د لاسرسۍ وړ لېنکونه

تازه خبر
شنبه ۵ سلواغه ۱۳۹۸ کابل ۰۳:۲۷

افغانستان

نوري: د غزني د امنیې قوماندانۍ د ښوونې او روزنې د امر قاتل نیول شوی

د غزني د والي ویاند محمد عارف نوري

د غزني ولايت چارواکي وايي، د امنيې قوماندانۍ د ښوونې او روزنې د امر څارمن شاپور بختيار او د دوو نورو پولیسو قاتل يې نيولى دى.

څارمن بختیار يوه اوونۍ وړاندې ښار ته څېرمه په البيروني ښارګوټي کې ووژل شو.

د غزني د والي ویاند محمد عارف نوري نن يکشنبه خبریالانو ته وویل:

"نيول شوى کس محمد خالد نومېږي او د ميدان وردګ ولايت د چک ولسوالۍ اصلي اوسېدونکى دى چې دمګړۍ یې د غزني ښار په البيروني ښارګوټي کې ژوند کاوه."

نیول شوي کس هم خبریالانو ته وویل، مشر یې ورته د شاپور د وژل کېدو په بدل کې زر پاکستانۍ کلدارې انعام ورکړ او د دوو پولیسو په بدل کې یې هم زر افغانۍ انعام ورکړی و.

د ملي اردو چارواکي وايي، په ارزګان کې ۹ وسله وال وژل شوي

ارشیف، افغان ځواکونه په ارزکان ولایت کې

د ملي اردو چارواکي وايي، په ارزګان ولايت کې ۹ وسله وال وژل شوي دي.

دغه پوځي عمليات په تېرو ۲۴ ساعتونو کې د ارزګان په مرکز ترينکوټ او دهراود ولسوالۍ کې شوي دي.

د افغانستان په جنوب کې د ۲۰۵ اتل قول اردو ویاند خواجه يحيى علوي نن وويل، په دغو عملياتو کې د وسله والو يوه اندازه وسلې او مهمات هم د افغان ځواکونو لاسته ورغلي دي.

وسله والو طالبانو تر اوسه په دې اړه رسنیو ته څه نه دي ویلي.

رستمي: سږ کال به پر ۳۰ زرو بېوزلو کورنیو د چرګانو فارمونه ووېشل شي

د افغانستان د کرنې او مالدارۍ وزارت ویاند اکبر رستمي

د افغانستان د کرنې او مالدارۍ وزارت وايي، په ۱۳۹۸ لمریز کال کې به پر ۳۰ زرو بېوزلو کورنیو د چرګانو فارمونه ووېشل شي.

د دغه وزارت ویاند اکبر رستمي نن ازادي راډیو ته وویل چې د چرګانو دغه فارمونه په بېلابېلو ولایتونو کې په هغو مېرمنو وېشل شوي چې اقتصادي وضعیت یې ښه نه دی.

ده وویل:

"په مجموعي ډول سږکال پر ۳۰ زرو کورنیو په دایکنډي، بدخشان، نیمروز، ارزګان، کابل، هرات، کونړ، خوست، بلخ، کندز او ننګرهار کې وېشل کېږي."

د دې پروژې له پلي کولو څخه هدف د چرګانو روزنې صنعت ته پراختیا ورکول، په کور دننه مېرمنو ته د کار زمینه برابرول، د کورنیو د خوړو خوندیتوب او له دې لارې د بېوزلو کورنیو اقتصادي پیاوړتیا ده.

د کرنې او مالدارۍ وزارت وايي، تېر کال هم پر ۵۴ زرو بېوزلو کورنیو باندې د چرګانو فارمونه وېشل شوي وو.

ملي امنیت: د موسى کلا لپاره د طالبانو تش په نوم ولسوال نيول شوى

د ملي امنيت عمومي رياست وايي، د هلمند ولايت د موسى کلا ولسوالۍ لپاره د طالبانو تش په نوم ولسوال نيول شوى دى.

دغه رياست نن په يوه اعلاميه کې ويلي چې ملا عبدالغفور له ځينو وسلو او مهماتو سره په ځانګړو عملياتو کې نيول شوى دى.

وسله والو طالبانو د دې پېښې په اړه تبصره نه ده کړې.

په کندوز ښار کې د لومړي ځل لپاره ټرافیکي څراغونه نصب شول

په کندز ښار کې ټرافیکي اشارې

په کندوز ښار کې د لومړي ځل لپاره ټرافیکي څراغونه نصب شول.

د کندوز ښار په واټونو کې له څو لسیزو راهیسې ټرافیکي څراغونه نه وو او اوس چې په ښار کې د موټرو شمېر زیات شوی، د ټرافیکي اشارو نشتوالي د پلیو او موټرچلوونکو ستونزې لا زیاتې کړې وې.

د دې ولایت د ټرافیکو رئيس وايي چې د ټرافیکي څراغونو له نصب کېدو سره به د ښاریانو ستونزې تر یوه حده حل شي.

د نیمروز ګمرک به له دې وروسته ۲۴ ساعته پرانیستی وي

د نیمروز ولایت ګمرک به له دې وروسته ۲۴ ساعته پرانیستی وي.

د افغانستان د ګمرکونو رئيس احمد رشاد پوپل پرون نیمروز ته لاړ او د دغه ولایت د ګمرکي خدماتو د ۲۴ ساعته کولو د اعلان ترڅنګ یې د ګمرکي عوایدو د ډېرېدو او د ګمرکي خدماتو پر ښه کېدو یې د دغه ولایت د ګمرک له مسؤلانو سره خبرې وکړې.

ده د ایران د ګمرک له مسؤلانو هم وغوښتل چې خپل ګمرکي خدمات د افغانستان په شان ۲۴ ساعته کړي.

نوري: ځانګړو افغان ځواکونو په غرني کې ۹ وسله وال طالبان وژلي

د غزني د والي ویاند محمد عارف نوري

د غزني ولايت چارواکي وايي، په ګیلان ولسوالۍ کې ځيني وسله وال وژل شوي او څو تنه يې نيول شوي دي.

د والي ویاند محمد عارف نوري پرون ناوخته ازادي راډیو ته وویل:

"د ځانګړو افغان ځواکونو په عملیاتو کې ۹ تنه وسله وال طالبان وژل شوي او ۸ تنه نور یې له وسلو او مهماتو سره یوځای نیول شوي دي."

ښاغلى نوري وايي، په دغو عملياتو کې د وسله والو طالبانو ۲۲ عرادې بېلابېل ډوله نقلیه وسایط هم له منځه وړل شوي دي.

ذبيح الله مجاهد چې ځان د وسله والو طالبانو وياند معرفي کوي، د بريد خبر مني، خو وايي چې امنيتي ځواکونو ملکيان وژلي دي.

ترکیه: د افغان-ترک ښوونځي د ترکيې د پوهنې وزارت چوکاټ ته انتقالېږي

ارشیف، په جوزجان ولایت کې د افغان-ترک د یوه ښوونځي زده کوونکي

د ترکيې د پوهنې وزارت يو چارواکى وايي، په افغانستان کې د افغان-ترک ټول ښوونځي د ترکيې د پوهنې وزارت چوکاټ ته انتقالېږي.

د ترکيې د پوهنې وزارت معين ريها ديني ميچ پرون په کابل کې يوه کنفرانس ته وويل، په دې اړه دوه مياشتې مخکې له افغان حکومت سره يو تفاهم شوى دى.

ده زیاته کړه:

"له افغان حکومت سره د تفاهم له مخې ١٢ افغان-ترک ښوونځي د ترکيې د پوهنې وزارت چوکاټ ته انتقالېږي، تر دې شېبې پورې ٧ ښوونځي انتقال شوي، پاتې ٥ ښوونځي به هم د پوهنې وزارت چوکاټ ته ولېږدول شي."

په افغانستان کې د افغان- ترک ښوونځيو فعاليت ٢٢ کاله مخکې پيل شو چې په جوزجان، بلخ، کابل، کندهار، هرات او ننګرهار کې د دغو ښوونځيو شمېر ١٢ ته رسېږي.

افغان- ترک ښوونځي په امريکا کې مېشت د مذهبي مشر فتح الله ګولن له خوا اداره کېدل چې په ترکيه کې د ٢٠١٦ م کال د کودتا د ناکامې هڅې په تنظيم تورن شوى دى.

د بلخ پوليس د سلواغې یا دلوې په څلورمه په مزار شريف کې پر افغان-ترک ښوونځيو چاپه اچولې وه، ځيني شااوخوا سل تنه زده کوونکي، ښوونکي او د ښوونځي خدمت کوونکي يې نيولي وو.

په سلواغې مياشت کې په هرات کې د افغان-ترک ښوونځيو اداره د ترکيې د پوهنې بنسټ ته وسپارل شوه.

د سولې ولسي حرکت نن په هلمند کې لاريون کوي

ارشیف، د سولې د ولسي حرکت غړي

د سولې ولسي حرکت وايي، په پام کې لري چې نن يکشنبه په هلمند کې د سولې او اوربند په ملاتړ لاريون وکړي.

دغه حرکت پرون په ننګرهار، تر هغه مخکې په خوست او غزني کې دې ته ورته لاريونونه کړي دي.

د سولې ولسي حرکت وياند بسم الله وطندوست پرون ناوخته ازادي راډيو ته وويل:

"د يکشنبې په ورځ په هلمند کې لاريون لرو، د لاريون پر مهال د جګړې پر ښکېلو اړخونو غږ کوو چې نور بايد ژر تر ژره اوربند اعلان شي، يوې سولې او روغې جوړې ته ورسېږو."

د سولې ولسي حرکت په لاريونو کې د حکومت له خوا د خالد پوځي عمليات او د طالبانو له خوا د الفتح په نوم پسرلني عمليات غندل شوي دي.

وسله والو طالبانو د الفتح په نوم د خپلو پسرلنيو عملياتو د پيل اعلان کړى دى.

د سولې ولسي حرکت وايي، په نورو ولايتونو کې به هم د سولې او اوربند په ملاتړ لاريون وکړي.

چارواکي: په میدان وردګ، غزني او خوست کې ۴۵ وسله وال مخالفان وژل شوي

ارشیف، افغان ځواکونه د پوځي عملیاتو په حال کې

د افغان ملي اردو د ۲۰۳ تندر قول اردو قوماندانۍ وایي، په میدان وردګ، غزني او خوست کې یې ۴۵ تنه د دولت وسله وال مخالفان وژلي دي.

د دې قوماندانۍ مطبوعاتي دفتر د شنبې په ورځ په یوې خبرپانې کې وویل، د میدان وردګ ولایت د نرخ ولسوالۍ د صدمرده په سیمه کې د افغان امنیتي ځواکونو په عملیاتو کې د دې ولسوالۍ لپاره د طالبانو د کمېسیون رئیس مولوي حبیب الله په ګډون ۵ تنه وسله وال وژل شوي دي.

ملي اردو همدارنګه زیاتوي چې افغان امنیتي ځواکونو د غزني ولایت د ګیرو ولسوالۍ د پناه په سیمه کې د دولت وسله والو مخالفینو ۱۶ تنه او د اب بند ولسوالۍ د خدوخېلو په سیمه او د غزني ښار اړوند نوغې په سیمه کې ۱۴ تنه وسله وال وژل شوي او ۷ نور یې ټپیان کړي دي.

په خبرپاڼه کې د خوست ولایت په نادرشاه کوټ ولسوالۍ کې د چاڼیزو عملیاتو یادونه شوې او په ترڅ کې یې د ۲ تنو وسله والو مخالفینو د وژل کېدو ویل شوي دي.

خو د میدان وردګ ولایت د نرخ ولسوالۍ د صد مردې کلي ځینو اوسېدونکو ازادي راډیو ته ټیليفوني تماسونو کې ادعا کړې چې دغلته د تېرې شپې عملیاتو کې د یوې ښځې او درې ماشومانو په شمول ولسي خلکو ته مرګ ژوبله اوښتې ده.

د طالبانو ویاند ذبیح الله مجاهد هم ادعا کړې چې په نرخ ولسوالۍ کې د ښځو او ماشومانو په شمول ملکيان په نښه شوي دي.

خو د میدان وردګ د والي ویاند مجیب الله شریفزي ازادي راډیو ته وویل، کشفي ادارو د ولسي خلکو د مرګ ژوبلې راپور نه دی ورکړی او په وینا یې چې دغلته د طالبانو یو ځايي قوماندان حبیب الله له څلورو نورو وسله والو سره وژل شوي دي.

ملي اردو خپل لورې ته اوښتې مرګ ژوبلې په اړه څه نه دي ویلي، او په خپلواکه توګه یې ددې ادعاوو سپیناوی ستونزمن دی.

چارواکي: په زابل کې په هوايي بریدونو کې ۲۵ وسله وال طالبان وژل شوي

په زابل کې چارواکي وايي، تېره شپه د نوبهار ولسوالۍ په څپلې غره او شهاب سیمو کې د نړیوالو ځواکونو په هوايي بریدونو کې ۲۵ وسله وال طالبان وژل شوي دي.

د زابل د والي وياند ګل اسلام سيال ازادي راډيو ته وويل، په وژل شویو کې بهرني اتباع هم شامل دي.

ده وویل:

"د بهرنیو ترهګرو په شمول چې د بېلابېلو هېوادونو اتباع په کې شامل دي، ۲۵ وسله وال طالبان وژل شوي دي."

د ښاغلي سیال په وینا، دې عملیاتو کې اووه وسله وال ټپیان شوي هم دي.

طالب وسله والو تر اوسه د حکومتي لوري د دې ادعا په اړه څه نه دي ویلي.

تر دې مخکې په کندهار کې د ۲۰۵ اتل قل اردو مطبوعاتي دفتر په یوې خبرپاڼې کې ویلي وو چې په زابل او ارزګان کې یې د عملیاتو پر مهال ۸ وسله وال وژلي دي.

په خبرپاڼه کې ویل شوي چې دا عملیات د جمعې د ورځې راهېسې د زابل په نوبهار او د ارزګان په مرکز ترینکوټ کې شوي دي.

ملي اردو خپل لوري ته د اوښتو تلفاتو په اړه څه نه دي ویلي.

۵ ولايتونو کې د نشه‌يي موادو د قاچاق په تور ۱۴تنه ونيول شول

ارشیف، په بغلان کې د پولیسو له‌خوا نیول شي چرس او تریاک,16 Nov 2018

په پنځو ولايتونو کې د نشه‌يي موادو د قاچاقو او خرڅلاو په تور ۱۴​تنه ونيول شول.

د کورنيو چارو وزارت په خبرپاڼه کې راغلي چې له نشه‌يي موادو سره د مبارزې ځانګړو پوليسو په کابل، کندهار، ننګرهار، هرات او تخار ولايتونو کې د نظامي عملياتو په نتيجه کې د نشه‌يي موادو ۱۴ قاچاق کوونکي او خرڅوونکي نيولي چې له دوی سره ۶۵ کېلو ګرامه نشه‌يي مواد لکه شيشه، هيروئين، ترياک او چرس هم د پوليسو لاس ته ورغلي دي.

د يادونې وړ ده چې په‌دې وروستيو وختونو کې د نشه‌يي موادو د قاچاق کوونکو او خرڅوونکو د نيولو لپاره د ځانګړو پولیسو عمليات ډېر شوي دي.

په هلمند کې تر زر کېلو ګرامو ډېر نشه‌يي مواد ونيول شول

د ګرمسېر ولسوالۍ

په هلمند ولايت کې تر زر کېلو ګرامو ډېر نشه‌يي مواد ونيول شول.

په هغه خبرپاڼه کې چې د هلمند امنيه قوماندانۍ له‌خوا خپره شوې راغلي چې د هلمند ولايت له نشه‌يي موادو سره د مبارزې ځانګړو پولیسو په ګرمسېر ولسوالۍ کې د نظامي عملياتو په نتيجه کې ۱۲۱۸ کېلوګرامه چرس ونيول.

دا چرس په دوو موټرو کې پټ کړل شوي او په پام کې وه چې د دې ولايت شمالي ولسواليو ته يې قاچاق کړي.

د يادولو وړ ده چې په‌دې تور درې تنه له وسلو سره نيول شوي دي.

سعودي عربستان ته د نشه‌يي موادو د قاچاقو مخه ونيول شوه

د سعودي عربستان بیرغ

سعودي عربستان ته تر لسو کېلو ګرامو ډېرو نشه‌يي موادو د قاچاقو مخه ونيول شوه.

د کورنيو چارو وزارت په خبرپاڼه کې راغلي چې ۱۴ کېلوګرامه هيروئين چې د ځان وچولو دسمال او رویجايي کې رانغاړل شوي وو او په پام کې وه چې د حامد کرزي هوايي ډګر له لارې يې سعودي عربستان ته قاچاق کړي، د سرحدي پوليسو له‌خوا ونيول شول.

په‌دې تور څلور تنه نيول شوي او د نورو څېړنو لپاره له نشه‌يي موادو سره د مبارزې عدلي او قضايي مرکز ته سپارل شوي دي.

د مبارزې عدلي او قضايي مرکز ته ۲۳ تنه تورن کسان وسپارل شول

له نشه‌يي موادو سره د مبارزې عدلي او قضايي مرکز وياند خالد مؤحد

له نشه‌يي موادو سره د مبارزې عدلي او قضايي مرکز ته ۲۳ تنه تورن کسان وسپارل شول.

له نشه‌يي موادو سره د مبارزې عدلي او قضايي مرکز وياند خالد مؤحد ازادي راډيو ته وويل، دا ۲۳ تنه تورن کسان چې د ۲۲ قاچاقي پېښو په تړاو نيول شوي، سل کېلوګرامه نشه‌يي مواد هم ورسره نيول شوي دي.

ښاغلی مؤحد زياتوي چې دې مرکز په تېره اوونۍ کې د څو تورنو کسانو دوسيې څېړلې او پر څو تورنو کسانو د محکمو له‌خوا حکمونه هم صادر شوي دي.

په‌دې ۲۳ کسانو کې څلورو يې غوښتل چې له حامد کرزي هوايي ډګره هند ته چرس او هيروئين قاچاق کړي.

نور راوښيه

XS
SM
MD
LG