د لاسرسۍ وړ لېنکونه

تازه خبر
یکشنبه ۲۹ مرغومی ۱۳۹۸ کابل ۱۰:۱۷

افغانستان

چارواکي: په لوګر او فاریاب کې ۱۲ وسله وال طالبان وژل شوي

ارشیف، افغان ځواکونه

چارواکي وايي، په لوګر او فاریاب ولایتونو کې یې ۱۲ وسله وال طالبان وژلي دي.

د لوګر د امنیې قوماندانۍ ویاند شاه پور احمدزي نن ازادي راډیو وویل، د خوشي په ولسوالۍ کې د امنیتي ځواکونو او طالبانو ترمنځ په نښته کې اووه طالب وسله وال وژل شوي او دوه نور ټپیان شوي دي.

د احمدزي په وینا، دا نښته تېره شپه وروسته له هغې وشوه چې وسله والو طالبانو د دې ولسوالۍ د سیمه ییزو پولیسو پر پوستو بریدونه وکړل.

نوموړي زیاته کړه چې په دې نښته کې درې سیمه ییز پولیس هم ټپیان شوي دي.

بل خوا، په فاریاب کې چارواکي وايي، تېره شپه یې پر دولت اباد ولسوالۍ د طالب وسله والو یوه حمله پر شا تبولې او پنځه تنه وسله وال طالبان یې وژلي.

د فاریاب د امنیې قوماندانۍ ویاند عبدالکریم یورش نن سهار ازادي راډیو ته وویل، تېره شپه وسله والو طالبانو د دولت اباد ولسوالۍ پر مرکز تهاجمي برید وکړ چې په پایله کې یې د هغوی پنځه تنه ووژل شول او درې نور یې ټپیان شول.

د یورش په وینا، په دې نښته کې ولسي خلکو او امنیتي سرتېرو ته مرګ ژوبله نه ده اوښتې.

دولت اباد د فاریاب یوه له هغو ولسوالیو څخه ده چې طالبان په کې پراخ حضور لري.

تر دې مخکې په شمال کې د ۲۰۹ شاهین قل اردو ویاند محمد حنیف رضايي ازادي راډیو ته ویلي وو چې د جمعې له ورځې راهېسې یې د فاریاب په غورماچ، خواجه سبز پوش او کوهستان ولسوالیو کې د عملیاتو پر مهال د وسله والو طالبانو د شپاړسو قوماندانانو په ګډون تر ۹۰ زیات وسله وال وژل شوي دي.

طالب ویاند ذبیح الله مجاهد د لوګر د خوشي ولسوالۍ د پېښې په اړه دغلته د اتو افغان سرتېرو د وژل کېدو ادعا کړې، خو نوموړي خپل لوري ته په لوګر او فاریاب کې د اوښتې مرګ ژوبلې په اړه څه نه دي ویلي.

د کونړ چارواکي: افغان ځواکونو په نورګل کې د داعش ۵ قوماندانان وژلي

د کونړ والي وايي، افغان ځواکونو په نورګل ولسوالۍ کې د داعش ډلې پنځه قوماندانان وژلي دي.

عبدالستار میرزکوال د جمعې په ورځ ازادي راډیو ته وویل چې دا پوځي عملیات د ملي امنیت جزوتامونو د نړیوالو ځواکونو په مرسته د مزاردرې په سیمه کې کړي چې په ترڅ کې یې د داعش ډلې ۱۴تنه وسله وال ژوندي نیول شوي.

ده وویل: د دې عملیاتو په نتیجه کې د داعش ډلې پنځه تنه قوماندانان وژل شوي او وسلې او مهمات یې هم نیول شوي او څوارلس تنه یې نیولي دي چې دوه تنه یې بهرنیان دي.

ښاغلی میرزکوال وايي چې وژل شوي او نیول شوي واړه د داعش ډلې غړي دي او په عملیاتو کې ملکي وګړو ته زیان نه دی اوښتی.

د کونړ والي همداراز یادونه وکړه چې د دې ولایت د چپې درې او ماڼوګي ولسوالیو په لېرې پرتو سیمو کې د داعش ډلې او طالبانو ترمنځ جګړې لاهم روانې دي.

چارواکي: د فاریاب په پښتون کوټ کې ۱۳ طالبان وژل شوي

ارشیف، د افغانستان ځواکونه

افغان پوځ د فاریاب ولایت په پښتون کوټ ولسوالۍ کې د ګډو ځواکونو په عملیاتو کې د ۱۳ طالبانو د وژل کېدو خبر ورکوي.

په شمال کې د ۲۰۹ شاهین قول اردو ویاند محمد حنیف رضايي ازادي راډیو ته وویل چې دا وسله وال د نړیوالو قواوو په هوايي حملو کې وژل شوي دي.

ښاغلی رضايي وايي، په وژل شویو کسانو کې دوه بهرنیان هم شامل دي.

ده وویل: یو هوايي برید د طالبانو د تش په نامه مرستیال ولسوال حاجي برکت پر قرارګاه شوی چې ټول دیارلس طالبان پکې وژل شوي.

په دوی کې دوه بهرني وګړي هم وو چې یو یې د ازبکستان وګړی اکه علي او د یوه بل هویت تراوسه نه دی معلوم شوی.

د رضايي په وینا، ګومان کېږي چې د تلفاتو شمېر ښايي تر دې هم زیات وي او ښايي خپله حاجي برکت هم پکې شامل وي.

د یادولو وړ ده چې په شمال کې د ملي اردو ځواکونو په تېرو ۲۴ ساعتونو کې پر پښتون کوټ سربېره د فاریاب ولایت په غورماچ، خواجه سبزپوش او کوهستان ولسوالیو کې هم هوايي عملیات کړي دي چې د شاهین قول اردو د ویاند ښاغلي رضايي په وینا، د شپاړسو قوماندانانو په ګډون د طالبانو له اتیا زیات وسله وال پکې وژل شوي دي.

په غزني کې کورنیو محصولاتو ته د پاملرنې په هدف هندواڼې ووېشل شوې

په غزني کې د هندواڼو د وېش د کمپاین یو انځور

د غزني خلکو د بهرنیو محصولاتو پر ځای کورنیو محصولاتو ته د پام اړونې په موخه پر خلکو هندواڼې ووېشلې.

د غزني ښار ته څېرمه د روضې کلي د سلطان محمود غزنوي زیارت په پارک کې د جمعې په ورځ سلګونه کسان د هندواڼو خوړولو لپاره سره راټول شوي وو.

دغه هندواڼې د دغه کلي د ځوانانو، قومي مشرانو، مدني فعالانو او ولسي خلکو له لوري وېشل کېدې.

د دغه کار هدف له چینايي، پاکستانیو او ایراني مشروباتو څخه افغاني محصولاتو ته د خلکو پام را اړول او په هېواد کې د وطني محصولاتو عامول او د بزګرانو ملاتړ کول و.

که څه هم چې دغه ډول کمپاینونه د هېواد په ځینو نورو ولایتونو کې هم شوي او دوام لري، خو بیا هم په غزني کې بزګران شکایت کوي چې د دوی په لاس کرل شوې مېوې هیڅ بازار نه لري.

پولیسو په ځينو ولایتونو کې د نشه يي موادو پر وړاندې ۹۴ عملیاته کړي

ارشیف، د افغانستان پولیس

له نشه يي موادو سره د مبارزې پولیسو د هېواد په بېلابېلو ولایتونو کې څه د پاسه ۹۰ عملیاته وکړل.

د کورنیو چارو وزارت له نشه يي موادو سره د مبارزې معینیت ویاند اسدالله یادګاري ازادي راډیو ته وویل، له نشه يي موادو سره د مبارزې پولیسو په تېرو شپږو ورځو کې په تخار، کندز، ننګرهار، کابل، هرات او دایکنډي ولایتونو کې ۹۴ عملیاته کړي چې په نتیجه کې یې يوه اندازه نشه يي مواد او قاچاق کوونکي نیول شوي دي.

ده وویل: د کورنیو چارو وزارت له نشه يي موادو سره د مبارزې پولیسو ۹۴ عملیاته کړي چې په نتیجه کې یې دوه ټنه تاریاک، چرس، شیشه، جامد کېمیاوي مواد، الکولي مشروبات او د الکولو لپاره يوه اندازه وراسته شوي کشمش نیولي او په دې تور ۱۰۲ کسان هم نیول شوي دي.

د یادونې وړ ده چې د دې عملیاتو په نتیجه کې له لوګر، دایکنډي او تخار ولایتونو څخه ۶۰ معتادین را ټول او د درملنې مرکزونو ته ولېږل شول.

د کندز پولیسو پنځه کسان د نشه يي موادو د خرڅلاو پر مهال ونیول

د کندز د ښار یو انځور

د کندز ولایت پولیسو پنځه کسان د نشه يي موادو د خرڅلاو پر مهال ونیول.

د کندز د امنیې قوماندانۍ ویاند انعام الدین رحماني ازادي راډیو ته وویل، د جوزا د میاشتې په ۲۸مه نېټه له نشه يي موادو سره د مبارزې پولیسو د کندز ښار په بېلابېلو سیمو کې عملیات وکړل چې په نتیجه کې یې پنځه کسان د نشه يي موادو د خرڅلاو پر مهال ونیول شول.

له نیول شویو کسانو سره ۱۰۶ ليټره الکولي مشروبات، پنځه کیلوګرامه هیروئین او ۸۷ ګرامه ټابلېټ (K) ګولۍ ونيول شول.

په ننګرهار کې لسګونه کیلو ګرامه نشه يي مواد ونیول شول

په ننګرهار ولایت کې لسګونه کیلو ګرامه نشه يي مواد ونیول شول.

په هغه خبرپاڼه کې چې د ننګرهار ولایت مقام رسنیو ته لېږلې، راغلي چې د جوزا د میاشتې په ۲۶مه نېټه له نشه يي موادو سره د مبارزې پولیسو په بهسودو، سره رود او غني خېلو ولسوالیو کې د درېیو بېلابېلو عملیاتو په ترڅ کې ۱۷۸ کیلوګرامه چرس، ۱۰ کیلوګرامه هیروئین او شپږ ګرامه شیشه نیولي دي.

د یادونې وړ ده چې د دې موادو د قاچاق او ساتلو په تور اووه کسان نیول شوي او تر هغه وروسته عدلي او قضايي مرکزونو ته معرفي شوي دي.

د پروان پولیسو نږدې شل کیلوګرامه نشه يي مواد ونیول

د پروان ولایت پولیسو نږدې شل کیلوګرامه نشه يي مواد د قاچاق پر مهال ونیول.

د پروان ولایت د امنیې قوماندانۍ په خبرپاڼه کې راغلي چې د جوزا د میاشتې په ۲۵مه نېټه د سالنګ ولسوالۍ له نشه يي موادو سره د مبارزې پولیسو د تلاشۍ پر مهال د تېلو په یوه ټانکر کې ۱۷ کیلوګرامه چرس او په یوه بل موټر کې یو کیلوګرام تاریاک ونيول.

په پام کې وه چې دا نشه يي مواد د هېواد له شمالي ولایتونو کابل ته قاچاق کړي.

د دې نشه يي موادو په تور درې کسان هم نیول شوي دي.

په ازبکستان کې د لومړي ځل لپاره يوه ښځه د مشرانو جرګې مشره شوه

د ازبکستان د مشرانو جرګې مشره تنزيلا نوربايووا

د ازبکستان په تاريخ کې د اول وار لپاره يوه ښځه د مشرانو جرګې رئيسه وټاکل شوه.

د مشرانو جرګې غړو نن تنزيلا نوربايووا د دې جرګې د رئيسې په توګه انتخاب کړله.

نوربايووا مخکې تر دې چې پرون د ولسمشر شوکت ميرضياييف له خوا د مشرانو جرګې د رئيسې په توګه ونومول شي، د صدراعظمې مرستياله او د ښځو لپاره د دولتي کمېټې مشره وه.

د پروان امنيه قوماندان: تېره اوونۍ جنايي پېښې زياتې شوې وې

د پروان امنيه قوماندان وايي، تېره اوونۍ په دغه ولايت کې جنايي پېښې زياتې شوې وې.

خو مل پاسوال محفوظ وليزاده له ازادي راډيو سره په خبرو کې وويل، دوى ځيني اقدامات وکړل: موږ وتوانېدو د دل اغا په مشرۍ د غير مسؤلو وسله والو غلو يوه ډله پيدا کړو چې په دغه بانډ کې ٦ کسان شامل وو، وسايط يې غلا کول او له خلکو يې په زوره پيسې اخيستې چې زما، د امنيتي ارګانونو او د پروان د پوليسو د اندېښنې سبب شوی و.

د پروان امنيه قوماندان وايي، د غير مسؤلو وسله والو غلو د دې ډلې ٤ کسان نيول شوي دي.

ښاغلى وليزاده وايي، د پاتې نورو ډلو په وړاندې به هم چې په غير قانوني کارونو کې ښکېلې ګڼل شوي، اقدامات په پام کې لري.

د پروان اوسېدونکي وايي، د جنايي پېښو د مخنيوي لپاره دې تر دې جدي اقدامات وشي.

راپور: ځيني افغان سیاستوال په پاکستان کې د سولې کنفرانس ته بلل شوي

د پاکستان بیرغ

ځينو پاکستانۍ ورځپاڼو راپور ورکړى چې د افغانستان څو تنه پېژندل شوي سياستوال پاکستان ته د سولې يوه کنفرانس ته وربلل شوي دي.

دغه سياستوال سبا شنبه د پاکستان د پنجاب ايالت په بهوربن ښارګوټي کې په داسې حال کې سره جرګه کېږي چې په پام کې ده راتلونکې اوونۍ ولسمشر محمد اشرف غني هم اسلام اباد ته سفر وکړي.

پاکستانۍ ورځپاڼې وايي، په دغو وربلل شويو سياستوالو کې د حزب اسلامي مشر ګلبدين حکمتيار هم شامل دى.

د دغه ګوند يوه لوړرتبه غړي غيرت بهير د پنجشنبې په ورځ د پاکستان له ډېلي ټايمز ورځپاڼې سره په خبرو کې تأييد کړه چې حکمتيار به د خپل ګوند د يوه هيئت مشري کوي.

د پاکستان ډېلي ټايمز ورځپاڼه زياتوي، د افغان سياستوالو شمېر ٣٠ ته رسېږي چې په هغوى کې د سولې د عالي شورا رئيس محمد کريم خليلي، د ولسمشرۍ کانديد محمد حنيف اتمر، د بلخ پخوانى والي عطا محمد نور او نورې څېرې شاملې دي.

ويل شوي چې دغه غونډه د لاهور د سولې تحقيقاتي مرکز له خوا تنظيم شوې ده.

ولسمشر محمد اشرف غني راروانه پنجشنبه د جون په ٢٧مه د پاکستان د صدراعظم عمران خان په بلنه اسلام اباد ته سفر کوي.

افغان ولسمشر پايلوبې ته د لارموندنې لپاره د فوټسال ټيم هڅې ستايلي

د فوټسال تر شلو کلونو د کم عمره لوبغاړو ټيم د لوبې جریان کې

د افغانستان ولسمشر پايلوبې ته د لارموندنې لپاره د فوټسال ټيم وروستۍ برياوې وستايلې.

د فوټسال تر شلو کلونو د کم عمره لوبغاړو ټيم د اسيايي لوبو په لړ کې د اول وار لپاره پايلوبې ته لار پيدا کړه.

دغه ټيم د پنجشنبې په ورځ اندونيزيا ته څلور د درېيو په مقابل کې ماته ورکړه او پايلوبې ته ووت.

جمهوري رياست وايي، ولسمشر محمد اشرف غني پرون د فوټسال لوبډلې له روزونکي عبدالرزاق ممرک سره ټيليفوني خبرې وکړې او د دغه پرمختګ مبارکي يې ورکړه.

د فوټسال ټيم روزونکي عبدالرزاق ممرک د فېسبوک پر پاڼه په خپل ويډيويي پيغام کې وويل: که څه هم زموږ لوبغاړو په بدني او د جسماني ځواک په لحاظ ستونزې درلودې، خو موږ تر خپل توان زياته هڅه وکړه، دا ژمنه کوو چې په پايلوبه کې به د خپل افغاني عزت او غيرت د دفاع لپاره ميدان ته ووځو.

د افغانستان د فوټسال تر شلو کلونو کم عمره لوبغاړي به سبا شنبه د جاپان له لوبډلې سره پايلوبه يا فاينل مسابقه وکړي.

دا سیالۍ د ایران په کوربه توب په تبریز ښار کې روانې دي.

افغانستان د اندونيزيا تر څنګ، ټايلند او هانک کانګ ته هم ماتې ورکړې، يوازې يې له ايرانه په لږ توپير ماته خوړلې ده.

د کرکټ په نړيوال جام کې سبا افغانستان له هندوستان سره لوبه کوي

ارشیف، د کرکټ افغان لوبډله د لوبې په جریان کې

د ٢٠١٩ میلادي کال د کرکټ نړيوال جام د سياليو په لړ کې سبا افغانستان له هندوستان سره مسابقه کوي.

د افغانستان پر وخت د ماسپښين پر دوو بجو به دغه مسابقه د انګلستان د ساوټ امپټُن په لوبغالي کې وشي.

افغانستان چې په دغه نړيوال جام کې يې خپلې تېرې ٥ مسابقې بايللي، د جدول په پاى کې دى.

خو هندوستان چې له څلورو مسابقو يې ٣ ګټلي، يوه يې د باران له کبله نه ده شوې.

د کرکټ نړيوال جام د مسابقو په لړ کې نن د ماسپښين پر دوو بجو د انګلستان او سريلانکا ترمنځ مسابقه کېږي.

دغه مسابقه به د ليدز په لوبغالي کې وشي.

د سولې ولسي حرکت د هلمند په مرکز لښکرګاه کې غونډه جوړوي

ارشیف، د سولې د ولسي حرکت غړي

د سولې ولسي حرکت نن مازيګر د هلمند په مرکز لښکرګاه کې د سولې او اوربند په ملاتړ ولسي غونډه جوړوي.

د دغه حرکت وياند بسم الله وطندوست نن ازادي راډيو ته وويل: په غونډه کې به د جګړې له ښکېلو اړخونو وغواړو چې نور جنګ پاى ته ورسوي، تر څنګ به يې له ولسونو وغواړو چې نور چوپ پاتې نه شي، هر څومره چې ولسونه چوپ پاتې شي، په هغه اندازه جګړه مخته ځي.

دغه ولسي حرکت تر دې مخکې هم د افغانستان په بېلابېلو ولايتونو کې د جګړې پر خلاف او د سولې په ملاتړ غونډې کړې دي.

چارواکي: په ننګرهار کې ۵۰ کیلو ګرامه چاودېدونکي توکي نیول شوي

د ننګرهار سیمه ییز چارواکي وايي چې د ملي امنیت ځواکونو په مومندرې ولسوالۍ کې د طالبانو له یوه پټنځایه پنځوس کیلوګرامه چاودېدونکي مواد ترلاسه کړي دي.

د ننګرهار د والي ویاند عطاالله خوګیاڼي ازادي راډیو ته وویل چې د ملي امنیت ځواکونو دا چاودېدونکي مواد پرون پنجشنبه له ضبطولو وروسته له منځه یووړل.

ده وویل: د مومندرې ولسوالۍ په مربوطاتو کې د ملي امنیت ځواکونو د پنجشنبې په ورځ له غرمې وروسته د وسله والو طالبانو پر یوه پټنځای عملیات ترسره کړل چې په ترڅ کې یې پنځوس کیلو ګرامه چاودېدونکي توکي نیولي او له منځه یې یوړول.

ښاغلي خوګیاڼي وویل، دا چاودېدونکي مواد د ماینونو د جوړولو لپاره زېرمه شوي وو.

طالبانو تر اوسه په دې اړه څه نه دي ویلي.

د دې چاودېدونکو موادو د نیولو خبر پرون پنجشنبه وروسته له هغه ورکړل شو چې په جلال اباد ښار کې یو ماین وچاودېد.

د ننګرهار د عامې روغتیا د ریاست ویاند ظاهر عادل رسنیو ته ویلي دي چې چاودنې یو تن وژلی او اولس نور یې ټپیان کړي دي.

د دې حملې مسؤلیت تر اوسه چا نه دی منلی.

نور راوښيه

XS
SM
MD
LG