د لاسرسي لېنکونه

تازه خبر
چهارشنبه ۱ لړم ۱۳۹۸ کابل ۱۱:۴۷

افغانستان

د ولسي جرګې د رامنځته شوې شخړې د حل پرېکړه سبا ته پاتې شوه

ارشیف

د افغانستان د ولسي جرګې د ریاست پر سر د رامنځته شوې شخړې د حل کمېسیون وایي، د دغې جرګې د ریاست د څوکۍ د برخلیک په اړه به سبا ته په عمومي غونډه کې پرېکړه وشي.

د ۲۷ کسیز کمېسیون غړي عبدالقیوم سجادي سبا ته د رأی ورکولو پروسې د مېکانیزم په اړه وویل:

"وړاندیز دا دی چې د شکمنې یا د شخړې وړ رأیې په اړه د رأیې ورکولو په اړه به سبا زموږ او ستاسې جلسه په ۹ بجو جوړه شي او سره کېنو، د رأی ورکولو د مېکانیزم په اړه به هوکړه وکړو او بیا به رأیه اچونه وشي."

د دغه کمېسیون یوه بل غړي غلام حسین ناصري وویل چې دوی د ارشيف د څېړنې، په صندوق کې د اچول شویو رأیو د شمېرنې او باطلې رأیې په برخه کې کار کړی دی.

د افغانستان د ولسي جرګې د ریاست لپاره د شنبې د ورځې ټاکنې وروسته له هغه لانجمنې شوې چې میر رحمان رحماني د دې جرګې رئیس اعلان شو او سیال‌یې کمال ناصر اصولي او یوه ډله وکیلانو اعتراض وکړ چې هغه له معیاره یوه رأیه کمه وړې ده.

د اوونۍ له پیل راهیسې د جرګې په تالار کې د ولسي جرګې د غړو ترمنځ لانجې روانې دي او ان سره لاس او ګرېوان شوي هم وو.

په غزني کې بمي چاودنې ۴ تنه ووژل او ۱۰ نور ټپیان دي

د غزني چارواکي خبر ورکوي چې نن له غرمې وروسته بمي چاودنې څوارلسو کسانو ته مرګ ژوبله واړوله.

د ولایت ویاند محمد عارف نوري په دې اړه ازادي راډیو ته وویل:

"څلور تنه وژل شوي چې دوه تنه یې ملکیان او دوه تنه دي امنیتي ځواکونه او لس تنه ټپیان دي چې اووه یې ملکي وګړي او درې یې امنیتي سرتېري دي، راوړل شوي دي."

بل لور ته بیا د غزني د ملکي روغتون رئیس وايي، د دوی روغتون ته تر اووسه د دوو کسانو مړي او پنځلس ټپیان وروړل شوي دي.

ډاکټر باز محمد همت وايي:

"وژل شوی دواړه امنیتي سرتېري دي او په ټپیانو کې شپږ امنیتي سرتېري او پاتې نور یې ملکیان دي چې په هغوی کې هم دوه ښځې دي."

کومې وسله والې ډلې تر اوسه د دې بمي چاودنې پړه پر غاړه نه ده اخیستې.

چاودنه نن د ورځې څه باندې دوه بجې د کابل- کندهار پر لویه لار د پي ار ټي سیمې ته څېرمه په داسې حال کې شوې چې پولیسو غوښتل له چاودېدونکو توکو ټک موټر ودروي، خو د نه درېدو په صورت کې یې ورباندې ډزې کړي چې چاودنه رامنځته شوې ده.

خو ځیني عیني شاهدان وايي چې دغه چاودنه په هاموی ټانک کې شوې ده.

پنجشیر کې پر بې‌ځایه شویو او سېلاب‌ځپلو مرستې وېشل شوي

د افغانستان په نقشه کې د پنجشیر ولایت

په پنجشیر ولایت کې پر ۱۶۷ بې‌ځایه شویو او سېلاب‌ځپلو کورنیو خوراکي مواد او پیسې وېشل شوي.

د پنجشیر د والي ویاند عبدالودود علي مردان نن د چهارشنبې په ورځ ازادي راډیو ته وویل چې د بدخشان له کران او منجان ولسوالۍ سل کورنۍ د طالبانو د بریدونو له وېرې د پنجشیر پریان ولسوالۍ ته کډه شوي او په خیمو کې اوسي.

د ده په خبره پر دغو بې‌ځایه شویو کورنیو خوراکي مواد وېشل شوي.

مردان همداراز وویل چې په خپله پنجشیر کې هم د وروستیو سېلابونو له امله ۶۷ کورنۍ زیانمنې شوې او له هرې یوې سره ۱۵ زره افغانۍ مرسته شوې ده.

د غزني ځیني پولیس: له څو میاشتو راهیسې مو معاشونه نه‌دي اخیستي

ارشیف، د غزني ولایت یو انځور

په غزني کې ځیني امنیتي سرتېري وایي چې کورنۍ یې وږې او ناداره دي.

دوی ازادي راډيو ته وویل، که څه هم چې د وطن د دفاع په خاطر جنګېږي، خو بیا یې هم له تېرو څو میاشتو خپل معاشونه نه‌دي اخیستي او یا یې هم معاشونه یو مخ ورک دي.

اخوا د غزني نظامي چارواکي بیا وايي چې په دغه ولایت کې د ټولو سرتېرو معاشونه اجرا شوي دي.

د غزني امنیه قوماندان سمونوال محمد خالد وردګ په دې اړه ازادي راډیو ته وویل:

"په دغه ولایت کې ټولو پولیسو ته له بایومټریک کېدو وروسته معاشونه ورکول شوي دي."

دا په داسې حال کې ده چې د هېواد د ځینو نورو سیمو په څېر په غزني کې هم پولیس له وسله‌والو سره په جګړه بوخت دي او د دغه ولایت د خلکو اقتصاد کمزوری بلل کېږی چې د دغو پولیسو کورنیو د همدغو سرتېرو معاشونو ته سترګې نیولې وي.

خلیل‌زاد امریکايي سناتورانو ته د خپلو لیدنو په اړه معلومات ورکوي

ارشیف/ د افغانستان د سولې او پخلاینې لپاره د امریکا خاص استازی زلمی خلیل‌زاد

د افغانستان د سولې او پخلاینې لپاره د امریکا خاص استازی زلمی خلیل‌زاد به نن د امریکا د سنا جرګې د بهرنیو اړیکو کمېټې ته د افغان سولې د ټينګښت په هدف د خپلو هڅو په اړه معلومات ورکړي.

د بهرنیو اړیکو کمېټه وايي، د دوی نننۍ ناسته به سري یا د تړلو دروازو تر شا وي.

ښاغلي خلیل‌زاد په شااوخوا اووه میاشتو کې شپږ واره له طالبانو سره د قطر په پلازمېنه دوحه کې کتلي دي.

تمه ده چې ښاغل خلیل‌زاد امریکايي سناتورانو ته د خپلو دغو لیدنو په اړه معلومات ورکړي.

له افغانستانه د بهرنیو ځواکونو وتل او له افغان خاورې د ترورېزم د کار نه‌اخیستل ډاډ هغه مسایل دي چې خلیل‌زاد او طالبانو پرې بحثونه کړي، خو خلیل‌زاد ټینګار کوي چې په افغانستان کې د اوربند ټينګښت او بین‌الافغاني خبرې یې هم د بحثونو اصلي موضوع‌ګانې دي.

د خلیل‌زاد او طالبانو وروستی دور خبرې د مې په نهمه پای ته ورسېدې.

د افغانستان د سولې او پخلاینې لپاره د امریکا خاص استازي ښاغلي خلیل‌زاد دا خبرې ښې، خو ورو یادې کړي.

طالبانو ویلي چې له افغان حکومت سره مخامخ خبرې نه‌کوي او دوی ته له افغانستانه د بهرنیو ځواکونو د وتلو مسئله مهمه ده.

د کرکټ افغان ملي لوبډله انګلستان ته ځي

ارشیف، د افغانستان د کرکټ د ملي لوبغاړو یو انځور

افغان کرکټ بورډ وایي، نن به د کرکټ افغان ملي لوبډله د انګلستان هېواد ته ولاړه شي.

د دغه بورډ ویاند فرید هوتک نن د چهارشنبې په ورځ ازادي راډيو ته وویل چې ملي لوبډله به انګلستان کې د نړیوال جام سیالیو لپاره د چمتوالي تمریناتي لومړی لوبه د مې په ۲۴مه نېټه له پاکستان ملي لوبډلې سره وکړي.

دی وايي:

"نن به افغان کرکټ ملي لوبډله له اېرلنډ څخه د انګلستان په لور روانه شي او هلته به افغان کرکټ ملي لوبډله د نړیوال جام سیالیو کې ګډون وکړي."

ښاغلی هوتک وایي، همدا شان به د مې په ۲۷مه نېټه افغانستان له انګلستان سره کرکټ تمریناتي لوبه ولري.

د نوموړي په خبره، د مې میاشتې په ۳۰مه نېټه په رسمي ډول د نړیوال جام سیالۍ پیلېږي او افغان کرکټ ملي لوبډلې دغو سیالیو ته بشپړ چمتوالی نیولی دی.

د افغان تکواندو ملي لوبډله به د هند په سیالیو کې ګډون وکړي

د افغانستان او هند ګډ بیرغونه

د افغانستان د تکواندو فدراسیون وایي، د جون میاشتې په ۱۴مه نېټه به افغان تکواندو ملي لوبډله د هند په سیالیو کې ګډون وکړي.

د دغه فدراسیون مشر بشر تره‌کې نن ازادي راډيو ته وویل چې په‌دغو سیالیو کې د افغانستان ترڅنګ د ګڼ شمېر نورو هېوادونو لوبډلې هم ګډون ولري.

«د انډین اوپېن» "لوبو کې به د افغانستان د تکواندو ملي لوبډله په بېلابېلو کټګوریو کې ګډون وکړي او زیات هېواودنه هڅه کوي چې د دغو لوبو غړیتوب ولري."

د ښاغلي تره‌کي په خبره، دا سیالۍ د ۲۰۲۰د توکیو د المپیک سیالیو لپاره ترسره کېږي چې هر لوبغاړي چې په‌کې د طلا مډال خپل کړ، دغو سیالیو ته به لار مومي.

نړیوال بانک او د مالي تأمین اداره په افغانستان کې دفترونه جوړوي

ارګ

نړیوال بانک او د مالي تأمین نړیواله اداره په افغانستان کې نوي دفترونه جوړوي.

ارګ ماڼۍ نن په یوه بیان کې ویلي چې نن له غرمې مخکې د نړیوال بانک مرستیال هارتوګ شفر او د مالي تأمین نړیوالې ادارې مرستیالې نینا سټویلجویک له افغان ولسمشر اشرف غني سره کتلي او په دې اړه‌یې بحث ورسره کړی.

د بیان له مخې دغو چارواکو همداراز له افغانستان سره د مؤثر ملاتړ لپاره په خپلو پروګرامونو هم خبرې کړي.

د افغانستان جمهور رئیس اشرف غني له یادو چارواکو سره په لیدنه کې ویلي چې د نړیوال بانک او د مالي تأمین د نړیوالې ادارې د نویو دفترونو جوړېدل له افغانستان سره ژور او اوږدمهال تعهد ښيي.

جرمني نن ۲۶ افغان پناه غوښتونکي کابل ته راولېږل

ارشیف، په کابل کې د حامد کرزي د هوایي ډګر یو انځور

جرمني نن ۲۶ افغان پناه غوښتونکي کابل ته راواستول.

د جرمني ډي پي اې خبري اژانس وايي چې په جرمني کې د دغو افغانانو د پناه اخیستلو غوښتنه رد شوې وه.

د ۲۰۱۶ کال له ډسمبر دا ۱۶م وار دی چې افغان پناه غوښتونکي په ډله‌ییزه توګه بېرته افغانستان ته رالېږل کېږي.

تر اوسه پورې ۵۶۵ نارینه افغان پناه غوښتونکي له جرمني را ایستل شوي دي.

منتقدین وايي چې پناه غوښتونکي باید ونه‌ایستل شي، ځکه د هغوی له نظره افغانستان خوندي نه‌دی.

د ملګرو ملتونو د تازه راپور په اساس د روان ۲۰۱۹ کال د جنورۍ او مارچ میاشتو ترمنځ ۵۸۱ افغان ملکیان وژل شوي دي.

د پکتیا بڼوال او بزګران خپلو حاصلاتو ته ساتنځایونه غواړي

د افغانستان په نقشه کې پکتیا ولایت

د پکتیا ولایت په یو شمېر سیمو کې کروندګر او بڼوال وایي، له بڼونو او څمکو د ترلاسه کېدونکو حاصلاتو د ساتلو لپاره ساتنځایونه نه‌لري.

دوی وایي، دا یوه ستونزه ده او له امله‌یې دوی اړ کېږي چې حاصلات په کمه بیه وپلوري.

دوی وایي، دغلته پياز، الوګان، غنم، جوار او لوبیا کري او په خبره‌یې چې سږ یې د پیازو کیلو په ۳۰ افغانۍ و، خو که سړې خونې ورته جوړې شوې وی، نو ښه ارزښت به‌یې پیدا کړی وی.

اخوا د پکتیا ولایت د کرنې، اوبو لګولو او مالدارۍ ریاست د دې ولایت د بڼوالو، ځمکوالو او مالدارانو ستونزې مني او وایي چې د هواري په برخه کې یې ګڼ پلانونه لري چې له ډلې یې یو هم بزګرانو او بڼوالو ته د دوی په سیمو کې د دوی د ستونزو په پام کې نیولو سره سم وړې پروژې دي.

چارواکي: افغان امنیتي ځواکونو په کاپیسا کې ۵ طالبان وژلي

د افغانستان په نقشه کې کاپیسا ولایت

د کاپیسا ولایت امنیتي چارواکي وايي چې افغان امنیتي ځواکونو پنځه وسله‌وال طالبان وژلي دي.

د دغه ولایت د امنیه قوماندانۍ ویاند عبدالشایق شورش نن سهار ازادي راډیو ته وویل چې دغه وسله‌وال طالبان د نجراب ولسوالۍ په افغانیه کلي کې د افغان پوځیانو په تصفیوي عملیاتو کې وژل شوي.

د شورش په خبره د نجراب په افغانیه او پچه‌غان درو کې له پرون شپې د طالبانو پر ضد عملیات روان دي.

د کاپیسا امنیتي چارواکي وايي چې افغان ملکیانو ته زیان نه‌دی اوښتی.

طالبانو تر اوسه په دې اړه څه نه‌دي ویلي.

ننګرهار کې سږ کال ۷ زره مټریک ټنه د شفتالو حاصلات راټول شوي

شفتالو

د ننګرهار ولایت د کرنې ریاست وایي، له دغه ولایته سږ کال شااوخوا ۷۰۰۰ مټریک ټنه شفتالو راټول شوي دي.

د دغه ولایت د کرنې ریاست سرپرست ذبیح‌الله حسن‌زي نن د چهارشنبې په ورځ ازادي راډيو ته وویل چې دغه اندازه شفتالو د ننګرهار له بهسودو، بټي‌کوټ، خېوه، کامې، ګوشتې، دره‌نور، او خوګیاڼو ولسوالیو له ۲۰۰۰ جریبه ځمکو راټول شوي دي.

دی وايي:

"سږ کال په ننګرهار کې شااوخوا ۷ زره مټریک ټنه د شفتالو حاصلات راټول شوي چې په یو کال کې یې ملي عاید تر ۵۰۰ میلیونه افغانیو رسېږي."

ښاغلی حسن‌زی وایي، له ننګرهاره کابل او ګڼو نورو ولایتونو ترڅنګ له هېواد بهر هم د شفتالو صادرات کېږي او ګڼ شمېر خلک په‌دې برخه کې په کاروبار بوخت دي.

حاجي‌اغا: د ډالرو لوړوالي د افغانستان پر سوداګرۍ منفي اغېز کړی

د افغانستان د متشبثینو عالي بورډ مشر رحم‌الدین حاجي اغا

د افغانستان د متشبثینو عالي بورډ وایي، د افغانیو پر وړاندې د ډالرو د بیو لوړوالي سوداګر له ستونزو سره مخ کړي دي.

د دغه بورډ مشر رحم‌الدین حاجي اغا نن د چهارشنبې په ورځ ازادي راډيو سره په خبرو کې د افغانستان پر مرکزي بانک انتقاد وکړ چې دغه بانک د بیو د کنټرول ظرفیت نه‌لري.

دی وايي:

"د ډالرو لوړوالي د افغانستان پر سوداګري منفي اغېز کړی، سوداګر حیران دي چې پر افغانیو سوداګري وکړي که پر ډالرو، که څه هم افغانۍ زموږ ملي هویت دی، خو له افغانستانه بهر افغانۍ نه چلېږي او دلته یې لوړوالي ستونزې جوړې کړي."

ښاغلی حاجي اغا وایي، دولت او اړوند بنسټونه باید په‌دې برخه کې ځانګړې پاملرنه وکړي او د بیو بازار دې کنټرول کړي.

د افغانستان د کرکټ ملي لوبډلې ایرلنډ ته په لوی توپیر ماتې ورکړه

ارشیف، د افغانستان د کرکټ د ملي لوبغاړو یو انځور

د افغانستان د کرکټ ملي لوبډلې پرون د سې شنبې په ورځ د ایرلنډ ټیم ته په دوهمه نړیواله یو ورځنۍ لوبه کې د ۱۲۶ منډو په توپير ماتې ورکړه او په دې سره د دواړو هېوادونو ترمنځ د دوو یو ورځنیو لوبو دا لړۍ یو په یو مساوي پای ته ورسېده.

پرونۍ لوبه چې د ایرلنډ په بلفاسټ لوبغالي کې وشوه، پچه ایرلنډ وګټله او افغان لوبډلې ته‌یې لومړی د بېټنګ بلنه ورکړه چې افغانستان د اوو لوبغاړو په سوځېدو په ۵۰ اورونو کې سيالې لوبډلې ته د ۳۰۶ منډو ستر هدف وټاکه.

ایرلنډ لوبډله په خپله پاڼۍ کې د افغان توپ اچوونکو له‌خوا تر سخت فشار لاندې راغله چې په ۴۲م اوور کې یې د ټولو لوبغاړو په سوځېدو ۱۷۹ منډې پوره کړای شوې او لوبه‌یې په یو لوی توپیر افغانستان ته وبایلله.

د ایرلنډ پر وړاندې دې لوبه کې شهزاد محمدي د ۱۰۱ منډو په جوړولو په نړیوالو یو ورځنیو لوبو کې خپله شپږمه سلیزه پوره کړه.

تر دې دوه ورځې مخکې ایرلنډ له افغانستان څخه لومړنۍ لوبه ګټلې وه.

ټاکل شوې د افغانستان راتلونکي تمریني لوبې د جمعې په ورځ له پاکستان او دوشنبې په ورځ له انګلستان سره ترسره شي.

راتلونکې پنجشنبې د مې په ۳۰مه نېټه په بریتانیا کې د کرکټ د نړیوال جام لوبې هم پیلېږي.

په‌دې لوبو کې افغانستان د جون په لومړنۍ نېټه د استرالیا سره مخ کېږي.

په غزني کې د طالبانو یو ځایي قوماندان وژل شوی

د کورنیو چارو وزارت ویاند نصرت رحیمي

چارواکي وايي، په غزني کې د طالبانو د یو ځایي قوماندان په شمول شپږ تنه وسله‌وال طالبان وژل شوي دي.

د افغانستان د کورنیو چارو وزارت وايي، قاري بشیر چې په قره‌باغ ولسوالۍ کې د وسله‌والو طالبانو د چریکي بریدونو مسؤل و، د پولیسو په یو کمین کې د پنځو نورو وسله‌والو سره وژل شوی دی.

د کورنیو چارو وزارت ویاند نصرت رحیمي وايي، په‌دې کمین کې د طالبانو یو موټر او دوه میله وسله هم له‌منځه تللې ده.

وسله‌والو طالبانو تر اوسه په‌دې اړه تبصره نه‌ده کړې.

قره‌باغ د غزني یوه له ناامنو ولسوالیو څخه ده.

عرفان: د ولسي جرګې عمومي غونډې ته به یوه جامع طرحه وړاندې کړو

د ولسي جرګې د مشرتابه پر څوکۍ د راپورته شوي کړکېچ د هواري لپاره د ټاکل شوي اووه ویشت کسیز پلاوي یو غړی عرفان الله عرفان

تمه کېږي چې د ولسي جرګې د مشرتابه پر څوکۍ د راپورته شوي کړکېچ د هواري لپاره ټاکل شوی ۲۷ کسیز پلاوی به نن چهارشنبه خپله طرحه د جرګې په عمومي غونډه کې شریکه کړي.

د دې پلاوي یو غړي عرفان‌الله عرفان د سې شنبې په ورځ «۱۳۹۸ کال د غويي ۳۰» هیله‌مندي وښوده چې د جرګې عمومي غونډې ته به یوه جامع طرحه وړاندې کړي.

ښاغلی عرفان زیاتوي:

"هیله‌مندي مو دا ده چې تر غرمې دې مسئلې ته د پای ټکی کېږدو او داسې طرحه به چې ټول تالار ته د منلو وړ وي پارلمان ته وړاندې شي."

د سې شنبې په ورځ «۱۳۹۸ کال د غويي ۳۰» چې د ولسي جرګې د مشرتابه پر څوکۍ د راپورته شوي جنجال څلورمه ورځ وه، دا کړکېچ راکم نه‌شو.

د شنبې په ورځ د ولسي جرګې د رئیس لپاره په رأی ورکولو کې له پروان ولایت څخه د خلکو استازی میر رحمان رحماني وتوانېده ۱۲۳ رأیې ترلاسه کړي، په مقابل کې یې د خوست څخه په ولسي جرګه کې د خلکو استازي کمال ناصر اصولي ۵۵ رأیې ترلاسه کړې.

خو ښاغلی اصولي او ملاتړي یې وايي چې ښاغلي رحماني د ولسي جرګې مشرتابه ته ټاکلې «پنځوس+یو» رأیې نه‌دي پوره کړي او په‌دې توګه باید بل پړاو انتخابات ترسره شي.

د ولسي جرګې په پخواني شپاړسم تقنیني دور کې هم د دې جرګې د رئیس پر سر ډېر جنجالونه راپورته شول او تر اوونیو بحثونو وروسته عبدالرؤف ابراهیمي د ولسي جرګې رئیس غوره شو.

بروکسل کې د افغانستان د سولې په اړه کنفرانس پیلېږي

د سولې عالي شورا ویاند غفور احمد جاوید

د بلجیم په پلازمېنې بروکسل کې نن چهارشنبه د افغانستان د سولې په اړه یو دوه ورځنی کنفرانس پیلېږي.

د افغانستان د سولې عالي شورا په یوې خبرپاڼه کې ویلي، دا کنفرانس د اروپا د سولې د انسټټیوټ له‌خوا جوړ شوی او د سولې عالي شورا رئیس محمد کریم خلیلي په‌کې د ګډون لپاره بروکسل ته رسېدلی دی.

د سولې عالي شورا ویاند غفور احمد جاوید ازادي راډیو ته وویل، ښاغلی خلیلي به نن دې کنفرانس ته وینا وکړي.

بل‌خوا د قطر په مرکز دوحه کې د طالبانو د سیاسي دفتر ویاند سهیل شاهین وايي چې پرون سې شنبه «۱۳۹۸ کال د غويي ۳۰» د افغانستان لپاره د اروپايي ټولنې ځانګړي استازي رولانډ کوبیا په دوحه کې د طالبانو د سیاسي دفتر له مشر ملا عبدالغني برادر سره د افغانستان پر روانو حالاتو، له امریکا سره د طالبانو پر مذاکراتو، د ولسي خلکو د مرګ ژوبلې پر مخنیوي او بشري مرستو خبرې کړې دي.

سهیل شاهین رسنیو ته په یو استولي بیان کې ویلي، د اروپايي ټولنې استازي په‌دې لیدنه کې د دې ټولنې په استازولۍ د افغانستان په سوله کې د مثبت رول لوبولو ډاډ ورکړ او هیله‌یې څرګنده کړې چې په راتلونکي کې به هم د طالبانو د سیاسي دفتر سره اړیکو ته دوام ورکړي.

د افغانستان په شمالي سیمو کې د داعش په اړه د روسیې اندېښنه

د روسیې بیرغ

د روسیې د فدرالي امنیت د ادارې مشر ویلي چې د افغانستان په شمالي سیمو کې ۵۰۰۰ وسله وال چې له داعش سره تړاو لري، فعال دي.

الکساندر بورتینکوف د افغانستان د شمالي پولو پر امتداد د داعش د وسله والو د فعالیت له امله اندېښنه څرګنده کړې ده.

بورتینکوف نن د مې په یوویشتمه په تاجکستان کې دا خبرې کړې دي.

هغه ویلي چې د داعش نږدې ۵۰۰۰ زره وسله وال د افغانستان په شمالي ولایتونو کې چې د منځنۍ اسیا له جمهوریتونو سره ګډه پوله لري، فعالیت کوي.

د اسوشېټېډ پرېس په حواله، د روسیې دې لوړ رتبه امنیتي چارواکي ویلي چې د منځنۍ اسیا جمهوریتونه باید له افغانستان سره پر خپلو سرحدي سیمو امنیت ښه کړي.

روسیه د منځنۍ اسیا په جمهوریتونو کې پوځي اډې هم لري.

دا اول وار نه دی چې روسیه په افغانستان کې د داعش د فعاليت په اړه اندېښنه څرګندوي.

اسوشېټېډ پرېس د یو شمېر څارونکو په حواله لیکلي چې مسکو په افغانستان کې د داعش د وسله والو د شمېر په اړه مبالغه کوي او په دې ډول له طالبانو سره د خپلو اړیکو د توجیه کولو هڅې کوي.

خو روسیه له طالبانو سره د همکارۍ خبر ردوي.

په هرات کې غلاوو او د سوداګرو اختطاف پانګه‌وال اندېښمن کړي

د افغانستان په نقشه کې د هرات ولایت

د هرات ولایت د سوداګرۍ او صنایعو خونې رئیس وايي چې په دغه ولایت کې غلاوو او د سوداګرو اختطاف پانګه‌وال اندېښمن کړي.

سعد خطیبي نن ازادي راډيو ته وویل، دغه ستونزه د دې لامل شوې چې پانګه‌وال په پانګونه کې ټکني شي.

ده زیاته کړه:

"دوه ورځې وړاندې د یو صراف ځوان زوی اختطاف او بیا ووژل شو، تېره شپه‌یې یو بل هم وژلی، له بده مرغه ناوړه خبرونه زیات لرو."

دا په داسې حال کې ده چې د افغانستان د سوداګرۍ او صنایعو خونې په خبره، تېر کال په هرات او ننګرهار ولایتونو کې د تښتونو او وژنو کچه لوړه وه.

ښاغلی خطیبي وايي، د ناامنۍ له امله سوداګرو خپله پانګه له هراته ویستلې او دا مهال‌یې په ترکیه او ایران کې پرې کارو بار کوي.

رستمي: په ټول هېواد کې د اوبو لګولو ۳۴۴ پروژې پلې کېږي

په جوزجان کې د اوبو لګولو د یوې پروژې د پرانیستې مراسم

د افغانستان د کرنې او مالدارۍ وزارت په پام کې لري چې په ټول هېواد کې د اوبو لګولو ۳۴۴ پروژې پلې کړي.

د دغه وزارت ویاند اکبر رستمي نن ازادي راډیو ته وویل چې د دغه پروګرام په پیل کې په ننګرهار کې د اوبو څلور کانالونه، د کابل په چهار اسیاب ولسوالۍ کې د اوبو رسونې یوه شبکه او په جوزجان کې د اوبو رسونې دوه پروژې ګټې اخیستنې ته سپارل شوې دي.

ده وویل:

"د هېواد په کچه شبکې او کانالونه جوړېږي چې ۲۰ فیصده به د اوبو د ضایع کېدو مخه ونیسي، حاصلات به ورسره ۲۵ فیصده لوړ شي او له دې سره به کاري فرصتونه هم رامنځته کړي."

نوموړی وايي چې تېر کال د کرنې وزارت ۹،۲ میلیارده افغانۍ د اوبو لګولو په پروژو مصرف کړې وې.

د ده په خبره، د کانالونو په جوړېدو سره به د بزګرانو تولیدي ظرفیت او حاصلات هم لوړ شي.

د حل مؤظف پلاوی به د ولسي جرګې په اړه نن نتایج اعلان کړي

د افغانستان پارلمان

تمه ده چې د ولسي جرګې د رئیس د انتخاب پر سر د اختلاف د حل مؤظف پلاوی نن د خپلو څېړنو نتایج اعلان کړي.

په ولسي جرګه کې په تېرو درېیو ورځو کې اختلافونه وروسته له هغه اوج ته ورسېدل چې د رأیو اخیستو له یوې لانجمنې پروسې وروسته میر رحمان رحماني د رئیس په توګه معرفي شو او سیال کاندید کمال ناصر اصولي یې مخالفت وکړ.

مؤظف پلاوي ته دنده سپارل شوې ده چې د ولسي جرګې ارشیف او د رئیس د انتخاب لپاره د رأیو بهیر وګوري او له ارزونې وروسته په‌دې اړه پرېکړه وکړي.

جلال‌اباد ښار کې يوې چاودنې ۴ کسان ټپیان کړل

د افغانستان په نقشه کې د ننګرهار ولایت

په ننګرهار ولایت کې په‌دې وروستيو کې چاودنې زیاتې شوې دي.

په دې لړۍ کې پرون دوشنبه هم په جلال‌اباد ښار کې په يوه چاودنه کې څلور کسان ټپیان شول.

د ننګرهار د امنيه قوماندانۍ وياند فريد خان ازادي راډيو وويل، د دوشنبې په ماښام شااوخوا اووه بجې د جلال‌اباد ښار په دوهمه ناحيه کې چاودنه وشوه.

ښاغلي فرید خان په‌دې پېښه کې د تلفاتو په اړه جزئیات نه‌دي ورکړي، خو د جلال‌اباد مرکزي روغتون مسؤلين وايي، د پېښې له ځایه دوی ته څلور ټپيان وروړل شوي چې یو يې بستر دی او درې نور تر لومړنۍ درملنې وروسته خپلو کورونو ته رخصت شوي دي.

دقيق معلومات نه‌شته چې دا چاودنه چا او څنګه کړې ده؟

د جلال‌اباد په لومړۍ حوزه کې د شنبې په ورځ هم څلور پرله‌پسې چاودنې وشوې چې دوه کسان‌يې ټپيان کړل.

یوه اوونۍ مخکې په جلال‌اباد کې د ګڼو چاودنو په نتيجه کې څلور ملکيان وژل شوي او شااوخوا ۲۰ نور ټپیان شوي وو.

په ننګرهار کې هم طالبان او هم داعش ډله فعال حضور لري.

هلمند او کندهار کې ۲ خیریه بنسټونه ۵۳ روغتیايي مرکزونه جوړوي

د افغانستان د روغتيا وزیر فیروز الدین فیروز

په کندهار او هلمند ولایتونو کې به د ناروغیو د کنټرول او مخنیوي مرکزونو ادارې او د بېل او ملېنډا ګېټس د بنسټ په مرسته ۵۳ روغتيايي مرکزونه جوړ شي.

د افغانستان د روغتيا وزارت وياند وحيدالله مایار پرون ماښام ازادي راډیو ته وویل چې په‌دې اړه د روغتیا وزیر فیروز الدین فیروز د يادو ادارو له مشرانو سره د دوشنبې په ورځ ولیدل.

ښاغلي مایار زیاته کړه:

"۳۰ روغتیايي مراکز به په هلمند او کندهار کې د بېل او ملېنډا ګېټس د بنسټ په مرسته جوړېږي. کارونه به‌یې په جون مياشت کې پیل شي. بل ملاقات د «سي ډي سي» د مشر سره و چې د ډېرې همکارۍ وعده‌يې وکړه په بېلابېلو برخو کې لکه تخنیکي برخه، د واکیسناسیون برخه او همداراز یې په کندهار کې د ۲۳ روغتيايي مراکزو د جوړولو ژمنه وکړه."

د روغتیا د نړيوالې ادارې ۷۲مه غونډه په ژنیو کې د دوشنبې په ورځ پیل شوه او یوه اوونۍ به دوام کوي.

په‌دې غونډه کې له ۱۹۴ غړو هېوادونو څخه شااوخوا څلور زره استازي ګډون کوي.

د ښاغلي مايار په وینا، افغانستان ته په‌دې غونډه کې ډېر اهمیت ځکه هم ورکول شوی چې افغانستان له هغو هېوادونو دی چې په جنګي شرايطو کې د روغتیايي خدماتو رسولو تر ټولو زياته تجربه لري.

هرات کې د یو شمېر ښوونکو کاري اعتصاب دوام وکړ

ارشیف، په هرات کې د یو شمېر ښوونکو کاري اعتصاب.

په هرات ولایت کې د یو شمېر ښوونکو کاري اعتصاب لا پای ته نه‌دی رسېدلی.

دا ښوونکي اعتراض لري چې معاشونه‌يې لږ دي.

دوی له پنجشنبې راهیسې تدریس درولی دی.

د افغانستان د ښوونکو لپاره د عدالت غوښتونکو د ټولنې استازي شهیر احمد احمدیار ازادي راډيو ته وويل چې د ښوونکو کاري اعتصاب تر نا ټاکل شوې مودې دوام لري.

دی وايي:

"د ښوونکو تر ټولو مهمه غوښتنه د معاش زیاتېدل دي. که‌یې معاشونه زيات نه‌شي، له اعتصابه به لاس وانه‌خلي. ښوونکي پرته له اعتصابه بله لاره نه‌لري."

ښاغلي احمديار ونه‌ویل چې په هرات کې د یوه ښوونکي معاش څومره دی؟

د هرات د ښوونې رئیس روح‌الله زاهد ژمنه کړې چې د ښوونکو غوښتنې به ومنل شي.

شاوخوا ۲۰ زره ښوونکي د هرات په ۱۳۰۰ ښوونځیو کې خپلو دندو ته نه‌ځي.

افغان پولیسو په کندهار کې درې غلچکي بریدکوونکي ووژل

په کندهار کې افغان پولیس

افغان پولیسو تېره شپه د کندهار ښار په بېلابېلو حوزو کې درې غلچکي بریدکوونکي ووژل.

د کندهار د پوليسو ویاند جمال ناصر بارکزي ازادي راديو ته وويل:

"لومړی دوه تنه بريدکوونکي د کندهار په لسمه امنیتي حوزه کې د پوليسو پر ګزمې برید وکړ، خو د پولیسو د مقاومت په نتیجه کې یو برید کوونکی ووژل شو او دوهم وتښتېد، خو دوهم بریدګر بيا په دولسمې امنیتي حوزې کې د امنیتي ځواکونو له‌خوا محاصره او وویشتل شو. درېیمه پېښه په لومړی امنیتي حوزې کې وشوه."

ښاغلي بارکزي وویل، درېیم بريدکوونکي هم داسې مهال ووژل شو چې د پوليسو پر تلاشۍ یې د بريد هڅه وکړه.

د پوليس ویاند وویل، په‌دغو بریدونو کې پولیسو ته زیان نه‌دی رسېدلی.

د طالبانو ویاند قاري يوسف احمدي بيا وژل شوي کسان طالبان نه، بلکې ملکيان بللي.

نور راوښيه

XS
SM
MD
LG