي مواد ونيول شول

د کابل ښار یو انځور

په کابل ولايت کې نږدې اووه کيلوګرامه نشه يي مواد ونيول شول.

د کابل د امنيې قوماندانۍ وياند فرامرز فردوس ازادي راډيو ته وويل، له نشه يي موادو سره د مبارزې پولیسو د سرطان د مياشتې په لسمه نېټه د کابل شمالي، جنوبي او شرقي دروازو باندې درې عملياته وکړل چې په نتيجه کې يې (۶۴) کيلوګرامه چرس ونيول.

دا چرس د قاچاق لپاره په موټرونو او سفري بکسونو کې پټ کړل شوي وو.

د دې نشه يي موادو د قاچاق په تور پنځه تنه نيول شوي چې موټرچلوونکي هم پکې شامل دي.

د خواجه سبزپوش ولسوالۍ پر بازار د هاوان لګېدو ۹ تنه وژلي

د فاریاب د سبزپوش ولسوالۍ د پېښې د ټپیانو یو انځور

د فاریاب ولایت د خواجه سبزپوش ولسوالۍ په ګنج بازار کې د هاوان د دوو مرمیو د راپرېوتو په پېښه کې نهه کسان مړه شوي او له دېرشو زیات نور ټپیان دي.

د فاریاب د امنیي قوماندانۍ ویاند عبدالکریم یورش ازادِ راډیو ته وویل چې دا هاوانونه طالبانو ویشتلي او زیاته یې کړه: د هاوان دوه مرمۍ د خواجه سبزپوش په ګنج بازار یا مال بازار کې ولګېدې، په سر کې څلور هېوادوال چې ټول ملکي وګړي وو، شهیدان شول او څو شېبې مخکې مو خبر ترلاسه کړ چې پنځه نور ټپیان په روغتون کې مړه شوي، د شهیدانو مجموعي شمېر نهه او د ټپیانو شمېر له ۳۱ تر ۳۲ تنو پورې رسېږي.

ښاغلی یورش زیاتوي چې طالبانو د خواجه سبزپوش ولسوالۍ پر مرکز هم څو توغندي ویشتلي دي.

طالبانو ویلي دي چې د خواجه سبزپوش ولسوالۍ پر مرکز هاوانونه دوی نه دي ویشتلي.

د هرات په پښتون زرغون کې د عامه محافظت د ځواکونو ۹ سرتېري ووژل شول

د عامه محافظت د ځواکونو ۹ سرتېري تېره شپه د هرات ولایت په پښتون زرغون ولسوالۍ کې د طالبانو په برید کې ووژل شول.

دا خبر دوو امنیتي چارواکو له ازادي راډیو سره په خبرو کې تأیید کړ.

دې چارواکو چې د موضوع د حساسیت له کبله نه غواړي نومونه یې افشا شي، وویل چې په دې حمله کې د عامه محافظت د ځواکونو پنځه نور سرتېري اسیران شوي او یو بل ټپي دی.

له دې مخکې د هرات امنیه قوماندان جنرال امین الله امرخېل د هرات ولایت په پښتون زرغون، اوبه او کرخ ولسوالیو کې د ناامنیو پر پېښو اندېښنه ښودلې وه او ویلي یې وو، چې په دې ولسوالیو کې پاکستاني جنګیالي د طالبانو په لیکو کې جګړه کوي.

په کابل ښار کې د یوې احتمالي چاودنې مخه ونیول شوه

د کابل ښار یو انځور

په کابل کې پر چاودېدونکو موادو بار د یوه موټر په نیول کېدو سره په دې ښار کې د یوې احتمالي چاودنې مخه ونیول شوه.

دا خبره د کابل امنیه قوماندان جنرال محمد روشندل تېره شپه ازادي راډیو ته وکړه او ويې ویل چې دغه موټر پرون پنجشنبه د کابل په پغمان ولسوالۍ کې کشف او چاودېدونکي مواد یې شنډ کړای شول.

ده وویل: یو تېزرفتار موټر چې انفجاري مواد پکې ځای پرځای شوي وو، په پغمان ولسوالۍ کې د تلاشۍ په پوسته کې د پولیسو لاسته ورغی او انفجاریه مواد یې هم خنثی شول.

ښاغلي روشندل زیاته کړه چې دا یوکرولا ډوله موټر و چې ډرېور یې په تېښته بریالی شوی دی.

د هغه په وینا، دغه موټر له پغمان ولسوالۍ کابل ته روان و.

په چاودېدونکو موادو بار دغه موټر داسې مهال نیول کېږي چې د تېرې دوشنبې په ورځ کابل د یوې زورورې چاودنې او له هغې وروسته د وسله والې نښتې شاهد و.

طالبانو د دې حملې مسؤلیت اخیستي و.

د چارواکو په وینا، پنځه واړه بریدکونوکي یې د افغان امنیتي ځواکونو له خوا ووژل شول.

په ننګرهار کې زرګونه بېځایه شوې کورنۍ بېرته اصلي مېنو ته ستنېږي

په ننګرهار کې یوه کډواله کورنۍ

په ننګرهار کې زرګونه بېځایه شوې کورنۍ بېرته اصلي مېنو ته ستنېږي.

دا خبره د ننګرهار د والي ویاند عطاالله خوګیاڼي تېر ماښام ازادي راډیو ته وکړه او ویې ویل چې شااوخوا ۱۴ زره کورنۍ چې د امنیتي ګواښونو له امله د خپلو کورونو پرېښودو ته اړشوې وې، اوس غواړي چې بېرته خپلو سیمو ته ستنې شي او دغه لړۍ پرون پیل شوه.

ده وویل: څوارلس زره کورنیو لېوالتیا ښودلې چې خپلو سیمو ته ستنې شي، دوه زره او پنځه کورنۍ چې د کوټ، بټي کوټ، شینوارو او مومندرې ولسوالیو اصلي هستوګن دي او د ښار او نږدې ولسوالیو په بېلابېلو سیمو کې د نا امنۍ له امله را بېځایه شوي و، دوی خپلو سیمو ته ستنېدل پیل کړل.

د خوګیاڼي په خبره، په دغو ولسوالیو کې امنیتي وضعیت اوس ښه شوی دی.

د اسلامي دولت ډله یا داعش او وسله وال طالبان دواړه په ننګرهار کې فعال دي.

د ننګرهار د والي ویاند وایي، هرې کورنۍ ته د دې ولایت د کډوالو ریاست شل زره افغانۍ د مرستې په توګه ورکوي.

د اسیا د فوټبال اتحاديې ۲ افغان لوبڅارانو ته اجازه ورکړل شوه

د اسیا د فوټبال اتحاديې دوه افغان لوبڅارانو ته د اسیا د فوټبال د ۱۶کلونو کم عمره ځوانانو په سیالیو کې د لوبڅارې اجازه ورکړه.

حلیم اقا شېرزاد او ننګیالی سادات به د اسیا د فوټبال په یادو شویو سیالیو کې د لوبڅارۍ دندې پرمخ وړي.

دا سیالۍ د راتلونکې لمریزې میاشتې په ۱۰مه نېټه د افغانستان، ایران، تاجکستان، ازبکستان، ترکمنستان او قرغزستان ترمنځ د تاجکستان په پایتخت دوشنبې ښار کې پیلېږي.

په جوزجان کې سلګونو کارګرانو لاریون کړی

په جوزجان کې سلګونو کارګرانو لاریون کړی او یو شمېر ښځینه کارګرانو خپلې خولې هم تړلي دي.

دوی په‌دې وروستیو کې له دندو ګوښه شوي وو او غواړي بیرته پر دندو وګومارل شي.

دغو کارګرانو ويلي چې د نامعلومو دلایلو پر اساس ۵۲۰ کارګران له دندو ګوښه شوي دي او د معادن او صنایع وزارت له خوا له تنقیص سره مخامخ شوي دي.

له لاریون کوونکو څخه یوه تن داسې وويل:" موږ خپل حق غواړو که په یوه دوو ورځو کې زموږ ستونزو ته لاسرسی ونه‌شي، موږ د لويې لارې په ګډون ټولې دولتي دروازې تړو او حکومت به بیا د شکایت حق نه‌لري."

په‌دې حال کې د جوزجان د ولایتي شورا رئیس مولوي عبدالحی حیات وايي چې دا موضوع یې له ځايي او مرکزي چارواکو سره شریکه کړې ده او ستونزه به ډېره ژر حل شي.

د امریکا او طالبانو خبرې حساس پړاو ته رسیدلي

د امریکا او طالبانو خبرې حساس پړاو ته رسیدلي دي.

د امریکا د بهرنیو چارو وزیر پرون ویلي و چې د افغان سولې وخت راغلی او د طالبانو سیاسي ډلې نن ویلي ممکن د سولې هوکړه وشي.

نن د قطر په پلازمینه دوحه کې د امریکا د مرکچي پلاوي او طالبانو د خبرو شپږمه ورځ ده.

د طالبانو د سیاسي دفتر ویاند سهیل شاهین ازادي راډیو ته وویل، د نن ورځې غونډه ځکه مهمه او هیله منوونکې ده چې د ده په خبره امکان لري د سولې هوکړه وشي.

په دې خبرو کې د امریکا مشر مرکچي زلمي خلیل‌زاد تر اوسه څه نه‌دي ویلي، خو پرون د امریکا د بهرنیو چارو وزیر مایک پامپیو ټویټ کړی و چې د افغان سولې وخت راغلی او امریکا د دې پروسې لپاره ژمنه ده.

دا اووم پړاو دی چې د افغان سولې لپاره د امریکا ځانګړی استازی زلمی خلیل‌زاد د طالبانو له سیاسي مشرانو سره په قطر کې خبرې مخته وړي.

امریکا ټینګار کوي چې له افغانستانه د بهرنیو ځواکونو پر وتلو، له افغان خاورې د ترورېزم پر نه استفادې، پر بین‌الافغاني خبرو او دایمي اوربند موافقه وشي.

طالبان بیا لومړی د بهرنیو ځواکونو وتل غواړي.

ولسمشرغني: د ښځو د اتحادیو تولیداتو ته ۵ سلنه ترجیح ورکول کېږي

محمداشرف غني کندهار ولایت ته د خپل سفر په په دویمه ورځ د کندهار ولایت له یو شمېر ښځو سره په کتنه کې، په بېلابېلو برخو کې د هغوی ستونزې او وړاندیزونه یې واوریدل.

ولسمشر محمد اشرف غني وايي، په ملي تدارکاتو کې به د ښځو د اتحادیو تولیداتو ته د نارینه‌وو د اتحادیو په پرتله پنځه فیصده ترجیح ورکړل شي.

ولسمشر کندهار ولایت ته د سفر په دوهمه ورځ د دې ولایت له یو شمېر ښځو سره د لیدو پر مهال ټينګار وکړ چې تولیدي اتحاديې دې جوړې کړي.

ولسمشر د ښځو د لاسي صنایعو ستونزې د حل په برخه کې د صعنت او سوداګرۍ وزارت ته ویلي چې له هېواده دباندې دې د افغانستان له ټولو سوداګریزو اتشو سره دې د کندهار ولایت د ښځو د لاسي صنایعو لپاره یو خاص واحد جوړ او په‌دې برخه کې دې اقدام وکړي.

افغان ولسمشر د کندهار ولایت له ځینو ښځو سره په کتنه کې په بېلابېلو برخو کې د هغوی ستونزې او وړاندیزونه واورېدل.

افغانستان د کرکټ نړيوال جام سياليو کې ويسټ انډيز سره مخ کېږي

افغان کرکټر حمید حسن

افغانستان نن پنجشنبه د کرکټ د ٢٠١٩میلادي کال د نړيوال جام د سياليو په لړ کې له ويسټ انډيز سره مسابقه کوي.

د انګلستان په ليدز لوبغالي کې به دغه مسابقه د افغانستان پر وخت د ماسپښين پر دوو بجو پيل شي.

افغانستان چې په‌دغه نړيوال جام کې يې خپلې ټولې ٨ مسابقې بايللي، نن هڅه کوي د ويسټ انډيز په وړاندې بريا خپله کړي.

پرون انګلستان وتوانېد نيوزيلنډ ته په ماتې ورکولو سره نيمه پايلوبې ته لار پيدا کړي.

د پرونۍ لوبې پچه يا ټاس انګلستان وګاټه او د بټنګ کولو پرېکړه يې وکړه.

انګلستان وتوانېد په ٥٠ اوورونو کې د ٨ لوبغاړو په سوځېدو سره ٣٠٥ منډې وکړي.

خو نيوزيلنډ ونه توانېد ورکول شوى هدف پوره کړي، ټول لوبغاړي يې په پنځه څلوېښتم اوور کې په داسې حال کې وسوځېدل چې يوازې يې ١٨٦ منډې کړې وې.

په انګلستان او وېلز کې د کرکټ د ٢٠١٩میلادي کال د نړيوال جام پايلوبې ته هندوستان او اسټراليا هم لار پيدا کړې ده.

چارواکي: د پکتیکا په ناامنو سیمو کې عملیات پیلیږي

ارشیف، یو تن افغان سرتیري د عملیاتو پر مهال

د ملي اردو مسؤلين وايي، د پکتيکا ولايت په ناامنو سيمو کې به پوځي عمليات وشي.

پرون د چهارشنبې په ورځ د ٢٠٣م تندر قول اردو قوماندان جنرال خان الله شجاع او په جنوب ختيځ زون کې د بهرنيو ځواکونو عمومي قوماندان بريد جنرال کېوين ډي «Brig. Gen. Kevin D» پکتيکا ولايت ته سفر وکړ.

د پکتيکا د والي وياند زيار خان ياد پرون د چهارشنبې په ورځ ازادي راډيو ته وويل، د ٢٠٣ تندر قول اردو قوماندان د نويو پوځي عملياتو د پيل خبر ورکړ:"د تندر قول اردو قوماندان ډاډ ورکړ چې د لويو لارو د امنيت تر څنګ به په هغو سيمو کې چې نسبتاً په‌کې امنيت ښه نه‌دى او د خلکو د ډاډمن ژوند لپاره هم، پر ځينو ځانګړو عملياتو کار کوي چې په بېلابېلو سيمو کې به ترسره شي. د بهرنيو ځواکونو قوماندان هم د افغان ځواکونو د پياوړتيا او تجهيز په برخه کې د همکارۍ ډاډ ورکړ."

د پکتيکا چارواکي وايي، په وروستيو کې په ځينو سيمو کې د دولت د وسله‌والو مخالفانو پرضد يې پوځي عمليات ګټور تمام شوي دي.

د پکتيکا اوسېدونکي شکايت لري چې د لويو لارو په اوږدو کې وخت ناوخت د ناامنيو پېښې کېږي.

کورنيو چارو وزارت: کابل کې يو ځانمرګى هدف ته تر رسېدو مخکې ونيول شو

ارشیف، کابل کې یو تن نیول شوی انتحاري حمله کوونکی

د کورنيو چارو وزارت وايي، تېره شپه په کابل کې يو ځانمرګى بريدکوونکى هدف ته تر رسېدو مخکې ونيول شو.

د دغه وزارت وياند نصرت رحيمي په ټويټر کې ليکلي چې دغه حمله کوونکي غوښتل په کابل کې زنبق څلورلارې ته نږدې د معترضو وکيلانو خيمه په نښه کړي.

ښاغلي رحيمي ليکلي، دغه مشکوک حمله کوونکى په ټپي حالت کې نيول شوى دى.

د ولسي جرګې د تېرو ټاکنو ځينې بې نتيجې اعلان شويو کانديدانو له څو اوونيو راهيسې د تحصن خېمې درولي او وايي، په حق کې يې بې عدالتي شوې ده.

چارواکي: جوزجان کې ۴۳سرتېري د طالبانو له اسارته خوشې کړاى شول

د افغانستان په نقشه کې د جوزجان ولایت

د جوزجان ولايت چارواکي وايي، د ٢٠٩ شاهين قول اردو درې څلوېښت سرتېري د طالبانو له اسارته خوشې کړاى شول.

د دوى په خبره دغه سرتېري د دوشنبې ناوخته په قوش تېپه ولسوالۍ کې د طالبانو له‌خوا نيول شوي وو.

د جوزجان امنيه قوماندان سمونيار عبدالواحد وجدان پرون د چهارشنبې په ورځ ازادي راډيو ته وويل، لا هم د نورو سرتېرو، پوليسو او ولسي پاڅون‌والو په اړه معلومات نه‌لري چې د قوش تېپې ولسوالۍ د سقوط پر مهال لادرکه شوي دي.

ښاغلي وجدان زیاته کړه:"د ملي اردو اسيران شبرغان ته رسېدلي دي. د ملي او محلي پوليسو او د ملي امنيت د منسوبينو په اړه چې په سيمه کې ورک وو، تر اوسه احوال نه‌لرو. ځينې يې په خواره واره ډول رارسېدلي دي."

د جوزجان قوش تېپه ولسوالۍ د تېرې دوشنبې او سې شنبې ترمنځ شپه کې د وسله‌والو طالبانو له خوا ونيول شوه.د ازادي راديو خبريال د سرچينو په حواله وايي چې د دې حملې پر مهال شا و خوا ٢٠٠ افغان پوځيان د وسله‌والو طالبانو له خوا اسيران شول.

قطر کې د اووم پړاو خبرې نن پنجشنبه د شپږمې ورځې لپاره دوام کوي

آرشیف/ په قطر کې د سولې د خبرو په اړه غونډه. عکس تزئیني بڼه لري

په دوحه کې د زلمي خلیل‌زاد په مشرۍ د امریکايي پلاوي او طالب استازو ترمنځ اووم پړاو خبرې اترې نن د شپږمې ورځې لپاره دوام کوي.

په قطر کې د طالبانو د سیاسي دفتر ویاند سهیل شاهین تېره شپه ناوخته ازادي راډیو ته وویل، سره له دې چې په روانو مزاکراتو کې ځینې پرمختګونه لیدل کېږي، خو ځینې مسئلې پاتې دي چې باید پرې یوې نتیجې ته ورسېږو.

نوموړي ویلي خبرې به نن هم دوام وکړي.

تردې مخکې ځینو سرچینو ویلي وو، ښايي په دوحه کې د امریکايي پلاوي او طالب استازو ترمنځ خبرې بې نتیجې پای ته ورسېږي.

د امریکا د بهرنیو چارو وزارت د تېرمیلادي کال په سپټمبر میاشت کې زلمی خلیل‌زاد د افغانستان د سولې لپاره خپل ځانګړی استازی وټاکه.

سره له دې چې نوموړي په تېرو لسو میاشتو کې له طالب استازو سره اووه پړاوه خبرې اترې کړي، خو تر اوسه نه‌دی توانیدلی چې دا ډله په افغانستان کې اوربند او له افغان حکومت سره مخامخ خبرو ته چمتو کړي.

طالب استازو تر اوسه دوه ځلي په مسکو کې له یو شمېر افغان سیاستوالو سره خبرې کړي، خو په‌دې خبرو کې د افغان حکومت په استازیتوب چا برخه نه درلوده.

ټاکل شوې د یکشنبې او دوشنبې په ورځ په دوحه کې جرمني او قطر د یوې بین الافغاني غونډې کوربه توب وکړي.

که څه هم افغان حکومت په‌دې غونډه کې هم برخه نه‌لري، خو له کابله به یو شمېر افغان سیاستوال، د مدني ټولنې استازي او خبریالان له طالب استازو سره خبرې وکړي.

نور راوښيه

XS
SM
MD
LG