د لاسرسۍ وړ لېنکونه

تازه خبر
دوشنبه ۳۰ مرغومی ۱۳۹۸ کابل ۰۲:۱۲

افغانستان

په کندهار کې پوليسو د وسله والو يوه ۷ کسيزه ډله نیولې

په کندهار کې پوليسو د وسله والو د يوې ۷ کسيزې ډلې د نيولو خبر ورکړ.

د کندهار د پوليسو ویاند جمال ناصر بارکزي نن وويل، دغه وسله وال په يوه اوونۍ کې په کندهار ښار او ولسواليو کې نيول شوي.

دی وایي:

"دغه ٧ کسيزه ډله په ښار او ولسواليو کې نيول شوې ده چې ترورېستان، جنګي طالبان او غلچکي بريدګر هم په کې شامل دي."

بارکزی وايي، نیول شویو کسانو پر خپلو کړنو اعتراف هم کړی دی.

چارواکي د مشکوکو کسانو د نيولو خبر په داسې حال کې ورکوي چې په کندهار کې غلچکي بريدونه زيات شوي دي.

بل خوا په باميان کې چارواکو د ١٠ کړۍ ماينونو د نيولو خبر ورکړى دى.

د باميان امنيه قوماندان مل پاسوال محمد صادق مرادي وويل، دغه ماينونه د باميان او بغلان ترمنځ سيمه کې نيول شوي دي.

ملي امنیت: په غزني کې د طالبانو د سرې قطعې ٩ غړي وژل شوي

د ملي امنيت عمومي رياست وايي، په غزني ولايت کې د وسله والو طالبانو د سرې قطعې ٩ تنه غړي وژل شوي دي.

دغه رياست نن په يوه اعلاميه کې ويلي، ځانګړو قطعاتو يې د ملا يعقوب په نوم د سرې قطعې د قوماندان پر قرارګاه عمليات کړي دي.

د اعلاميې په حواله د طالبانو دغه قوماندان په ادريس مشهور و.

د ملي امنيت عمومي رياست وايي، په دغو عملياتو کې د سرې قطعې ٩ غړي وژل شوي، د وسله والو ٦ قرارګاوې تخريب کړاى شوي، ٥ نقليه وسايط له يوې اندازې مهماتو سره نيول شوي دي.

په اعلاميه کې د قضيې په تړاو د ٢ مشکوکو کسانو د نيول کېدو خبر هم ورکړل شوى دى.

په کندز کې د اختر د رارسېدو په خاطر جدي امنیتي تدابیر نیول شوي

د کندز امنیه قوماندان منظور خان ستانکزی

د کندز امنیتي چارواکي خلکو ته ډاډ ورکوي چې افغان ځواکونو د دې ولایت په بېلابېلو برخو کې د کوچني اختر د رارسېدو په خاطر جدې امنیتي تدابير نيولي، تر څو خلک په یوه ارامه فضا کې اختر ونمانځي.

د کندز امنيه قوماندان منظورخان ستانکزي په دې اړه ازادي راډیو ته وویل:

"د اختر د ورځو لپار موږ خپلې برنامې او پلانونه لرو، ترڅو زموږ خلک د اختر شپې او ورځې د خوښۍ په فضا کې ونمانځي او موږ هېڅ چا ته اجازه نه ورکوو چې د خلکو پر وړاندې ستونزې جوړې کړي."

نوموړی له خلکو غواړي چې د ښه امنیت په خاطر له امنیتي ځواکونو سره همکاري وکړي، څو په دې ولایت کې د وسله والو طالبانو ټول پلانونه شنډ شي.

د کندز سیمه ییز چارواکي د دې ولایت خلکو ته په داسې حال کې د امنیت د تامین په اړه ډاډ ورکوي چې تېرکال په کوچني اختر کې د جګړي ښکېلو اړخونو په هېواد کې سرتاسري اورند اعلان کړی و او له کبله یې هېوادوالو په یوه ارامه فضا کې د اختر شپې او ورځې تېرې کړي، خو سږکال وسله والو طالبانو د اوربند په ردولو سره د جګړې پر دوام تېنګار کړی دی.

په غزني کې د تېرې شپې په برید کې ۵ پولیس وژل شوي

د غزني ولایت چارواکي وايي چې د غزني ښار د تېرې شپې په انتحاري حمله کې ۵ پولیس وژل شوي او د ۴ ملکیانو په ګډون ۱۱ نور ژوبل شوي دي.

د غزني د والي ویندوی عارف نوري نن یکشنبه وویل چې دا برید د تېرې شپې په نهه نیمې بجې د پولیسو پر ریزرف قطعې وشو.

نوري په عین حال کې وايي، تېره شپه ځانګړو افغان ځواکونو په مُقر او ګیرو ولسوالیو کې په کومانډو عملیاتو کې ۲۷ وسله وال طالبان وژلي او ۶ موټرسایکلونه یې ورویجاړ کړي دي.

طالبانو په دې اړه څه نه دي ویلي، خو د دې ډلې ویاند ذبیح الله مجاهد د پولیسو پر ریزرف قطعې د حملې په اړه ویلي چې ۴۰ سرتېري وژل شوي او ګڼ نور ژوبل دي.

خلیلزاد د طالبانو د مشر د اختریز پیغام ځینې برخې د خوشبینۍ وړ بللي

د افغانستان د سولې لپاره د امریکا ځانګړی استازی زلمی خلیلزاد

د افغانستان د سولې لپاره د امریکا ځانګړي استازي نن یکشنبه د طالبانو د مشر د اختریز پیغام ځینې برخې د خوشبینۍ وړ بللې دي.

زلمي خلیلزاد په څو ټوېټري پیغامونو کې لیکلي:

"د طالبانو د مشر د اختر په پیغام کې د افغانستان د سولې د پروسې یو څه ملاتړ، له نورو افغانانو سره دیالوګ ته لېوالتیا او په نهایت کې داسې جوړجاړی چې د واک وېش ته پکې اړتیا وي، ښې خبرې دي."

ده په عین حال کې د طالبانو د مشر له لوري پر جنګ ټینګار ته په اشارې ویلي چې د دا ډول الفاظو کارول غیر ضروري دي او یوازې د سولې خبرې پېچلې کوي او د پرمختګ په لاره کې خنډونه جوړوي.

د افغانستان د سولې لپاره د امریکا ځانګړي استازي د طالبانو د مشر دا ادعا رد کړې چې ګنې امریکا د جګړې اور ته لمن وهي.

خلیلزاد له طالبانو سره د سولې د اووم پړاو د پیلولو او د سیمې او اروپايي هېوادونو له چارواکو سره د سلا مشورو لپاره سفر پیل کړی.

ښاغلي خلیلزاد ویلي چې په دې پړاو کې به هڅه وکړي چې د افغانستان د سولې پروسه چټکه کړي.

د ولسمشر د فرمان له مخې د ننګرهار له محبسه ۱۲۰ بندیان خوشې شول

افغان ولسمشر محمد اشرف غني

د افغان ولسمشر د ځانګړي فرمان پر اساس د ننګرهار له محبسه ۱۲۰ تنه له بنده خوشې شول.

د ننګرهار د والي ویاند عطاالله خوګیاڼي تېر ماښام ازادي راډیو ته وویل چې د مجاهدینو د بریا د ۲۷مې کلیزې په مناسبت ولسمشر دا فرمان ورکړی چې له مخې یې د هغو بندیانو چې په کوچنیو جرایمو محکوم وو، د بند موده راکمه شوه.

ده وویل:

"د ننګرهار له محبسه ۱۸۱ بندیانو له دې فرمانه ګټه واخيسته، په دې کې د ۸۰ بندیانو د قید موده پوره شوه او ۴۰ نور هغه وو چې د بند په موده کې یې کموالی راغی چې په دې سره یې د بند موده پوره شوه، په مجموع کې ۱۲۰ تنه ازاد او د ۶۰ نورو کسانو د بند په موده کې کموالی راغی."

د ښاغلي خوګیاڼي په خبره، په لومړي ځل په ننګرهار کې د جزایي اجراتو د قانون په رڼا کې د حجز او حبس د بدیلونو د تطبیق چارې پیلېږي.

د دغه ولایت د استېناف محکمې د پرېکړې سره سم د هغو کسانو لېستونه د جوړېدو په حال کې دي چې په سپکو جرمونو محکوم دي او د بند موده یې تر پنځو کلونو کمه وي، نو د بند مودې تر ختمېدو پورې د ضمانت پر بنسټ په بېلابېلو ادارو کې په خدماتي یا وړیا کارونو بوختېږي او د شپې له خوا له خپلو کورنیو سره یوځای اوسېدای شي.

د ننګرهار چارواکو د شمېرو له مخې دا مهال د ننګرهار په محبس کې د ښځو په ګډون ۲۳۰۰ کسان د بېلابېلو جرمونو په تور بندیان دي.

کرکټ کې افغانستان استرالیا ته ۲۰۸ منډې هدف وټاکه

افغان کرکټ لوبډله

د افغانستان د کرکټ لوبډلې استرالیا ته ۲۰۸ منډې هدف وټاکه.

د لوبې ټاس افغانستان وګاټه، د منډو جوړولو پرېکړه یې وکړه، که څه هم دواړه افغان پیلونکي منډه جوړونکي حضرت ځاځی او محمد شهزاد په په لومړي او دوهم اورونو کې په صفر وسوځېدل خو ترې وروسته د رحمت شاه ۴۳، حشمت شاهدي ۱۸، د ګلبدین ۳۱ او د راشد خان تېزو ۲۷ منډو هدف له دوه سوه پورته کړ.

افغان لوبغاړي هم د پاکستاني او سریلانکا یي لوبغاړو په شان د ټاکلو پنځوسو اورونو په لوبولو ونه توانېده.

اوس به استرلیا د د یاد هدف په تعقیب لوبه پیلوي.

د افغانستان په توپ اچوونکو کې تر ډېره له راشد خان، حمید حسن، مجبب ځدراڼ او محمد نبي نه تمه کېږي چې د استرلیا لوبغاړي د یاد هدف پوره کېدو ته پرېنه‌ږدي.

افغانستان له استرالیا سره د کرکټ سیالي پیل کړه

د افغانستان د کرکټ ملي لوبډله

د افغانستان د کرکټ ملي لوبډلې نن شنبه د جون د میاشتې په لومړۍ نېټه د کرکټ د نړیوال جام لپاره په سیالیو کې خپله لومړۍ لوبه پیل کړه.

د افغانستان د کرکټ د ملي لوبډلې دغه لومړۍ مسابقه د استرالیا په وړاندې ده چې د لوبې بچه افغانستان وګټله او خپله یې د توپوهنې پرېکړه وکړه.

دا سیالي د برېستول ښار د کرکټ په لوبغالي کې پیل شوه.

د افغانستان د کرکټ بورډ مشر عزیزالله فضلي ازادي راډیو ته د پنجشنبې په ورځ وویل چې پر خپله لوبډله ډاډه دی چې له استرالیا به لوبه وګټي.

عزیزالله فضلي وایي:

"زه ډاډ لرم چې زموږ ملي لوبډله به ښه لوبه وکړي، استرالیا ښه لوبډله لري او له پوره تیارۍ سره راغلې، خو زه پر خپلو لوبغاړو باوري یم."

د کرکټ د نړیوال جام لپاره په سیالیو کې د ویسټ انډیز لوبډلې پاکستان ته سخته ماته ورکړه.

د افغانستان د کرکټ لوبډلې هم په تمریناتي مسابقو کې پاکستان ته ماته ورکړې وه.

د کرکټ د نړیوال جام لپاره به نن بله سیالي د سریلانکا او نوي زیلنډ ترمنځ ده.

ملا هبت الله: په نږدې راتلونکې کې د اوربند احتمال نه شته

د طالبانو مشر ملا هبت الله آخندزاده

د طالبانو مشر ملا هبت الله تلویحاً ویلي چې د دې ډلې له خوا په نږدې راتلونکې کې د اوربند احتمال نه شته.

اخونزاده د کوچني اختر په مناسبت پیغام کې ویلي چې له متحده ایالاتو سره یې د خبرو دروازه لا هم پرانیستې ده.

د طالبانو مشر دا پیغام وروسته له هغې خپروي چې د امریکايي له هیئت سره په قطر کې د طالب استازو شپږم پړاو خبرې تېره میاشت پرته له کوم لوی پرمختګه پای ته ورسېدې.

افغان ولسمشر محمد اشرف غني د تېرې میاشتې په لومړیو کې د روژې د مبارکې میاشتې په مناسبت په ټول افغانستان کې د اوربند غوښتنه کړې وه، خو وسله والو طالبانو دا وړاندیز رد کړ.

د تېر کال په کوچني اختر کې وسله والو طالبانو د اوربند وړاندیز منلی و او د درې ورځو لپاره یې په ټول افغانستان کې دا اوربند عملي کړ.

دا اقدام هغه مهال هم د افغانانو او هم د نړیوالې ټولنې له تاوده هرکلي سره مخ شوی و.

نیمروز کې نږدې ۳۰۰ کیلو ګرامه نشه‌يي مواد ونیول شول

په نیمروز ولایت کې نږدې درې سوه کیلو ګرامه نشه‌يي مواد ونیول شول.

په نیمروز ولایت کې نږدې درې سوه کیلو ګرامه نشه‌يي مواد ونیول شول.

د نیمروز د امنیه قوماندانۍ له‌خوا رسنیو ته په لېږل شوې خبرپاڼه کې راغلي چې له نشه‌يي موادو سره د مبارزې ځانګړو پولیسو په کنګ ولسوالۍ کې د نشه‌يي موادو پر يوه زېرمه بريد کړی او په نتيجه کې يې ۲۷۸ کیلو ګرامه تاریاک نيولي دي.

د دې پېښې په تړاو تر دې مهاله څوک نه دي نیول شوي.

د کورنیو چارو وزارت د معتادینو په اړه یوې نوې طرحه جوړوي

آرشیف، په کابل کې یو معتاد. 12.27.2017

د کورنیو چارو وزارت له نشه‌يي موادو سره د مبارزې معینیت د معتادینو په اړه د یوې نوې طرحې په اړه خبر ورکوي.

له نشه‌يي موادو سره د مبارزې معین محمد هاشم اورتاق د معتادینو د يوه روغتيايي مرکز د لیدلو پرمهال د دې طرحې په اړه خبر ورکړ.

ښاغلي اورتاق وويل چې د دې طرحې له مخې به په کابل ښار کې معتادینو ته ځانګړي ځایونه ټاکل کېږي او هلته به یې ژوند ته پام کېږي.

دا طرحه د کورنیو چارو وزارت جوړوي چې د عامې روغتیا او د کار او ټولنیزو چارو وزارتونو به په عملي کولو کې مرسته ورسره کوي.

د خوست د یو شمېر ولسوالیو خلکو پرون د اوربند لپاره لاریون وکړ

ارشیف، په غزني کې د اوربند په اړه د خلکو غږ

د خوست د یو شمېر ولسوالیو خلکو پرون د مې په یودېرشمه د اوربند لپاره لاریون وکړ.

لاریون کوونکو په جګړه کې له ښکېلو خواوو غوښتنه وکړه چې د اختر په ورځو کې اوربند وکړي.

د یووالي او بدلون کاروان په نوم د سیاسي حرکت مشر عبدالولي واحدزي لاریون ته وویل:

"موږ هیله لرو، غږ کوو چې په اختر کې دې اوربند وشي، که طالبان، امریکا، ناټو او حکومت زموږ دا غوښتنه ونه مني، د خوست قومونه به د هغو په مخ کې درېږي چې جنګ خوښوي.

په خوست کې پرون لاریون کوونکو د افغانستان ملي بیرغ او د سولې شعارونه لېږدول.

د فاریاب د کوهستان ولسوال: طالبان پر کوهستان حملې ته تیاری نیسي

د فاریاب د کوهستان ولسوالۍ ولسوال وايي چې وسله والو طالبان پر دې ولسوالۍ حملې ته تیاری نیسي او وسله وال را غونډوي.

ولسوال روح الله میرزاد پرون د مې په یودېرشمه د ازادي راډیو خبریال ته وویل چې له دوو ورځو راهیسې په سیمه کې د وسله والو طالبانو جلب او جذب روان دی او پر امنیتي پوستو یې هم حملو ته شدت ورکړی دی.

میرزاد زیاتوي:

"وسله وال طالبان لګیا دي حشر کوي، وسله وال را ټولوي، طالبانو پر ټولو پوستو حملې کړي، د وسله والو طالبانو به شل تنه مړي او زخمیان وي، دیارلس تنه زموږ شهیدان دي او اووه تنه زخمیان دي."

میرزاد وویل چې که له مرکزه اضافي ځواکونه ور ونه رسېږي، له سخت وضعیت سره به مخامخ شي.

د کوهستان ولسوال ازادي راډیو ته وویل چې شااوخوا سیمې وسله والو طالبانو نیولي او دوی کلابند دي.

د مبارزې عدلي او قضايي مرکز ته ۲۱ قضیې سپارل شوي

له نشه‌يي موادو سره د مبارزې عدلي او قضايي مرکز ویاند خالد مؤحد

امنیتي ادارو له نشه‌يي موادو سره د مبارزې عدلي او قضايي مرکز ته ۲۱ قضیې سپارلې دي.

له نشه‌يي موادو سره د مبارزې عدلي او قضايي مرکز ویاند خالد مؤحد ازادي راډیو ته وویل، ۳۲ کسان چې دوه يې ښځې وې، څه د پاسه سلو کیلو ګرامو نشه‌يي توکو د قاچاقو په تور نيولي دي.

دې تورنو کسانو ته ۲۱ قضيې جوړې شوي چې د څېړنو لپاره عدلي او قضايي مرکز ته سپارل شوي دي.

ښاغلي مؤحد زیاته کړه چې تېره اوونۍ د دې مرکز محکمو پر څو تورنو کسانو حکمونه صادر کړل: "تېره اوونۍ ۱۷ کسان د جرمونو او نشه‌يي موادو د قاچاقو په تور نیول شوي چې د عدلي او قضايي مرکز ابتدائیه او استیناف محکمو له پنځو څخه نيولې بيا تر ۱۳ کالو پورې په بند باندې محکوم کړل. له دې کسانو سره درې کیلو ګرامه هیروئین، ۱۴کیلو ګرامه مورفین، ۱۲کیلو ګرامه تریاک او ۹۱۸ کیلوګرامه چرس نیول شوي دي."

په دې نيول شويو کسانو کې اتو یې غوښتل چې نشه يي مواد د هوايي ډګرونو له لارې بهر ته قاچاق کړي.

ننګرهار کې څه د پاسه ۲۰ کیلو ګرامه نشه‌يي مواد ونیول شول

د افغانستان په نقشه کې د ننګرهار ولایت

په ننګرهار ولایت کې څه د پاسه شل کیلو ګرامه نشه‌يي مواد ونیول شول.

د ننګرهار ولایت امنیه قوماندانۍ په خبرپاڼه کې راغلي چې په لومړۍ پېښه کې پولیسو په روداتو ولسوالۍ کې ۱۷ نیم کیلو ګرامه چرس هغه مهال ونیول شول چې په یوه موټر کې د جلال اباد ښار ته قاچاق کېدل.

په دوهمه پېښه کې شپږ کیلو ګرامه هیروئین هغه مهال ونیول شول چې په یوه سراچه موټر کې له غني خېلو ولسوالۍ څخه يوې ګاونډۍ ولسوالۍ ته قاچاق کېدل.

د نشه يي موادو د قاچاقو په تور دواړه موټر چلوونکي نیول شوي دي.د

نور راوښيه

XS
SM
MD
LG